مەيمانمەن كەزدەسۋ بارىسىندا سەنات باسشىسى جاپونيا يمپەراتورى نارۋحيتونىڭ تاققا وتىرۋىمەن جانە «رەيۆا» ءداۋىرىنىڭ باستالۋىمەن جاپون حالقىن قۇتتىقتادى. «رەيۆا – ۇيلەسىم تابۋ, ول بۇكىل ادامزاتتىڭ ارمانى. ۇيلەسىم ءداۋىرى جانە ونىڭ كۇش-قۋاتى بۇكىل الەمگە تارالعانىن قالار ەدىم. جاپونيا حالقىنىڭ تابىسقا جەتۋىنە جانە وركەندەۋىنە تىلەكتەسپىن», - دەدى د.نازارباەۆا.
سەنات باسشىسى قازاقستاننىڭ تۇڭعىش پرەزيدەنتى – ەلباسىنىڭ 2016 جىلعى جاپونياعا ساپارى تۋرالى پىكىرلەرىمەن ءبولىستى جانە سول ساپار بارىسىندا «كەڭەيتىلگەن ستراتەگيالىق ارىپتەستىك» مارتەبەسى بەكىتىلگەن جانە قابىلدانعان ماڭىزدى ساياسي قۇجاتتار قازاقستان مەن جاپونيا قارىم-قاتىناستارىنا جاڭا سەرپىن بەرەتىنىنە سەنىم ءبىلدىردى.
تاراپتار سونداي-اق ەكىجاقتى ءوزارا ءىس-قيمىلداعى ەكونوميكالىق, گۋمانيتارلىق جانە مادەني ماسەلەلەردى تالقىلادى. سەنات باسشىسى ەكو جانە ەتنو ءتۋريزمنىڭ ەرەكشەلىكتەرى تۋرالى ايتا كەلىپ جاپون تۋريستەرىن قازاقستانعا شاقىردى. «تىكەلەي اۋە قاتىناسىن اشۋ جاپون تۋريستەرىنىڭ سانىن ارتتىرادى دەپ ۇمىتتەنەمىن. سونداي-اق, ءبىزدىڭ ەل تۋرالى كوبىرەك حاباردار بولۋ ءۇشىن تۋريستىك اگەنتتىكتەردىڭ قاتىسۋىمەن بىرلەسكەن كونفەرەنتسيالار ۇيىمداستىرۋ قاجەت», - دەدى د.نازارباەۆا.
جاپونيا ەلشىسى سەنات توراعاسىنا ءوز جوسپارلارى تۋرالى ايتا كەلىپ, قازاقستانعا اكەلىنەتىن جاپون ينۆەستيتسياسىنىڭ كولەمىن ارتتىرۋ – باستى مىندەتتەردىڭ ءبىرى ەكەنىن اتاپ ءوتتى. د.نازارباەۆا وسىعان بايلانىستى شەتەلدىك ينۆەستورلاردى قورعاۋدىڭ قولايلى تەتىكتەرى, جەڭىلدەتىلگەن سالىق ءتارتىبى, اعىلشىن قۇقىعى مەن تاۋەلسىز قارجى سوتىنىڭ قاعيدالارىنا نەگىزدەلگەن نۇر-سۇلتانداعى حالىقارالىق قارجى ورتالىعىنىڭ جۇمىسى تۋرالى جان-جاقتى ايتىپ بەردى. «شيكىزات ەكسپورتىنان الشاقتاپ, قوسىلعان قۇنى جوعارى ءونىمدى قايتا وڭدەۋگە ۇمتىلۋ قاجەت», - دەدى سەنات توراعاسى.
