ءىس-شاراعا ءماجىلىس دەپۋتاتتارى, مينيسترلىكتەردىڭ باسشىلارى, ورتالىق مەملەكەتتىك ورگانداردىڭ, قحا قۇرىلىمدارىنىڭ, بۇقارالىق اقپارات قۇرالدارىنىڭ وكىلدەرى قاتىستى.
وتىرىستى اشقان ءماجىلىستەگى قازاقستان حالقى اسسامبلەياسى دەپۋتاتتىق توبىنىڭ جەتەكشىسى ساۋىتبەك ابدراحمانوۆ جيىننىڭ ءمان-ماعىناسىنا توقتالىپ ءوتتى.
– پارلامەنت ماجىلىسىندە قازاقستان حالقى اسسامبلەياسىنىڭ دەپۋتاتتىق توبى قۇرىلعان. ول وسىنداي ەلەۋلى, ماڭىزدى ماسەلەلەر بويىنشا وتىرىستاردى وتكىزىپ وتىرادى. بۇگىنگى وتكىزىپ وتىرعان وتىرىسىمىزدىڭ تاقىرىبى – ەل پرەزيدەنتى قاسىم-جومارت توقاەۆتىڭ سايلاۋالدى باعدارلاماسىنان تۋىندايتىن ءبىزدىڭ دەپۋتاتتىق توپتىڭ مىندەتتەرى. اسسامبلەيا توراعاسىنىڭ ورىنباسارى جانسەيىت تۇيمەباەۆتىڭ بايانداماسى, شىعىپ سويلەگەن دەپۋتاتتاردىڭ سوزدەرى, ءتيىستى مينيسترلىكتەردەن كەلگەن وكىلدەرگە قويىلعان سۇراقتار دەپۋتاتتىق توپتىڭ مۇشەلەرى جاۋاپكەرشىلىكتى سەرگەك سەزىنەتىنىن كورسەتىپ وتىر, – دەدى دەپۋتات.
سونىمەن قاتار ەلدەگى قالىپتاسقان احۋالعا ءارىپتەستەرىنىڭ نازارىن اۋداردى.
– كوپ دۇنيە وزگەرەدى, قوعامدا ادىلەت بۇرىنعىدان ارتا تۇسەدى دەپ كۇتىپ وتىرمىز. ونىڭ ناقتى جولدارى – قوعامنىڭ بيلىككە سەنىمىن ارتتىرۋ ماسەلەسى وتە كوكەيكەستى بولىپ تۇر, – دەدى س.ابدراحمانوۆ.
وتىرىستا نەگىزگى باياندامانى جاساعان قازاقستان حالقى اسسامبلەياسى توراعاسىنىڭ ورىنباسارى – حاتشىلىق مەڭگەرۋشىسى جانسەيىت تۇيمەباەۆ ءوز سوزىندە پرەزيدەنت قاسىم-جومارت توقاەۆتىڭ ۇلىقتاۋ ءراسىمىندە سويلەگەن ءسوزى قازاقستاننىڭ جاڭا تاريحى باستاۋ الار نۇكتەسى بولعانىن, وندا سايلاۋ الدىنداعى «يگىلىك – بارلىعى ءۇشىن! ساباقتاستىق. ادىلدىك. پروگرەسس» دەگەن تۇعىرناماسىنىڭ ەرەجەلەرى عانا ەمەس, ولارعا قول جەتكىزۋدىڭ نەگىزگى تاسىلدەرى دە بەلگىلەنگەنىن اتاپ ءوتتى.
سونىمەن قاتار مەملەكەت باسشىسىنىڭ ماڭىزدى ماقساتى – قوعامنىڭ بىرلىگىن قامتاماسىز ەتۋ جانە ءاربىر ازاماتتىڭ قۇقىعىن قورعاۋ ەكەنىن اتاپ ءوتتى.
– وتكەن پرەزيدەنتتىك سايلاۋدىڭ ءساتتى وتۋىنە قازاقستان حالقى اسسامبلەياسىنىڭ بارلىق قۇرىلىمدارى, سونىڭ ىشىندە ەتنومادەني بىرلەستىكتەر, اسسامبلەيانىڭ ءماجىلىستەگى دەپۋتاتتارى بەلسەنە ۇلەس قوسقانىن ايتا كەتكەن ءجون. ەتنومادەني ورتالىقتار ق.توقاەۆتىڭ كانديداتۋراسىن قولداۋ ماقساتىندا «ءبىزدىڭ تاڭداۋىمىز – بىرلىك پەن كەلىسىم!» اتتى جالپىرەسپۋبليكالىق ەلەكتورالدىق اكتسياسىن جۇزەگە اسىردى. قازاقستان حالقى اسسامبلەياسى Nur Otan پارتياسىنىڭ رەسپۋبليكالىق ءجانە وڭىرلىك قوعامدىق شتابتارىنا ءوز قاتارىنان 200-گە جۋىق بەدەلدى تۇلعاسىن كانديداتتىڭ سەنىمدى وكىلى رەتىندە جىبەردى. اسسامبلەيا بۇدان بولەك, ەل بىرلىگىن نىعايتۋعا باعىتتالعان 270-تەن استام ءتۇرلى ءىس-شارالار مەن مادەني باعدارلامالار ۇيىمداستىردى. اسسامبلەيا قۇرىلىمدارى مەن وكىلدەرى اقپاراتتىق سالادا دا بىرقاتار جۇمىس اتقاردى, – دەدى ج.تۇيمەباەۆ.
قحا توراعاسىنىڭ ورىنباسارى كاسىپكەرلەر قاۋىمداستىعى تاراپىنان اسسامبلەيا جۇمىسىنىڭ الەۋمەتتىك باعىتىن بەلسەندى دامىتۋعا, جاستارمەن جانە ۆولونتەرلىك قوزعالىستارمەن جۇمىستى كۇشەيتۋگە, بارلىق قولجەتىمدى فورماتتار ارقىلى قازاقستاندىق قوعام بىرلىگىنىڭ قۇندىلىقتارىن ىلگەرىلەتۋگە, قازاقستان حالقى اسسامبلەياسى قىزمەتىنىڭ جاڭا تاسىلدەرىن ازىرلەۋگە شاقىردى.
بايانداماشى, سونداي-اق اسسامبلەيا بۇدان بولەك, ەل بىرلىگىن نىعايتۋعا باعىتتالعان 270-تەن استام ءتۇرلى ءىسشارالار مەن مادەني باعدارلامالار ۇيىمداستىرعانىنا توقتالدى.
– جالپى العاندا, اسسامبلەيا اتقارعان جۇمىستار قازاقستانداعى ەتنوس وكىلدەرىنىڭ ءبىراۋىزدان سايلاۋعا قاتىسىپ, ءوز تاڭداۋىن لايىقتى جاساۋىنا وڭ ىقپال ەتكەنى ءسوزسىز. ويتكەنى ەلەكتورالدى اكتسيالار ارقىلى ەل تۇرعىندارى مەن بارلىق ەتنوستىق توپتار اۋىزبىرشىلىك تانىتىپ, ەلباسى نۇرسۇلتان نازارباەۆ سالعان سارا جولدى تاڭداپ, Nur Otan پارتياسى ۇسىنعان كانديدات قاسىم-جومارت توقاەۆقا قولداۋ ءبىلدىردى.
وتىرىستا ءماجىلىس دەپۋتاتتارى قۋانىش سۇلتانوۆ, البەرت راۋ, بەيبىت مامراەۆ, ماگەررام ماگەرراموۆ, ناتاليا جۇمادىلداەۆا, شايماردان نۇرىموۆ ءسوز سويلەدى.
ال جيىندى قورىتىندىلاعان ءماجىلىس توراعاسىنىڭ ورىنباسارى ۆلاديمير بوجكو ءوز سوزىندە مەملەكەت باسشىسى قاسىم-جومارت توقاەۆتىڭ سايلاۋالدى تۇعىرناماسىندا جانە ۇلىقتاۋ راسىمىندە ايتىلعان باستامالارىن ىلگەرىلەتۋگە ءجانە تۇسىندىرۋگە بەلسەندى قاتىسۋ قاجەتتىگىنە قحا دەپۋتاتتىق توبى مۇشەلەرىنىڭ نازارىن اۋداردى.
