اسا قادىرلى ەلباسى!
قۇرمەتتى وتانداستار!
ەڭ الدىمەن, ماعان زور سەنىم ارتىپ, قولداۋ كورسەتكەن بارشا قازاقستان حالقىنا العىس ايتامىن!
بۇل سايلاۋ, شىن مانىندە, دەموكراتيا تالاپتارىنا ساي ءوتتى. سايلاۋ الاڭىندا, ناعىز اشىق باسەكەگە ءتۇسۋ مۇمكىندىگى بولدى. بارلىق ساياسي كۇش وكىلدەرى قاتىستى. ساياسي باعدارلامالار سايىسقا تۇسكەن ءادىل دودا بولدى.
«سايلاۋ – قاتىسۋشىلاردىڭ پىكىرى عانا جەڭىسكە جەتەتىن جارىس» دەيدى. راسىندا, ءادىل پىكىر.
وسى وتە ماڭىزدى ساياسي باسەكەدە ءبىزدىڭ حالقىمىزدىڭ دانالىعى, پاراساتى جەڭدى. سوندىقتان بۇل جەڭىس – حالقىمىزدىڭ جەڭىسى! ءبىز ءبىر ەل بولىپ, حالىق بولىپ قازاقستاننىڭ الداعى دامۋ جولىن بىرگە ايقىندادىق.
9 ماۋسىمدا قازاقستاننىڭ جارقىن بولاشاعى ءۇشىن داۋىس بەرگەن ءاربىر ازاماتتىڭ پىكىرى – ءبىز ءۇشىن وتە ماڭىزدى! ءويتكەنى حالقىمىزدىڭ تاتۋلىعى, ىنتىماعى, بىرلىگى – ءبىزدىڭ ەڭ باستى قۇندىلىعىمىز. وسى قۇندىلىقتى كوزدىڭ قاراشىعىنداي ساقتاۋ – بارشامىزعا ورتاق پارىز. سوندىقتان پرەزيدەنت رەتىندە حالقىمىزعا مىنانى ايتقىم كەلەدى:
ەلىمىزدىڭ ءار ازاماتىنىڭ ءمۇددەسىن قورعاۋ – مەنىڭ باستى ماقساتىم. ولاردى ساياسي كوزقاراستارى مەن ۇستانىمدارىنا قاراي بولۋگە جول بەرمەيمىن! ءتۇرلى ساياسي جانە قوعام قايراتكەرلەرىنەن كەلىپ ءتۇسكەن قۇندى ۇسىنىستاردى, باستامالاردى مەن ءوز جۇمىسىمدا مىندەتتى تۇردە ەسكەرەمىن.
اشىق جانە ءادىل جۇمىس ىستەيمىز. ءبىز ءۇشىن ەڭ ماڭىزدى مىندەت – زاڭعا ساي ادال قىزمەت ەتۋ.
ءبىزدىڭ ءبىر عانا وتانىمىز بار! تاعدىرىمىز – ءبىر! ءبىز حالقىمىزدىڭ جارقىن بولاشاعى ءۇشىن ءبارىمىز بىرگە ەڭبەك ەتەمىز!
اقيقاتىن ايتۋىمىز كەرەك, بۇل سايلاۋدا ءبىزدىڭ ازاماتتارىمىز ەلباسىنىڭ ستراتەگيالىق باعدارىن قولداپ داۋىس بەردى! نۇرسۇلتان ءابىش ۇلى نازارباەۆ بۇكىل الەم مويىنداعان دامۋ مودەلىن جاسادى. قازاقستاننىڭ كوك تۋىن دۇنيە ءجۇزىنىڭ تۇكپىر-تۇكپىرىندە جەلبىرەتتى.
وسى كۇندەرى مەنىڭ اتىما ازاماتتارىمىزدان كوپتەگەن ءوتىنىش-تىلەك كەلىپ تۇسۋدە. ولاردىڭ بارىنە ورتاق ءبىر عانا تىلەك بار: ەلباسىمىزدىڭ جولىن, ستراتەگياسىن ساقتاۋ جانە ونى ودان ءارى نىعايتۋ. شىن مانىندە, حالىقتىڭ ءدال وسىنداي ءوتىنىش-تىلەك ايتۋى – زاڭدى, ورىندى. سەبەبى قازىرگى دامىعان قازاقستان – بۇل, ەڭ الدىمەن, ەلباسىنىڭ ارقاسى.
ەلباسى – قازاق مەملەكەتىنىڭ نەگىزىن قالاۋشى ۇلى تۇلعا. ول جاھاندىق دەڭگەيدەگى مەملەكەت قايراتكەرى. الەم تاريحىنا ءدال وسىلاي جازىلدى.
ەلباسىنىڭ حالقىمىز ءۇشىن جانە الەمدىك قوعامداستىق ءۇشىن سىڭىرگەن وراسان زور ەڭبەگىن ارقاشان قۇرمەتتەۋ – بارىمىزگە ورتاق پارىز.
قۇرمەتتى وتانداستار!
سايلاۋ ناۋقانى بارىسىندا مەن ەلىمىزدىڭ كوپتەگەن وڭىرىندە بولدىم. مەنىڭ ساياسي تۇعىرنامام – بۇل ءبىزدىڭ ازاماتتارىمىزدىڭ باستى سۇرانىستارىنا جاۋاپ.
ءبىرىنشى كەزەكتە مەن قازاقستاننىڭ ءۇشىنشى جاڭعىرتىلۋىن, بەس ينستيتۋتتىق رەفورما مەن مەملەكەتىمىزدىڭ باسقا دا اسا ماڭىزدى ستراتەگيالىق قۇجاتتارىن ءجۇزەگە اسىرۋ بويىنشا جۇمىس ىستەيتىن بولامىن. باسقاشا ايتقاندا, مەن ەلباسىنىڭ ستراتەگيالارىن جۇزەگە اسىرۋعا دەن قويامىن.
ەلىمىز ورنىقتى دامۋدىڭ جاڭا دەڭگەيىنە شىعا الۋى ءۇشىن جاڭا قادامدار مەن جاڭا شەشىمدەر قاجەت. ولار تاياۋ ارادا جاريا ەتىلەتىن بولادى.
ەكىنشىدەن, وتكىر الەۋمەتتىك پروبلەمالاردى شەشۋمەن ناقتى اينالىسۋدى, اسا مۇقتاجدارعا كومەك كورسەتۋدى جوسپارلاپ وتىرمىن.
ۇكىمەتكە اتالعان سالادا سەزىنەتىندەي ناتيجەلەرگە قول جەتكىزۋ ءۇشىن شارالار دايىنداۋدى تاپسىرامىن.
ۇشىنشىدەن, قازاقستاندىق كاسىپكەرلەردى قولدايتىن, ينۆەستيتسيالار تارتىپ, ولاردى قورعايتىن, ىسكەرلىك بەلسەندىلىكتى ىنتالاندىراتىن, كەڭ كولەمدى ورتادا قالىپتاستىراتىن بولامىن.
تورتىنشىدەن, مەنىڭ ماقساتىم – قوعامنىڭ بىرلىگىن قامتاماسىز ەتىپ, ءار ازاماتتىڭ قۇقىعىن قورعاۋ.
جانە سوڭىندا ەڭ باستىسىنا توقتالايىن. قاشاندا جانە قاي جەردە دە قازاقستاننىڭ ۇلتتىق مۇددەسىن قورعايتىن بولامىن.
بۇگىندە الەم جەدەل وزگەرىستەر ءداۋىرىنە اياق باستى. تەحنولوگيالار, ەكونوميكا جانە الەۋمەتتىك ءتارتىپ اۋىسۋدا. ادامداردىڭ, اسىرەسە جاستاردىڭ دۇنيەتانىمىندا وزگەرىستەر بار.
قازاقستاننىڭ الدىندا جاڭا سىن-تەگەۋرىندەر مەن قاتەرلەر بوي كورسەتۋدە. كوپتەگەن جىل بويى حالىقارالىق ساياساتپەن اينالىسىپ كەلگەن مەن جاڭا ءداۋىردىڭ العا ۇمتىلىسىن ايقىن سەزىنىپ وتىرمىن.
ساۋدا سوعىستارى, حالىقارالىق قاتىناستارداعى قىسىمدار, قاۋىپسىزدىكتىڭ بۇرىنعى مەحانيزمدەرىنىڭ بۇزىلۋى, وڭىرلىك جانجالداردىڭ كوبەيۋى – وسىنىڭ ءبارى جاڭا گەوساياسي ءومىر شىندىعى.
الداعى بىرنەشە جىل بەدەرىندە زامانىمىزدىڭ باستى سۇراعى: قانداي ەلدەر پروگرەسس ساپىنان ورىن الا الاتىنىنا, قايسىسى الەمدىك دامۋدىڭ جيەگىندە قالاتىنىنا جاۋاپ بەرىلەتىن بولادى.
ەكونوميكالىق, الەۋمەتتىك جانە ساياسي پروگرەسس – بۇل ءبىزدىڭ زاماناۋي سىن-تەگەۋرىندەرگە ءبىردەن-ءبىر دۇرىس جاۋابىمىز.
ءبىز الەمگە اشىقپىز, ۇزدىك تابىستارعا, جەتەكشى تەحنولوگيالارعا ۇمتىلىپ وتىرمىز. ادامداردىڭ يگىلىگى ءۇشىن جاسامپاز وزگەرىستەر – مەنىڭ پروگرەستى ءتۇسىنۋىم, مىنە, وسىنداي.
سونىمەن قاتار بيلىك ادامداردىڭ تالاپ-تىلەگىنە قۇلاق اسۋعا, پروبلەمالاردى جەرگىلىكتى جەردە شەشۋگە, ازاماتتار الدىندا تۇراقتى ەسەپ بەرىپ تۇرۋعا مىندەتتى.
ۋادە بەرمەي, ورىنداۋ شارت! مۇنداي ەرەجەنى بارلىق ۇكىمەت مۇشەسى جانە اكىمدەر ۇستانۋلارى ءتيىس.
پرەزيدەنت رەتىندە مەن ءۇشىن ەكونوميكالىق دامۋدىڭ جالپى تسيفرلارى ەمەس, بارلىق ازاماتتارىمىزدىڭ ناقتى ءال-اۋقاتى اسا ماڭىزدى بولىپ تابىلادى. سوندىقتان ستراتەگيالىق ماسەلەلەر بويىنشا شەشىمدەر قابىلداۋدا حالىقتىڭ باسىم بولىگىنىڭ ۇستانىمدارى قاپەرگە الىناتىنى ءسوزسىز.
ءبىزدىڭ مەملەكەتتىك بيلىكتىڭ فورمۋلاسى: كۇشتى, وكىلەتتى پرەزيدەنت – ىقپالدى, جۇمىس ىستەۋگە قابىلەتتى پارلامەنت – حالىققا ەسەپ بەرەتىن ۇكىمەت. ناق وسىنداي ساياسي جۇيە كۇردەلى گەوساياسي جاعدايلاردا مەملەكەتىمىزدىڭ تالاپتارىنا بارىنشا تولىق سايكەس كەلەدى, الدىمىزدا تۇرعان ستراتەگيالىق مىندەتتەردى شەشۋگە ىقپال ەتەدى.
سونىمەن قاتار قوعامدى ساياسي ترانسفورماتسيالاۋ پروتسەسى جالعاساتىن بولادى.
ساياسي تۇزەتۋلەر تۇبەگەيلى ەكونوميكالىق قايتا قۇرىلىمداۋلارمەن ءسايكەسۋى ءتيىس, ولاي بولماعان جاعدايدا رەفورمالاردا تەجەلۋلەر ورىن الۋى ىقتيمال. مۇنى الەمدىك تاجىريبەلەر ايقىن كورسەتىپ وتىر.
مەملەكەتتىك باسقارۋ جۇيەسىنە مەريتوكراتيا نەگىزىندە تەك لايىقتى, ءبىلىمدى ادامدار كەلۋلەرى كەرەك. كادرلار ىرىكتەۋدە باسقا قاعيدات بولماۋى ءتيىس.
تۇتاستاي العاندا, بىزگە بيلىكتىڭ حالىق الدىنداعى جاۋاپكەرشىلىگىن ارتتىرۋ قاجەت. ەرەكشە نازار ازاماتتىق قوعامدى دامىتۋعا اۋدارىلاتىن بولادى.
قادىرلى قاۋىم!
مەنىڭ سايلاۋالدى ۇگىت-ناسيحات جۇمىستارىم – بۇل ۇلكەن مىندەتتىڭ الدىنداعى حالىقپەن كەڭەسۋ بولدى. 2019 جىلدىڭ 13 مامىرىندا #BIRGE جالپىحالىقتىق اكتسياسى باستالدى. ونىڭ باستى ماقساتى – ەل دامۋىنداعى ەڭ ماڭىزدى مىندەتتەردى انىقتاۋ.
قازاقستاننىڭ بارلىق ايماعىنان ءتۇرلى ۇسىنىستار جينالدى. بۇگىنگە دەيىن 540 مىڭعا جۋىق ۇسىنىس-تىلەك كەلىپ ءتۇستى. #BIRGE اكتسياسىنا قاتىسىپ, ازاماتتىق بەلسەندىلىك تانىتقان بارشا حالىققا شىن جۇرەكتەن العىسىمدى ءبىلدىرەمىن.
ەندى ءبىز قوعامداعى وزەكتى ماسەلەلەردى ايقىن كورىپ وتىرمىز. ونىڭ شەشۋ جولدارىن بىلەمىز.
بۇگىن حالىقتى, ەڭ الدىمەن, نە مازالايدى؟ ەڭ ءبىرىنشى – ازاماتتار بارلىق جەردە ادىلدىك ورناۋىن قالايدى. الەۋمەتتىك ساياساتتان باستاپ مەملەكەتتىك ورگانداردىڭ حالىققا ءادىل قىزمەت كورسەتۋىن تالاپ ەتەدى.
حالىقتى تولعاندىرىپ وتىرعان باستى ماسەلە – تابىس كولەمىنىڭ ازايۋى. حالىقارالىق قارجى نارىقتارىنىڭ تۇراقسىزدانۋى, تەڭگەنىڭ دەۆالۆاتسياسى حالىقتىڭ تابىسىنا كەرى اسەر ەتتى. ميلليوننان استام ازاماتىمىز بانكتەن نەسيە الۋعا ءماجبۇر بولدى.
تابىسى جوعارى جانە تومەن ازاماتتاردىڭ اراسىنداعى الشاقتىق – ءبىزدىڭ قوعامدى مازالايتىن تاعى ءبىر وزەكتى ماسەلە. ءارينە مۇنداي قۇبىلىستار بۇكىل الەمدە بار, دەگەنمەن, توقمەيىلسىپ وتىرا بەرۋگە بولمايدى. سوندىقتان ءدال وسى وتكىر الەۋمەتتىك-ەكونوميكالىق ءجانە ساياسي ءماسەلەنى شەشۋ ءۇشىن ورتا مەرزىمدى كەشەندى شارالار قابىلداۋ قاجەت.
قورشاعان ورتانىڭ قازىرگى مۇشكىل ءحالى – كوپشىلىكتىڭ كوكەيىندەگى ماسەلە. سوندىقتان ەلىمىزگە بىرىڭعاي ەكولوگيالىق ساياسات قاجەت. قورشاعان ورتانى قورعاۋ جۇيەسىنە سەرپىن بەرەتىن جاڭا ەكولوگيالىق كودەكس قابىلداۋ كەرەك.
كەلەسى وزەكتى ماسەلە – حالىقتى سۋمەن قامتاماسىز ەتۋ. تازا اۋىز سۋ ءاربىر ۇيدە, ءاربىر وتباسىندا بولۋى مىندەت.
تاعى ءبىر ماڭىزدى, حالىقتى مازالايتىن ماسەلە. بۇل – جولداردىڭ ساپاسى. سول سەبەپتى اۆتوجولداردىڭ جاعدايىن جاقسارتۋ – ءبىزدىڭ نەگىزگى ماقساتتارىمىزدىڭ ءبىرى.
XXI عاسىر تالابىنا سايكەس, تسيفرلاندىرۋ كەڭ اۋقىمدى مىندەت بولىپ تابىلادى. ول ءومىردىڭ بارلىق سالاسىن: مەملەكەتتىك قىزمەت كورسەتۋلەردەن باستاپ, بولاشاق ەكونوميكانىڭ جاڭا سالالارىن قۇرۋعا دەيىنگى ارالىقتى قامتۋى ءتيىس.
ساياسي پروگرەستى قوسا العاندا, ەلدىڭ دامۋى تسيفرلاندىرۋمەن تىكەلەي بايلانىستى. ول مەملەكەت پەن قوعام اراسىنداعى قارىم-قاتىناس مازمۇنىن ساپالىق تۇرعىدان وزگەرتەدى. سوندىقتان ەلباسى بەكىتكەن «تسيفرلىق قازاقستان» مەملەكەتتىك باعدارلاماسى ورىندالاتىن بولۋى ءتيىس.
ءبىزدىڭ ازاماتتارىمىزدى بيلىك پەن قوعام ديالوگىن دامىتۋ ماسەلەسى قاتتى تولعاندىرادى. مۇنداي ديالوگ پىكىر الۋاندىعىن مويىنداۋ نەگىزىندە قۇرىلۋى ءتيىس. ءتۇرلى پىكىرلەر, بىراق ءبىرتۇتاس ۇلت. مىنە, باستى باعدارىمىز. سوندىقتان مەن قوعامدىق سەنىمنىڭ ۇلتتىق كەڭەسىن قۇرعان ءجون دەپ شەشتىم. كەڭەسكە, جاستاردى قوسا العاندا, بۇكىل قوعام وكىلدەرى كىرەتىن بولادى. ۇلتتىق كەڭەستىڭ العاشقى كەڭەسى وسى جىلدىڭ تامىزىندا وتكىزىلەدى.
بيلىك ءوزىنىڭ حالىق الدىنداعى ۋادەسىن ورىنداۋعا مىندەتتى. ونىڭ باستى ميسسياسى وسىعان سايادى. تەك وسىلاي عانا ۇلت بىرلىگى مەن ەلدەگى تۇراقتىلىقتى نىعايتۋعا بولادى. سوندىقتان مەنىڭ سايلاۋالدى تۇعىرنامامدى جۇزەگە اسىرۋدىڭ تاقىرىپتىق جوسپارى جاسالادى. حالىقتىڭ وزىق يدەيالارى, ۇسىنىستارى وسى قۇجاتتا كورىنىس تابادى.
كەلەسى ماڭىزدى باعىتتارعا باسا ءمان بەرۋىمىز كەرەك.
ءبىرىنشى باعىت. حالىقتىڭ تابىسىن ارتتىرۋ.
تۇراقتى جانە قارقىندى ەكونوميكالىق ءوسىم ارقىلى عانا بۇل ماسەلەنى شەشۋگە بولادى. ەڭ الدىمەن, ءوسىم بىزگە نە ءۇشىن قاجەت ەكەنىن تەرەڭ ءتۇسىنۋىمىز كەرەك. ازاماتتارىمىز ءوز ەلىندە الاڭسىز ءومىر ءسۇرىپ, ەڭبەك ەتىپ, ۇرپاعىن ءتاربيەلەپ, حالقىمىزدىڭ جەتىستىكتەرىنە بىرگە قۋانىپ, ماقتان تۇتۋ ءۇشىن ەكونوميكالىق ءوسىم بولۋى ءتيىس.
تاياۋ ارادا ۇكىمەتتىڭ كەڭەيتىلگەن وتىرىسىندا ءبىز ەلىمىزدىڭ الەۋمەتتىك-ەكونوميكالىق دامۋىنا ارنالعان ناقتى مىندەتتەردى ايقىندايمىز.
ەكىنشى باعىت. سىبايلاس جەمقورلىقتى جويۋ.
1 قىركۇيەككە دەيىن جەمقورلىقتىڭ دەڭگەيىن مەيلىنشە تومەندەتۋگە باعىتتالعان رەفورمالار توپتاماسى دايىندالادى.
جەمقورلىق – مەملەكەتتىڭ دامۋىن تەجەيتىن كەسەل. بۇل – قوعامداعى ءوزارا سەنىمگە, جالپى مەملەكەتىمىزدىڭ قاۋىپسىزدىگىنە قاتەر توندىرەتىن قۇبىلىس. سىبايلاس جەمقورلىققا قارسى جۇيەلى جۇمىس جۇرگىزەمىز.
ءۇشىنشى باعىت. سوت جانە قۇقىق قورعاۋ جۇيەسىن رەفورمالاۋ.
سوت – زاڭ ۇستەمدىگىنىڭ كەپىلى. سوندىقتان سۋديالار جوعارى كاسىبي جانە ادامگەرشىلىك تالاپتارىنا ساي بولۋى – بۇل ۇلكەن مىندەت. سۋديالار مەن وسى قىزمەتتەن ۇمىتكەرلەردى باعالاۋ جانە ىرىكتەۋ جۇيەسىن قاتاڭداتۋ كەرەك.
سوت – ادىلدىكتىڭ سوڭعى شەگى بولۋى ءتيىس. قۇقىق قورعاۋ جۇيەسىنىڭ باستى مىندەتى – حالىقتىڭ سەنىمىنە يە بولۋ.
ءتورتىنشى باعىت. جاڭا جۇمىس ورىندارىن اشۋ جانە حالىقتى لايىقتى جالاقىمەن قامتۋ.
ۇلتتىق تابىستى ءادىل ءبولۋ ماسەلەسى – بۇل ستراتەگيالىق ماڭىزدى دۇنيە. مەملەكەتتىك بيۋدجەتتىڭ قاراجاتىن, ەڭ الدىمەن, كەلەشەگى زور ماقساتتارعا جانە جاڭا جۇمىس ورىندارىن اشۋعا ءبولۋ قاجەت.
بەسىنشى باعىت. تۇرعىن ءۇي ماسەلەسىن شەشۋ.
ءتۇرلى ساناتتاعى ازاماتتاردىڭ قولجەتىمدى باسپاناعا يە بولۋىنا ايرىقشا نازار اۋدارامىن. ءبىزدىڭ الدىمىزدا بىرىڭعاي تۇرعىن ءۇي ساياساتىن جاساقتاۋ مىندەتى تۇر. ۇكىمەت وسى باعىتتا ناقتى شارالار قابىلدايدى.
التىنشى باعىت. ادىلەتتى الەۋمەتتىك ساياسات.
ءبىز ادام كاپيتالىن دامىتۋ ساياساتىن جالعاستىرامىز. بۇل باعىتتا, ەڭ الدىمەن, نە ىستەۋىمىز قاجەت؟
جاپپاي ءبىلىم بەرۋدى قولداۋ. بارلىق تۇرعىنعا ساپالى مەديتسينالىق قىزمەت كورسەتۋ. بۇل ماسەلەلەر بويىنشا ءبىزدىڭ تۇتاس باعىت-باعدارىمىز بار.
ءبىز مۇعالىمدەردىڭ جانە ءدارىگەرلەردىڭ مارتەبەسىن كوتەرەتىن جاڭا زاڭدار قابىلدايمىز. ولاردىڭ قۇقىعىن قورعاپ, ماتەريالدىق جاعدايىن جاقسارتۋ ءۇشىن ءتيىستى قولداۋ كورسەتەمىز.
جەتىنشى باعىت. وڭىرلەردى دامىتۋدىڭ جاڭا باعدارى.
ءبىزدىڭ قاعيدامىز بارشاڭىزعا ءمالىم: قۋاتتى ايماقتار – قۋاتتى قازاقستان.
ازاماتتارىمىزدى تولعاندىرعان ناقتى ماسەلەلەر جەرگىلىكتى دەڭگەيدە شەشىلۋى ءتيىس. جەرگىلىكتى ءوزىن ءوزى باسقارۋ ءجۇيەسىن نىعايتامىز. ايماقتاعى قوردالانعان ماسەلەلەردى شەشۋگە حالىق بەلسەنە ارالاساتىن بولادى.
سەگىزىنشى باعىت. «رۋحاني جاڭعىرۋ» قۇندىلىقتارى ءبىزدىڭ باستى رۋحاني باعدارىمىز بولىپ قالا بەرەدى. تاريحقا قۇرمەتپەن قاراۋ, وتانعا ادال بولۋ, عىلىم-بىلىمگە دەگەن ۇمتىلىس – مۇنىڭ بارلىعى ءبىزدىڭ حالقىمىزدىڭ بويىنداعى اسىل قاسيەتتەر. بۇل قاسيەتتەر ءبىزدىڭ حالقىمىزدىڭ بىرلىگىن جانە ۇلتىمىزدىڭ جاسامپازدىعىن نىعايتادى, باسەكەگە قابىلەتتى ەل بولۋعا جول اشادى.
قازاقستاندى بولاشاققا باستايتىن – جاستار. سوندىقتان بۇل باعدارلامانى جاس ۇرپاقتى تاربيەلەۋگە باعىتتاۋىمىز قاجەت.
توعىزىنشى باعىت. سىرتقى ساياسات.
قازاقستان الەمدە ۇلكەن بەدەلگە قول جەتكىزدى, ءوزىن بەيبىتسۇيگىش, اشىق ەل, حالىقارالىق ىستەردە سەنىمدى جانە جاۋاپكەرشىلىكتى ارىپتەس رەتىندە تانىتتى.
ءبىز كونسترۋكتيۆتى, تەڭدەستىرىلگەن, كوپۆەكتورلى, سىرتقى ساياسي باعىتىمىزدى جالعاستىرامىز. الەمدىك ارەنادا ۇلتتىق ءمۇددەمىزدى نىق ىلگەرىلەتەتىن جانە قورعايتىن بولامىز. ەلىمىزدىڭ سىرتقى ساياسي قىزمەتى وتانىمىزعا, ۇلتتىق بيزنەسكە, ءار ازاماتقا ناقتى پايدا اكەلەتىن بولادى.
ونىنشى باعىت. جاس ۇرپاققا ەرەكشە قايىرىلعىم كەلەدى.
سىزدەردىڭ الدارىڭىزدا قازاقستان دامۋىندا شەشۋشى ءرول اتقارۋ, پروگرەستىڭ قوزعاۋشى كۇشى بولۋ مىندەتى تۇر. ەلباسى 2019 جىلدى جاستار جىلى دەپ جاريالادى. «جاستار – ەل تىرەگى» ارنايى جوباسى جۇمىس ىستەي باستادى.
ءبىز جاستاردىڭ «جاس كاسىپكەر» بيزنەس-باستاماسىن دامىتۋ باعدارلاماسىن جۇزەگە اسىرۋدامىز, جاستار ستارتاپتارىن قولدايتىن بولامىز. جاستاردى جۇمىسقا ورنالاستىرۋ باعدارلامالارىن ەنگىزەمىز.
مەنىڭ مىندەتىم – سىزدەرگە وزدەرىڭىزدىڭ ەڭ ۇلكەن ارماندارىڭىزدى جۇزەگە اسىرىپ, جەكە «تابىستار تاريحىن» قالىپتاستىرۋلارىڭىزعا بارلىق مۇمكىندىكتى تۋعىزۋ.
مەملەكەتتىك قىزمەتتىڭ بارلىق دەڭگەيىنە جاس تالانتتى باسقارۋشىلاردى ىلگەرىلەتۋ ءۇشىن «پرەزيدەنتتىڭ كادرلىق رەزەرۆى» قالىپتاستىرىلاتىن بولادى.
ءبىزدىڭ جاستارىمىز ماقساتكەر, ەڭبەكسۇيگىش, كرەاتيۆتى, سوندىقتان قازاقستاننىڭ بولاشاعى سەنىمدى قولدا.
قىمباتتى وتانداستار!
الدىمىزدا اۋقىمدى جالپىحالىقتىق مىندەتتەر تۇر. ماقساتىمىز – ايقىن, جولىمىز – اشىق! قازاقستان جاڭا ءمۇمكىندىكتەر مەن پەرسپەكتيۆالار ەلىنە اينالدى. ونىڭ يگىلىگىن جاستار مەن كەلەشەك ۇرپاق كورەدى.
ءبىز بابالار ءداستۇرىن قاستەرلەيتىن, جاھاننىڭ وزىق جەتىستىكتەرىنە ۇمتىلاتىن حالىقپىز. بۇل – ءبىزدىڭ كۇش-قۋاتىمىزدىڭ دىڭگەگى.
ءبىز الدىمىزداعى بارلىق قيىندىقتى بىرگە ەڭسەرەمىز. ءبىز قۋاتتى ءارى گۇلدەنگەن قازاقستاننىڭ وركەندەۋى ءۇشىن بىرگە ەڭبەك ەتەمىز.
انتقا ادال بولۋ, سەرتكە بەرىك بولۋ – مەنىڭ حالىق الدىنداعى پارىزىم.
قازاقستاننىڭ جارقىن بولاشاعى ءۇشىن, حالىق ءۇشىن ايانباي ەڭبەك ەتۋگە سەرت بەرەمىن.
بارشاڭىزعا اماندىق, قۇت-بەرەكە تىلەيمىن.
قاسيەتتى وتانىمىز – قازاقستان رەسپۋبليكاسى جاساي بەرسىن!
