القالى جيىنعا نۇر-سۇلتان, الماتى جانە شىمكەنت قالالارى, وبلىستار اكىمدىكتەرىنىڭ, سونداي-اق ۇكىمەتتىك ەمەس ۇيىمدار, ءىت-كومپانيالار مەن بۇقارالىق اقپارات قۇرالدارىنىڭ وكىلدەرى قاتىستى.
الدىمەن اقپارات جانە قوعامدىق دامۋ ءمينيسترى ءداۋرەن اباەۆ ءسوز الىپ, بۇل سەمينار-كەڭەس مەملەكەتتىك ورگانداردىڭ اشىقتىعىنا جانە بيلىك پەن قوعام اراسىنداعى ديالوگتى نىعايتۋعا ارنالعانىن ايتتى. مينيستر جاقىندا وتكەن ازاماتتىق فورۋمدا ەلىمىزدىڭ تۇڭعىش پرەزيدەنتى حالىقپەن كەرى بايلانىس ورناتۋدىڭ جاڭا فورماتتارىن ىزدەستىرۋدى تاپسىرعانىن ەسكە سالىپ, بۇل باعىتتا ءتيىمدى جۇمىس ءىستەۋ ءۇشىن بىلىكتى ساراپشىلاردى, ازاماتتىق قوعام مەن باق وكىلدەرىن بارىنشا جۇمىلدىرۋ كەرەكتىگىن اتاپ ءوتتى.
– كەرى بايلانىستى كۇشەيتۋدە ءبىز باعدارلايتىن ءۇش پوستۋلات – بارىنشا قامتۋ, اشىقتىق جانە جەدەل ارەكەت ەتۋ. بۇگىندە ەلىمىزدىڭ وڭىرلەرىندە وسى باعىتتا ناتيجەلى جۇمىستار اتقارىلىپ, وڭ تاجىريبەلەر جيناقتالدى. بۇل رەتتە open akimat, Ikomek, «حالىقتىق باقىلاۋ» جانە تاعى بىرقاتار جوبانى اتاۋعا بولادى. بۇلاردى ىسكە اسىرۋعا حالىقتىڭ جاپپاي گادجەت قولدانۋى, ينتەرنەت اياسىنىڭ كەڭەيۋى, بارلىق سالالاردىڭ تسيفرلانۋى سەپتىگىن تيگىزدى. قازىر ءاربىر وبلىس اكىمدىگىنىڭ الەۋمەتتىك جەلىلەردە پاراقشالارى بار, وندا ادامدار وزدەرىنىڭ تالاپ-تىلەكتەرىن قالدىرادى. ارينە, اشىقتىق پەن جەدەلدىكتىڭ ءار ايماقتا كورسەتكىشى ءارتۇرلى, دەگەنمەن بارلىق ءوڭىر وسى جۇمىستىڭ ماڭىزدىلىعىن ءتۇسىنىپ, ونىڭ تيىمدىلىگىن ارتتىرۋدى كوزدەيدى. جالپى, مۇنداي تاجىريبە الەۋمەتتىك شيەلەنىستى ورشىتپەۋگە اجەپتاۋىر ىقپال ەتەتىنىن مويىنداماسقا لاجىڭ جوق. سوندىقتان بۇل جيىننىڭ سەسسيالارىنىڭ ءبىرىن ءىت-تەحنولوگيالاردى قولدانۋ تاقىرىبىنا ارنادىق, – دەدى د.اباەۆ.
بۇعان قوسا مينيستر اقپاراتقا قولجەتىمدىلىك تۋرالى زاڭدى ىسكە اسىرۋ تۋرالى ءسوز قوزعادى. ونىڭ ايتۋىنشا, بۇل تەك مەملەكەتتىك ورگاندار مەن كومپانيالاردى عانا ەمەس, بيۋدجەت قاراجاتىن الاتىن بارلىق كۆازيمەملەكەتتىك سەكتور مەن جەكە ۇيىمداردى قامتيدى. سونداي-اق باق تۋرالى زاڭدا العاش رەت ءباسپاسوز حاتشىلارىنىڭ مارتەبەسى كورسەتىلىپتى جانە ولاردىڭ دەڭگەيىن دەپارتامەنت ديرەكتورىنا دەيىن كوتەرۋ بويىنشا جۇمىس جۇرگىزىلىپ جاتىر ەكەن.
رەسپۋبليكالىق سەمينار-كەڭەس 4 باعىت بويىنشا پانەلدىك سەسسيالارعا ءبولىندى. ونىڭ العاشقىسى «باق حالىقتان كەرى بايلانىس الۋ ارناسى رەتىندە» دەپ اتالدى. بۇل ءبولىمنىڭ مودەراتورى «Internews Kazahstan» ۇيىمىنىڭ زاڭگەرى ولگا ديدەنكو بولدى. ول ءسوز بوستاندىعى جايىندا جان-جاقتى پىكىرىن ءبىلدىرىپ, اقپارات ەركىندىگى تۋرالى زاڭ قابىلداعان ەلدەردىڭ قاتارى جىل سايىن ارتقانىن ناقتى دەرەكتەرمەن كورسەتتى. زاڭگەر بۇگىندە الەم حالقىنىڭ تەڭ جارتىسى ينتەرنەت پايدالاناتىنىنا توقتالىپ, سوعان سايكەس مەديا-كونتەنتكە قولجەتىمدىلىك تە كەڭەيگەنىن ايتتى.
ال ىشكى ىستەر ءمينيسترىنىڭ ورىنباسارى الەكسەي كالايچيدي ەلىمىزدەگى ەڭ ۇلكەن قۇقىق قورعاۋ ورگانىندا ۇلكەن رەفورما ءجۇرىپ جاتقانىن, سونىڭ ىشىندە قوعاممەن, باق-پەن بايلانىستى نىعايتاتىن جاڭا فورماتتار قاراستىرىلىپ جاتقانىن جەتكىزدى. ونىڭ ايتۋىنشا, بۇرىن ءوزارا قارىم-قاتىناس تەك باسپاسوز حاتشىلارىنىڭ ءمالىمدەمەسىمەن شەكتەلسە, بۇگىندە باسشىلاردىڭ وزدەرى كابينەتتەرىنەن شىعىپ, حالىقپەن بەتپە-بەت كەزدەسىپ جاتىر. سونىڭ ءبىر كورىنىسى – «جولدا قابىلداۋ» اكتسياسى. وسى ءىس-شارا ارقىلى ازاماتتار ايىپپۇلدارعا, جۇرگىزۋشى قۇقىنا, كوشى-قون زاڭناماسىنا قاتىستى سۇراقتارىن قويىپ, وعان تۇشىمدى جاۋاپ الا العان. جالپى جىلىنا 17 ملن مەملەكەتتىك قىزمەت كورسەتىلىپتى. سونداي-اق مينيسترلىكتىڭ اككاۋنتىنا 650 مىڭ ادام جازىلعان ەكەن.
سونىمەن قاتار «وڭتۇستىك استانا» ترك» اق باس ديرەكتورى بولات قاليانبەكوۆ كۇنىنە ينتەرنەتكە حالىقتىڭ 67%-ى كىرسە, 72%-ى تەلەديدار قارايتىنىن اتاپ, مۇنىمەن الەۋمەتتىك جەلىلەرمەن سالىستىرعاندا باق ءالى دە الەۋەتتى ەكەنىن مالىمدەدى. ءسويتىپ وزدەرى قولعا العان «اكىممەن اشىق اڭگىمە» جوباسى ءساتتى بولعانىن, حالىقپەن بايلانىستى كۇشەيتكەنىن ايتىپ بەردى. ماسەلەن, وسى جوباعا جەرگىلىكتى جۇرت ەرەكشە ىقىلاس تانىتىپ, تەلەارنا سايتى جانە WhatsApp جەلىسى ارقىلى اكىمگە مازالاعان سۇراقتارىن تىكەلەي جولداعان. ناتيجەسىندە تەلەارنانىڭ رەيتينگى جوعارىلاپ, سايتىنا كىرگەن ادامداردىڭ سانى دا كۇرت ءوسىپتى.
سونداي-اق بۇل كەلەلى كەڭەستىڭ ەكىنشى سەسسياسى جاو-نىڭ ازاماتتارمەن ءوزارا ءىس-قيمىل قۇرالدارىن قالىپتاستىرۋ كەزىندە ەرەكشە قاجەتتىلىگى بار ادامداردىڭ مۇقتاجدىقتارىن ەسكەرۋگە ارنالدى. ال ءۇشىنشى بولىمىندە كەرى بايلانىستا زاماناۋي اقپاراتتىق تەحنولوگيالاردى قولدانۋ ءجونى تالقىلانسا, سوڭىنان مەملەكەتتىك قىزمەت كورسەتۋلەردى جەتىلدىرۋ تەتىكتەرى ەگجەي-تەگجەيلى باياندالدى.
