«Go Viral – بۇل اقش-تىڭ ورتالىق ازياداعى يننوۆاتسيانى, كاسىپكەرلىكتى جانە ەكونوميكالىق مۇمكىندىكتەردى كەڭەيتۋدى, سونداي-اق ءوڭىردىڭ جاھاندىق ەكونوميكامەن بايلانىسىن جاقسارتۋدى قولدايتىنىنىڭ كوپتەگەن مىسالىنىڭ ءبىرى», دەپ اتاپ ءوتتى اقش-تىڭ قازاقستانداعى ەلشىسى ۋيليام موزەر ءباسپاسوز ءماسليحاتىندا. فەستيۆال شىمىلدىعى قبتۋ رەكتورى كەنجەبەك يبراشەۆ پەن اقش-تىڭ الماتىداعى باس كونسۋلى ەريك مايەرمەن جانە قازاقستان سىرتقى ىستەر مينيسترلىگىنىڭ الماتىداعى وكىلدىگىنىڭ باسشىسى ەرلان ىسقاقوۆپەن بىرگە سالتاناتتى تۇردە اشىلدى. اقش-تان, ورتالىق ازيا مەن شىعىس ەۋروپادان كەلگەن جەتەكشى ترەندسەتتەرلەر بيزنەس, كوممۋنيكاتسيا سالاسىندا جاھاندىق اۋديتوريامەن ءوزارا ءىس-قيمىل جاساۋ تۋرالى اقپاراتتارىمەن ءبولىستى. بۇل سالالىق كەڭىستىكتىڭ سوڭعى جاڭالىقتارىنان حاباردار ەتىپ, ءوزارا تاجىريبە الماسۋعا مۇمكىندىك بەرەدى.
كىم بولعىڭىز كەلەدى؟ ماقساتىڭىز قانداي؟ مۇراتقا جەتۋ جولىندا نە نارسەگە نازار اۋدارۋىڭىز ءتيىس؟ ستەنفورد ۋنيۆەرسيتەتىنىڭ ومىرلىك ديزاين باعدارلاماسىنىڭ لەكتورى دجون ارمسترونگ العاشقىلاردىڭ ءبىرى بولىپ وسى سۇراقتارعا جاۋاپ بەردى. كوپ جىلدان بەرى ستۋدەنتتەرگە ءبىلىم بەرۋ, مانساپتىق جانە جەكە دامۋ جولدارىن تاڭداۋعا كومەكتەسەتىن ءارتۇرلى كۋرستاردى وقىتىپ جۇرگەن ماماننىڭ ايتۋىنشا, كەز كەلگەن ومىرلىك ماسەلەلەرگە جاۋاپ ىزدەۋدە ديزاين-ويلاۋ ادىستەرىن ۇتىمدى قولدانا بىلگەن دۇرىس. دجون قاتىسۋشىلارعا «ءومىر – ءومىر سۇرۋگە تاتيتىن شىعارماشىلىقتى قىزىق دۇنيە» دەگەن ۇراندى ورتاعا تاستادى. ال ياروسلاۆ حاليۋلين VR جانە AR تەحنولوگيالارى كەمەلىنە جەتكەن كۇندەرى, ارقايسىسى وسى سالادا ءوز ورنىن تابا الاتىنىن ايتادى. مىسالى, جوبالاۋشى نەمەسە قۇرىلىسشى زاماناۋي تەحنولوگيالار بويىنشا وقىتۋ ارقىلى جۇمىس ساپاسىن جاقسارتسا, قۇرىلىستىڭ الدىن الا كەمشىلىكتەرىن تابۋ الداعى جۇمىستى جەڭىلدەتىپ قانا قويمايدى, ۋاقىت ۇنەمدەلىپ, ساپاسى جاقسارا تۇسپەك.
سونداي-اق پانەلدىك سەسسيا وتىرىستارى مەديا, مادەنيەت سالاسى جۇلدىزدارىنىڭ قاتىسۋىمەن ۇزدىك حالىقارالىق تاجىريبە مەن نارىقتىق جوسپارلاۋ, كەيىنگى جاڭاشىلدىقتار, جاساندى ينتەللەكت سالاسىنداعى ترەندتەر, XXI عاسىرداعى كينو ميسسياسى تاقىرىپتارى تالقىلاندى. سۋرەتشى, ماسساچۋسەتس شتاتىنىڭ ونەر جانە ديزاين كوللەدجىنىڭ پروفەسسورى ەلاين بۋكحولتس جارىقتىڭ كەڭىستىكتىك نىساندارمەن, ءمۇسىن جانە ارحيتەكتۋرامەن قارىم-قاتىناسى تۋرالى زەرتتەۋلەرىمەن ءبولىستى. «سۋرەتتەردىڭ جىلجىمالى ءتۇسى ونەردە جاڭا تاجىريبە بەرەدى. جارىق پەن ءتۇس گامماسىن وزگەرتۋ قابىلداۋدىڭ باسقا پريزماسى ارقىلى وزگەشە كورۋگە مۇمكىندىك بەرەدى. الەمدىك دۇنيەتانىم شەكاراسىن كەڭەيتۋگە اسەر ەتەدى», دەگەن ەلاين بۋكحولتس ساحنادا جارىقتى ويناتۋ ارقىلى اۆتورلىق پەرفورمانس كورسەتتى.
بۇدان بولەك Next Notes – قازاقستان مۋزىكانتتارى قاۋىمداستىعى اۆتورلىق اندەردى جازۋ مەن ىنتىماقتاستىقتى دامىتۋ بويىنشا ءدارىس وتكىزسە, تاجىكستاندىق جازۋشى انيسا سابيري ورتالىق ازيا ايماعىنداعى ايەل جازۋشىلاردىڭ جاعدايى تۋراسىندا بايانداما جاسادى. سونداي-اق, فەستيۆال اياسىندا قازاقستان, رەسەي, اقش جانە ەۋروپانىڭ ادەبي جۋرنالدارىندا جاريالانىپ جۇرگەن اقىن, اقش ۇلتتىق ونەر قورىنىڭ الەمدىك ونەردەگى جوعارى جەتىستىكتەردى قولدايتىن ارنايى قوس گرانتى مەن Käpylä Translation Prize (UCONN) سىيلىعىنىڭ يەگەرى ايگەرىم ءتاجىنىڭ «بۋماجنايا كوجا/Paper-Thin Skin» (Zephyr Press, اقش, 2019) اتتى ولەڭدەر جيناعىنىڭ تۇساۋكەسەرى ءوتتى. قوعامنىڭ شىعارماشىلىق بەلسەندىلىگى تۇلعانىڭ, بيزنەستىڭ جانە تۇتاستاي مەملەكەتتىڭ ماڭىزدى جەتىستىگى رەتىندە ءوزارا باسەكەلەستىك ارتىقشىلىعىن ارتتىرۋعا ۇندەيتىن باسقوسۋ مادەني جانە الەۋمەتتىك-ەكونوميكالىق دامۋدى ىقپالداستىرۋعا شاقىرادى. وسىلايشا, قازىرگى زامانعى مادەني كەڭىستىكتىڭ بىرەگەي الاڭىنا اينالعان GoViral حالىقارالىق فەستيۆالى زاماناۋي كوزقاراس ارقىلى جاڭا الەۋمەتتىك-مادەني ورتانى قالىپتاستىرۋدىڭ كەزەكتى مارتە وزىق ۇلگىسىن كورسەتىپ بەردى.
