سانالى عۇمىرىنىڭ جارتى عاسىرعا جۋىعىن جۋرناليستيكا سالاسىنا ارناپ كەلە جاتقان ج.سۇلەيمەنوۆتى رەسپۋبليكا جۇرتشىلىعى ماعجانتانۋشى رەتىندە دە جاقسى بىلەدى. قازاقستان جازۋشىلار وداعىنىڭ وبلىستىق فيليالىنىڭ ءتوراعاسى, «ماعجان» ادەبي-كوركەم كوپشىلىك جۋرنالىنىڭ باس رەداكتورى, «قىزىلجار-اقپارات» جشس-نىڭ ديرەكتورى رەتىندە التى الاشتىڭ اقيىق اقىنىنىڭ ءومىرى مەن شىعارماشىلىعى تۋرالى قازاق, ورىس ءتىلدەرىندە بىرنەشە جيناق, ەنتسيكلوپەديا شىعاردى. «قوجابەرگەن», «ءماڭگىلىك ەلدىڭ ماڭگىلىك ماقتانىشى», «داۋىلپاز بابا قوجابەرگەن» كىتاپتارىن باسپاعا ازىرلەدى. ونداعان اڭگىمە مەن پوۆەست, ەسسەلەر جيناقتارىنىڭ اۆتورى.
القالى باسقوسۋدى عىلىم جانە يننوۆاتسيالار جونىندەگى پرورەكتور, تاريح عىلىمدارىنىڭ دوكتورى اقمارال ىبىراەۆا جۇرگىزىپ, العاشقى ءسوزدى ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ پروفەسسورى سەرىك نەگيموۆكە بەردى. تانىمال عالىم جاراسباي قابدوللا ۇلىنىڭ ءبىر بويىنا توعىستىرعان ازاماتتىق قاسيەتتەرى ىشىنەن پارلامەنت ءماجىلىسىنىڭ دەپۋتاتى بولعان كەزەڭدە ءتىل, ءدىل ءۇشىن بولعان كۇرەستە ار-نامىستان تايماعان ماقساتكەرلىك, رۋحاني بيىك, ويى تەرەڭ بولمىسىن دارالاپ ايتتى. فيلولوگيا عىلىمدارىنىڭ دوكتورى زينايدا تاباكوۆا, قازاق فيلولوگياسى كافەدراسىنىڭ مەڭگەرۋشىسى جانباي قادىروۆ, بالا كەزدەن بەرگى دوسى, اقىن توقتار زىكىرين, اۋىلداسى بالدىرعان ءىلياسوۆ, شاكىرتى, «سولتۇستىك قازاقستان» گازەتىنىڭ باس رەداكتورى ەرباقىت امانتاي, تاعى باسقالارى ەل سەنىمىنە لايىق تۇلعانىڭ شىعارماشىلىعى, جاس جۋرناليستەرگە بەرگەن ونەگەسى مەن تالىمگەرلىك قامقورلىعى جايلى كەڭىنەن تولعانا سىر شەرتتى. جۋرناليستيكا ءبولىمىنىڭ تۇلەكتەرى جازۋشىنىڭ اڭگىمەلەرىن مانەرلەپ وقىپ, قۇلاق قۇرىشىن قاندىردى.
عىلىمي كەڭەستىڭ شەشىمىمەن جاراسباي قابدوللا ۇلىنا «قۇرمەتتى پروفەسسور» اتاعى بەرىلدى.
سولتۇستىك قازاقستان وبلىسى
