قازاقپارات
«وتانىمىز – ماڭگىلىك ەلدىڭ بەدەلىن ارتتىرا بەرۋ – سەندەرگە ارتىلعان زور ءۇمىت. سوندىقتان, جاستارىمىز ۇلتتىق قۇندىلىقتارىمىزعا ادال بولىپ, قازاقستاننىڭ جەتىستىكتەرىن ەسەلەي بەرەدى دەپ مەن كامىل سەنەمىن», دەدى قاسىم-جومارت توقاەۆ.
پرەزيدەنت جاقسى داستۇرگە اينالعان «ايبىن» اسكەري-پاتريوتتىق جيىنى – وتانشىل جاستاردى ادال قىزمەت ەتۋگە, ەل قورعانى بولۋعا تاربيەلەيتىن ءدال وسىنداي بىرەگەي الاڭ ەكەنىنە توقتالدى.
«اسكەري-پاتريوتتىق قوزعالىستىڭ باستى ماقساتى – وزدەرىڭىز سياقتى جالىندى جاستاردىڭ باسىن قوسىپ, ەل دامۋىنا قاجەتتى ماڭىزدى جۇمىستارعا بەلسەنە ارالاستىرۋ, كۇش جۇمىلدىرۋ. وتان ءۇشىن ايانباي ەڭبەك ەتۋ – بارشامىزعا ورتاق ماقسات», دەدى مەملەكەت باسشىسى.
سونداي-اق قاسىم-جومارت توقاەۆ جاستاردىڭ باستى باعدارىنا اينالۋى ءتيىس قۇندىلىقتاردى اتاپ ءوتتى.
«جاسامپازدىق, بەيبىتشىلىك پەن كەلىسىم, حالقىمىزدىڭ بىرلىگى, وتانعا دەگەن سۇيىسپەنشىلىك جانە بارىمىزگە ورتاق تاعدىر جولى – ءبىزدىڭ حالقىمىزدى بىرىكتىرەتىن قۇندىلىقتار. بۇل قۇندىلىقتار – جاستاردىڭ باستى باعدارىنا اينالۋى ءتيىس», دەي كەلە پرەزيدەنت رەسپۋبليكالىق اسكەري-پاتريوتتىق جاستار جيىنىن اشىق دەپ جاريالادى.
