ا. ايماعامبەتوۆتىڭ ايتۋىنشا, 2019 جىلى تەست تاپسىرمالارىنىڭ بازاسى جاڭارتىلدى. سۇراقتار فۋنكتسيونالدىق ساۋاتتىلىققا, لوگيكالىق ويلاۋ دەڭگەيىن انىقتاۋعا, بازالىق قۇزىرەتتىلىكتەر مەن تۇسىنىككە باعدارلانعان.
«ءبىز ءۇشىن ماڭىزدىلاردىڭ ءبىرى – سۇراقتاردىڭ مازمۇنىن جاڭارتۋ. سۇراقتار قانداي دا ءبىر جاتتاندى اقپاراتتى قايتالاۋعا, ەستە ساقتالعان بەلگىلى ءبىر فاكتىلەردى ەسكە تۇسىرۋگە باعىتتالماۋى ءتيىس. وسى تەست ارقىلى ونىڭ ساۋاتتىلىعىن, بالانىڭ باعدارلانۋىن, مەكتەپتە العان ءبىلىمىن قانشالىقتى پايدالانا الاتىنىن ءتۇسىنۋ كەرەك. تەست سۇراقتارىنىڭ بازاسى, باستى نازار جانە مازمۇنى وزگەرتىلەدى», — دەدى ءبىلىم جانە عىلىم ءمينيسترى.
ا. ايماعامبەتوۆتىڭ ايتۋىنشا, سۇراقتاردى قۇراستىرۋ ءۇشىن ەڭ تاجىريبەلى ءارى الدىڭعى قاتارداعى پەداگوگتار تارتىلادى. ازىرلەۋشىلەر مەن ساراپشىلار وبلىستىق, قالالىق ءبىلىم بەرۋ باسقارمالارى,تىلدەردى دامىتۋ باسقارمالارى, تىلدەرگە وقىتۋدىڭ وڭىرلىك ورتالىقتارى, بىلىكتىلىكتى ارتتىرۋ ينستيتۋتتارى, وقۋ-ادىستەمەلى بىرلەستىكتەر, كوللەدجدەر, جوو-لار ۇسىنعان ءبىلىم بەرۋ ۇيىمدارىنىڭ قىزمەتكەرلەرىنەن, مۇعالىمدەر مەن وقىتۋشىلاردان ىرىكتەپ الىنادى.
سونىمەن قاتار, ءبىلىم جانە عىلىم ءمينيسترى تەستىلەردە ماعىناسى تۇسىنىكسىز نەمەسە تۇلەكتەردىڭ پىكىرىنشە قاتە جاۋاپتار بولسا, اپەللياتسيا راسىمىنە جۇگىنۋ كەرەك ەكەنىن اتاپ ءوتتى.
اپەللياتسيالىق كوميسسي ءاربىر ۇبت وتەتىن پۋنكتتە قۇرىلعان, سونىمەن قاتار رەسپۋبليكالىق اپەللياتسيالىق كوميسسيا قۇرىلدى. كوميسسيا قۇرامىنا تاجىريبەلى ماماندار ەنگىزىلگەن, ولار شاعىمدى قاراستىرۋدىڭ وبەكتيۆتىلىگىن قاداعالايدى.
«ونداي جاعدايلار بار, ءتىپتى, عىلىمدا بەلگىلى ءبىر كۇندەر, وقيعالار بويىنشا بىرنەشە مالىمەت بار. سوندىقتان كەيدە تۇلەكتەر اپەللياتسياعا كەلىپ, ءتيىستى دەرەك كوزىن كورسەتىپ, دالەلدەپ جاتادى. كوميسسيا قاراپ راستاعان سۇراقتار سانى بىرنەشە ەسە تومەندەگەنىن اتاپ وتكىم كەلەدى», — دەدى ا. ايماعامبەتوۆ.
2019 جىلى ۇبت-عا قاتىسۋعا ءوتىنىش بىلدىرگەن مەكتەپ تۇلەكتەرىنىڭ جالپى سانى 96 380 ەكەنىن ايتا كەتكەن ءجون, ونىڭ ىشىندە 73 389 تۇلەك تەستىلەۋدى قازاق تىلىندە, 22 823-ءى ورىس تىلىندە تاپسىراتىن بولادى, بۇل 75:25 ارا قاتىناسىن قۇرايدى. ۇبت 20 ماۋسىم مەن 5 شىلدە ارالىعىندا 9 اعىممەن 169 ۇبت وتكىزۋ پۋنكتەرىندە وتكىزىلەدى. تەستىلەۋ 5 ءپان: ءبىلىم بەرۋ باعدارلامالارىنىڭ تاڭدالعان توبىنا سايكەس 3 مىندەتتى جانە 2 بەيىندى ءپان بويىنشا جۇرگىزىلەدى. بارلىعى 120 تەست تاپسىرماسى بولادى. ەڭ جوعارعى بالل — 140.
