شاراينا
سارسەنبى, 20 اقپان 2013 7:09
شىعىن كولەمى – 11 ميلليارد دوللار
داماسكىدە 2011 جىلدىڭ ناۋرىزىنان بەرى ءجۇرىپ جاتقان سوعىس قيمىلدارى سالدارىنان سيريا ينفراقۇرىلىمىنا كەلتىرىلگەن شىعىن ەسەپتەپ شىعارىلدى.
سارسەنبى, 20 اقپان 2013 7:09
شىعىن كولەمى – 11 ميلليارد دوللار
داماسكىدە 2011 جىلدىڭ ناۋرىزىنان بەرى ءجۇرىپ جاتقان سوعىس قيمىلدارى سالدارىنان سيريا ينفراقۇرىلىمىنا كەلتىرىلگەن شىعىن ەسەپتەپ شىعارىلدى.
ونىڭ جالپى سوماسى 11 ميلليارد دوللاردى قۇراعان. ونىڭ سىرتىندا سيريا ۇكىمەتى وتكەن جىلى ينفراقۇرىلىمنىڭ جانە مەملەكەتتىك مەكەمەلەردىڭ ماڭىزدى نىساندارىن جوندەۋ ءۇشىن 11 ميلليون دوللار قارجى جۇمساعان. بۇعان دەيىن ەل پرەزيدەنتى باشار اساد سيريانىڭ قارسىلاستارى ەلدىڭ ينفراقۇرىلىمىنا جانە سيريالىق ازاماتتاردىڭ پسيحيكاسىنا نۇقسان كەلتىرۋ جۇمىستارىن جوسپارلى تۇردە جۇرگىزۋدە دەپ مالىمدەگەن بولاتىن. 2011 جىلدان بەرى جالعاسىپ كەلە جاتقان قارۋلى قاقتىعىس سالدارىنان 70 مىڭ ادام قازا تاپتى.
بەنەديكتتىڭ جاعدايى نە بولماق؟
ءوز ەركىمەن تاقتان باس تارتقان ريم پاپاسى بەنەديكت XVI-عا اشتىقتان كەلەر قاۋىپ جوق. تاقتان كەتكەننەن كەيىن وعان اي سايىن 2,5 مىڭ ەۋرو زەينەتاقى تولەنبەك.
ونىڭ سىرتىندا ەكس-پاپاعا ەشتەڭەگە الاڭداۋعا جانە ەشتەڭە ءۇشىن اقى تولەۋگە تۋرا كەلمەيدى. سوندىقتان دا كوپتەگەن ءدىندارلاردى بەنەديكتتىڭ ءوز اقشاسىن قايدا جۇمسايتىنى قىزىقتىرۋدا. وتستاۆكاداعى پونتيفيكتىڭ زەينەتاقىسى ءتىپتى دەمالىسقا كەتكەن كاردينالدىڭ زەينەتاقىسىنان دا تومەن. سونىمەن بىرگە, قاسيەتتى پەتر تاعىنىڭ مۇراگەرى بەنەديكتكە قۇرمەتتى كاردينال مارتەبەسىن بەرەتىن شىعار دەگەن دە ءۇمىت بار. ال ول ونىڭ ايىنا 5 مىڭ ەۋرو زەينەتاقى الۋىنا مۇمكىندىك بەرەدى.
قازىرگى پرەزيدەنتتىڭ باسىم جەڭىسى
Cedatos ۇيىمىنىڭ اقپاراتتارى بويىنشا, ەكۆادور پرەزيدەنتتىگىنەن ۇمىتكەر رافاەل كوررەا 61 پايىز داۋىس جيناسا, ونىڭ ەڭ نەگىزگى باسەكەلەسى گيلەرمو لاسسو 20 پايىز عانا داۋىس جيناعان.
ەل استاناسى كيتو قالاسىنىڭ ورتالىعىندا كوررەانىڭ جاقتاۋشىلارى بىرنەشە ساعاتتان بەرى ونىڭ جەڭىسىن تويلاۋدا. ەلدىڭ قازىرگى پرەزيدەنتى رافاەل كوررەانىڭ ەلدە ءوتىپ جاتقان سايلاۋدىڭ ءبىرىنشى تۋرىندا-اق جەڭىسكە جەتكەنىن exit-poll مالىمەتتەرى دە ايعاقتاۋدا. سايلاۋ زاڭناماسىنا سايكەس ەگەر كانديدات 50 پايىز جانە پليۋس 1 داۋىس السا نەمەسە ەڭ جاقىن تۇرعان باسەكەلەسىنەن 10 پايىزعا وزا وتىرىپ, باسىم داۋىسقا يە بولسا, ول ءبىرىنشى تۋردا جەڭگەن بولىپ ەسەپتەلەدى.
اقش-تا قۇلدىق تۇبەگەيلى جويىلدى
امەريكانىڭ ميسسيسيپي شتاتى كونستيتۋتسياعا ەنگىزىلگەن قۇلدىقتى جوياتىن 13-ءشى تۇزەتۋدى راتيفيكاتسيالاعان اقش-تىڭ ەڭ سوڭعى شتاتى بولىپ تابىلادى.
ول ميسسيسيپي ۋنيۆەرسيتەتىنىڭ ەكى عالىمىنىڭ قىزىعۋشىلىق تانىتۋى ارقاسىندا جۇزەگە اسقان. تاياۋدا ەكرانعا شىققان س.سپيلبەرگتىڭ «لينكولن» اتتى ءفيلمىن قاراعان ولار ءوز شتاتىندا قۇلدىقتىڭ قاشان جويىلعانىن بىلمەك بولعان. سويتسە, 1995 جىلى جەرگىلىكتى پارلامەنت تۇزەتۋدى ەنگىزۋ ءۇشىن داۋىس بەرگەن, بىراق ونىڭ كوشىرمەسى فەدەرالدىق رەەسترگە جىبەرىلمەگەن, ال ول تۇزەتۋ فورمالدى تۇردە شتات اۋماعىندا كۇشىندە تۇر دەگەندى بىلدىرەتىن. عالىمدار جەرگىلىكتى بيلىككە سۇراۋ سالعان سوڭ ءتيىستى قۇجاتتار فەدەرالدىق رەەسترگە جىبەرىلگەن كورىنەدى.
اۋەجاي باسىنداعى ۇرلىق
بريۋسسەلدە بەلگىسىز بىرەۋلەر بەلگيا استاناسىنان تسيۋريحكە جەتكىزبەك بولعان الماستىڭ ءىرى پارتياسىن ۇرلاپ كەتكەن.
وقيعا بريۋسسەل اۋەجايىندا ورىن العان. ەكى ماشيناعا وتىرعان قىلمىسكەرلەر ۇشۋ الاڭىن ءبولىپ تۇرعان دۋالدى بۇزىپ ءوتىپ, ۇشاققا الماستاردى تيەپ جاتقان ينكاسساتورلىق جۇك ماشيناسىنا جاقىن كەلگەن. قارۋمەن قورقىتا وتىرىپ, شابۋىل جاساۋشىلار الماستاردى ءوز اۆتوموبيلدەرىنە سالىپ, وزدەرى كەلگەن ىزبەن قاشىپ كەتكەن. شابۋىل سالدارىنان ەشكىم زارداپ شەكپەگەن كورىنەدى. پوليتسيا قازىر توناۋشىلاردى ىزدەستىرۋدە.
سارگسيان جەڭىسكە جەتتى
ارمەنيا پرەزيدەنتى سەرج سارگسيان 18 اقپاندا وتكەن سايلاۋدا 58 پايىزدان استام داۋىس جيناپ, ءوز لاۋازىمىن ساقتاپ قالدى.
ەۋروينتەگراتسيانى جاقتاۋشى, بۇرىنعى سىرتقى ىستەر ءمينيسترى راففي وۆاننيسيان 20 پايىزعا كەيىن قالىپ, ەكىنشى ورىن العان. ورتالىق سايلاۋ كوميسسياسى بۇرمالاۋلار جونىندە شاعىمدار بولعان جوق دەپ راپورت بەرۋدە. ال «ميراس» پارتياسىنىڭ ءباسپاسوز حاتشىسى وۆسەپ حۋرشۋديان سايلاۋدا جاپپاي بۇرمالاۋلار ورىن الدى دەپ مالىمدەگەن. سايلاۋدىڭ تۇپكىلىكتى ناتيجەلەرىن ارمەنيانىڭ ورتالىق سايلاۋ كوميسسياسى داۋىس بەرۋ اياقتالعاننان كەيىن 7 كۇننەن سوڭ حابارلايتىن بولادى.
ميللياردەردىڭ بايلىعى كىمگە قالادى؟
گەرمانياداعى ەڭ باي ادامداردىڭ ءبىرى جانە Metro Group نەمىس ريتەيلەرىنىڭ نەگىزىن قالاۋشى وتتو بايسحايم 18 اقپان كۇنى وزىنە ءوزى قول جۇمساعان.
بيزنەسمەننىڭ مۇردەسى دۇيسەنبى كۇنى تاڭەرتەڭ ءوزىنىڭ باۆارياداعى ۇيىندە تابىلعان كورىنەدى. Bild باسىلىمىنىڭ جازۋىنشا, ول ەم قونبايتىن ناۋقاسپەن سىرقاتتانعان جانە «ءوز دەنساۋلىعىنىڭ ۇمىتسىزدىگىنە بايلانىستى» ومىرمەن قوشتاسۋعا بەل بۋعان. بيزنەسمەننىڭ جاسى 89-دا ەكەن. ونىڭ بالالارى بولماعان, 1999 جىلى زايىبى قايتىس بولعان. وتكەن عاسىردىڭ 60-شى جىلدارىنىڭ سوڭىندا ۇساق كوتەرمە ساۋدا يدەياسىن ۇسىنا وتىرىپ, ول 3 ملرد. دوللاردان اساتىن بايلىققا قول جەتكىزگەن. و.بايسحايم نەگىزىن قالاعان Metro Group كومپانياسى بۇگىندە كولەمى جاعىنان الەمدەگى بەسىنشى سۋپەرماركەتتەر جەلىسى بولىپ تابىلادى.
ينتەرنەت ماتەريالدارى نەگىزىندە ازىرلەندى.
