ءىس-شاراعا بەلارۋس, رەسەي, ارمەنيا, وزبەكستان, تاجىكستان, تۇرىكمەنستان, ۋكراينا, قىرعىزستان, ازەربايجان, گرۋزيا مەملەكەتتەرىنىڭ قازاقستانداعى توتەنشە جانە وكىلەتتى ەلشىلەرى, سونداي-اق ليتۆانىڭ قازاقستانداعى ءۇشىنشى حاتشىسى قاتىستى.
جيىندا جانسەيىت تۇيمەباەۆ الدىمەن القالى توپ الدىندا جاقىندا قازاقستان پرەزيدەنتى بولىپ سايلانعان قاسىم-جومارت توقاەۆتىڭ مەملەكەتتەر اراسىنداعى ىنتىماقتاستىقتى دامىتۋعا جاڭا سەرپىن بەرەتىنىنە سەنىم ءبىلدىردى.
– قازاقستان ءتۇرلى سالادا ءبىزدىڭ ەلدەرىمىزدىڭ قارىم-قاتىناسىن نىعايتۋعا باسا ءمان بەرەدى. ەۋرازيالىق ەكونوميكالىق وداقتىڭ شەڭبەرىندە بارلىق باعىت بويىنشا ەكىجاقتى جانە كوپجاقتى ءارىپتەستىك بەلسەندى دامۋدا. قازاقستان حالقى اسسامبلەياسىنىڭ 29 ءساۋىردە وتكەن XXVII سەسسياسىندا سىرتقى ىستەر مينيسترلىگىمەن بىرگە اتقارىلاتىن سىرتقى ساياسي مىندەتتەر بەلگىلەندى. ونىڭ العاشقىسى – قحا كاسىپكەرلەر اسسوتسياتسياسى ارقىلى شەتەلدىك ينۆەستورلارمەن ەكونوميكالىق ىنتىماقتاستىقتى كەڭەيتۋ. ەكىنشى تاپسىرما – ىسكەرلىك بايلانىستى كۇشەيتۋ جانە ەلگە ينۆەستيتسيا تارتۋ ءۇشىن قحا-نىڭ شەتەلدىك دوستارى كلۋبىن قۇرۋ, – دەدى ج.تۇيمەباەۆ.
ءسويتىپ جينالعان قاۋىم اتالعان كلۋبتى قۇرۋ ماسەلەلەرىن تالقىلادى. ج.تۇيمەباەۆ ونىڭ ءبىرنەشە ءتيىمدى جاقتارىن ايتىپ بەردى.
– قازاقستان كوپتەگەن ەلمەن دوستىق قارىم-قاتىناسىن ساقتاپ, ءتۇرلى سالادا ارىپتەستىك ورناتقان. ونىڭ ءىشىندە ەكونوميكالىق بايلانىستى بولەك ايتۋعا بولادى. شەتەل ازاماتتارى مۇندا كەلگەندە الدىمەن وزدەرىمەن تۋىس ەتنوستار ورنالاسقان ايماقتارعا بارادى جانە ءوز بيزنەستەرىن دە اشا باستايدى. مىسالى, شەتەلدىكتەرگە ينۆەستيتسيالىق تارتىمدى ءوڭىر رەتىندە تۇركىستان وبلىسىن ايتار ەدىم. قازىر ازەربايجان كاسىپكەرلەرى وسى ايماققا ءجيى-ءجيى اتباسىن بۇرىپ, ءتۇرلى بيزنەس-جوبالاردى جۇزەگە اسىرۋ جايىن قاراستىرۋدا. بۇل تۇرعىدا اسسامبلەيانىڭ شەتەلدىك دوستارى كلۋبىن قۇرۋ تۋرالى باستاما ماڭىزدى ءرول اتقارادى. سوندىقتان وسى شارۋانىڭ جاي-جاپسارى, تيىمدىلىگى جونىندە جان-جاقتى پىكىر الماسقانىمىز دۇرىس, – دەدى ازەربايجاننىڭ قازاقستانداعى توتەنشە جانە وكىلەتتى ەلشىسى راشاد ماممادوۆ.
سونىمەن قاتار باسقوسۋ بارىسىندا بەلارۋس ەلشىسى اناتولي نيچكاسوۆ, وزبەكستان ەلشىسى سايديكرام نيازحودجاەۆ جانە ۋكراينا ەلشىسى يۆان كۋلەبا قازاقستان حالقى اسسامبلەياسىنىڭ مەملەكەتتەر اراسىنداعى ەكونوميكالىق بايلانىسىن نىعايتۋعا قوسىپ جاتقان ۇلەسى تۋرالى پىكىرلەرىن جەتكىزدى. بۇعان قوسا اسسامبلەيا جانىنان قۇرىلاتىن شەتەلدىك دوستار كلۋبىنىڭ جۇمىسىن كەڭىنەن تالقىلادى.
