«باتىس» وڭىرلىك قولباسشىسىنىڭ تاربيە جانە الەۋمەتتىك-قۇقىقتىق جۇمىستار بويىنشا ورىنباسارى پودپولكوۆنيك باقىت الازوۆتىڭ ايتۋىنشا, اسكەري بولىمدەردە اشىلعان سايلاۋ ۋچاسكەلەرىندە داۋىس بەرۋشىلەردىڭ بەلسەندىلىگى وتە جوعارى بولعان. اسكەري قىزمەتكەرلەردىڭ جەكە قۇرامى عانا ەمەس, ولاردىڭ وتباسى دا ساياسي ناۋقانعا تۇگەل قاتىسقان.
سايلاۋ ۋچاسكەلەرىندە داۋىس بەرۋ زاڭ بويىنشا تاڭعى ساعات 7-دە باستالسا, ارادا ءبىر ساعات ۋاقىت وتكەندە سايلاۋشىلاردىڭ 70 پايىزىنان ارتىعى ءوز داۋىسىن بەرىپ ۇلگەرگەن. سايلاۋعا قاتىسۋشىلاردىڭ باسىم بولىگى – 18-گە ەندى تولعان, تۇڭعىش رەت داۋىس بەرۋ قۇقىعىنا يە بولعان جاس ساربازدار.
اسكەرگە قاراعاندى قالاسىنان شاقىرىلىپ, قازىر اقتاۋداعى 6656 اسكەري بولىمىندە وتان الدىنداعى بورىشىن اتقارىپ جاتقان قاتارداعى جاۋىنگەر بەرىك ەسقاليەۆ تا وسىنداي تۇڭعىش داۋىس بەرۋشىلەردىڭ ءبىرى. «مەن تاۋەلسىز قازاقستاننىڭ ازاماتى رەتىندە ەلىمىزدە ۇلتارالىق تاتۋلىق, ىنتىماق بولعانىن قالايمىن. سول ءۇشىن بۇگىن ازاماتتىق پارىزىمدى اتقارىپ, داۋىسىمدى بەردىم» دەيدى جاس سارباز.
ورال قالاسىنداعى 5517 اسكەري بولىمدە قىزمەت ەتۋشى قايرات وتەگەنوۆتىڭ تۋعان جەرى – الماتى وبلىسى. اسكەري كيىم كيگەلى وتكەن 7 اي ىشىندە قىزمەتىنىڭ قىر-سىرىن, قوعامدىق ءتارتىپتىڭ ماڭىزىن, تاتۋلىق پەن ىنتىماقتىڭ باعا جەتكىسىز قۇندىلىق ەكەنىن ۇعىپ قالىپتى. «وتانىمىزدا بەيبىت ءومىر مەن كەلىسىم ورناپ تۇر. سوعان ماقتانامىن!» دەيدى ول.
- ۇيىمشىلدىقپەن وتكەن داۋىس بەرۋدىڭ ناتيجەسىن قورىتىندىلاپ تا ۇلگەردىك. بىزگە قاراستى بارلىق 5 جابىق سايلاۋ ۋچاسكەسىندە تىركەلگەندەر 100 پايىز داۋىس بەردى. زاڭ بۇزۋشىلىقتار بولمادى. تاڭەرتەڭگى ساعات 10-دا تولىعىمەن تاڭداۋىمىزدى جاساپ ۇلگەردىك, - دەيدى پودپولكوۆنيك باقىت الازوۆ.
ايتا كەتەيىك, قازاقستاننىڭ باتىس وڭىرىندەگى اسكەري بولىمدەردە سايلاۋ قۇقىعى بار 5 مىڭعا جۋىق ازامات قىزمەت ەتەدى.
باتىس قازاقستان
