جيىنعا پرەمەر-مينيستر اسقار مامين, پرەزيدەنت اكىمشىلىگىنىڭ باسشىسى باقىتجان ساعىنتاەۆ, ۇلتتىق بانك توراعاسى ەربولات دوساەۆ, پرەمەر-ءمينيستردىڭ ءبىرىنشى ورىنباسارى – قارجى ءمينيسترى ءاليحان سمايىلوۆ, پرەمەر-ءمينيستردىڭ ورىنباسارى گۇلشارا ابدىقالىقوۆا, پرەزيدەنت اكىمشىلىگى باسشىسىنىڭ ءبىرىنشى ورىنباسارى دارحان كالەتاەۆ, پرەزيدەنتتىڭ ەكونوميكالىق ماسەلەلەر جونىندەگى كومەكشىسى تيمۋر سۇلەيمەنوۆ, ەڭبەك جانە الەۋمەتتىك قورعاۋ ءمينيسترى بەردىبەك ساپارباەۆ قاتىستى.
قاسىم-جومارت توقاەۆ ادىلەتتى الەۋمەتتىك ساياساتتىڭ ايرىقشا ماڭىزى, اسىرەسە, اۋىر جاعدايعا تاپ بولعان ادامدارمەن قاتىناستى قالىپتاستىرۋدا ەكەنىن اتاپ ءوتتى. سونداي-اق, قازاقستان پرەزيدەنتى تسيفرلىق پلاتفورمانى قولدانا وتىرىپ, بىرىڭعاي الەۋمەتتىك كارتانى كەشىكتىرمەي ەنگىزۋ قاجەتتىگىن ايتتى.
كەڭەس بارىسىندا ەڭبەك جانە الەۋمەتتىك قورعاۋ ءمينيسترىنىڭ اتاۋلى الەۋمەتتىك كومەك كورسەتۋ جاعدايلارى جونىندەگى ەسەبى تىڭدالدى.
– وسى ماڭىزدى سالادا حالىقتىڭ جاعدايىن جاقسارتۋعا مۇمكىندىك بەرەتىن اۋقىمدى جۇمىستار جۇرگىزىلۋدە. سونىمەن قاتار, اتاۋلى الەۋمەتتىك كومەك كورسەتۋ شارالارى كەزىندە زاڭ بۇزۋشىلىقتار, ءتىپتى, الاياقتىق جولدار دا انىقتالدى. بۇل بيۋدجەت ءۇشىن جوسپارلانباعان شىعىن, – دەپ باياندادى بەردىبەك ساپارباەۆ.
جيىن قورىتىندىسى بويىنشا مەملەكەت باسشىسى اتالعان سالاداعى تەرىس ارەكەتتەردى جويۋ ءۇشىن ەڭبەك جانە الەۋمەتتىك قورعاۋ مينيسترىنە اتاۋلى الەۋمەتتىك كومەكتىڭ بەرىلۋ ءتارتىبىن رەتتەۋ جونىندە شۇعىل شارالار قابىلداۋدى تاپسىردى, سونداي-اق, پرەزيدەنت اكىمشىلىگى مەن ۇكىمەتكە بىرقاتار ناقتى تاپسىرما بەردى.
