ايتۋلى جارىستىڭ تۇساۋى وسىدان ءتورت جىل بۇرىن ازەربايجاننىڭ باس شاھارى – باكۋدە كەسىلدى. قارت قۇرلىقتا تۇڭعىش رەت ۇيىمداستىرىلعان كەشەندى دودانىڭ جالپىكوماندالىق ەسەبىندە 164 جۇلدە (79 التىن+40 كۇمىس+45 قولا) ولجالاعان رەسەي قۇراماسى كوش باستادى. ەكىنشى جانە ءۇشىنشى ورىنداردى ازەربايجان (21+15+20) مەن ۇلىبريتانيا (18+10+19) يەلەندى. سونداي-اق ۇزدىك بەستىكتىڭ قاتارىنا گەرمانيا (16+17+33) مەن فرانتسيا (12+13+18) قوسىلدى. ەستەرىڭىزگە سالا كەتەيىك, كاسپي جاعالاۋىندا وتكەن جارىستا 50 ەلدەن كەلگەن 5730 ورەن 30 سپورت ءتۇرى بويىنشا 253 جۇلدە جيىنتىعى ءۇشىن سايىسقا تۇسكەن ەدى.
ال ءىى ەۋروپا ويىندارىندا باسەكەلەر اكروباتيكا, اەروبيكا, بادمينتون, باسكەتبول (3ح3), باتۋتپەن سەكىرۋ, بوكس, ۆەلوسپورت (شوسسە, ترەك), گرەك-ريم كۇرەسى, دزيۋدو, ەركىن كۇرەس, ەسكەك ەسۋ, جاعاجاي فۋتبولى, جەڭىل اتلەتيكا, كاراتە, كوركەم گيمناستيكا, نىسانا كوزدەۋ, ساداق اتۋ, سامبو, سپورتتىق گيمناستيكا, ستەند اتۋ جانە ۇستەل تەننيسىنەن وتەدى.
