ەلىمىزدەگى ەڭ ءىرى ساياسي ناۋقاننىڭ زاڭ تالاپتارىنا قانشالىقتى ساي وتكەندىگى جايىندا پىكىر الماسقان جيىندى ۇيىمداستىرۋعا «زاڭگەرلەر ءادىل سايلاۋ ءۇشىن» رەسپۋبليكالىق قوعامدىق بىرلەستىگى مۇرىندىق بولدى. وتىرىسقا تانىمال زاڭگەرلەر, زاڭ عىلىمدارىنىڭ دوكتورلارى مەن كانديداتتارى, ەلىمىزدىڭ الدىڭعى قاتارلى جوعارى وقۋ ورىندارىنىڭ پروفەسسورلارى, سونداي-اق مەملەكەتتىك ورگانداردىڭ, ۇكىمەتتىك ەمەس ۇيىمداردىڭ جانە ەلشىلىكتەردىڭ وكىلدەرى قاتىستى.
القالى جيىندا ءسوز تىزگىنىن زاڭ عىلىمدارىنىڭ كانديداتى, قازاقستان زاڭگەرلەر وداعىنىڭ جانە «زاڭگەرلەر ءادىل سايلاۋ ءۇشىن» رقب توراعاسى سەرىك اقىلباي ۇستادى. ول ەلىمىزدىڭ بارلىق 17 وڭىرىندە 3 مىڭعا جۋىق زاڭگەر سايلاۋ ۋچاسكەلەرىندەگى جاعدايعا مونيتورينگ جۇرگىزگەنىن ايتىپ, ايماقتارداعى وكىلدەردىڭ الدىن الا باعالاۋى بويىنشا پرەزيدەنت سايلاۋى سايلاۋ زاڭناماسىنىڭ تالاپتارىنا سايكەس وتكەنىن مالىمدەدى.
– ءبىزدىڭ ۇيىم ءار سايلاۋعا قاتىسىپ كەلەدى. ۇيىمنىڭ باستى مىندەتى – سايلاۋ كوميسسياسىنىڭ قىزمەتىن باعالاۋ ەمەس, كەڭەس بەرىپ, كومەكتەسۋ. ءبىز سايلاۋشىلارعا ءوز قۇقىقتارىن ەگجەي-تەگجەيلى تۇسىندىرۋگە باسا ءمان بەرەمىز. ەگەر ءار سايلاۋشى ءوز قۇقىن ءبىلىپ تۇرسا, وندا سايلاۋ اشىق, ءادىل ءارى تازا وتەدى. سوندىقتان ءبىز سايلاۋشىلاردان كەلىپ تۇسكەن سۇراقتارعا تولىققاندى جاۋاپ بەرۋ ءۇشىن بەس رەت ءباسپاسوز جيىنىن وتكىزدىك. سۇراقتار كوبىنە ينتەرنەت ارقىلى قابىلداندى. جالپى, بۇرىنعى سايلاۋلارعا قاراعاندا بۇل جولى سايلاۋشىلاردىڭ بەلسەندىلىگى ارتىپ, ءوز قۇقىقتارىن اجەپتاۋىر ءبىلىپ قالدى, – دەدى سەرىك اقىلباي.
باسقوسۋدا قوعامدىق بىرلەستىكتىڭ زاڭگەرلەرى سايلاۋ, سايلاۋ پروتسەسى جانە زاڭناما ءماسەلەلەرى بويىنشا باياندامالار جاسادى. ولاردىڭ ىشىندە زاڭ عىلىمدارىنىڭ دوكتورى, پروفەسسور مارات ءسارسەمباەۆ ەۋروپاداعى قاۋىپسىزدىك جانە ىنتىماقتاستىق ۇيىمىنا قاراستى دەموكراتيالىق ينستيتۋتتار جانە ادام قۇقىقتارى جونىندەگى بيۋروسىنىڭ پرەزيدەنت سايلاۋى تۋرالى مالىمدەمەسىنە زاڭ تۇرعىسىنان باعا بەردى. ال زاڭ عىلىمدارىنىڭ دوكتورى, پروفەسسور سەرگەي ۋدارتسەۆ سايلاۋ قۇقىعىنىڭ دامۋىنا اسەر ەتەتىن فاكتورلار جونىندە ءسوز قوزعادى. سونىمەن قاتار م.نارىكباەۆ اتىنداعى قازگزۋ-دىڭ قىلمىستىق سوت تورەلىگى جانە عىلىمي-قۇقىقتىق ساراپتاما ماسەلەلەرى بويىنشا عىلىمي جوبالاردىڭ جەتەكشىسى مارات قوعاموۆ «سايلاۋ زاڭناماسى: تيىمدىلىك ماسەلەلەرى, تەوريا جانە پراكتيكا» اتتى تاقىرىپتا بايانداما جاسادى. بۇعان قوسا ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتى زاڭ فاكۋلتەتى دەكانى ساۋلە اماندىقوۆا ەل ازاماتتارىنىڭ داۋىس بەرۋ قۇقىعىن تولىق قولدانۋى پاتريوتيزمنىڭ ءبىر كورىنىسى دەگەن پىكىرىن ءبىلدىردى.
كەلەلى كەڭەسكە قاتىسۋشى زاڭگەرلەر ءىس-شارانى قورىتىندىلاپ, كوتەرىلگەن ماسەلەلەردى ەسكەرىپ, الداعى ۋاقىتتا سايلاۋ زاڭناماسىن ءارى قاراي جەتىلدىرۋ ءجونىندە ۇسىنىستارىن جەتكىزدى.
