جيىن ورتالىق سايلاۋ كوميسسياسىنىڭ 9 ماۋسىمدا وتكەن كەزەكتەن تىس پرەزيدەنتتىك سايلاۋدىڭ الدىن الا قورىتىندىسىن جاريالاعاننان كەيىن ۇيىمداستىرىلدى. باسقوسۋعا قازاقستان كوممۋنيستىك حالىق پارتياسى رەسپۋبليكالىق سايلاۋالدى شتابىنىڭ جەتەكشىسى ايقىن قوڭىروۆ جانە ونىڭ ورىنباسارى ۆيكتور سميرنوۆ قاتىستى.
اتالعان پارتيا اتىنان پرەزيدەنتتىككە كانديدات رەتىندە ۇسىنىلعان جامبىل احمەتبەكوۆ وسك حابارلاعان سايلاۋدىڭ ناتيجەسىمەن كەلىسەتىندەرىن, بارلىق كورسەتكىش حالىقتىڭ شىنايى قولداۋىمەن سايكەسەتىنىن مالىمدەدى.
«سايلاۋ اشىق ءارى ءادىل ءوتتى. سايلاۋالدى ناۋقان بارىسىنداعى كۇرەس شىنايى ءارى باسەكەلى بولدى. ءبىزدىڭ ۇگىت-ناسيحات جۇمىسىن جۇرگىزۋشىلەر زاڭناما اياسىندا رەسپۋبليكالىق شتابتىڭ جوسپارىنا ساي بەكىتىلگەن بارلىق قاجەتتى شارانى قابىلدادى. كونستيتۋتسيا كەپىل بولعان تەڭدىك پەن باسەكەلەستىك زاڭى تولىق ساقتالدى. ءبىزدىڭ بايقاۋشىلاردىڭ سايلاۋدىڭ ناتيجەسىنە ىقپال ەتەتىن ورەسكەل قۇقىق بۇزۋشىلىقتى انىقتاماعانىن مالىمدەگىم كەلەدى», دەدى ول.
وسىلاي دەي كەلە, جامبىل احمەتبەكوۆ Nur Otan پارتياسى اتىنان سايلاۋعا قاتىسقان قاسىم-جومارت توقاەۆقا قۇتتىقتاۋىن جولداپ, ونىڭ جەڭىسى سەنىمدى ءارى لايىقتى بولعانىن اتاپ ءوتتى. سونداي-اق ءوزىنە قولداۋ كورسەتكەن بارلىق قازاقستاندىققا العىسىن ايتىپ, كەزەكتەن تىس پرەزيدەنت سايلاۋى جوعارى بيلىك ءترانزيتىنىڭ شەشۋشى كەزەڭى بولاتىنىنا جانە قازاقستاندى جاڭعىرتۋ جولىنداعى رەفورمالاردىڭ ءجۇزەگە اسۋىنا ىقپال ەتەتىنىنە سەنىم ءبىلدىردى.
ءسوزىنىڭ سوڭىندا جامبىل احمەتبەكوۆ پارتيا جاقتاستارى مەن بەلسەندىلەرىنە سايلاۋالدى ناۋقاندى ءتيىستى دارەجەدە ۇيىمداستىرىپ, اتقارىپ شىققانى ءۇشىن ريزاشىلىعىن جەتكىزدى. «مەن بۇل سايلاۋدىڭ قورىتىندىسىن ءبىزدىڭ جەڭىلىسىمىز دەپ ەسەپتەمەيمىن. ءبىز كۇشىمىزدى كورسەتتىك, تاعى ءبىر مارتە ءوزىمىزدى تەكسەردىك. پارلامەنت ءماجىلىسىنىڭ سايلاۋى الدىندا وبلىستىق, اۋداندىق كوميتەتتەردىڭ شاما-شارقىن بايقادىق», دەپ ءوز ويىن تۇيىندەدى.
