قوستانايداعى وبلىستىق تاريحي-ولكەتانۋ مۋزەيىندە قازاقستاندىق بەلگىلى فوتوگراف-ولكەتانۋشى دميتري باگاەۆتىڭ ۇزدىك دەگەن جۇمىستارىنىڭ «ءبىر ءسات جانە بۇكىل ءومىر» اتتى كورمەسى اشىلدى. 1884 جىلى تۋىپ, 82 جاسقا كەلىپ قايتقان دميتري پوليكارپوۆيچ اقساقال ءوزىنىڭ كۇندەلىگىندە: «فوتوسۋرەت بوس ەرمەك ەمەس, فوتوسۋرەت ول – عىلىم, ونەر, فوتوسۋرەت – ۋاقىتتىڭ دالەلى» دەپ جازعان ەكەن. ايتسا – اتقانداي, وتكەن عاسىردىڭ باسىندا ونىڭ فوتواپپاراتىنىڭ وبەكتيۆىنە ىلىنگەن قاس-قاعىم ساتتەر قازاق دالاسىنىڭ شەجىرەسىنە اينالعان. حالقىمىزدىڭ تالاي ءبىرتۋارىنىڭ بەينەسىن ءبىر كورۋگە زار بولىپ كەلەمىز. وسى تۇرعىدان العاندا باگاەۆتىڭ قازاق دالاسىنا سىڭىرگەن ەڭبەگى ۇشان-تەڭىز دەسەك بولار. فوتوگرافتىڭ پاۆلودارداعى ءۇي-مۋزەيى قورىنان كورمەگە 50 فوتوسۋرەت ۇسىنىلىپتى. وندا حح عاسىردىڭ باسىنداعى قازاق حالقىنىڭ كۇندەلىكتى تۇرمىسى, ەسكى پاۆلوداردىڭ كورىنىستەرى, كەڭ دالانىڭ, باياناۋىل تاۋلارىنىڭ كوركەم پەيزاجى بەينەلەنگەن.
دميتري باگاەۆتىڭ شىعارماشىلىق مۇراسىندا ەتنوگرافيالىق سۋرەتتەرىنىڭ ورنى بولەك.
– دميتري پوليكارپوۆيچ ەڭبەكتەرىندە قويىلىمدىق كادرلار جوق. سول كەزدەگى فوتوپلاستينكالاردىڭ جارىق سەزگىشتىگىنىڭ جوعارى بولۋىمەن قاتار, فوتوگراف ءوزىنىڭ كاسىبي شەبەرلىگىنىڭ ارقاسىندا بولىپ جاتقان وقيعالاردىڭ ءار ءساتىن سول كۇيىنشە ءتۇسىرىپ جاريالاعان, – دەيدى وبلىستىق تاريحي-ولكەتانۋ مۋزەيىنىڭ قىزمەتكەرى باقىتگۇل مۇراتبەكوۆا.
فوتوسۋرەتكە تۇسىرۋمەن بالا جاسىنان اينالىسقان دميتري پوليكارپوۆيچتىڭ ءومىرى دە قازاق دالاسىنداعى اسا ءىرى وقيعالى كەزەڭدەرگە تۇسپا-تۇس كەلەدى. ول قازاقتىڭ كوشپەلى ءومىرى تاريح قويناۋىنا كەتىپ بارا جاتقانىن ءتۇسىنىپ, ونى اسا ىنتىزارلىقپەن تۇسىرەدى. سونىمەن قاتار ونىڭ شىعارمالارىنان قازاقستاندا بولعان توڭكەرىس, اشتىق, ۇلى وتان سوعىسى سياقتى تاريحي وقيعالاردىڭ بارلىعى دا كورىنىس تابادى.
دميتري باگاەۆتىڭ «وشاق باسىنداعى ايەل», «تايدى ۇستاۋ», «بەسىك تەربەتكەن انا قيالى», «التىباقان», «ەكىباستۇز شاحتەرى» سياقتى فوتوجۇمىستارى الەمدىك فوتوسۋرەت مۇراسى بولىپ سانالادى. ەڭ باستىسى, ولار قازاق دالاسىنىڭ شەجىرەسىنە اينالۋىمەن دە قۇندى ەڭبەكتەر.
قوستاناي
