كورمەگە چونچجۋ قالاسىنىڭ 46 شەبەرىنىڭ 400-گە جۋىق تۋىندىسى قويىلدى. تۇرلەنگەن تاياقشالار كورەي مادەنيەتىنىڭ اتريبۋتى عانا ەمەس, شىعىس ازيا حالىقتارىنىڭ سالت-ءداستۇرىن ەرەكشەلەيتىن مادەني مۇرا رەتىندە تانىلعان.
– تاعامنان ءدام تاتۋدىڭ ءۇش جولىن بىلەمىز. بانگلادەش, يندونەزيا سىندى مەملەكەتتەر تاماقتى قولمەن جەيتىن بولسا, باتىس حالىقتارى داستارقان باسىندا قاسىق پەن شانىشقىنى پايدالاناتىنى بەلگىلى. بۇل ادىستەر تاماقتى ۇزۋگە, شانشىپ, ءتۇرتىپ الۋعا كومەكتەسەتىن بولسا, تاياقشامەن تاماقتانۋعا ادەتتەنگەن شىعىس ازيا ەلدەرى تاعامنىڭ بۇتىندىگىن ساقتاۋعا ءمان بەرەدى. ىشىلگەن استىڭ ادامعا قۇنار بەرەتىنىن ەسكەرسەك, شىعىس ازيا ەلدەرى تاياقشالاردى ءومىر مەن قۋاتتى بايلانىستىرۋشى قۇرال رەتىندە قابىلدايدى. سول سەبەپتى, تاياقشالاردى جاساۋ ونەرىنە, ءتىپتى ونى دۇرىس ۇستاۋ ەرەجەلەرىنە ەلدە زور كوڭىل بولىنەدى, – دەدى چونچجۋ قالاسى مادەني ءوندىرىستى ىلگەرىلەتۋ قورىنىڭ باس حاتشىسى پاك سانگ ون.
ەكسپوزيتسياعا قويىلعان حانچجي (كورەي قاعازى) شەبەرى لي چونگۋكتىڭ قىتايدىڭ بۇرىش اعاشى پۋنديدەن جاسالعان تاياقشالارى قاراپايىمدىلىعىمەن ەرەكشەلەنەدى. ويتكەنى پۋندي اعاشى قاراپايىمدىلىق پەن تابيعات تىنىشتىعىنىڭ سيمۆولى سانالادى. ال كيم سونحونىڭ اۆتورلىعىمەن جاسالعان لاكتالعان تاياقشالار ءداستۇرلى ونەر جولىنداعى ازاپتى جولدى مەڭزەيدى. بۇدان بولەك بالالار اسحانالىق جيىنتىعى, قولا قاسىقتار سەرياسى, قولادان جاسالعان توستاعاندار سىندى قولونەر بۇيىمدارى جۇرتشىلىقتىڭ قىزىعۋشىلىعىن تۋدىردى.
