بقو تج دەپارتامەنتىنىڭ ءباسپاسوز قىزمەتىنەن تۇسكەن مالىمەتكە قاراعاندا, وقيعا 11 ماۋسىم كۇنى جاڭاجول اۋىلدىق وكرۋگىنە قاراستى ءابىش ەلدى مەكەنىندە بولدى.
جاسماعامبەتوۆ كوشەسى 29/2 مەكەنجايىندا 2 پاتەرلىك تۇرعىن ءۇيدىڭ ورتەنگەنى جونىندە ساعات 13.25-تە حابار تۇسكەن. №2 پاتەر تۇگەلدەي جانىپ كەتتى.
ءورت ساعات 16.03-تە وقشاۋلانىپ, 16.31-دە ءسوندىرىلدى.
ءورتتىڭ جالپى اۋماعى 90 شارشى مەتردى قامتىدى. وعان قوسا ءۇيدىڭ ەكىنشى جاعىنداعى پاتەردىڭ دە 30 شارشى مەترى جارامسىز بولىپ قالدى.
دەنەسىن جەڭىل كۇيىك شالعان اتالمىش پاتەر يەسى, 1980 جىلعى ناسىپقالي بايعازيەۆ جالپاقتال اۋرۋحاناسىنا جەتكىزىلدى.
ن.بايعازيەۆ ماۋسىمدىق جۇمىس كەزىندە وت جاعۋشى بولسا, ايەلى كلارا ەرمۇقانوۆا - مەكتەپتە كىشى قىزمەتكەر. ەرلى-زايىپتىلار وتباسىندا بەس بالا تاربيەلەپ وتىر.
جاڭاجول اۋىلدىق وكرۋگىنىڭ اكىمى قايىرجان ومىراليەۆتىڭ ايتۋىنشا, ءۇي تۇرۋعا جارامسىز. وتباسى كۇنى بۇگىن ناسىپقالي بايعازيەۆتىڭ اناسىنىڭ ۇيىندە تۇرىپ جاتىر. ولاردىڭ ءبىر بالاسى تارازدا ستۋدەنت, ەكىنشىسى ورالدا. تاعى ءبىر پەرزەنتى بيىل مەكتەپ ءبىتىردى. قالعان ەكەۋى 6-7-سىنىپتاردا وقيدى.
«قازىرگى كەزدە اتالعان وتباسىنا ازىق-ت ۇلىك بەرىلدى. اۋىلداستار تۇرمىستىق تەحنيكا الىپ بەرۋ ءۇشىن اقشا جيناۋدا. اقساقالدار القاسى مەكتەپ جاسىنداعى بالالارىنا كيىم-كەشەك الۋ ءۇشىن قارجىلاي كومەكتەسپەك. سونىمەن قاتار شارۋا قوجالىعىنىڭ جەتەكشىسى تىلەك ساپاروۆ ءۇي بەردى. بۇل تۇرعىن ۇيگە جوندەۋ جۇمىستارى جۇرگىزىلگەننەن كەيىن بايعازيەۆتىڭ وتباسى كىرەتىن بولادى», - دەدى ق.ومىراليەۆ.
