جاقىندا «اڭسار اللا» ب ۇلىكشىلەرى ساۋد ارابياسىنىڭ ءوڭتۇستىك-باتىسىنداعى ابحا قالاسىندا ورنالاسقان باس اۋەجايعا وق جاۋدىرعانىن مالىمدەدى. بۇل تۋرالى حۋسيتتەردىڭ باقىلاۋىندا تۇرعان «ءال-ماسيرا» تەلەارناسى حابار تاراتقان. وندا اۋەجايعا باعىتتالعان زىمىران دىتتەگەن جەرىنە ءدوپ تيگەنى ايتىلعان. ال يەمەندەگى سوعىسقا ارالاسىپ جاتقان ساۋد ارابياسى باستاعان كواليتسيا كۇشتەرى بۇل حابارلاماعا قاتىستى ەشقانداي ءتۇسىنىكتەمە بەرگەن جوق.
تاياۋدا حۋسيتتەر ءدال وسى تەلەارنا ارقىلى يەمەن شەكاراسىنىڭ ىرگەسىندە تۇرعان حاميس مۋشيت اۋدانىنداعى كورول حالەد اسكەري-اۋە بازاسىنا شابۋىل جاساعاندارىن ءمالىمدەگەن. ارتىنشا كواليتسيا كۇشتەرى بۇل شابۋىلدى تويتارىپ, ۇشقىشسىز ۇشۋ اپپاراتتارىن اتىپ تۇسىرگەنىن جەتكىزدى. دەگەنمەن ب ۇلىكشىلەر بازانىڭ اۋماعىنداعى قارۋ-جاراق, رادار جانە وپەراتسيالىق بولمەلەر بار قويمالارعا سوققى جاساي الدىق دەپ تۇجىرىمدادى.
ال بيىلعى مامىر ايىنىڭ سوڭىندا «ءال-ارابيا» تەلەارناسى كواليتسيا سانانىڭ سولتۇستىگىندەگى ءال-دۋلايمي اۆياتسيالىق بازاسىندا ورنالاسقان قارۋ-جاراق قويمالارىنا سوققى جاساعانىن حابارلادى. ساۋد ارابياسى باستاعان كواليتسيا بۇعان دەيىن دە ب ۇلىكشى حۋسيتتەردىڭ باقىلاۋىنداعى اۋە بازاسىنا 13 اۋە سوققىسىن جاساعان ەدى. بۇل بازا ەل استاناسىنداعى اۋەجايدىڭ ماڭىندا ورنالاسقان. كواليتسيا تاراپى كوتەرىلىسشىلەر تەرروريستىك وپەراتسيالاردى ىسكە اسىرۋ ماقساتىندا پيلوتسىز ۇشۋ اپپاراتتارى مەن راكەتالاردى ىسكە قوسۋ ءۇشىن اۋە بازاسىن ۇستاپ وتىرعانىن مالىمدەگەن.
سول ۋاقىتتاردا يەمەننىڭ دەنساۋلىق ساقتاۋ مينيسترلىگىنىڭ رەسمي وكىلى يۋسەف ءال-حاديري اراب كواليتسياسىنىڭ بومبىلاۋىنان ەلدە 52 000 ادام زارداپ شەككەنىن حابارلادى. ولاردىڭ ىشىندە 13250 ادام مەرت بولعان. كوز جۇمعاندار قاتارىندا 3800 بالا مەن 2580 ايەل بولعان. ال سانا قالاسىندا اۋە شابۋىلدارىنىڭ سالدارىنان 56 ادام جاراقاتتانىپ, 6 ادام قايتىس بولعان. ونىڭ تورتەۋى – قىرشىنىنان قيىلعان بالالار.
يەمەننىڭ ىشكى قاقتىعىستارىنا مۇرنىن سۇققان اراب ەلدەرى كواليتسياسىنىڭ ارەكەتتەرىن شيتتىك «اڭسار اللا» قوزعالىسى جاۋاپسىز قالدىرىپ جاتقان جوق. ولار الىستا وتىرىپ-اق ساۋد ارابياسى مەن ءباا ايماقتارىنداعى ماڭىزدى نىسانداردى كۇيرەتە الاتىندارىن قاتاڭ ەسكەرتتى. ماسەلەن, حۋسيتتەردىڭ ساۋد ارابياسىنداعى ورتالىق مۇناي قۇبىرىنا جاساعان اۋە شابۋىلى ەلدى ءبىراز دۇرلىكتىردى. سونىڭ سالدارىنان سورعى ستانسالارىنىڭ جۇمىسى تۇرالاپ قالعان. وسىدان كەيىن ب ۇلىكشىلەر ءالى 299 نىساندى كوزدەپ وتىرعاندارىن ايتىپ, سەس كورسەتتى.
وتكەن ايدىڭ سوڭىندا مەككەدە وتكەن اراب مەملەكەتتەرىنىڭ سامميتىندە اراب ەلدەرى يراندى يەمەندەگى «اڭسار اللا» قوزعالىسىنا بالليستيكالىق زىمىراندار جەتكىزىپ وتىر دەپ ايىپتادى. سول باسقوسۋدا ساۋد ارابياسى كورولى سالمان بەن ابدەل ءازيز ءال-ساۋد يران توڭىرەگىندەگى داعدارىستى جانە يەمەن حۋسيتتەرىنىڭ تاراپىنان جاسالىپ جاتقان شابۋىلداردى تالقىلاۋ ءۇشىن اراب ەلدەرى مەن پارسى شىعاناعى ەلدەرى كوشباسشىلارىن ەكى سامميتكە شاقىردى.
ءسال كەيىنگە شەگىنىس جاساپ, شيەلەنىستەن قالاي ورشىگەنىنە توقتالا كەتسەك, ەلدەگى ساياسي داعدارىستىڭ ىقپالىنان يەمەندى 1978 جىلدان بەرى باسقارعان ءالي ابداللا سالەح 2012 جىلى وتستاۆكاعا كەتكەن ەدى. ول ەل تىزگىنىن سول كەزدە ۆيتسە-پرەزيدەنت قىزمەتىن اتقارعان ءابد راببۋ مانسۋر حابيگە بەرگەنىمەن, 2014 جىلى ءتوڭكەرىس جاساعان حۋسيتتەرگە قولداۋ كورسەتتى. بىراق كەيىننەن ءبۇلىكشىلەردى بەيبىت تۇرعىنداردىڭ ءومىرىن قيدى دەپ ايىپتاپ, يەمەن ۇكىمەتىنە جاقتاس ساۋد ارابياسىمەن اراداعى جاعدايدى قالىپقا كەلتىرۋگە شاقىردى. بۇل حۋسيتتەردىڭ شامىنا ءتيىپ, سالەحكە قاستاندىق جاساپ, مەرت قىلدى.
2018 جىلدىڭ جەلتوقسانىندا قارسىلاس تاراپتار قانشا جىلدان بەرگى تارتىستان كەيىن بۇۇ اياسىندا شۆەتسيادا ءبىر ۇستەلدىڭ باسىندا وتىرىپ, كەلىسسوز ءجۇرگىزدى. قىرعيقاباق بولىپ جۇرگەن ولار سول جيىندا بىتىمگە كەلىپ, تۇتقىندارمەن الماسۋ, قىزىل تەڭىزدىڭ جاعاسىنداعى حودەيدا قالاسىنداعى اتىستى توقتاتۋ تۋرالى بىرقاتار ماڭىزدى كەلىسىمگە قول جەتكىزگەن. وكىنىشكە قاراي الەمدىك قوعامداستىقتاردىڭ كوڭىلىن دەمدەگەن بۇل بەيبىتشىلىك قادام ۇزاققا سوزىلمادى. ب ۇلىكشىلەر توبى مەن ۇكىمەت اسكەرى ءبىر-ءبىرىن ورناتىلعان ءتارتىپتى ساقتامادى دەپ كۇستانالاپ, 2019 جىلدىڭ قاڭتارىندا سوعىس وتى قايتا تۇتاندى.
