سول سياقتى ەلىمىزدە 25 جاسقا دەيىنگى بالا تابا الاتىن قىز-كەلىنشەكتەر اراسىندا ەرتە جۇكتىلىك پەن ابورت تاقىرىبى وزەكتىلىگىن جويماي وتىر. وكىنىشكە قاراي, ايەلدەر قاۋىمىنىڭ باسىم بولىگى «بالا الدىرۋدى» قۇرساقتاعى كەرەك ەمەس شارانادان قۇتىلۋدىڭ جالعىز جولى دەپ ەسەپتەيدى. تۇسىكتەن كەيىنگى ەڭ قورقىنىشتى دياگنوز – بەدەۋلىك. بۇگىنگى تاڭدا ەلىمىزدە ءاربىر بەسىنشى وتباسى وسىنداي جاعدايدى باسىنان وتكەرىپ, ءبىر پەرزەنتكە زار بولىپ ءجۇرىپ قول جەتكىزەدى. ال ەكو 100% ءسابي سۇيۋگە كەپىلدىك بەرمەيدى. ءبارى – ءبىر قۇدايدىڭ قۇزىرىندا.
وسى ارادا سۇراق تۋادى. نەگە وڭ مەن سولىن تانىماعان جاپ-جاس قىزدارىمىز جىنىستىق قاتىناسقا بارادى؟ بىرەۋدىڭ بويجەتىپ ۇلگەرمەگەن بالاسىن توسەككە سۇيرەيتىن جىگىتتەر قىزبەن جاقىنداسقاندا جۇكتى بولىپ قالاتىنىن نەگە بىلمەيدى؟ وسىنداي جاعدايدا قوعام كوبىنە قىز بالانى عانا كىنالاۋىن نەگە قويمايدى؟ تۇبىندە بەدەۋلىككە الىپ باراتىن جىنىستىق جۇقپالى اۋرۋلاردىڭ ءتۇرى كوبەيگەنىن بىلەتىن جاستار وسى كەزدە نەگە بىلمەي قالادى؟
وسى ماسەلە توڭىرەگىندە جۋىردا عانا پسيحولوگ ماماندارمەن, سەكسوپاتولوگ دارىگەرمەن پىكىرلەسكەن ەدىك. ارامىزدا ءدىن جولىندا جۇرگەن ادام دا بولاتىن.
سونىمەن ۇيدەگى بالا-شاعامىزعا رەتىن تاۋىپ, جاسىنا قاراي جىنىستىق ساۋاتتىلىق تۋرالى ايتۋىمىز كەرەك پە, كەرەك ەمەس پە؟ اڭگىمەنىڭ باسىن اشىپ الايىق. جىنىستىق ساۋاتتىلىق تۋرالى اڭگىمە جىنىستىق قارىم-قاتىناسقا ۇيرەتۋ دەگەندى بىلدىرمەسە كەرەك. ۇلعا ۇلدىڭ نە ەكەنىن, قىزعا قىزدى قۇداي تاعالا قالاي جاراتقانىن قاي كەزدەن باستاپ تۇسىندىرگەن ءجون؟
«ويباي, نە ايتىپ وتىرسىزدار؟ وسى بىزگە ەشكىم ۇيرەتپەي-اق ءوزىمىز ءبارىن ءبىلىپ الدىق قوي», دەيتىن ادام مۇنداي كەزدە بىردەن تابىلادى.
«ەگەر قىز بالا كىشكەنتايىنان قاعىنىپ, ەكىقابات بولىپ قالسا ءوزى كىنالى. اكە-شەشەسى قايدا قاراپ وتىر؟», دەيتىن ءۋاج ارينە, ايتىلادى.
«ينتەرنەتتى اشىپ قالساڭ ءبارى بار. جاستاردىڭ كوزى اشىق, وزدەرى-اق ءبىلىپ الادى» دەستى ەندى ءبىرى.
«باياعىدا مۇنداي اڭگىمەنى قىزدارعا جاقىن جەڭگەسى ايتاتىن» دەگەن ءسوزدىڭ دە ايتىلماي قالماسى ايان. بىراق بۇگىن اعالاردىڭ كوزى ايفوننان, جەڭگەلەردىڭ قولى الەۋمەتتىك جەلىلەردەن بوساماي جاتقاندا, ۇل مەن قىزعا بەرىلەتىن تاربيە اتا-انانىڭ تىكەلەي مىندەتى بولىپ قالا بەرمەك.
«مەن قايدان شىقتىم؟ اكەم تۋدى ما, شەشەم تۋدى ما؟» دەگەن ىڭعايسىز سۇراقتاردى بالا ءبارىبىر ەرتەلى-كەش قويادى.
سوندىقتان دا «اھ دەگەندە اۋزىمنان ءتۇسىپ قالعانسىڭ, بازاردان ساتىپ الدىق, كاپۋستانىڭ اراسىنان تاۋىپ العانبىز» دەگەن جاۋاپتان قاشىڭىز», دەيدى ماماندار.
«سەن اناڭنىڭ قۇرساعىندا جاتتىڭ. انانىڭ قۇرساعىنداعى ءداندى اكەڭ بەرگەن. كەيىنىرەك ول ءداندى اكەڭ قايدان العانىن ءوزى تۇسىندىرەدى» دەپ جاسىنا قاراي, جاۋاپ بەرىپ, بىرتىندەپ وسى تاقىرىپقا اكەلىپ, وسى تاقىرىپتى, جىنىستىق قارىم-قاتىناستىڭ جاۋاپكەرشىلىگىن بارىنشا ابايلاپ ءتۇسىندىرۋ قاجەت», دەدى سەكسوپاتولوگ-دارىگەر.
قالاي بولعاندا دا ومىرلىك سۇراقتىڭ جاۋابىن ءوسىپ كەلە جاتقان جاس ادام ەڭ جاقىندارىنان بىلگەنى ءجون. عالامتوردا تولىپ تۇرعان, ەلەكتەن وتپەگەن ءتۇرلى پيعىلداعى اقپاراتتار لەگىنىڭ قايسىسى دۇرىس, قايسىسى بۇرىس ەكەنىنە ەشكىم كەپىلدىك بەرمەيتىنى بەلگىلى.
ءجۇز جەردەن ىڭعايسىز تاقىرىپ بولسا دا, تاعدىرشەشتى ماسەلە ەكەنىن مويىنداۋ قاجەت. ايتپەسە, ەلىمىزدەگى ەڭ جاس انا بار بولعانى 13-تە بولار ما؟
بارلىق مەملەكەتتەر سياقتى قازاقستاندا جاسوسپiرiمدەردiڭ رەپرودۋكتيۆتiك دەنساۋلىعىن ساقتاۋ كۇردەلi ماسەلەلەردiڭ بiرi. وسى ارادا يۋنفپا-نىڭ تەحنيكالىق قولداۋىمەن جۇرگiزiلگەن زەرتتەۋ ناتيجەلەرi بويىنشا جاستاردىڭ 13,6 پايىزى 15 جاسقا جەتپەي جىنىستىق قاتىناسقا تۇسەتىنى انىقتالعانىن العا تارتۋعا بولادى. 15-19 جاس ارالىعىنداعى جاسوسپىرىمدەردىڭ جارتىسىنا جۋىعى جىنىستىق قاتىناسپەن ءومىر سۇرەدى. ولاردىڭ كوبى بەيباستاق جىنىستىق بايلانىس – دەنساۋلىق ءۇشىن وتە زيان ەكەنىن ويلامايدى.
بۇۇ حالىق سانى سالاسىنداعى قورىنىڭ اتقارۋشى ديرەكتورى باباتۋندە وسوتيمەحين الەمنiڭ 15 جىلدان كەيiنگi بەينەسى بۇگىنگى 10 جاستاعى قىز بالالاردىڭ تاربيەسىنە, ءبىلىمى مەن بالا تابۋعا قابىلەتتىلىك دەنساۋلىعىنا تىكەلەي تاۋەلدi ەكەنىن مالىمدەگەن جوق پا؟!
