مىسىر تاريحىنداعى بەسىنشى, دەموكراتيالىق سايلاۋ ارقىلى بيلىككە كەلگەن العاشقى پرەزيدەنت اتانعان مۇحاممەد مۋرسي 1951 جىلى دۇنيەگە كەلگەن. جاس كۇنىندە «مۇسىلمان باۋىرلار» قوزعالىسىنا قاتىسقان قايراتكەر 2000-2005 جىلدارى مىسىر پارلامەنتىنىڭ دەپۋتاتى بولدى. 2011 جىلى حوسني مۋباراكقا قارسى ەرەۋىلدەرگە بەلسەنە قاتىسقان ساياساتكەر 2012 جىلى ەلدەگى پرەزيدەنت سايلاۋىنىڭ ەكىنشى تۋرىندا 51,73 پايىز داۋىس جيناپ, ەل پرەزيدەنتى بولىپ سايلانعان بولاتىن. الايدا, 2013 جىلدىڭ 3 شىلدەسىندە مىسىر قارۋلى كۇشتەرى توڭكەرىس جاساپ, ونى بيلىكتەن تايدىردى. ورنىنا توڭكەرىسشىلەردىڭ جەتەكشىسى ابدۋلفاتتاح ءال سيسي بيلىككە كەلگەن ەدى. بيلىكتى باسىپ العان اسكەريلەر مۋرسيگە بىرقاتار ايىپ تاقتى. اتاپ ايتقاندا, وعان تىڭشىلىق جاسادى, «حاماس» جانە «حەزبوللا» ءتارىزدى راديكال توپتارمەن بايلانىس جاسادى, اۆتوريتارلىق جۇيە ورناتپاق بولدى دەگەن ايىپتار تاعىلدى. سونىمەن قاتار, 2015 جىلى وعان ەرەۋىلشىلەردى تۇتقىنداپ, ازاپتادى دەگەن ايىپ تا تاعىلعان ەدى. ءسويتىپ, 20 جىل باس بوستاندىعىنان ايىرۋ ۇكىمى شىققان بولاتىن. سونىمەن قاتار, وزگە دە ايىپتار نەگىزىندە وعان 46 جىل اباقتىدا وتىرۋ جازاسى تاعايىندالعانى جايلى دا دەرەكتەر تاراعان-دى. بىراق, سوت پروتسەسىنە جۋرناليستەر قاتىستىرىلعان ەمەس.
BBC-ءدىڭ حابارلاۋىنا قاراعاندا ول ينفاركتان كوز جۇمعان بولۋى مۇمكىن. ەكس-پرەزيدەنتتىڭ ادۆوكاتى ابدۋلمۋمين ابدۋلماكسۋد سوت زالىندا كوز جۇماعان ءمۋريسدىڭ دەنەسىن اسكەريلەر الىپ كەتكەنىن ايتىپتى. بىراق, ادۆوكات ساياساتكەردىڭ دەنەسىن بيلىك وكىلدەرى قايدا اكەتكەنىن بىلمەيتىن بولىپ شىقتى. ءمۋرسيدىڭ تۋىستارىنىڭ وتىنىشتەرىن دە سوت قابىل الماپتى. ءسويتىپ, ونى اۋلەتتىڭ زيراتىنا جەرلەۋ دە مۇمكىن بولماي تۇرسا كەرەك.
مىسىر ەكس-پرەزيدەنتىنىڭ قازاسىنا وراي الەمدىك ماسس-مەديا ءتۇرلى اقپاراتتار تاراتىپ جاتىر. اسىرەسە, بۇل قازاعا بايلانىستى تۇركيا قايراتكەرلەرى ءتۇرلى مالىمدەمەلەر جاساپ ۇلگەردى. تۇركيا پرەزيدەنتى رەجەپ تايىپ ەردوعان ونى «باۋىرىم» دەپ اتاسا, سىرتقى ىستەر ءمينيسترى مەۆلۋت چاۆۋشوعلۋ «توڭكەرىسشىلەر ونى بيلىكتەن الاستاتقانىمەن, ول جايلى ەستەلىكتەر كوڭىلىمىزدەن وشپەيدى»,-دەدى. سونىمەن قاتار, تۇركيا ءدىن ىستەرى مينيسترلىگى 81 ەلدىمەكەندە مۋرسيگە ارناپ عايىپ جانازا نامازى وقىلاتىنى تۋرالى مالىمدەمە جاساپتى.
