وسىدان 30 جىل بۇرىن – 22 ماۋسىم كۇنى قازاقستان قوعامى ءبىرىنشى باسشى لاۋازىمىنا نۇرسۇلتان نازارباەۆ الدەقاشان لايىقتى بولسا دا سول كەزدەگى ورتالىق بيلىك, ياعني كوكپ باس حاتشىسى م.گورباچەۆتىڭ وينامالى ساياساتىنان كوڭىلىمىز الاڭداپ, جۇرەك تىنىش تاپپاي, «86-شى جىلداعىداي تاعى قانداي كۇتپەگەن وقيعا بولۋى مۇمكىن», دەپ ورتالىق كوميتەتكە كەلىپ ەدىك. الماتى قالاسىندا تاڭەرتەڭ ازداپ جىلى جاڭبىر جاۋىپ, كۇن جادىراپ شىققان. ونى جاقسىلىققا جورىدىق...
پلەنۋم اشىلىپ, مىنبەگە ماسكەۋدەگى وداقتىق ورتالىقتىڭ وكىلى – كوكپ ورتالىق كوميتەتى ساياسي بيۋروسىنىڭ ءمۇشەسى, كوكپ وك-نىڭ حاتشىسى ۆ.م.چەبريكوۆ كوتەرىلگەندە, «نە ايتار ەكەن؟» دەپ, زال سىلتىدەي تىندى. ماسكەۋ وكىلىنىڭ اۋزىنان «نۇرسۇلتان نازارباەۆ» دەگەن ءسوز شىققاندا زالدا وتىرعان بەس ءجۇز ادام جىلى قارسى الىپ, ۇزاق قول سوعىپ, قولداۋ كورسەتىپ ەدى.
ءدال وسى كۇنى قازاقستان كومپارتياسى ورتالىق كوميتەتىنىڭ حV پلەنۋمى وتكىزىلىپ, وسىعان دەيىن قازاق كسر-ءى مينيسترلەر كەڭەسى توراعاسى قىزمەتىن اتقارعان نۇرسۇلتان ءابىش ۇلى نازارباەۆ كوپ تىلەۋى كول بولىپ, قازاقستان كومپارتياسى ورتالىق كوميتەتىنىڭ ءبىرىنشى حاتشىسى بولىپ سايلاندى.
سول كۇننەن باستاپ قازاقستان باسشىسىنىڭ رەسپۋبليكا جۇرتشىلىعىنىڭ مۇددەسىندەگى ءاربىر ءسوزى, ءاربىر باستاماسى قالىڭ ەلدىڭ كوڭىلىنەن شىعىپ, ماسكەۋدەگى ورتالىق بيلىك ءبىزدىڭ باسشىمىزبەن ساناساتىن بولىپ, ەڭسەمىز كوتەرىلە باستادى.
وسىلايشا قازاقستاننىڭ جاڭا ءداۋىرى باستالىپ ەدى...
نۇرسۇلتان ءابىش ۇلى بىردەن وداقتىق ينستيتۋتتاردىڭ ەسكىرگەنىن, زامان تالابىنان قالىپ قويعانىن, اسىرەسە ەكونوميكا, ۇلت, باسقارۋشى اپپارات, كادر ماسەلەلەرىنىڭ شامادان تىس ورتالىقتانىپ كەتكەنىن, كوپتەگەن ءادىس-تاسىلدەردىڭ, كەيبىر شەشىمدەردىڭ ءادىلەتسىزدىگىن, قاۋلى, قارارلاردىڭ جارامسىزدىعىن وداقتىق مارتەبەلى جيىنداردىڭ ءمىنبەرىنەن اشىق, باتىل سىنعا الدى.
بىرەر مىسال: 1986 جىلعى 17-18 جەلتوقسانداعى ستۋدەنت-جاستاردىڭ شەرۋىنە بايلانىستى 1987 جىلى كوكپ ورتالىق كوميتەتى ارنايى قاۋلى قابىلداپ, سول قۇجاتتا «كازاحسكي ناتسيوناليزم» دەپ باعا بەرگەن. نۇرسۇلتان ءابىش ۇلى وسى قاۋلىنىڭ ادىلەتسىزدىگىن دالەلدەپ, الدەنەشە رەت ساياسي بيۋرودا كوتەرىپ ءجۇرىپ, قاۋلىنىڭ كۇشىن جويعىزدى. بۇل بيلەۋشى كومپارتيا تاريحىندا بۇرىن-سوڭدى بولماعان وقيعا ەدى.
ءبىرىنشى حاتشى بولىپ سايلانىسىمەن ءبىر ايدان كەيىن قاراعاندىداعى شاحتەرلەر ەرەۋىلىن توقتاتىپ, ولاردىڭ تالاپ-تىلەكتەرىن شەشۋ جولدارىن بەلگىلەدى.
ۇلى وتان سوعىسىنداعى ەڭبەگى, ەرلىگى قازاق شەڭبەرىنەن الىسقا شىعىپ جۇرسە دە لايىقتى باعاسىن الا الماعان باۋىرجان مومىش ۇلىنا كەڭەس وداعىنىڭ باتىرى اتاعىن بەرگىزدى.
مەملەكەتتىك باسقارۋدى جاڭعىرتىپ, رەسپۋبليكا پرەزيدەنتى لاۋازىمىن كىرگىزدى. سەمەيدەگى يادرولىق پوليگوندى جاپتى.
كوسمودروم قازاق جەرىندە بولسا دا عارىشكەرلەرى بولماعان ەلدىڭ ەكى ۇلانى – توقتار اۋباكىروۆ پەن تالعات مۇساباەۆتى عارىشقا ۇشىردى.
دۇنيە ءجۇزى قازاقتارىنىڭ تۇڭعىش قۇرىلتايىن وتكىزىپ, تاۋەلسىزدىك جىلدارى 1 ميلليوننان استام وتانداسىمىزدىڭ قازاقستانعا كەلۋىنە ەسىك اشىپ, جاعداي تۋعىزدى.
وسى سياقتى ەلىمىزدىڭ ءمارتەبەسىن كوتەرەرلىك عاسىرلار بويى ارمان بولعان تاۋەلسىزدىك جەڭىستەرىنە تۇڭعىش پرەزيدەنتىمىز – ەلباسى باستاماشى بولدى.
ەلباسى نۇرسۇلتان نازارباەۆتىڭ مەملەكەت قايراتكەرى دەڭگەيىندەگى قىزمەتى حالقىمىزدىڭ ءداستۇرى مەن داڭقىن اسىرار ۇلى دالا كەڭىستىگىندەگى ابىزدىقتىڭ داڭعىل جولىنا ۇلاستى.
قۋانىش سۇلتانوۆ,
پارلامەنت ءماجىلىسىنىڭ دەپۋتاتى
