ەلىمىزدە قازىر ءتۋريزمدى دامىتۋ جۇمىستارى قولعا الىنۋدا, بۇل باعىتتا نەگىزىنەن بىتكەن ىستەن بىتىرەر ءىس كوپ دەۋگە بولادى. ءتۋريزمدى تۇلەتۋ بارىسىندا ءالى تالاي تىڭ يدەيالار تۋىنداپ, نەبىر قىزىقتى جوبالاردىڭ تۇساۋىن كەسۋى عاجاپ ەمەس جانە بۇل الىس-جاقىن بولاشاقتىڭ ەنشىسىندەگى ولجالارىمىز دەي تۇرايىق, ءتىپتى ول بۇگىنگى جاس بۋىننىڭ قولىمەن اتقارىلۋى دا ابدەن مۇمكىن.
دالاسى سۇلۋ كورىنىستەرگە تولعان, تىلسىم سىرلارى تۇنعان ماڭعىستاۋ – قازاقستاننىڭ تۋريستىك ايماعى سانالاتىن ۇزدىك وندىققا ەنەدى, ياعني تۋريستىك الەۋەتى جوعارى ايماق قاتارىندا.
الايدا توعىز جولدىڭ تورابىنا اينالعان, ءتورت تاراپتىڭ كەڭ ءدالىزى ماڭعىستاۋدا اتالمىش سالا تىنىسىن كەڭىنەن الىپ, قۇلاشىن كەڭگە جايىپ كەتە العان جوق. ءال جەتپەي مە, الەۋەت جەتپەي مە, الدە قاراجاتتان قىسىلۋ بار ما, جوق بىلىك ولقى سوعىپ كەلە مە؟ ايتەۋىر, باردى ۇقساتۋدا دۇرك كوتىرىلىپ كەتە الماي تۇرعانىمىز اقيقات.
اقتاۋداعى وڭىرلىك كاسىپكەرلەر پالاتاسىندا وتكەن باسقوسۋدا كوپتىڭ كوكەيىندەگى وسى ماسەلە تىلگە تيەك بولدى. راسىندا, عاجاپ جەرلەرگە ءتۋريزمدى دامىتۋعا نە كەدەرگى؟ ساياحاتشىلاردى ءولكەگە كوپتەپ تارتۋ ءۇشىن قانداي جوبالار جۇزەگە اسۋى كەرەك؟
– اقتاۋ قالاسى مەن قۇرىق پاروم كەشەنى ارالىعىن قامتيتىن اۋماقتاعى ءتۋريزمدى دامىتۋعا رەسپۋبليكالىق بيۋدجەتتەن 18 ملرد تەڭگە ءبولىندى. سونىمەن قاتار جاعاجاي دەمالىسىن دامىتۋ باستى نازاردا. وعان وسىنداعى ينفراقۇرىلىم جاساقتالىپ, اقتاۋ مەن «الاۋ» لاگەرى جولدارى جوندەلەتىن بولادى, – دەيدى «Kazakh Turism» ۇلتتىق كومپانياسىنىڭ باسقارما توراعاسى ءو.بيساقاەۆ.
جاعاجاي ءتۋريزمىن دامىتۋ جانە بالالار دەمالىسىن, ياعني بالالار ءتۋريزمىن دامىتۋ – وڭىردە ءجيى ايتىلىپ كەلە جاتقان جاعداي. قازىرگى تاڭدا ءتۋريزمدى دامىتۋعا قاتىستى جاسالىپ جاتقان جۇمىستاردىڭ كوبى وسى باعىتتارعا سايادى.
«اتامەكەن» ۇكپ باسقارما توراعاسىنىڭ ورىنباسارى و.ورداباەۆتىڭ ايتۋىنشا, ماڭعىستاۋ ءتۋريزمىن دامىتۋ ءۇشىن الدىمەن تۋريستەردى كۇتىپ الۋ تالاپتارىن جەتىلدىرۋ كەرەك. اۋەجاي مەن تەمىر جول ۆوكزالىنىڭ دايىندىعى قانداي؟ سونداي-اق اۆتوكولىك جولدارى بويىندا تۋريستەرگە سەرۆيستىك قىزمەت كورسەتۋ قاي دەڭگەيدە؟ «ساياحاتشىلاردى قاراپايىم شايحانامەن ەمەس, قىزىقتى, تىڭ جوبالارمەن تارتۋدى ويلاستىرۋ كەرەك. «جوبالاۋ ءوفيسى» جوباسى وسى جايتتاردى جۇزەگە اسىرۋعا مۇمكىندىك بەرەدى» دەيدى ول. شىندىعىندا, الىس جولدار بويىنداعى سەرۆيستىك قىزمەت كورسەتەتىن ورىنداردىڭ سانى دا, ساپاسى دا سىن كوتەرەتىندەي ەمەس. تىڭ جوبالار بىلاي تۇرسىن, ايتساڭ ۇيات, ايتپاساڭ بولمايتىن ەڭ قاراپايىم نارسە – اجەتحانالاردىڭ احۋالى-اق ادام شوشىرلىق حالدە. بۇل «اركىم باراتىن جەر» – نەگىزى بارلىق نىساندا, بارلىق ورىندا, ءتىپتى جول بويلارىندا دا جاڭعىرىپ, تازالىق پەن مادەنيەتتىڭ ناقتى كورىنىسى بولا السا عوي!
دوڭگەلەك ۇستەلدە تۋريستىك ايتاقتارعا حالىقتى تارتۋ ءۇشىن ىشكى اۋە قاتىناستارىن وڭتايلاندىرۋ ۇسىنىلدى. مەكتەپ دەمالىسى ماۋسىمىندا بالالار بيلەتتەرىن سۋبسيديالاۋ, ءبىر ەرەسەك ادامعا ەكى بالانى تەگىن الىپ ءجۇرۋ جاعدايىن قاراستىرۋ تۋراسىندا پىكىر ايتىلدى. سوندا وتباسى بيۋدجەتى 30 پايىزعا ۇنەمدەلىپ, حالىق شەتەلگە ەمەس, وتاندىق تۋريستىك جەرلەرگە ىنتا ءبىلدىرەدى ەكەن. تۋر-پوليتسيا قىزمەتىن قۇرۋ, اۆتو كەرۋەن, مەديتسينالىق تۋريزم, بالالار ءتۋريزمى, وزگە دە جۇمىستاردى دامىتۋ ۋاقىت ەنشىسىندە جانە مۇنىڭ ءبارى قازاقستاندى تۋريستىك تارتىمدىلىعى بار 50 ەلدىڭ قاتارىنا قوسۋ مىندەتىن جۇزەگە اسىرۋعا كومەكتەسپەك.
– يران مەن تۇرىكمەنستان سياقتى كورشىلەس ەلدەرگە رەيس اشا الماي وتىرمىز. نيەت بىلدىرگەن كومپانيالارعا رۇقسات بەرىلمەدى. كورشى ازەربايجاندا بۇل ماسەلە جوق. يراندىق تۋريستەر باكۋدە ۆيزاسىز ءجۇر. باكۋگە تۋريستەر تولاسسىز كەلەدى. قوسىمشا رەيستەر ۇيىمداستىرىپ جاتامىز. بىزگە نەگە سونداي جاعداي جاساماسقا؟ سونداي-اق تۋريستەردى تىركەۋ اۋەجاي عيماراتىندا بولۋى كەرەك, ولار كوپ ۋاقىتىن قۇجاتتارمەن اۋرە-سارساڭعا جۇمساماۋى ءتيىس. ىشكى رەيستەردى سۋبسيديالاۋ جەدەلدەتىپ قولعا الىنسا ەكەن. جاز مەزگىلىندە اتىراۋدان كۇنىنە 4 رەيس جاسالادى. وسىنداي سۇرانىس ەلىمىزدىڭ بارلىق ايماعىنان, جاقىن شەتەلدەردەن دە تۇسەرىنە سەنىم مول, – دەيدى اقتاۋ حالىقارالىق اۋەجايىنىڭ ديرەكتورى ە.جولداسوۆ.
باسقوسۋدىڭ ورتاق ايتارى ۇكىمەتكە جولدانباق. مۇمكىن, وڭىردە كەلەشەكتى كۇتپەي, قازىر-اق شەشىلۋ جولارى تابىلىپ تۇرعان ءتۋريزمدى دامىتۋعا قاتىستى ءىرىلى-ۇساقتى ماسەلەلەردىڭ بىرقاتارى شەشىمىن تاۋىپ قالار دەگەن ويدامىز.
ماڭعىستاۋ وبلىسى
