جەدەل شارالار قابىلداندى
قالىڭ قازاق ەلى «قازانى باسقانىڭ – قايعىسى باسقا» دەگەن جوق. قابىرعاسى قايىسقان قازاقستاندىقتار ەدەل-جەدەل كومەك كورسەتۋ ماقساتىندا اپات ورىن العان ارىس ماڭىنان تابىلدى. ەڭ اۋەلى, ءتيىستى مەملەكەتتىك ورگاندارمەن ءبىر مەزەتتە باسقا دا قاراپايىم ازاماتتار جارىلىس كەزىندە داعدارىپ قالعان تۇرعىنداردى, اتا-اناسى كوز جازىپ قالعان بالالاردى قاۋىپسىز جەرگە جەتكىزۋگە اتسالىستى. پارتيا مەن مەشىتتەردىڭ, سونداي-اق قوعامدىق ۇيىمداردىڭ باستاماسىمەن ارنايى كومەك قورلارى قۇرىلدى. كوپتەگەن ۇجىمدار بىركۇندىك ەڭبەكاقىلارىن اۋدارىپ ۇلگەردى. بۇل قىسىلتاياڭ ساتتە ءبىر ۇدەدەن تابىلاتىن ادامي قاسيەتتىڭ, ەڭ باستىسى ەلدىكتىڭ, بەرەكە مەن بىرلىكتىڭ بەلگىسى.
مەملەكەت باسشىسى قاسىم-جومارت توقاەۆ وقيعا ورىن العان العاشقى ساتتەردەن باستاپ ءتيىستى ورىندارعا ناقتى تاپسىرمالار بەردى جانە ءوزى دە اپات اۋماعىنا ارنايى ۇشىپ كەلدى. شىرعالاڭعا تۇسكەن تۇرعىنداردىڭ شەرتەر كۇيى – شىعار مۇڭىنا نازار اۋداردى. زارداپ شەككەندەرگە مەملەكەت تاراپىنان بارلىق قاجەتتى قولداۋ جاسالاتىنىن ايتىپ, ادامداردىڭ الاڭ كوڭىلىن دەمەدى. ءيا, ەل باردا ەشكىم دە دالادا قالمايتىنى انىق. قازىرگى ۋاقىتتا ارىستاعى اپاتتان جاراقات العان جاندارعا مەديتسينالىق كومەكتەن باستاپ, ءۇي-جايىنان ايىرىلعان تۇرعىندارعا دەيىن بارلىق قاجەتتى كومەك كورسەتۋ شارالارى جۇرگىزىلۋدە.
ارىستىقتاردىڭ يىعىنا ءتۇسكەن اۋىرتپالىق بارشا ەلدىڭ باسىن بىرىكتىرە, توپتاستىرا ءتۇستى. ورنىندا بار دۇنيە وڭالار, اللا قايىرىن بەرسىن!
ءيا, بەرەكەلى بەيبىت كۇندە ەڭسەمىزدى تۇسىرەر مۇنداي الاپاتتىڭ بولارىن كىم ويلاعان؟.. بولعان ىسكە بولاتتاي بەرىك بولا بىلەر حالقىمىز العاشقىدا ابدىراپ قالدى. دەسەك تە, وقيعاعا قاراي امال جاسالىپ, ءتيىستى شارالار قابىلدانعان سوڭ تۇرعىندار ءبىرشاما سابىرعا بوي الدىرىپ, ساباسىنا تۇسكەندەي. ونىڭ ۇستىنە بارشا قازاقستاندىقتاردىڭ رياسىز پەيىلمەن بىلدىرگەن شىنايى قولداۋى جانعا مەدەت, داتكە قۋات بولدى. ەلدىڭ ەلدىگى, بىرلىگى وسىندايدا انىق كورىنسە كەرەك.
تارقاتا ايتار بولساق, مەملەكەت باسشىسىنىڭ تاپسىرماسىنا سايكەس تۇركىستان وبلىسى ارىس قالاسىنداعى اسكەري ءبولىم اۋماعىنداعى جارىلىسقا بايلانىستى ايماق باسشىسى ومىرزاق شوكەەۆتىڭ توراعالىعىمەن تەز ارادا ارنايى كوميسسيا قۇرىلدى. وبلىس اكىمدىگىنىڭ باسشىلىق قۇرامى مەن اسكەريلەر, قۇقىق قورعاۋ ورگاندارى توتەنشە جاعداي اۋماعىندا بەلسەنە ارەكەت ەتۋدە.
«توتەنشە جاعداي جاريالانىپ, بارلىق اۋدان, جاقىن ەلدى مەكەندەر جۇمىلدىرىلدى. قازىرگى ۋاقىتتا بولعان وقيعانىڭ اۋقىمىنان قالانى تۇتاستاي ەۆاكۋاتسيالاۋ كەرەكتىگىن كورىپ تۇرمىز. بارلىق باعىتتا كولىكتەر لەگى قوزعالادى. ادامداردى الا كەتىپ, ارنايى ۇيىمداستىرىلعان لاگەرلەرگە جەتكىزەدى. اۋدانداردىڭ اكىمدەرى ءوز كوماندالارىمەن بىرگە لاگەرلەر ۇيىمداستىرىپ, كەلگەن ادامداردىڭ ءتىزىمىن جاساپ, كىمدەردى تۋىستارىنا, كىمدەردى قوناق ۇيلەرگە ورنالاستىرۋ كەرەكتىگىن انىقتاۋ كەرەك. ءار لاگەردى اۋدان اكىمى باسقارادى», دەدى وقيعا ورنىنا جەدەل جەتكەن ءو.شوكەەۆ.
وبلىس اكىمىنىڭ تاپسىرماسىنا ساي, تۇرعىندار ءۇش لاگەرگە ورنالاستىرىلدى. ولار: اقدالا بۇرىلىسى; 41 رازەزد; ۆودوزوبور باعىتىنداعى لاگەرلەر. اتالعان باعىت بويىنشا اسكەري كولىكتەر, جۇك كولىكتەرى مەن ارنايى جاساق جۇمىلدىرىلدى. لاگەر باسىندا تۇرعىنداردى اۋدان اكىمدەرى قارسى الىپ, جايعاستىردى. الەۋمەتتىك نىسانداردى (اۋرۋحانا, بالالار) پوليتسيا قىزمەتكەرلەرى كوشىردى.
توتەنشە جاعدايعا بايلانىستى قۇرىلعان ارنايى شتاب بەيرەسمي تاراپ جاتقان «بوگەن», «شاردارا» سۋ قويماسىنان كەلەتىن قاۋىپ تۋرالى اقپاراتتىڭ جالعان ەكەنىن مالىمدەدى. سونداي-اق وتىرار مەن ورداباسى اۋداندارىندا 100 ورىندىق ەكى گوسپيتال اشىلدى. قوسىمشا 30 جەدەل مەديتسينالىق كولىك جۇمىس ىستەۋدە.
ارىستاعى توتەنشە جاعدايعا بايلانىستى مەگاپوليستە 15 ەۆاكۋاتسيالىق بەكەت اشىلدى. قازىرگى تاڭدا قاۋىرت جەلى بويىنشا 700-گە جۋىق تەلەفون حابارلاماسى كەلىپ ءتۇستى. سونىمەن قاتار ارىس قالاسىنان حالىقتى كوشىرۋ ءۇشىن 40 اۆتوبۋس جىبەرىلدى. وسى كۇنگى العاشقى مالىمەتتەرگە قاراعاندا, شىمكەنت قالاسىنىڭ №1 كلينيكالىق اۋرۋحاناسىنا جالپى سانى 19 ازامات ءارتۇرلى دەنە جاراقاتىمەن تۇسكەن. تۇرعىندار ءۇشىن شىمكەنت قالاسى توتەنشە جاعدايلار دەپارتامەنتىندە تاۋلىك بويى 8 (7252) 44-94-72 قاۋىرت جەلىسى جۇمىس ىستەۋدە.
وسى كۇنى قورعانىس ءمينيسترى, گەنەرال-مايور نۇرلان ەرمەكباەۆ باستاعان توپ وقيعا ورنىنا كەلىپ, قوعامدىق شتاب جۇمىسىنا ارالاستى.
توتەنشە جاعداي كەزىندە قوعامدىق ءتارتىپتى ساقتاۋعا, ەۆاكۋاتسيالانعان ازاماتتاردىڭ مۇلكىن كۇزەتۋگە پوليتسيا قىزمەتكەرلەرى تارتىلدى. جەكە قۇرامنىڭ 463 قىزمەتكەرى (193 قىزمەتكەر جانە 23 تەحنيكا ازاماتتىق قورعاۋ ورگاندارىنان, 270 قىزمەتكەر مەن 30 تەحنيكا پوليتسيا بولىنىستەرىنەن) مەن ىشكى ىستەر مينيسترلىگىنىڭ 53 تەحنيكاسى ارىس قالاسىنان كوشىرىلگەندەرگە كومەك كورسەتۋدە. قوعامدىق ءتارتىپتى قاداعالاۋ ءۇشىن ۇلتتىق ۇلان اسكەري ءبولىمىنىڭ 500 جاۋىنگەرى ارىستى كۇزەتۋدە.
سونداي-اق الەۋمەتتىك جەلىلەردە ارىس قالاسىندا بالالاردىڭ جوعالۋى تۋرالى اقپارات تارالدى. بۇل اقپارات تەكسەرىلىپ, وقيعا ورنىنان كوشىرىلگەندەردىڭ ورنالاسقان جەرلەرىن انىقتاۋ شارالارى جۇرگىزىلىپ جاتىر. قيىن ساتتە ىشكى ىستەر مينيسترلىگى تۇرعىنداردى ۇرەيگە بوي الدىرماۋعا شاقىرىپ, الىپ-قاشپا حابارعا ەرمەي, رەسمي اقپاراتتارعا عانا سۇيەنۋ قاجەتتىگىن ەسكەرتتى. قازىر ارىستاعى احۋال ىشكى ىستەر ورگاندارىنىڭ ءجىتى قاداعالاۋىندا.
«جارىلىستان 23 ادام ءارتۇرلى دەنە جاراقاتىمەن تۇركىستان وبلىسىنا قاراستى اۋرۋحانالارعا جەتكىزىلدى. ولاردىڭ باسىم بولىگى وبلىستىق كلينيكالىق اۋرۋحاناعا جاتقىزىلىپ, بارلىق قاجەتتى مەديتسينالىق كومەك كورسەتىلۋدە. جارىلىس سالدارىنان وتىرار تسرب-عا 34 ادام كەلگەن. ولاردىڭ بارلىعىنا مەديتسينالىق كومەك كورسەتىلگەن. اۋدان اكىمدىگىمەن بىرگە جايعاستىرۋ جۇمىستارى جۇرگىزىلىپ جاتىر. ارىستاعى توتەنشە جاعدايعا وراي ورداباسى اۋدانىندا دا مەديتسينالىق شتاب قۇرىلدى. ورداباسى اۋداندىق ورتالىق اۋرۋحاناسىنان جانە وبلىستىق كلينيكالىق اۋرۋحاناسىندا 200-دەن استام ناۋقاسقا ارنالعان ورىن دايىندالدى. 30 جەدەل جاردەم كولىكتەرى شىمكەنت قالاسىنا كىرەر 3 جولعا قويىلدى. تاعى دا قاجەت بولعان جاعدايدا بىرنەشە اۋدانداردان الدىرىلعان قوسىمشا جەدەل جاردەم كولىكتەرى دايىن. وبلىستىق كلينيكالىق اۋرۋحانادان تراۆماتولوگ, حيرۋرگ, رەانيماتولوگ دارىگەرلەر قۇرىلعان مەديتسينالىق شتابقا جينالدى. قازىرگى كەزدە جاراقات العاندار جوق. ەۆاكۋاتسيا جۇمىستارى جۇرگىزىلىپ جاتىر. ارىس قالالىق ورتالىق اۋرۋحاناسى مەن ەمحاناسىنداعى ناۋقاستار دا ەۆاكۋاتسيالاندى. ماماندار دا جەدەل جاردەم كولىكتەرى دە وبلىس بويىنشا جەتكىلىكتى», دەپ حابارلادى وبلىستىق دەنساۋلىق ساقتاۋ باسقارماسى.
بۇدان كەيىنگى تاراعان اقپارات بويىنشا, جارىلىستان 31 ادام زارداپ شەگىپ, مەديتسينالىق مەكەمەگە ورنالاستىرىلعان. وبلىس اكىمىنىڭ ايتۋىنشا, ولاردىڭ ىشىندە ەكەۋىنىڭ جاعدايى اۋىر, قالعانى, ورتاشا جانە جەڭىل دەڭگەيدە. ءبىر ادام قازا تاپقان. ونىڭ اۆتوكولىگىنە سنارياد كەلىپ تۇسكەن.
سول كۇنگى تۇستەن كەيىنگى اقپاراتتارعا قاراعاندا, اپات سالدارىنان تۋىنداعان قيىندىققا وبلىس پەن قالا اۋماعىنداعى ەرىكتىلەرى دە بىلەك سىبانا كىرىستى. ولار ارىس قالاسى مەن ونىڭ ماڭىندا ورنالاسقان ەلدى مەكەندەردىڭ تۇرعىندارىن قاۋىپسىز ايماققا كوشىرۋگە اتسالىسىپ, جاراقات سالدارىنان كوپ قان جوعالتقاندارعا ارنايى قان تاپسىردى. شىمكەنتتىڭ باتىس قاقپاسىنداعى اقمەشىت مەشىتىنە الاساپىراندا اتا-اناسىنان اداسىپ قالعان بۇلدىرشىندەردى جيناپ, ءتيىستى كومەك كورسەتۋدە. شىمكەنت قالاسىنداعى №87 مەكتەپكە ۋاقىتشا ورنالاسقان ءبۇلدىرشىندەردىڭ اتى-جوندەرى انىقتالىپ, اتا-انالارىنا حابار جىبەرىلدى. ءبىر سوزبەن ايتقاندا, ارىس قالاسى تۇرعىندارىنىڭ باسىنا تۇسكەن اۋىرتپالىقتى جەڭىلدەتۋگە اعايىن بەلسەنە اتسالىستى.
وقيعا بولعان كۇنى تۇركىستان وبلىسىنىڭ اكىمى ومىرزاق شوكەەۆ ورداباسى اۋدانى, اقجول اۋىلى, جامبىل مەكتەبىندە توتەنشە جاعدايعا بايلانىستى بريفينگ وتكىزدى. تۇركىستاندىقتاردى ايتىپ كەلمەگەن اپاتتان قۇتقارۋعا مەملەكەتتىك دەڭگەيدە كومەك كورسەتىلەتىندىگىن جەتكىزدى. بريفينگ «حابار 24» ارناسىنىڭ تىكەلەي ەفيرىنەن كورسەتىلدى. وندا مىنا تومەندەگى مالىمەتتەر جاريالاندى.
«ارىستا 45 مىڭ تۇرعىن بار. جارىلىستاردىڭ كولەمىن, ماسشتابىن كورگەن سوڭ تۇگەل قالانى ەۆاكۋاتسيالاۋ تۋرالى شەشىم قابىلدادىق. تەزدەتىپ قۇلاقتاندىرۋ قۇرالدارى ىسكە قوسىلدى. اۆتوبۋستار اكەلىنىپ, قالادان تۇرعىنداردى تەز ارادا قاۋىپسىز وڭىرگە شىعارۋعا ارەكەت جاسالدى. قازىرگى ۋاقىتتا ارىستا ءار ساعات سايىن كوشەلەردى ارالاپ, ارنايى كولىكتىك كولوننالار جىبەرىپ, تۇرعىنداردىڭ بارلىعىن شىعارىپ جاتىرمىز. كوپشىلىگى قالادان شىقتى دەپ ايتۋعا بولادى. ەندى پوليتسيامەن جانە اسكەريلەرمەن بىرىگىپ, قالانىڭ ءىشىن پاترۋلدەۋگە كىرىستىك. قالانىڭ شەتتەرىن قورشاپ, بلوك پوستتار ورناتتىق. ارىس تۇرعىندارىن ەۆاكۋاتسيالاۋعا 150 اۆتوكولىك تارتىلدى. قالانى كۇزەتۋگە اۋداندىق ىشكى ىستەر ءبولىمى تولىق جۇمىلدىرىلدى. 345 قىزمەتكەر, 75 ارنايى كولىك, 51 جەدەل جاردەم كولىگى تارتىلدى. ودان بولەك قورعانىس مينيسترلىگى تاراپىنان 800 اسكەري قىزمەتشى قالا اۋماعىنا جەتكىزىلدى. ولار جەدەل تاپسىرمالاردى ورىندايتىن بولادى. سوڭعى ءبىر ساعاتتا ارىس قالاسىنان 1616 ادام ەۆاكۋاتسيالاندى», دەدى ءو.شوكەەۆ بريفينگ بارىسىندا.
ال قورعانىس ءمينيسترى نۇرلان ەرمەكباەۆ الدىمەن جارىلىستان قازا تاپقان تۇرعىننىڭ جاقىندارىنا كوڭىل ايتتى.
«قازا تاپقان كىسىنىڭ جاقىن تۋىستارىنا جانە جاراقات العاندارعا كوڭىل ايتامىز. بۇگىن ارىس قالاسىندا اسكەري وق-دارىلەر ارسەنالى قويمالارىنىڭ بىرىندە ءورت شىعىپ, جارىلىس بولدى. جارىلىس باسقا قويمالارعا جالعاسىپ, بىرنەشە قويما جارىلىپ كەتتى. ءوڭىر اكىمدىگى مەن تج كوميتەتى ءىس-ارەكەتىنىڭ ارقاسىندا ەلدى مەكەندەردەن بارلىق تۇرعىندار شىعارىلدى. بۇل ارسەنالدا قاۋىپتى وق-دارىلەر مەن بومبالاردىڭ ساقتالماعانىن رەسمي مالىمدەيمىن. بارلىق وق-دارىلەر ساقتىق ءۇشىن دالاعا قاراي باعىتتالىپ قويىلعان. سوندىقتان نەگىزگى سوققى بوس دالاعا جاسالدى. تولقىننىڭ ءبىر بولىگى ەلدى مەكەنگە اسەر ەتىپ, بىرنەشە باسپانانىڭ شاتىرى مەن تەرەزەسىنە زاقىم كەلدى. قاۋىپسىزدىك ءۇشىن ارىس تۇرعىندارىنا جاقىن ارادا جەدەل شتابتىڭ رۇقساتىنسىز ۇيلەرىنە كەلمەۋدى سۇرايمىز. سەبەبى ارىستىڭ كوشەلەرىندە جارىلماي قالعان وق-دارىلەر بولۋى مۇمكىن. قازىر ءبىر توپ ساپەر تازالاۋ جۇمىستارىن جۇرگىزىپ جاتىر. بۇل جۇمىستار اياقتالعان سوڭ, تۇرعىندار ءوز ۇيلەرىنە ورالا الادى. قازىر بارلىق ۇيلەر مەن كۆارتالدار پوليتسيا مەن قارۋلى كۇشتەردىڭ ءجىتى باقىلاۋىندا. سوندىقتان م ۇلىكتىڭ ساقتالۋى جونىندە تۇرعىندار ۋايىمداماعانى ءجون. ەشقانداي توناۋشىلىق پەن ۇرلىق-قارلىق بولمايدى», دەدى مينيستر.
اعايىننىڭ قولداۋى ايرىقشا
ساعات 21.30-دان باستاپ وتاندىق تەلەارنالاردا «ارىس. ءبىز بىرگەمىز» اتتى تەلەمارافون ءوتىپ, وندا ورىن العان توتەنشە جاعدايدىڭ جاي-جاپسارى تۋرالى جان-جاقتى اقپارات بەرىلدى. ستۋدياعا ىشكى ىستەر مينيسترلىگىنىڭ رەسمي وكىلى ءنۇردىلدا وراز كەلىپ, جەدەل اتقارىلىپ جاتقان ءىس-شارالار جونىندە بايانداپ بەردى.
ەلدىگىمىز بەن بىرلىگىمىز سىنالاتىن وسىنداي سىن ساعاتتا ارىس حالقىنا بارىنشا قولداۋ كورسەتۋ ماقساتىندا جان-جاقتان گۋمانيتارلىق كومەكتەر كورسەتىلە باستادى. ماسەلەن, Nur Otan پارتياسى توراعاسىنىڭ ءبىرىنشى ورىنباسارى ماۋلەن اشىمباەۆ Facebook-تەگى پاراقشاسىندا پارتيا گۋمانيتارلىق كومەك جيناۋ جۇمىستارىن قولعا العانىن حابارلادى. ءسويتىپ كومەك جيناۋ پۋنكتتەرى رەتىندە وڭىرلەردەگى پارتيا فيليالدارىنىڭ مەكەنجايلارىن كورسەتتى. سونداي-اق «اپاتتىڭ ايتىپ كەلمەيتىنى بەلگىلى. سوندىقتان ارىستاعى توتەنشە جاعدايدىڭ زارداپتارىن جويۋعا بۇكىل حالىق بولىپ اتسالىسۋ – بارشامىزدىڭ ازاماتتىق مىندەتىمىز. سول سەبەپتى Nur Otan پارتياسى ورتالىق اپپاراتىنىڭ قىزمەتكەرلەرى جارىلىستان زارداپ شەككەن ازاماتتارعا كومەك رەتىندە ءبىر كۇندىك جالاقىلارىن اۋدارۋ تۋرالى شەشىم قابىلدادى» دەپ مالىمدەدى.
ال تەلەمارافون بارىسىندا Jas Otan جاستار قاناتىنىڭ توراعاسى داۋلەت كارىبەك جايسىز حاباردى ەستي سالا بەلسەندى جاستار دەرەۋ ىسكە كىرىسىپ, كومەك قولىن سوزىپ جاتقانىن ايتتى. ناقتىراق ايتقاندا, ەرىكتىلەر پارتيا فيليالدارىنا جۇگىنگەن ازاماتتاردىڭ وتىنىشتەرىن جازىپ الىپ, ولاردىڭ كوز جازىپ قالعان بالا-شاعالارىن ىزدەستىرۋ ءۇشىن الەۋمەتتىك جەلىلەردەگى تانىمال توپتاردى ىسكە قوسىپ, فوتولاردى جاريالاي باستاعان. سونىمەن قاتار ساعات 17.00-دەن باستاپ جارىلىس بولعان ايماققا جاقىن ورنالاسقان شىمكەنت, قىزىلوردا, تاراز جانە الماتى قالالارىندا گۋمانيتارلىق كومەك جيناۋ پۋنكتتەرى اشىلعانىن اتاپ ءوتتى. وندا الدىمەن قاجەتتى گيگيەنالىق زاتتار, كۇن ىستىعىندا بۇزىلا قويمايتىن اس-سۋ جانە كورپە-جاستىقتار جينالۋدا. مۇنىڭ ءبارى تاڭەرتەڭ ءبىرىنشى رەيسپەن ءجونەلتىلمەك.
«بۇل ءىس-شارالار وسىمەن شەكتەلمەي, اپاتتى جاعداي توقتاعاننان كەيىن وبلىستاردان ەرىكتىلەر جينالىپ, ارىس قالاسىن قالپىنا كەلتىرۋ جۇمىستارىنا بەلسەنە ارالاسادى. قازىردىڭ وزىندە شىمكەنت قالاسىندا 100-گە تارتا ەرىكتى كومەك سۇراعاندارعا ءجون سىلتەپ, سۋ تاراتىپ ءجۇر. سونداي-اق ازاماتتاردى اكىمشىلىك بولگەن مەكتەپتەر مەن كوللەدجدەرگە ورنالاستىرۋ جۇمىستارىنا قولعابىس ەتىپ جاتىر», دەدى د.كارىبەك.
سونىمەن قاتار تەلەارنا ستۋدياسىنا قازاقستان حالقى اسسامبلەياسىنىڭ وكىلى كامال الپەيىسوۆا كەلىپ, اسسامبلەيا تاراپىنان جاسالىپ جاتقان ءىس-شارالار جونىندە ايتىپ بەردى. ونىڭ ايتۋىنشا, بۇكىل وڭىردەگى قحا-نىڭ حاتشىلىقتارى مەن قوعامدىق كەلىسىم مەكەمەلەرىنىڭ جۇمىسىن وسى جاعدايعا بايلانىستى جۇمىستارعا جۇمىلىپ جاتىر. وسى وقيعا تۋرالى حابار تاراعان ساتتەن باستاپ شىمكەنت قالاسىنداعى دوستىق ۇيىندە دەرەۋ شتاب قۇرىلىپ, زارداپ شەككەن تۇرعىندارعا گۋمانيتارلىق كومەك كورسەتۋ جۇمىستارىن قولعا العان.
«ارىس. ءبىز بىرگەمىز» تەلەمارافونى كەزىندە قاراعاندى وبلىسىنان اۋە كەمەلەرى ارقىلى 10 توننا ازىق-ت ۇلىك پەن كيىم-كەشەك جولدانعانى حابارلاندى. سونداي-اق وسى ستۋديادا «اتامەكەن» ۇكپ باسقارما توراعاسىنىڭ ورىنباسارى ولجاس ورداباەۆ گۋمانيتارلىق كومەك كورسەتۋدەن ەلىمىزدىڭ كاسىپكەرلەرى دە قالىس قالماعانىن ايتتى. «كاسىپكەرلەر دە بەلسەندى قاتىسىپ جاتىر. شىمكەنت, تۇركىستان قالاسىنىڭ كاسىپكەرلەرى العاشقى مينۋتتاردان كومەك كورسەتىپ, حالىقپەن بىرگە ەكەنىن كورسەتتى. ال شىمكەنت قالاسىنداعى «ينتەرتيچ» ەمحاناسى جۇگىنۋشىلەرگە تەگىن قىزمەت كورسەتتى. كاسىپكەرلەر مۇنداي جاعدايدا جۇرتپەن بىرگە بولۋدى وزدەرىنە پارىز دەپ سانايدى. جاقىنىنان مەدەت كۇتكەن اعايىندى كاسىپكەرلەر بارىنشا دەمەي بەرەدى», دەدى ول.
قيىن جاعدايعا دۋشار بولعان ارىس تۇرعىندارىنان كومەكتەرىن اياماۋدى ازاماتتىق بورىشىمىز دەپ بىلەتىن جەر-جەردەگى اعايىننىڭ ءبارى اۋىزبىرشىلىك تانىتىپ, جىلۋ جيناپ جاتىر. ەڭبەك جانە حالىقتى الەۋمەتتىك قورعاۋ مينيسترلىگىنىڭ, سونداي-اق ۆەدومستۆولىق باعىنىستى ۇيىمدارى مەن وڭىرلىك دەپارتامەنتتەرىنىڭ قىزمەتكەرلەرى جارىلىستان زارداپ شەككەن جۇرتقا قول ۇشىن سوزۋ ءۇشىن ءبىر كۇندىك ەڭبەكاقىلارىن اۋداراتىنىن مالىمدەدى. بۇعان قوسا قورعانىس مينيسترلىگىنىڭ دە قىزمەتكەرلەرى ءبىر كۇندىك ەڭبەكاقىلارىن كومەك كورسەتۋ قورىنا بولەتىنىن حابارلادى. سونىمەن قاتار ارىستاعى اعايىنعا كومەك قولىن سوزعان كوپشىلىكپەن بىرگە «Egemen Qazaqstan» گازەتىنىڭ ۇجىمى دا ءبىر كۇندىك ەڭبەكاقىلارىن اۋداراتىن بولدى.
تاعى ءبىر ايتا كەتەر جايت, ءبىلىم جانە عىلىم مينيسترلىگى شىمكەنت قالاسى مەن تۇركىستان وبلىسىنىڭ جەرگىلىكتى اتقارۋشى ورگاندارىمەن بىرلەسىپ, ارىس قالاسىنداعى وقيعالاردى مۇقيات قاداعالاپ, بالالاردى قالادان كوشىرۋگە جانە ولاردى جايعاستىرۋعا بەلسەندى قاتىسىپ جاتىر.
نۇرشات توكەن,
ورىنبەك وتەمۇرات,
«Egemen Qazaqstan»
