جاقسى ءداستۇر جالعاسادى
بۇگىن قازاقستان تاريحىندا جاڭا پاراق اشىلدى. پرەزيدەنتتى ۇلىقتاۋ ءراسىمى ءوتىپ, مەملەكەت باسشىسى رەسمي ءتۇردى قىزمەتىنە كىرىستى. بۇل – ءبارىمىز ءۇشىن قۋانىشتى جاعداي. حالقىمىزدى وسىناۋ ۇلكەن مەرەكەمەن قۇتتىقتايمىن! پرەزيدەنتىمىز كىرىسپە سوزىندە ماڭىزدى 10 باعىتقا توقتالىپ ءوتتى. ونىڭ بارلىعى بۇعان دەيىنگى باعدارلامالاردىڭ جالعاسىن تاباتىنىن بىلدىرەدى. بۇل – ساباقتاستىق. ايتىلعان ماسەلەلەردىڭ بارلىعى حالىقتىڭ ءال-اۋقاتىن جاقسارتۋعا باعىتتالعان. جاقىندا بولاتىن ۇكىمەتتىڭ كەڭەيتىلگەن وتىرىسىندا قارالىپ, ۇلكەن باعدارلاما قابىلداناتىن بولدى. پرەزيدەنتىمىز عاسىر دەرتىنە اينالعان سىبايلاس جەمقورلىققا قارسى كۇرەستى دە ايتىپ ءوتتى. ءبىلىم سالاسىنا دا ۇلكەن كوڭىل ءبولىنىپ وتىر. ەرەكشە اتاپ ايتاتىن جايت – مۇعالىمدەر مەن دارىگەرلەردىڭ مارتەبەسىن كوتەرەتىن زاڭنىڭ قابىلدانۋى. پرەزيدەنت ايتقان قولجەتىمدى مەديتسينا اۋىلدا دا, قالادا دا دەنساۋلىق ساقتاۋ ۇيىمدارىنىڭ جۇيەلى جۇمىسى دەگەندى بىلدىرەدى. جاڭا پرەزيدەنتتىڭ باستى ۇستانىمى – جاستار. بولاشاق – جاستاردىڭ قولىندا. جاستاردى ءار سالاعا ارالاستىرۋ دا ماڭىزدى. وسىعان ساي تاپسىرمالار دا بەرىلمەك. مەنىڭ ويىمشا, قازاقستاننىڭ بولاشاعى زور.
باقىتجان جۇماعۇلوۆ,
پارلامەنت سەناتىنىڭ دەپۋتاتى
الەۋمەتتىك ادىلەتتىلىك اسپەتتەلمەك
بىرىنشىدەن, سايلاۋ ءوتتى. حالىققا سالسا دا, قالىپقا سالسا دا Nur Otan پارتياسى ءوز بيىگىنەن كورىندى. حالىققا سالسا دەپ وتىرعانىم, جالپى وسى حالىقتىڭ مۇددەسىمەن, وسى كوپشىلىكتىڭ ماسەلەسىمەن اينالىساتىن پارتيا – وسى پارتيا. سوندىقتان Nur Otan پارتياسىنىڭ جەڭىسى بۇكىل حالىقتىڭ جەڭىسى دەگەندى كوپشىلىكتىڭ كوكەيىندەگى ءماسەلەلەر ەندى دۇرىس شەشىم تابادى دەگەن سەنىممەن ايتىپ جاتىرمىز. مىنە, وسى ءۇشىن سايلاۋدا ءبىز ءوز كانديداتىمىزعا داۋىس بەردىك.
ۇلىقتاۋ راسىمىندە قاسىم-جومارت كەمەل ۇلى «ەلدىڭ مۇددەسىن قورعاۋ – مەنىڭ باستى ماقساتىم» دەپ ايتتى. ەلدىڭ مۇددەسى دەگەن ءسوز – قازاقستان ازاماتىنىڭ ارقايسىسىنىڭ مۇددەسى. سونىڭ ىشىندە «جاستاردى ساياسي كوزقاراستارى مەن ۇستانىمدارى بويىنشا بولۋگە جول بەرمەيمىن» دەپ ايتتى. بۇل وتە ماڭىزدى. «بولىنگەندى ءبورى جەيدى». ەلگە جانى اشيتىن پاتريوت ادام ءوزىنىڭ ساياسي نەمەسە باسقا دا ۇسىنىستارىن ەلدى بىرىكتىرۋگە باعىتتايدى. كۇنى كەشە سايلاۋدا ايقىن باسىمدىقپەن جەڭىسكە جەتكەننەن كەيىن دە «ءتورت جارىم مىڭ ۇسىنىس كەلىپ ءتۇستى. بۇل ۇسىنىستاردىڭ بارلىعىن ساراپتاپ, ءار ۇسىنىسقا وتە مۇقيات قاراۋ كەرەك, بۇل باسقارۋ ورگاندارىنىڭ, اكىمشىلىكتەردىڭ, قوعامدىق ۇيىمداردىڭ ءبارىنىڭ مىندەتى. بۇلاردىڭ بارلىعىنا ءۇن قاتۋ, جاۋاپ بەرۋ كەرەك» دەدى پرەزيدەنت.
اسىرەسە ادىلەتتىلىك ماسەلەسىن وتە قاتتى ايتىپ ءجۇر. الەۋمەتتىك ءادىلەتتىلىك ساياسات دەگەن بار. مىسالى, ريم يمپەرياسىنىڭ ءوزى نان جەتپەگەندىكتەن ەمەس, ناندى ءادىل ءبولمەگەندىكتەن قۇلاعانىن تاريحتان ءبىلەمىز. ادىلدىك, ادالدىق دەگەن ۇعىمدار بارلىق سالادا بولسىن دەگەندى دە قاداپ ايتتى. تاعى ءبىر قۋانارلىعى, ول كىسى «رۋحاني جاڭعىرۋ» باعدارلاماسىن نەگىزىنەن جاس ۇرپاقتى تاربيەلەۋگە ارناۋىمىز كەرەك دەپ وتىر. شىندىعىندا, وسى رۋحاني جاڭعىرۋدى داڭعازادان تازالاپ, جاستاردى تاربيەلەيتىن قۇرال رەتىندە پايدالانساق جاقسى بولار ەدى. مەملەكەت باسشىسىنىڭ وسى ماسەلەنى قاداپ ايتقانى مەنىڭ كوڭىلىمنەن شىقتى.
دارحان مىڭباي,
پارلامەنت ءماجىلىسىنىڭ دەپۋتاتى, Nur Otan پارتياسى فراكتسياسىنىڭ مۇشەسى
ءوزارا تۇسىنىستىك ورىستەيدى
قازاقستان رەسپۋبليكاسىنىڭ اتا زاڭى بويىنشا پرەزيدەنتتىڭ قۇقىعى مەن مىندەتى ايقىندالىپ كورسەتىلگەن. ونىڭ ىشىندە ىشكى ساياساتپەن قاتار, مەملەكەتتىڭ سىرتقى ساياساتى دا اسا ماڭىزعا يە. پرەزيدەنتتىڭ ءاربىر ءسوزى مەن ءىسى حالىقارالىق ساراپشىلار تاراپىنان قىزىعۋشىلىق تۋدىرىپ, شەتەلدىكتەر تاراپى نازاردان تىس جىبەرمەيدى. وسى ورايدا قاسىم-جومارت توقاەۆتىڭ ءبىلىمى مەن بىلىكتىلىگى, تاجىربيەسى اسا جوعارى ەكەنىن ايتا كەتكەن ءجون. تاۋەلسىزدىك جىلدارىنان باستاپ قازاقستاننىڭ سىرتقى ءيميدجىن قالىپتاستىرۋ جولىندا دا ايتارلىقتاي ۇلەس قوستى.
پرەزيدەنتتى ۇلىقتاۋ ءراسىمىندە بۇگىنگى قوعامنىڭ نازارىنا ىلىككەن ماسەلەلەردىڭ ءبىرى – بيلىك پەن حالىقتىڭ بايلانىسى. مەملەكەت تاراپىنان جاسالىپ جاتقان جۇمىستاردىڭ بارلىعىنان ەل ازاماتتارى حاباردار بولىپ, سونىڭ ىشىندە ءوز ورنىن تابۋعا, قاجەتىن الۋعا, ساياسي ساۋاتتىلىعىن ارتتىرىپ, قۇقىعىن قورعاۋعا بەيىمدەلۋى ءتيىس. وسى ماقساتتا پرەزيدەنت ۇسىنعان باستامالار بۇگىنگى قوعام ءۇشىن اسا قاجەتتىلىك تانىتۋدا. قوعام مەن بيلىك بايلانىسى ارتسا, ءوزارا ءتۇسىنىستىك قالىپتاسادى. قانداي دا ءبىر تۋىنداعان ماسەلەنىڭ ەكى ۇشىن ەكى كوزقاراسپەن ەمەس, ءبىر ويدان شىعاتىنداي كەڭەسىپ شەشۋگە جاسالعان قادام دەر ەدىك. پرەزيدەنتتىڭ باستامالارى ەڭ الدىمەن حالىقتىڭ جاعدايىن جاقسارتۋعا, الەۋمەتتىك سالانىڭ الەۋەتىن دامىتۋعا باعىتتالىپ وتىر. بۇل – قۋانتارلىق ءىس.
مارات باشيموۆ,
ەۋروپالىق قۇقىق جانە ادام قۇقىقتارى جونىندەگى ساراپتامالىق ينستيتۋت ديرەكتورى
باسىمدىقتاردى ايقىنداپ بەردى
بۇعان دەيىن سايلاۋالدى ۇگىت-ناسيحات جۇرگىزۋ بارىسىندا Nur Otan پارتياسى اتىنان ۇسىنىلعان قاسىم-جومارت كەمەل ۇلى توقاەۆ ءوزىنىڭ باعدارلاماسىن تانىستىرىپ, ەل كەلەشەگىنىڭ جارقىن بولۋى ءۇشىن باسىم باعىتتاردى ايقىنداپ بەرگەن بولاتىن. ارينە, تاۋەلسىزدىك جىلدارىنان بەرى تۇڭعىش پرەزيدەنت نۇرسۇلتان نازارباەۆتىڭ ءجۇرگىزگەن سارابدال ساياساتىنىڭ جالعاسى رەتىندە الەۋمەتتىك-ەكونوميكالىق نەگىزگە باعىتتالعان ستراتەگيالىق باعدارلامالاردىڭ الداعى ۋاقىتتا دا ءارى قاراي جالعاسىن تاباتىنى انت بەرۋ راسىمىندە ايتىلدى.
سونىمەن قاتار پرەزيدەنت بۇگىنگى وزەكتى ماسەلەلەردىڭ دە وڭ شەشىم تاباتىنىن, ءار قازاقستاندىقتىڭ مۇددەسىن قورعايتىنىن, كادرلىق رەزەرۆ جاسالاتىنىن ايتىپ ءوتتى. ونىڭ ىشىندە ەلباسىنىڭ بيىلعى جىلدى جاستار جىلى دەپ اتاۋى, سونىڭ نەگىزىندە ەلىمىزدەگى جاس بۋىننىڭ جاڭاشا سەرپىن الىپ, باعىت-باعدارىن ايقىنداۋعا باسىمدىق بەرىلەتىنى دە ورىندى ءارى اسا قاجەت باستاما دەگەن پىكىردەمىن. مەملەكەت باسشىسىنىڭ ءدال قازىرگى الماعايىپ زاماندا, عالامدىق ەكونوميكانىڭ سان قۇبىلعان كەزەڭىندە, الپاۋىت دەرجاۆالاردىڭ ساۋدا سوعىسىنا تاپ بولىپ تۇرعان شاقتا ەل بىرلىگى مەن تۇتاستىعى اسا ماڭىزدى ەكەنىن ايتۋى ورىندى ءارى شىنايى پىكىر دەپ ەسەپتەيمىن.
نۇرجان التاەۆ,
پارلامەنت ءماجىلىسىنىڭ دەپۋتاتى
