ۆيتسە-مينيستر امبۋلاتورلىق جانە ستاتسيونارلىق ەمدەۋگە 165 ادام جىبەرىلگەنىن جانە ءتۇرلى دارەجەدەگى جاراقاتپەن رەانيماتسيالىق ءبولىمشەلەردە 15 ادام جاتقانىن ءمالىمدەدى. بەلگىلى بولعانداي, جاراقاتتانعان تۇرعىنداردىڭ كوپشىلىگىنە شىمكەنتتەگى وبلىستىق كلينيكالىق جانە وبلىستىق بالالار اۋرۋحاناسىندا ءتيىستى كومەك كورسەتىلىپ جاتىر. جاراقات العاندارعا كومەكتەسۋگە تۇركىستان وبلىسىنداعى ورتالىق اۋرۋحانالار دا جۇمىلدىرىلىپتى.
– مەديتسينالىق كومەكتى كۇشەيتۋ ماقساتىندا ارىس, تۇركىستان, كەنتاۋ جانە شىمكەنت قالالارى مەن ورداباسى اۋدانىنان 22 جەدەل مەديتسينالىق جاردەم بريگاداسى تارتىلىپ وتىر. قوسىمشا 4 بريگادا جامبىل وبلىسىنان ءجىبەرىلدى. بۇدان بولەك تاعى 12 بريگادا جامبىل جانە قىزىلوردا وبلىستارىندا دايىن تۇر. ەمدەلۋشىلەردى كونسۋلتاتسيالىق كومەكپەن قامتۋ ءۇشىن الماتى جانە شىمكەنتتەن قۇرامىندا رەانيماتولوگتار, تراۆماتولوگتار, بالالار رەانيماتولوگتارى جانە نەيروحيرۋرگتەردەن جاساقتالعان بريگادا سانيتارلىق اۆياتسيامەن اتتاندى, – دەيدى و.ابىشەۆ.
ۆەدومستۆو وكىلى قازىرگى ۋاقىتتا اۋىر حالدەگى بارلىق ەمدەلۋشىگە كومەك كورسەتىلگەنىن, سونىمەن قوسا ءبىر ادامعا وتا وقيعا ورنىندا جاسالعانىن جەتكىزدى. سونداي-اق شۇعىل تاسىمالداۋ بويىنشا قيىندىق تۋدىرماس ءۇشىن سانيتارلىق اۆياتسيانىڭ 2 تىكۇشاعى ءازىر ەكەنىن ايتتى. اتالعان اۋە تەحنيكاسى بارلىق مەديتسينالىق قوندىرعىمەن جاراقتالعانىن ناقتىلادى ۆيتسە-مينيستر.
ال ىشكى ىستەر ءمينيسترىنىڭ ورىنباسارى يۋري يلين, 25 ماۋسىمداعى جاعدايعا سايكەس اسكەري بولىمشەنىڭ اۋماعىندا جارىلىس تىركەلمەگەنىن اتاپ ءوتتى.
– ىشكى ىستەر مينيسترلىگىنىڭ 1200-دەن اسا ادامنان تۇراتىن قۇرامى جانە 180-نەن استام تەحنيكاسى وقيعا ورنىندا كەزەكشىلىك اتقارۋدا. ۇزىن سانى 45 ءورت اۋىزدىقتالدى. ونىڭ ىشىندە 21 فاكتى جەكە تۇرعىن ءۇيدىڭ اۋماعىندا بولسا, 9 دەرەك بويىنشا شارۋاشىلىق قورا-جايلار ورتەنگەنى انىقتالدى. تاعى 15 وقيعا دالالىق ايماقتا سناريادتار مەن وق-دارىلەردىڭ جارىقشاعىنان پايدا بولعان.
تۇركىستان وبلىستىق ىشكى ىستەر دەپارتامەنتى جانە رەسپۋبليكالىق ۇلان ساربازدارىنىڭ كۇشىمەن بۇزاقىلىق ارەكەتتىڭ الدىن الۋدا كەزەكشىلىك ۇيىمداستىرىلدى. ناتيجەسىندە وتكەن تاۋلىكتە ءۇش ادام ۇستالدى. بۇزاقىلىق بويىنشا ەكى دەرەك تىركەلدى. قازىرگى تاڭدا قورعانىس مينيسترلىگى ۇشقىشسىز باسقارىلاتىن اپپاراتتاردىڭ كومەگىمەن قاۋىپتى ايماقتا بارلاۋ جۇمىستارىن جۇرگىزىپ جاتىر. وق-ءدارى قويماسىنىڭ اۋماعىندا تۇتانۋى ىقتيمال 9 وشاق تابىلعان. دەمەك, جارىلىستىڭ قايتالانۋ قاۋپى ءالى بار. بىراق العاشقىداي اۋقىمدى جارىلىس بولمايدى دەپ سەنىممەن ايتۋعا بولادى, – دەدى يۋ.يلين.
ىشكى ىستەر ءمينيسترىنىڭ ورىنباسارى, قالانى جارىلماعان وق-دارىلەردەن تازارتۋ ءۇشىن ساپەرلەر جۇمىلدىرىلعانىن ايتتى. ءجۇز ادامنان اساتىن ينجەنەرلىك جاساق ءتيىستى تەمىر جولدىڭ بويىندا, قالانىڭ ىشىندە جانە اسكەري بولىمشەنىڭ ماڭىندا جۇمىس ىستەۋدە.
«مينادان تازارتۋ جۇمىستارى اياقتالعاننان كەيىن تۇرعىنداردى ۇيلەرىنە قايتارامىز. ماتەريالدىق شىعىندى ەسەپتەيتىن كوميسسيا قۇرىلادى. ۇكىمەت باسشىسى بەكىتكەن ارنايى جۇمىس توبىنىڭ باسىندا پرەمەر-ءمينيستردىڭ ورىنباسارى جەڭىس قاسىمبەك تۇر. ارنايى توپ اكىمدىكتەرمەن جانە قۇرىلىس كومپانيالارىمەن بىرلەسىپ جەكە ۇيلەر مەن ينفراقۇرىلىمعا كەلگەن ماتەريالدىق زارداپتى تولىق ەسەپتەيدى. ودان كەيىن قالپىنا كەلتىرۋ جۇمىستارى جاسالادى», دەدى ۆيتسە-مينيستر.
«مەملەكەت باسشىسىنىڭ تاپسىرماسىمەن ۇكىمەتتىڭ رەزەرۆىنەن ارنايى قاراجات بولىنەدى», دەدى يۋ.يلين. مينيستر ورىنباسارىنىڭ ايتۋىنشا, مەملەكەت باسشىسى 2-3 كۇندە مينادان تازارتۋ جانە قالپىنا كەلتىرۋ جۇمىستارىن اياقتاۋدى تاپسىرعان.
ىشكى ىستەر مينيسترلىگى وكىلىنىڭ پىكىرىنشە, جەرگىلىكتى اپاتتان كەيىن حالىقتى ەۆاكۋاتسيالاۋ ءۇشىن قوعامدىق كولىكتەردى جۇمىلدىرعان ەكەن. ارتىنشا جاقىن ماڭايداعى ەلدى مەكەندەردەن دە كولىكتەر الدىرىلعان. كەي ازاماتتار وزدەرىنىڭ جەكە كولىكتەرىمەن دە جەرلەستەرىنە كومەكتەسكەن.
باۋىرجان مۇقان,
جاقسىلىق مۇراتقالي,
«Egemen Qazaqstan»
