شاراينا
سەنبى, 16 اقپان 2013 7:47
مەتەوريت كوپشىلىكتى ۇرەيلەندىردى
كەشە ەرتەڭگىسىن چەليابى وبلىسىنىڭ اۋماعىندا مەتەوريت قۇلاۋى سالدارىنان جارىلىس بولدى. رەسەي ىشكى ىستەر مينيسترلىگىنىڭ تاراتقان مالىمەتتەرىنە قاراعاندا, قۋاتتى جارىلىس سالدارىنان مەكتەپتەر مەن بالاباقشا تەرەزەلەرىنىڭ اينەكتەرى سىنعان.
سەنبى, 16 اقپان 2013 7:47
مەتەوريت كوپشىلىكتى ۇرەيلەندىردى
كەشە ەرتەڭگىسىن چەليابى وبلىسىنىڭ اۋماعىندا مەتەوريت قۇلاۋى سالدارىنان جارىلىس بولدى. رەسەي ىشكى ىستەر مينيسترلىگىنىڭ تاراتقان مالىمەتتەرىنە قاراعاندا, قۋاتتى جارىلىس سالدارىنان مەكتەپتەر مەن بالاباقشا تەرەزەلەرىنىڭ اينەكتەرى سىنعان.
«نوۆوستي» اقپارات اگەنتتىگىنىڭ حابارلاۋىنشا, مەتەوريت قۇلاعان اۋماقتاردا بيىك عيماراتتاردىڭ, مەكتەپتەر مەن بالاباقشالاردىڭ, باسقا دا نىسانداردىڭ اينەكتەرى سىنعان. سوڭعى مالىمەتتەرگە قاراعاندا, مەتەوريت قۇلاۋىنان 100-دەن استام ادام جاراقات العان. مەتەوريتتى چەليابى, سۆەردلوۆ, تۇمەن جانە قورعان وبلىستارىنىڭ تۇرعىندارى دا بايقاپتى. وسىعان بايلانىستى چەليابى اكىمشىلىگى جەرگىلىكتى تۇرعىنداردى بالالارىن مەكتەپتەردەن الىپ كەتۋگە شاقىردى.
قايتا جاڭعىرتۋ جۇمىستارىن باستادى
سولتۇستىك كورەيا ەلدىڭ سولتۇستىك-شىعىسىندا ورنالاسقان «تونحە» زىمىران ۇشىرۋ الاڭىن قايتا جاڭعىرتۋ جۇمىستارىن باستادى. اقپارات قۇرالدارىنىڭ جازۋىنشا, ۇشىرۋ الاڭىن الىسقا ۇشاتىن ءىرى كولەمدەگى زىمىراندار ءۇشىن دايىنداۋدا.
ستارت بەرۋ الاڭىن جەتىلدىرۋ يران ينجەنەرلەرىنىڭ نەمەسە يراندىق تەحنولوگيانىڭ كومەگىمەن جۇزەگە اسىرىلاتىن كورىنەدى. «تونحەنىڭ» كوپتەگەن ەلەمەنتتەرى يراننىڭ «سەمنان» كەشەنىنە ۇقساس كەلەدى. ساراپشىلاردىڭ پىكىرىنشە, قۇرىلىس قارقىنى باسەڭدەمەسە, نىساندى جاڭعىرتۋ 2016 جىلعا قاراي, ءتىپتى ودان دا ەرتە اياقتالۋى مۇمكىن. انىقتالماعان دەرەكتەرگە قاراعاندا, نىساندى كورەيالىق جاڭا كN-08 جانە «مۋسۋدان» زىمىراندارىن ۇشىرۋ ءۇشىن دايىنداۋدا.
40 جىلدان استام ۋاقىت وتكەن سوڭ…
ۇلىبريتانيانىڭ قورعانىس مينيسترلىگى 1972 جىلى سولتۇستىك يرلانديادا «قاندى جەكسەنبى» كەزىندە قازا تاپقان جانە اۋىر جاراقاتتار العان ادامدارعا وتەماقى تولەيتىن بولدى. بۇل جونىندە «فرانس-پرەسس» اگەنتتىگى حابارلادى.
سول قاندى وقيعا بولعان كۇنى قازا تاپقان 13 جانە جارالانعان وسىنشا ادامنىڭ تۋعان-تۋىستارىنا 50 مىڭ فۋنت ستەرلينگتەن (77,5 مىڭ دوللار) وتەماقى ۇسىنىلادى. قورعانىس مينيسترلىگى وسى ماقساتقا 1,3 ميلليون فۋنت ستەرلينگ ءبولىپ وتىر. قازا تاپقانداردىڭ كەيبىر تۋىستارى بۇل وتەماقى مولشەرىنە قاناعاتتانباعاندىق بىلدىرۋدە. ال قاندى وقيعا 1972 جىلدىڭ 30 قاڭتارىندا سولتۇستىك يرلانديانىڭ دەرري قالاسىندا بولعان ەدى. پاراشيۋتشىلەر باتالونىنىڭ اسكەرلەرى بەيبىت شەرۋ جاساۋشىلارعا قارسى وق اتىپ, سونىڭ سالدارىنان 13 ادام مەرت بولىپ, 14 ادام جارالانعان بولاتىن.
قىسقا قايىرىپ ايتقاندا:
قىرعىز دەپۋتاتى تۋرسۋنباي باكىر ۇلى «وبششەستۆەننىي رەيتينگ» اپتالىعىنىڭ ءتىلشىسى ەريك يسرايلوۆقا قول جۇمسادى. وقيعا پارلامەنتاريدىڭ ءوز قىزمەت بولمەسىندە بولعان.
ازەربايجان پرەزيدەنتى يلحام اليەۆ يسمايل اۋدانىنىڭ باسشىسى نيزامي الەكپەروۆتى وسى جىلدىڭ قاڭتارىنداعى تارتىپسىزدىكتەرگە بايلانىستى قىزمەتىنەن بوساتتى.
اعىلشىندىق زەرتتەۋشى, تەڭىزگە ءجۇزۋشى جانە كارتوگراف دجەيمس كۋكتىڭ تاپانشاسى اۆستراليادا وتكەن اۋكتسيوندا 227 مىڭ اقش دوللارىنا ساتىلدى.
تايلىق ەرلى-زايىپتى ءسۇيىسۋ ۇزاقتىعى بويىنشا الەم رەكوردىن جاڭارتتى. ولار 58 ساعات 35 ءمينوت جانە 58 سەكونت بويى ءسۇيىسىپ تۇرعان.
كۇتپەگەن جەردەن داۋ شىقتى
ەگيپەتتە ەل پرەزيدەنتىنىڭ ۇلىن ازاماتتىق اۆياتسيا مينيسترلىگىندە جوعارى ەڭبەكاقى الاتىن جۇمىسقا قابىلدانعانىنا بايلانىستى كۇتپەگەن جەردەن داۋ-داماي تۋىندادى. «اسسوشەيتەد پرەسس» اگەنتتىگىنىڭ اقپاراتىنا قاراعاندا, وسىعان بايلانىستى مينيسترلىك ارنايى مالىمدەمە جاساۋعا ءماجبۇر بولعان.
مالىمدەمەدە ەل پرەزيدەنتى موحاممەد ءمۋرسيدىڭ بەس ۇلىنىڭ ءبىرى – ومار مۋرسي اڭگىمەلەسۋدەن ءوتىپ, ءتيىستى قىزمەتكە ورنالاسقانى ايتىلعان. ال مينيسترلىككە قاراستى اگەنتتىك قىزمەتكەرىنىڭ ايتۋىنشا, ومار مۋرسي جەرگىلىكتى ۋنيۆەرسيتەتتەردىڭ ءبىرىن جاقىندا عانا ءبىتىرىپتى. كوپ ۋاقىت وتپەي ول ايىنا 5 مىڭ دوللار الاتىن جۇمىسقا ورنالاسقان. ەگيپەتتە تۇلەكتەردىڭ باسىم كوپشىلىگى ەڭبەك جولىن 75 دوللاردان اسپايتىن مەملەكەتتىك قۇرىلىمداردا باستايدى ەكەن. ايتا كەتەيىك, پرەزيدەنت م.ءمۋرسيدىڭ پرەزيدەنتتىك سايلاۋعا تۇسكەن كەزدەگى باعدارلاماسىندا ءوزىنىڭ جەمقورلىقپەن جانە تامىر-تانىستىقپەن ايانباي كۇرەسەتىندىگى كورسەتىلگەن.
حەيگەلدىڭ كانديداتۋراسى قولداۋ تاپپادى
رەسپۋبليكاشىل سەناتورلار توبى اقش پرەزيدەنتى باراك وبامانىڭ ەلدىڭ قورعانىس ءمينيسترى قىزمەتىنە ۇسىنعان چاك حەيگەلدىڭ كانديداتۋراسىنا قولداۋ بىلدىرمەدى. بۇل جونىندە «فرانس-پرەسس» اقپارات اگەنتتىگى حابارلادى.
داۋىس بەرۋ قورىتىندىسىندا چ.حەيگەلگە سەناتورلاردىڭ 58-ءى قارسى داۋىس بەرگەن, ال ونى سەناتورلاردىڭ نەبارى 40-ى جاقتاعان. جاقتاپ داۋىس بەرگەندەردىڭ باسىم كوپشىلىگى دەموكراتتار. وسىنىڭ الدىندا پەنتاگون باسشىلىعىنا ۇسىنىلعان چاك حەيگەلدىڭ كانديداتۋراسىن اقش سەناتىنىڭ قارۋلى كۇشتەر جونىندەگى كوميتەتى ماقۇلداعان بولاتىن. سەناتتاعى رەسپۋبليكاشىلار فراكتسياسى حەيگەلدى سەناتور بولعان ءبىر كەزدەرى يزرايل اتىنا سىندار ايتقان جانە ول يراننىڭ يادرولىق باعدارلاماسىنا قاتىستى قاتاڭ كوزقاراس ۇستانبايدى دەپ ايىپتايدى. سەناتتىڭ كەلەسى وتىرىسى ءبىر اپتادان سوڭ وتەدى.
ساياحاتشى كەمە جاعالاۋعا جەتكىزىلدى
بەس كۇننەن بەرى مەكسيكا بۇعازىندا بۇزىلۋ سالدارىنان تۇرىپ قالعان «كارنيۆال تريۋمف» ساياحاتشى كەمەسى ارەڭ دەگەندە جاعاعا جەتكىزىلدى. «رەيتەر» اگەنتتىگىنىڭ حابارلاۋىنشا, كەمەنىڭ بورتىندا 3143 جولاۋشى جانە 1086 ەكيپاج مۇشەسى بولعان.
كەيىن بەلگىلى بولعانداي, كەمەنىڭ ماشينا بولىمشەسىنەن ءورت شىققان, ول ەلەكتر جۇيەلەرىن بۇلدىرگەن. سونىڭ كەسىرىنەن ليفتىلەر مەن كارىزدەر جۇمىس ىستەمەي قالىپتى. باسقا دا پروبلەمالار تۋىنداعان سياقتى. «كارنيۆال» ساياحات كومپانياسى جولاۋشىلاردىڭ بارلىعىنا بيلەت قۇنىن قايتارۋعا, 500 دوللاردان قولما-قول اقشا بەرۋگە, ولاردىڭ بارلىق كولىكتىك شىعىندارىن تولەۋگە, سونداي-اق, جولاۋشىلاردى تەگىن تاعى ءبىر ساياحاتقا الىپ شىعۋعا ۋادە بەرىپ وتىر. دەگەنمەن, كەيبىر جولاۋشىلار بۇعان قاناعاتتانباي, قوماقتى وتەماقى تولەتتىرۋ ءۇشىن سوتقا شاعىمداناتىندارىن مالىمدەدى.
ينتەرنەت ماتەريالدارى نەگىزىندە ازىرلەندى.
