تۇعىرى بيىك تارباعاتاي

كورىپ جۇرگەن دالاڭىز –

اقسۋاتتىڭ دالاسى،

كورىپ جۇرگەن اۋاڭىز –

اقسۋاتتىڭ اۋاسى.

كورىپ جۇرگەن تاڭىڭىز –

اقسۋاتتىڭ تاڭى دا،

كورىپ جۇرگەن شاڭىڭىز –

اقسۋاتتىڭ شاڭى دا.

الايدا مەن تاڭ قالدىم،

اقسۋاتقا باردىم دا،

نە كەرەمەت! بىلمەيمىن، ءبىر كە­رەمەت بار مۇندا، – دەپ كە­زىن­­دە اقىن قادىر مىرزا ءالى جىرعا قوسقان اقسۋاتتا، بار­قىتبەلدىڭ باۋرايىندا ءۇش كۇن بويى ءتول ونەرىمىز تورگە ورلەپ، ۇمى­تىلا باستاعان ۇلتتىق قۇن­دى­لىقتارىمىز ۇلىقتالدى.

بالۋاندار مەن بوكسشىلار باسەكەسى

ءيا، 14-16 ماۋسىم كۇندەرى تارباعاتاي اۋدانىندا «تۇعى­رى بيىك تارباعاتاي» اتتى حالىق­ارالىق سپورت جانە ونەر فەستيۆالى ءوتتى دۇركىرەپ. اۋقىمدى شارا 14 ماۋسىمدا اۋليە ىرعىزباي دوس­حانا ۇلى كەسەنەسىنە ءتاۋ ەتۋدەن باس­تالدى. بۇل كۇنى وسىندا وب­لىستىق اقساقالدار كەڭەسىنىڭ كوش­پەلى وتىرىسى مەن ءوڭىردىڭ اۋداندارىنداعى يمامداردىڭ «XXI عاسىردىڭ زياتكەر يمامى» اتتى وبلىستىق ءبىلىم سايىسى ۇيىمداستىرىلدى. وسى شاراعا ارنايى كەلگەن وبلىس اكىمى دانيال احمەتوۆ الىس-جاقىننان جەتكەن قوناقتارمەن، كوپشىلىكپەن بىرگە اسقا قاتىسىپ، وسىمەن جەتىنشى مارتە جالاۋى جەلبىرەگەن تۋرنيرگە قاتىستى وي-پىكىرىن ورتاعا سالىپ، الداعى ۋاقىتتا ءدۇبىرلى دودانىڭ اياسىن ودان ءارى كەڭەيتۋ قاجەتتىگىن ايتتى. «بىزگە وسىنداي سپورتتىق شارالار وتە قاجەت. ويتكەنى بۇل وبلىس پەن جەكەلەگەن اۋدانداردىڭ اتىن شىعارىپ قانا قويماي، جاس ۇرپاقتى وتانسۇيگىشتىككە باۋليدى. جارىسقا 30-دان استام ەلدىڭ بالۋاندارى كەلەدى دەپ ەستىدىم. بۇل – تاماشا كورسەتكىش. وسىنداي ناعىز مىقتىلاردىڭ بەلدەسۋلەرىن كورگەن بالاقايلار كەيىن وزدەرى دە سالاماتتى ءومىر سالتىن ۇستانۋعا، سپورتپەن اينا­لىسۋعا تىرىساتىنى ءسوزسىز. ەندى تارباعاتايداعى جارىستىڭ فورماتىن وزگەرتۋ كەرەك. اتالعان تۋر­نيردى دۇنيەجۇزىلىك ويىندار تۇرىندە وتكىزسە دەگەن ۇسىنىس بار. ارينە، بۇل ءۇشىن ءبىراز شارۋا تىندىرۋ قاجەت. قارجىلاندىرۋ جاعىن دا قايتا قاراۋ قاجەت شى­عار. وسى جۇمىستاردى ەڭسەرە ءبىل­سەك، ىرعىزباي دوسحانا ۇلى اتىن­داعى دودا دەڭگەيى جاعىنان بىشكەكتە وتەتىن دۇنيەجۇزىلىك كوشپەندىلەر ويىندارىنان ەش كەم تۇسپەيتىن بولادى» دەگەن ايماق باسشىسى ءوڭىردىڭ كيەلى ورىندار تىزىمىنە ەنگەن كە­سەنەنىڭ جاعدايىمەن تانىسىپ، تارباعاتاي اۋدانى اكىمىنە وسىنداعى «امانات» مۋزەيىنە جاڭا عيمارات سالىپ بەرۋدى تاپسىرىپ، تاريحي ورىنعا دەيىن اپاراتىن جولدى جوندەۋ كەرەكتىگىن ەسكەرتتى.

بيىل العاش رەت حالىقارالىق فەستيۆال دەڭگەيىنە كوتەرىلگەن شارانىڭ شىمىلدىعى 15 ماۋ­سىمدا قازاق كۇرەسىنەن وتەتىن ىر­عىز­باي دوسحانا ۇلى اتىنداعى الەم­دىك گران-پري سايىسىمەن ءتۇرىلدى. بىرەسە شاقىرايىپ، ءبى­رەسە بۇلت بۇركەگەن كۇن استىندا جان الىسىپ، جان بەرىسكەن بالۋاندار ءۇش سالماقتا بابى مەن باعىن سىنادى. جان-جاقتان ەن­تەلەگەن جۇرت اسىرەسە قازاق كۇ­رەسىن وزدەرىنىڭ ءتول سپورتىنداي مەڭگەرىپ العان گرۋزين، مولدوۆان، وزبەك جانە تاجىك بالۋاندارىنىڭ اياق الىسىن قىزىعا تاماشالادى. وسى ءتورت ەلدىڭ بالۋان­دارى سوڭعى سىندا قا­زاق با­لۋان­­دارىنا كادىمگىدەي قار­سى­لىق، قارسىلىعىڭىز نە، ءتىپتى با­سىمدىقتارىن تانىتتى. بۇعان 70 كيلودا گرۋزين جىگىتى زۆياد ودوشەشۆيليدىڭ، 80 كيلودا تاجىك سپورتشىسى حامروز رادجابونىڭ جەڭىمپاز اتانۋى دالەل بولسا كەرەك. ال اۋىر سالماقتا ەكى دۇركىن «قازاقستان بارىسى»، «الەم با­رىسى» سەكىلدى اتاعىنان ات ءۇر­كەتىن ماراپاتتارى بار ايبەك نۇعىماروۆقا گرۋزين مەن وزبەك بالۋاندارى جەڭىستى وڭايلىقپەن بەرمەدى. شىڭعىستاۋدىڭ شىمىر ۇلى جارتىلاي فينالدا گرۋ­زين گەوردجي كاتارادزەمەن بەلدەسىپ، ۇپاي سانىمەن جەڭىسكە جەتتى. ايبەكتىڭ جاۋىرىنىن ءبىر مارتە كىلەمگە تيگىزىپ، تورەشىلەر شەشىمىمەن جارتىلاي جەڭىس يە­لەنگەن كاتارادزە ورتاداعى تورە­شى قازاق بالۋانىنىڭ قولىن كوتەرگەندە باسىن شايقاپ تۇردى. سودان نە كەرەك، بۇل سالماقتىڭ فينالىندا ەكى دۇركىن «قازاقستان بارىسى» وزبەك مۇقسين حيسا­مەدينوۆپەن جۇلقىسىپ، ءسال عانا باسىمدىقپەن تۋرنير جەڭىمپازى دەپ تانىلدى.

كۇرەس اياقتالىپ، ۇتىس ويى­نى باستالار ارالىقتا وسى ءۇل­كەن شارانىڭ ۇيىمداستىرۋ­شىلارىنىڭ ءبىرى، تارباعاتاي اۋدا­نىنىڭ جانە شىعىس قازاق­ستان وبلىسىنىڭ قۇرمەتتى ازاماتى، دۇنيەجۇزىلىك قازاق كۇ­رە­سى فەدەراتسياسىنىڭ ۆيتسە-پرە­زي­دەنتى بادەلحان كامالحان­ ۇلىن سوزگە تارتتىق. «140 شا­قى­رىمدىق بايگە ەلىمىزدە بۇ­رىن-سوڭدى بولىپ كورگەن جوق. بۇگىندە ەلدىڭ ءبارى اراب، اعىلشىن جىلقىلارىنا قۇمار. ءوزىمىزدىڭ ءتول اتتارىمىز ۇمىتىلىپ بارادى. بۇرىن قازاقتىڭ ۇزاق ءجۇرىستى قازاناتتارى بولعان. 140 شاقىرىمدىق جارىستى ءوت­كىزۋدەگى ماقساتىمىز – سونى قال­پىنا كەلتىرۋ، دارىپتەۋ، ات­تىڭ توزىمدىلىگىن عانا ەمەس، ادام­داردىڭ مىقتىلىعىن دا سىناۋ، قازاقتىڭ سايىپقىران جىگىت­تەرىن انىقتاۋ. مۇنىڭ ءبارى – وسكەلەڭ ۇرپاققا ۇلكەن ءتار­بيە، ۇلگى-ونەگە. بۇكىل اۋداندار كيىز ۇيلەرىن تىگىپ جاتىر. اۋىل بىرلىگى، ەل بىرلىگى كورىنىپ جاتىر. وسى رەتتە جارعاق قۇلاعى جاستىققا تيمەي شارانىڭ جوعارى دەڭگەيدە وتۋىنە اتسالىسقان تار­­­باعاتاي اۋدانىنىڭ اكىمى سە­رىك سادۋاقاسوۆقا ەل ازاماتتارى اتىنان العىس بىلدىرەمىز»، دەي­دى كوپشىلىككە تۋعان جەرىن ارداقتاۋدىڭ ۇلگىسىن كورسەتىپ ءجۇر­­گەن ازامات.

قازاق كۇرەسىنەن تۋرنير اياق­تال­عاننان كەيىن ىمىرت ۇيىرىلە قۇمىرسقاشا قاپتاعان قاۋىم «Qazaq Promotions» كومپانياسى ۇيىمداستىرعان « ۇلى دالا باتىرلارى» كاسىپقوي بوكس كەشىن تاماشالاۋعا اقسۋات ستاديونىنا جينالدى. ءبىر قىزىعى، ءدال بوكس باستالار ساتتە كۇن كۇرت بۇزىلىپ، قاتتى داۋىل تۇرىپ، جاڭبىر ءنو­سەر­لەتە قۇيىپ، جارقىراپ تۇر­عان جارىقتىڭ ءبارى ءسونىپ، جۇرت اياق استىنان ابىر-سابىر بولدى دا قال­دى. اۋىل حالقىنىڭ كوڭىلى كەڭ، تۇرعىندار پەيىلى دارحان عوي. «قاراماي-اق جاۋىنعا، توي باس­تالدى اۋىلدا» دەگەندەي، اۋا ­رايىنىڭ قولايسىزدىعىنا ءتۇسى­نىستىكپەن قاراپ، جارىقتىڭ قوسىل­عانىن، جاڭبىردىڭ باسىل­عانىن كۇتىپ، تۇنگى ساعات ەكىگە دەيىن تىك تۇرىپ بوكس كوردى. تار­با­عاتاي اۋدانىندا تۇڭعىش رەت ۇيىمداستىرىلعان بىلعارى قول­عاپ شەبەرلەرى باسەكەسىندە ەلديار قامشىبەكوۆ، نۇرلان ساپارباي، نۇرسۇلتان امانجولوۆ سەكىلدى قازاق بوكسشىلارى شەتەلدەن كەل­گەن قارسىلاستارىمەن شارشى الاڭعا شىعىپ، ونەرلەرىن، قا­رىم-قابىلەتتەرىن پاش ەتتى. «قازاقتىڭ قان تامىرى اۋىل عوي. حالقىمىزدا «تۋعان جەرگە تۋىڭ تىك» دەگەن تاماشا ماقال بار. «باتىر بولساڭ جاۋىڭا ناي­زاڭ ءتيسىن، باي بولساڭ حالقىڭا پاي­داڭ ءتيسىن» دەگەندەي، بارىن تۋعان جەرىمەن ءبولىسىپ جۇرگەن تار­باعاتايلىق ازاماتتار ءوتىنىش جاساعاننان كەيىن اۋىلداعى ءىنى-قارىنداستارىمىز ءبىزدىڭ بوكس­شىلارىمىزدى تەلەديدار ەمەس، جانىنان، جاقىن جەردەن كورسىن، تالاپتانسىن، قاناتتانسىن دەپ ارنايى كوماندامەن كەلىپ، وسى جارىس­تى ۇيىمداستىرىپ وتىرمىز. وسى اۋداننان، وسى اۋىلدان كەلەشەكتە بىزدەن دە مىقتى جاستار شىعادى دەپ ويلايمىز. سوعان تىلەكتەسپىز»، دەيدى كەشتى ۇيىمداستىرۋعا ۇيتقى بولعان تانىمال كاسىپقوي بوكسشى قانات يسلام.

وسى كۇنى قازاق كۇرەسى مەن بوكس باسەكەلەرى ارالىعىندا جەر­­­­گىلىكتى مەتسەناتتاردىڭ قول­داۋىمەن، «ءبىز بىرگەمىز» اتتى قايىرىمدىلىق قورىنىڭ ۇيىم­­داستىرۋىمەن ۇتىس ويىنى ويناتىلدى. ۇتىسقا باعالى سىي­لىقتار مەن اۆتوكولىك تىگىلدى. اتال­عان قوردىڭ جەتەكشىسى جان­­دوس ورازعاليەۆتىڭ ايتۋىن­شا، ۇتىستان تۇسكەن قاراجات «قا­رە­كەت» قورىنا، اقجارداعى جاس­­وس­پىرىمدەر مەكتەبىنىڭ جات­تىقتىرۋشىسىنا كومەك رەتىندە اۋدارىلماق.

ەلىك جيرەن ەسكەرتكىشى، 140 شاقىرىمدىق بايگە

قازاقتىڭ تويى بايگەسىز، ايتىسسىز، ءانسىز، كۇيسىز وتكەن بە؟ 16 ماۋسىم كۇنى اقسۋاتقا اعىل­­عان تويشىل قاۋىم ات جارىسى، اقىنداردىڭ ايتىسى مەن ءان­شىلەردىڭ ونەرىن تاماشالادى.

«تۇعىرى بيىك تارباعاتاي» حالىقارالىق سپورت جانە ونەر فەستيۆالىنىڭ ءبىر ەرەك­­شە­لى­گى ەلى­­­مىزدە تۇڭعىش رەت ۇيىم­داس­تىرىلعان 140 شاقىرىم­­دىق ات بايگەسى دەر ەدىك. جىلقى جا­نۋا­رىنىڭ توزىمدىلىگى مەن شابان­دوزدىڭ شىدامدىلىعىن تارازىعا سالعان الامانعا رەسپۋبليكانىڭ تۇكپىر-تۇكپىرى مەن رەسەيدەن 100-گە تارتا جۇيرىك كەلىپتى. ولار تاڭ قىلاڭ بەرە، ساعات 4-تە تولاعاي باۋرايىنان (كوكپەكتى اۋدانى) جارىس جولىنا شىعىپ، ءتۇس اۋا ەكپىن اۋىلىنداعى اتشابارعا ارتىنىپ-تارتىنىپ جەتكەنشە وسىندا ءارتۇرلى قاشىقتىقتاعى ات بايگەسى قىزىپ جاتتى.

ەرەكشە اتاپ وتەرلىگى، ءدال وسى كۇنى الىس-جاقىننان قۇيرىق-جا­لى ءتۇيىلىپ اكەلىنگەن قىل قۇي­رىقتىلار ۇزاق شاقىرىمعا بەت العاندا كوكجىرا اۋىلىنىڭ كىرە بەرىسىنە كەزىندە تارباعاتاي، اق­سۋات ءوڭىرىنىڭ عانا ەمەس، وبلىستىڭ ابىرويىن اسقاقتاتقان جۇيرىك ەلىك جيرەنگە ەسكەرتكىش ورناتىلدى. ەسكەرتكىشتى قويعان – 1946-1968 جىلدارى اۋداندىق، وبلىستىق، رەسپۋبليكالىق ات جا­رىستاردا بىرنەشە مارتە باس بايگەنى ەنشىلەگەن سايگ ۇلىكتىڭ سوڭعى شاباندوزى امانگەلدى نۇ­ر­بەكوۆتىڭ ۇرپاقتارى. «بۇل ەس­كەرتكىشتى اكەمىز امانگەلدى نۇربەكوۆتىڭ ءوزى باستاپ كەتكەن ەدى. وكىنىشكە قاراي، اياقتاي المادى. اكە اماناتىن ۇرپاقتارى ورىنداپ جاتقان جايىمىز بار. ەلىك جيرەن تۋرالى ەل اۋزىندا اڭىزعا بەرگىسىز اڭگىمە كوپ. قار­تايعاندا سەمەيدەگى ەت كومبيناتىنا وتكىزگەندە تۋعان توپى­راعىنا ءۇش رەت قاشىپ كە­لىپتى دەسەدى. سونىڭ بىرىندە ءبىزدىڭ ءۇيى­مىزگە، اكەمىزدىڭ قوراسىنا كە­­لىپتى. ەستى جانۋار ءوزىنىڭ شاباندوزىن ىزدەپ كەلگەن عوي. ال­داعى ۋاقىتتا ەلىك جيرەننىڭ قانداي بايگەلەردە توپ جارعانى تۋرالى مالىمەتتەردى جيناقتاپ، كىتاپ شىعارماق نيەتتەمىز»، دەيدى نازىم امانگەلدىقىزى.

ەلىك جيرەن ەسكەرتكىشىنىڭ اشى­لۋىندا ءسوز العان بادەلحان كامالحان ۇلى تارباعاتاي ءتوسىن كەزىندە نەبىر تۇلپارلاردىڭ ءدۇ­بىرلەتىپ وتكەنىن تەبىرەنە ەسكە الىپ: «ەلىك جيرەن ەلىنە قايتا ورالدى. ەلىك جيرەنمەن بىرگە قا­زاقتىڭ قازاناتى قايتا ورالىپ جاتىر. بۇگىن بارقىتبەل باۋرايىندا 140 شاقىرىمدىق بايگە وتۋدە. ەندى ءاربىر جولاۋشى تۇلپارعا باس ءيىپ وتەتىن بولا­دى»، دەدى.

ەلىك جيرەن ەسكەرتكىشى اشىل­­­­­­عاننان كەيىن ەكپىندەتە ەك­پىن اۋىلىنىڭ بايگە الاڭىنا اسىق­تىق. كەلسەك، حالىق ىعى-جى­عى. ۋ-شۋ. توپتالعان ادامدار مارە جاققا ءوتىپ كەتپەسىن دەپ ۇزىننان ۇزاق تە­مىر قورشاۋ قويىلىپتى. قۇ­قىق قورعاۋ قىزمەتكەرلەرى الگى قور­شاۋدان باق وكىلدەرىنىڭ ءوزىن ارەڭ دەگەندە وتكىزدى. سودان قوي­شى، ساعات ءتىلى 12-دەن اسقاندا مي­كروفون ۇستاعان جۇرگىزۋشىلەر «الدىڭعى اتتار اققالانىڭ تۇ­­سىنا كەلدى» دەپ حابارلاعاندا ءار جەردە بىتىراپ جۇرگەن حالىق مارەگە قاراي لاپ قويدى. جۇرت 140 شاقىرىمنان ءبىرىنشى بولىپ وتەتىن جۇيرىكتى تاعاتسىزدانا كۇ­تىپ تۇر. ەلدىڭ كوڭىل كۇيى كوتە­رىڭكى.

قۇلاگەر، اكەڭ تۇلپار، شەشەڭ سۇڭقار،

سوعىپ ەڭ دونەنىڭدە-اۋ سەگىز ارقار،

– دەپ ايقايلايدى قىزىپ العان ءبىر اعامىز. «140 شاقىرىم ات­تار­­­­­عا تىم قيىن. وبال عوي. جانۋار­دى بۇلايشا قيناۋعا بولا ما؟! قايتا بۇگىن كۇن سالقىن، اتتارعا قولايلى بولىپ تۇر. ايتپەسە كىم بىلەدى؟!» دەپ جىلقىعا جان­اشىر­لىق تانىتقان سوزدەردى دە قۇلاعىمىز شالدى.

سونىمەن نە كەرەك، ساعات ءتىلى 12 جارىمنان اسىپ، 1-گە تا­قا­عاندا مىڭداعان كورەرمەننىڭ قۇ­لاق تۇندىرعان قيقۋىمەن ال­عاشقى ات مارەنى قيىپ وتكەن. قيىپ وتكەندە، 140 شاقىرىمعا ەمەس، 20-30 شاقىرىمعا قوسىلعان جۇيرىكتەردەي ەمىن-ەركىن شاۋىپ وتكەن قىزكۇرەڭ ەسىمدى بۇل جۇيرىك اقسۋاتتىڭ اتى، يەسى الماس ءامىر­عاليەۆ ەكەنىن (شاباندوزى – كوك­پەكتىلىك رۋسلان شايىرعازين) حابارلاعان جۇرگىزۋشىلەر. بۇدان كەيىن ارادا ءۇش-ءتورت مينۋت ءوت­كەندە كاتونقاراعايدىڭ پىراق اتتى جۇيرىگى (ات يەسى – قايرات سەركەنوۆ، شاباندوزى – قۋانىش تۇر­سىنحانوۆ) مارە سىزىعىن كەس­كەن. بۇل ات بيىلعى ءساۋىر ايىن­دا زايسان اۋدانىندا ەلىمىزدە تۇڭعىش ۇيىمداستىرىلعان 130 شاقىرىمدىق بايگەدە دە 2-ورىن العان-دى. ءۇشىنشى ورىن دا وسى كاتونقاراعاي اۋدانىنىڭ ءۇل­كەن نارىن اۋىلىنىڭ اردا­كۇرەڭ ات­تى (ات يەسى – قۇرمەت قاجى­عا­ليەۆ، شاباندوزى – سەرگەي رى­بين)­ ءساي­گ ۇلىگىنە بۇيىردى.

8-9 ساعات ات ۇستىندە تاپجىلماي وتىرۋ وڭاي ما؟! جالپى، بۇل ۇلى بايگەدە ۇيىمداستىرۋشىلار تو­عىز اتقا جۇلدە تىككەن ەدى، ءبى­راق مارە سىزىعىن تولىق كەسىپ ءوت­كەن ون ءۇش ات قانا ەكەنىن ەس­كەرىپ، «جىلقىنىڭ تەرى» دەپ قال­عان اتتاردىڭ دا يەسىن قۇر قول قالدىرمادى.

«كيەلى مەكەن – اقسۋات» ءانى دۇنيەگە كەلدى

ات بايگەسىنەن سوڭ اقسۋات ستاديونىندا «تۋعان جەرگە تۋىڭدى تىك» اتتى حالىقارالىق ايتىس باس­­تالدى. ايتىس باستالماس بۇ­رىن مەتسەنات، وسى اۋداننىڭ ەك­پىن اۋىلىنىڭ تۋماسى دۋلات تاس­تەكەەۆتىڭ دەمەۋشىلىگىمەن جا­­رىق كورگەن «تاريحقا تولى تار­­باعاتاي» كىتابى (IV تومى) مەن 2016-2018 جىلدارى وتكەن «تۋ­عان جەرگە تۋىڭدى تىك» اتتى حالىق­ارالىق ايتىس جيناعىنىڭ تانىستىرىلىمى ءوتتى. سونىمەن قاتار بۇل كۇنى ەكى بىردەي جاڭا ءاننىڭ تۇساۋى كەسىلدى. اۋەلگىسى – اۋەنىن التىنبەك قورازباەۆ شىعارعان، ءسوزىن ءجۇرسىن ەرمان جازعان «كيەلى مەكەن – اقسۋات» ءانى (ورىنداعان – ساۋلەجان تاع­زيا)، ەكىنشىسى – «شىعىس ۇرانى» ءانى ء(سوزى – مەرەي قارتوۆ، ءانى – ەر­بوسىن قاسىمبەكوۆ).

وسىمەن ءتورتىنشى مارتە وتكەن ءسوز دوداسىنا بيىل مۇحتار نيا­زوۆ، رۇستەم قايىرتاي ۇلى، جانسايا مۋسينا، قانات مىرزاحان، سىرىم اۋەزحان، اسپانبەك شۇعاتاەۆ، ايدوس راشات (موڭعوليا)، ەرلان امانقوجا ۇلى (قىتاي) سىندى اقىندار قاتىستى. ايتىس قو­رى­تىندىسىندا باس جۇلدە شە­كارانىڭ ارعى بەتىنەن كەلگەن اقىن ەرلان امانقوجا ۇلىنا، 1- ورىن قانات مىرزاحانعا، 2-ورىن جان­سايا مۋسيناعا، 3-ورىن رۇستەم قايىرتاي ۇلىنا بۇيىردى. ال ءداستۇرلى اقسۋات ايتىسىنىڭ بيىل­­عى ستيپەندياسى اسپانبەك شۇ­عاتاەۆقا بەرىلدى.

حالىقارالىق ونەر جانە سپورت فەستيۆالىن ۇيىمداستىرۋشىلار الداعى ۋاقىتتا شارا اياسى كەڭەيە تۇسەتىندىگىن ايتادى. «بۇرىن كۇ­رەس، ايتىس بولەك بولاتىن. بيىل بادەل­حان اعانىڭ ۇسىنىسىمەن ءبارىن ءبىر ارناعا توعىستىرىپ، «تۇعىرى بيىك تارباعاتاي» اتتى حالىقارالىق سپورت جانە ونەر فەستيۆالىنە اي­نالدىردىق. باس­تا­ماسى جامان ەمەس سەكىلدى. ەڭ باستىسى، حا­لىق­تىڭ ىستىق ىقى­لاسىن سەزىنىپ وتىرمىز. ال­داعى ۋاقىتتا فەستيۆال اياسىن كەڭەيتىپ، تارباعاتاي، اق­جار، اقسۋات ءوڭىرى تۋرالى ءان باي­قاۋىن ۇيىمداستىرساق دەگەن ويى­مىز بار»، دەيدى فەستيۆالدى ۇيىم­داس­تى­رۋشىلاردىڭ ءبىرى، «TasGroup» كومپانيالار توبىنىڭ باسشىسى دۋلات تاستەكەەۆ.

ءۇش كۇنگە سوزىلعان، اۋدان جۇرتشىلىعى مەن سىرتتان كەلگەن قوناقتاردى ءبىر سەرپىلتكەن اۋقىمدى شاراعا جەرگىلىكتى ونەر­پاز­داردىڭ دا ەرەكشە ەڭبەك ءسى­ڭىر­گەنىن ايتپاسقا بولماس. «حا­لىقارالىق ونەر جانە سپورت فەس­­­­­تيۆالىنە اقجار، اقسۋات ءوڭى­رىنىڭ 17 اۋىلدىق وكرۋگىنەن 200-دەن استام ونەرپاز قاتىستى. ءۇرجار، زايسان، ۇلان، كۇرشىم، اياگوز، اباي اۋداندارى دا وسى مەرەكەگە ەرەكشە اتسالىستى. ءۇل­كەن شاراعا جەرلەسىمىز مايرا ءىلياسوۆا مەن بيسارا ماكەنوۆا دا ارنايى كە­لىپ، اننەن شاشۋ شاش­تى»، دەيدى اقسۋات مادەنيەت ءۇيى­نىڭ ديرەكتورى شاكەن كوپ­شىكباەۆا.

بارقىتبەل باۋرايىن انگە، كۇيگە بولەگەن شارا 16 ماۋسىمدا كەشكىسىن «مۋزارت» ءانسامبلىنىڭ گالا-كونتسەرتىمەن تۇيىندەلدى.

شىعىس قازاقستان وبلىسى،

تارباعاتاي اۋدانى،

اقسۋات اۋىلى