ۆلاديمير پۋتين,
رەسەي فەدەراتسياسىنىڭ
پرەزيدەنتى:
– نۇرسۇلتان ءابىش ۇلى – ساياساتتا كوپتەن, كەڭەس داۋىرىنەن كەلە جاتقان تۇلعا. مەنى قاتتى تاڭعالدىراتىنى – ونىڭ زامان تىنىسىن تاپ باسىپ تانيتىنى. بۇل قاسيەت – بۇگىنگى الەمدى ءدوپ باسىپ سەزىنە الاتىن قاسيەت وعان قايدان دارىعان؟.. ول – ادال دا ءادىل. ءبىر ماسەلەلەردى تالقىلاعاندا, ءاردايىم قاتارداعى ادامدارعا بۇل قالاي اسەر ەتەدى دەپ ويلاپ تۇرادى.
سي تسزينپين,
قىتاي حالىق رەسپۋبليكاسىنىڭ توراعاسى:
– پرەزيدەنت نۇرسۇلتان نازارباەۆتىڭ ارقاسىندا ءبىزدىڭ ەلدەرىمىزدىڭ اراسىندا ءارىپتەستىكتىڭ مىقتى ىرگەتاسى قالانعان. پرەزيدەنت نازارباەۆ ەلدەرىمىزدىڭ دوستىعىن نىعايتۋ ءۇشىن قانشاما جىل ايانباي ەڭبەك ەتتى. قازاقستان مەن قىتاي اراسىنداعى قارىم-قاتىناستى دامىتۋعا زور ۇلەس قوسقان نۇرسۇلتان نازارباەۆتى قىتاي ەلى جاقسى بىلەدى جانە اسا قۇرمەتتەيدى.
حۋ تسزينتاو,
قىتاي حالىق رەسپۋبليكاسىنىڭ توراعاسى (2003-2013 جج.):
– تاۋەلسىزدىك جىلدارى ءسىزدىڭ باسشىلىعىڭىزبەن ەڭبەكسۇيگىش تە اقىلمان قازاقستان حالقى ءوزىنىڭ قاجىرلى دا جاسامپاز ەڭبەگىمەن دامۋدىڭ دۇرىس جولىن تابا ءبىلدى. بۇگىندە قازاقستاندا ەكونوميكا تۇراقتى دامۋ ءۇستىندە, حالىقتىڭ ءال-اۋقاتى ارتىپ, قوعامنىڭ الەۋمەتتىك-ساياسي تۇراقتىلىعى ساقتالىپ وتىر. سوڭعى جىلدارى قىتاي-قازاقستان قاتىناستارى بەلسەندى دامۋدا.
دونالد ترامپ,
اقش پرەزيدەنتى:
– مەن پرەزيدەنت مىرزاعا ەكسپو-2017 ارقىلى ەنەرگەتيكالىق قاۋىپسىزدىك ماسەلەلەرى بويىنشا جاھاندىق ۇنقاتىسۋدى ىلگەرىلەتۋدەگى كورەگەندىگى مەن كوشباسشىلىعى ءۇشىن ريزاشىلىعىمدى بىلدىرەمىن. ءوزارا قۇرمەت پەن ورتاق مۇددەلەرگە نەگىزدەلگەن اقش پەن قازاقستان اراسىنداعى ستراتەگيالىق ءارىپتەستىكتىڭ ءارى قاراي نىعايا تۇسەتىنىنە ءۇمىتتەنەمىن.
باراك وباما,
اقش پرەزيدەنتى
(2009-2017 جج.):
– پرەزيدەنت نازارباەۆ يادرولىق قارۋلاردى تاراتپاۋ ماسەلەلەرىندە الەمدەگى ۇلگىلى كوشباسشىلاردىڭ ءبىرى بولىپ تابىلادى. قازاقستان يادرولىق قارۋدان باس تارتىپ, قاۋىپسىزدىك پەن ەكونوميكالىق وركەندەۋگە قول جەتكىزۋدە ۇلگى بولا الادى. بۇل قادام قازاقستاندى وڭىردەگى تۇراقتى ەلدەردىڭ بىرىنە اينالدىرۋعا مۇمكىندىك بەردى.
دجوردج ۋوكەر بۋش,
اقش پرەزيدەنتى
(2001-2009 جج.):
– قۇرمەتتى پرەزيدەنت مىرزا! ءسىزدىڭ باسشىلىعىڭىزبەن قازاقستان جاپپاي قىرىپ-جوياتىن قارۋدى تاراتپاۋ ىسىندە الەمنىڭ جەتەكشى ەلدەرىنىڭ بىرىنە اينالدى. قۇراما شتاتتار, سونىمەن قاتار قازاقستانعا تەرروريزمگە قارسى جاھاندىق كۇرەستە كورسەتكەن دوستىعى مەن ىنتىماقتاستىعى ءۇشىن, سونىڭ ءىشىندە «قازباتتىڭ» يراكتاعى ءۇزدىك قىزمەتى ءۇشىن ريزاشىلىعىن ءبىلدىرەدى.
رەجەپ تايپ ەردوعان,
تۇركيا رەسپۋبليكاسىنىڭ پرەزيدەنتى:
– قازاقستان پرەزيدەنتى نۇرسۇلتان نازارباەۆ – ءوز زامانىنىڭ اسا كورنەكتى تۇلعاسى ءجانە تۇركى جۇرتىنىڭ اقساقالى. ءبىز نۇرسۇلتان نازارباەۆتىڭ حالىقارالىق باستامالارىنا ءارقاشاندا اشىقپىز ءارى زور قۇرمەتپەن قابىلدايمىز. قازاقستان پرەزيدەنتىنىڭ تۇركى الەمىندەگى بەدەلى بيىك, نۇرسۇلتان نازارباەۆتىڭ بارشا تۇركى حالىقتارىنىڭ باسىن بىرىكتىرىپ, باۋىرلاس تۇرىك ەلىمەن قارىم-قاتىناستى نىعايتۋعا سىڭىرگەن ەرەن ەڭبەگىن اتاپ وتپەۋگە بولمايدى.
ابدۋللا گۇل,
تۇركيا رەسپۋبليكاسىنىڭ پرەزيدەنتى (2007-2014 جج.):
– ءار كەلگەنىمدە گۇلدەنە ءتۇسكەنىنە كۋا بولىپ جۇرگەن استانا قالاسى – قازاقستاننىڭ ديناميزمى مەن پرەزيدەنت نازارباەۆ مىرزانىڭ كورەگەندىگىن بەينەلەيتىن ەڭ ۇلكەن تۋىندى. استانانىڭ قۇرىلىس جۇمىستارىنا ءتۇرىك فيرمالارى مەن جۇمىسشىلارىنىڭ دا ۇلەس قوسۋىن تۇرىك-قازاق ىنتىماقتاستىعىنىڭ ەڭ اسەم نىشاندارىنىڭ ءبىرى دەپ ءبىلەمىز.
يلحام اليەۆ,
ازەربايجان رەسپۋبليكاسىنىڭ پرەزيدەنتى:
– ايماقتاعى بەيبىتشىلىككە باعىتتالعان قازاقستان باسشىلىعىنىڭ جۇيەلى دە دانا ساياساتى كوبىنە قاۋىپسىزدىكتى نىعايتۋدى كوزدەيدى. قازاقستان تۇعىرى بيىك, تەگەۋرىنى مىقتى مەملەكەتكە اينالدى. سوندىقتان دا ايماقتىق ماسەلەلەردى شەشۋدە قازاقستاننىڭ ءرولى مەن ماڭىزى ارتا تۇسۋدە, ال ءبىز بۇل مەملەكەتتىڭ جەتىستىگىنە ارقاشان دا قۋانىشتىمىز. مەن قازاقستاننىڭ جاڭا ەلورداسىن كورىپ, قارقىندى قۇرىلىسپەن سالىنىپ جاتقان جاڭا قالانىڭ كوركىنە ءتانتى بولدىم.
شاۆكات ميرزيوەۆ,
وزبەكستان پرەزيدەنتى:
– ۋاقىت پەن تاعدىر ماعان الەمدىك دەڭگەيدەگى مەملەكەتتىك ءارى ساياسي قايراتكەر – قازاقستان رەسپۋبليكاسىنىڭ پرەزيدەنتى نۇرسۇلتان نازارباەۆپەن بىرگە جۇمىس ىستەۋ مۇمكىندىگىن سىيلادى. ول – وزىق ويلى ادام. قاشاندا تىڭ رەفورمالارعا ۇمتىلادى. ول – رەفورماتور. تاۋەلسىزدىك جىلدارى قازاقستاننىڭ قانداي جەتىستىكتەرگە جەتكەنىن كورۋگە بولادى. ەڭ باستىسى, قازاقستاندا بەيبىتشىلىك پەن تىنىشتىق ورناپ تۇر. رەفورمالار ءجۇرىپ جاتىر. قازاقستاننىڭ بۇگىنگى جەتىستىكتەرىنە بۇكىل الەم كۋا.
نازارباەۆپەن سويلەسكەن كەزدە ءوزىمدى جايلى سەزىنەمىن. ءاربىر كەزدەسۋدەن ساباق الامىن.
كوفي اننان,
بۇۇ باس حاتشىسى
(1997-2006 جج.):
– قازاقستان – وزگە دە تمد ەلدەرىمەن سالىستىرعاندا ەرەكشە مەملەكەت. وندا تۇراقتىلىق, بەيبىتشىلىك جانە ەكونوميكالىق ءوسىم بار. 1991 جىلى پرەزيدەنت نازارباەۆتىڭ باستاماسىمەن قازاقستان ءوز ەركىمەن يادرولىق قارۋدان باس تارتقاندا, ءبىز نازارباەۆتىڭ وسى ءبىر باستاماسىنا قايران قالعان بولاتىنبىز. ويتكەنى بۇۇ الەم ەلدەرىن يادرولىق قارۋدان باس تارتۋعا ۇندەپ كەلە جاتقانىنا 60 جىلدان استى. بىراق ءناتيجە جوق ەدى. كەيىنگى تابىستار – پرەزيدەنت نازارباەۆتىڭ ەڭبەگى.
پان گي مۋن,
بۇۇ باس حاتشىسى
(2007-2016 جج.):
– قازاقستان پرەزيدەنتىنىڭ كورەگەن ساياساتى بولماعاندا, بۇل وڭىردەگى حالىق ءالى كۇنگە دەيىن سىناقتاردان زارداپ شەگىپ وتىرۋى مۇمكىن ەدى. ءسىزدىڭ ورتالىق ازيادا يادرولىق قارۋدان ادا ايماق قۇرۋ باستاماڭىزبەن سولتۇستىك جارتى شاردا ونداي اۋماق تۇڭعىش رەت قۇرىلعانىن زور ريزاشىلىقپەن ايتا الامىن.
مارگارەت تەتچەر,
ۇلىبريتانيا پرەمەر-ءمينيسترى (1979-1990 جج.):
– قازىر جاھاندىق ساياساتتا 5-6 ءىرى جانە ىقپالدى ساياساتكەر بار. سولاردىڭ ءبىرى – نۇرسۇلتان نازارباەۆ. مەن وعان سەنەمىن جانە ونىڭ بارلىق باستامالارىن قولدايمىن.
لي كۋان يۋ,
سينگاپۋر رەسپۋبليكاسىنىڭ ءبىرىنشى پرەمەر-ءمينيسترى (1959-1990 جج.):
– پرەزيدەنت نازارباەۆ – كەڭەستىك ساياساتتاعى جارىق جۇلدىز, ءتۇرلى رەسپۋبليكالار اراسىنداعى ءىرى تۇلعا. قازاقستان ليدەرى – بەلگىلى دەڭگەيدە قاتال, ءتاجىريبەلى, جەدەل شەشىم قابىلداي الاتىن ادام. وداقتىڭ باسقا رەسپۋبليكالارىنىڭ ءوزى مويىنداعان جىلى شىرايلى, تالانتتى جانە تاباندى باسشى. نازارباەۆ رەسپۋبليكانى باسقارىپ تۇرعاندا, قازاقستاننىڭ تابىستارعا جەتۋ ءمۇمكىندىگى اناعۇرلىم مول بولادى.
ماحاتحير موحامماد, مالايزيانىڭ 1981-2003 جج. جانە قازىرگى پرەمەر-ءمينيسترى:
– ءبىز ەلدە تۇراقتىلىق بولعاندا عانا ونىڭ دامي الاتىنىنا سەنەمىز. ال قازاقستان وڭىردەگى ەڭ تۇراقتى ەل بولىپ تابىلادى. پرەزيدەنت قازاقستاننىڭ الەمدەگى باسەكەگە بارىنشا قابىلەتتى 50 ەلدىڭ قاتارىنا كىرۋىن ماقسات ەتىپ قويدى. مەن پرەزيدەنت مىرزانى تالاي جىلدان بەرى جەكە بىلەتىندىكتەن, ونىڭ وسى ماقساتقا قول جەتكىزۋ ءۇشىن بار كۇش-جىگەرىن جۇمسايتىنىنا جانە وعان قول جەتكىزەتىنىنە سەنىمدىمىن. مالايزيالىقتارعا قازاقستان تۋرالى كوپ ءبىلۋ كەرەك. مەن قازاقستان مەن مالايزيا اراسىنداعى قارىم-قاتىناستاردى دامىتۋعا پرەزيدەنت ايرىقشا ۇلەس قوستى دەپ سانايمىن.
انگەلا مەركەل,
گفر كانتسلەرى:
– جاۋاپتى مىندەتتەردى ودان ءارى اتقارۋىڭىزدا سىزگە زور تابىستار مەن ساتتىلىك تىلەيمىن. ەكونوميكالىق, قوعامدىق جانە ساياسي رەفورمالاردى جۇرگىزۋدە قازاقستان بۇدان بىلاي دا گەرمانيا تاراپىنان بولاتىن قولداۋعا سەنىم ارتا الاتىن بولادى.
جاك شيراك,
فرانتسيا پرەزيدەنتى
(1995-2007 جج.):
– مەن وزىڭىزبەن كەزدەسۋلەرىمدى ءاردايىم ۇلكەن ىلتيپاتپەن ەسكە الامىن.
مەن 1991 جىلى قازاقستاندا بولعان وزگەرىستەردى فرانتسيانىڭ ماڭىزدى ءارى شەشۋشى وزگەرىستەر رەتىندە باعالايتىنىن ايتقىم كەلەر ەدى. الماعايىپ ءارى اسا كۇردەلى جاعدايدا ءسىزدىڭ ەلىڭىز ءوزىنىڭ ۇلتتىق قۇندىلىقتارى مەن ۇزاق تاريحىنا ادالدىعىن ساقتاي وتىرىپ, سونىمەن قاتار دەموكراتيانىڭ ادامزات بالاسىنا ورتاق قاعيداتتارى مەن قۇقىقتىق مەملەكەتكە بەيىلدىگىن پاش ەتەتىن مەملەكەت ورناتۋدىڭ اينىماس جولىنا ءتۇستى. 15 جىلدىڭ ىشىندە قازاقستان تۇراقتى ينستيتۋتتارى مەن سەرپىندى ەكونوميكاسى بار ەلگە اينالدى.
سيلۆيو بەرلۋسكوني,
يتاليا پرەمەر-ءمينيسترى (1994-1995, 2001-2006,
2008-2011 جج.):
– ءسىزدى قازاقستان پرەزيدەنتى قىزمەتىنە قايتا سايلانۋىڭىزبەن شىن جۇرەكتەن قۇتتىقتايمىن. سايلاۋدىڭ ءناتيجەسى – قازاقستان حالقىنىڭ سىزگە دەگەن جوعارى سەنىمى مەن سۇيىسپەنشىلىگىنىڭ كورىنىسى. سىزگە قازاقستاندىقتاردىڭ يگىلىگى جولىندا تابىستى ەڭبەك جانە حالىقارالىق ارەنادا ءسىزدىڭ ەلىڭىزدىڭ بەدەلى مەن ءرولى ودان ءارى ارتا بەرۋىن تىلەيمىن.
حۋان كارلوس ءى,
يسپانيا كورولى
(1975-2014 جج.):
– ءسىزدىڭ ەلىڭىز وسى جىلدار ىشىندە ايتارلىقتاي ناتيجەلەرگە جەتتى. ءبىزدىڭ بىرلەسكەن جۇمىسىمىزدىڭ ارقاسىندا ءبىزدىڭ مەملەكەتتەرىمىز اراسىنداعى قارىم-قاتىناس دوستىق پەن ىنتىماقتاستىق رۋحىندا دامىپ وتىرعانى مەنى ەرەكشە قۋانتادى. مەن ءسىزدىڭ كۇش-قۋاتىڭىزدىڭ ارقاسىندا قازاقستان ومىرىندەگى جاڭا كەزەڭ تاعى ۇلكەن پروگرەسپەن جانە حالىقتىڭ ءال-اۋقاتىنىڭ ارتۋىمەن بەلگىلى بولادى دەپ سەنەمىن.
كان ناوتو,
جاپونيا پرەمەر-ءمينيسترى (2010-2011 جج.)
– ەلىڭىز ءسىزدىڭ باسشىلىعىڭىزبەن ءارى قاراي دامي تۇسەدى جانە ورتاازيالىق ايماقتىڭ تۇراقتىلىعىنا, گۇلدەنۋىنە ۇلكەن ۇلەس قوسادى دەگەن سەنىمدەمىن. جاپونيانىڭ شىعىسىندا بولعان زۇلمات زىلزالاعا بايلانىستى شىن جۇرەكتەن بىلدىرگەن كوڭىل ايتۋلارىڭىز ءۇشىن جانە قازاقستان رەسپۋبليكاسىنىڭ گۋمانيتارلىق كومەك كورسەتۋ تۋرالى ۇسىنىسى ءۇشىن العىسىمدى بىلدىرەمىن.
