باتىس قازاقستان وبلىسىنىڭ اكىمى التاي كولگىنوۆ ءوزىنىڭ وتباسىمەن بىرگە ورال قالاسىنداعى №521 سايلاۋ ۋچاسكەسىندە داۋىس بەردى.
- بۇگىنگى سايلاۋ – ەلىمىز ءۇشىن وتە ماڭىزدى كۇن. ءار قازاقستاندىق ءوزىنىڭ ازاماتتىق بورىشىن قازاقستاننىڭ بولاشاعىنا, ەلدىڭ بىرلىگىنە, قازاقستان رەسپۋبليكاسىنىڭ الەمنىڭ دامىعان مەملەكەتتەرى قاتارىنا قوسىلۋىنا ءوزىنىڭ داۋىسىن بەرسە ەكەن دەگەن نيەتىمىز بار. ءبىز دە وتباسىمىزبەن سايلاۋعا كەلدىك. ءبىزدىڭ اق جايىق ءوڭىرى قاشان دا ءوزىنىڭ بىرلىگىمەن, ىنتىماعىمەن, مادەنيەتىمەن, تارتىبىمەن ەرەكشەلەنەدى. بۇگىن دە سولاي بولادى دەپ سەنەمىز, - دەدى ءوڭىر باسشىسى.
اقپاراتتارعا قاراعاندا, باتىس قازاقستان وبلىسىنىڭ بارلىق جەرىندە داۋىس بەرۋ بەلسەندى ءجۇرىپ جاتىر. قاراتوبە اۋدانىنداعى №278 جاڭاقونىس سايلاۋ ۋچاسكەسىندە 95 جاستاعى ۇوس ارداگەرىقۇرمانعالي ىسقاقوۆ ءوز تاڭداۋىن جاساسا, قازتالوۆ اۋىلىندا كۇنى كەشە, ياعني 8 ماۋسىم كۇنى شاڭىراق كوتەرگەن جاس جۇبايلار راديك دۇيسەنوۆ پەن قۇندىز ايداروۆا سايلاۋ بولىمشەسىنە قول ۇستاسىپ قاتار كەلىپتى. ال شىڭعىرلاۋ اۋدانىنداعى №425 سايلاۋ ۋچاسكەسىندە كيىز ءۇي تىگىلىپ, سايلاۋشىلاردى ۇلتتىق ناقىشپەن قارسى العان.
رەداكتسيا تاپسىرماسىمەن ورال قالاسىنداعى بىرنەشە سايلاۋ بولىمشەسىن ارالاپ, داۋىس بەرۋ بارىسىمەن تانىستىق. زاچاگانسك كەنتىندەگى №10 ورتا مەكتەپ عيماراتىندا ورنالاسقان №421 سايلاۋ بولىمشەسىندە 1746 سايلاۋشى, №427 سايلاۋ ۋچاسكەسىندە 1267 سايلاۋشى تىركەلگەن ەكەن. كەڭ, كەلۋشىلەرگە بارلىق جاعداي جاسالعان, سايلاۋشىلار اراسىندا سابىلىس جوق. باقىلاۋشىلار دا سايلاۋ ءوز رەتىمەن ءوتىپ جاتقانىن ايتادى. №421 سايلاۋ ۋچاسكەسىنىڭ كوميسسيا مۇشەسى تىلەگەن ەسەنتەمىروۆ تاڭعى ساعات 7-دە ەڭ ءبىرىنشى بولىپ اسكەري قىزمەتكەر داۋىس بەرىپتى. ايتپاقشى, ول شاعىن سىيلىققا دا يە بولعان. ال №427 سايلاۋ ۋچاسكەسى كوميسسياسىنىڭ توراعاسى سانسىزباي كەنجەكوۆتىڭ ايتۋىنشا, ساياسي ناۋقان ويداعىداي ءوتىپ جاتىر.
№47 مەكتەپ عيماراتىندا ورنالاسقان №400 سايلاۋ ۋچاسكەسىنە تىركەلگەن 1427 سايلاۋشىنىڭ 214-ءى تاڭەرتەڭگى ساعات 10-عا دەيىن داۋىس بەرىپ ۇلگەرىپتى. وسى جەردە تمد ەلدەرىنەن كەلگەن حالىقارالىق باقىلاۋشىلارعا كەزدەستىك. سايلاۋ ۋچاسكەسى اۋماعىندا جاتقان كەيبىر كوپقاباتتى ءۇي تۇرعىندارى وزدەرىن سايلاۋشىلار تىزىمىنەن كورە الماي, نارازىلىق ءبىلدىرىپ اتتى. بىراق سايلاۋ كوميسسياسىنىڭ مۇشەلەرى تابان استىندا حقكو-عا حابارلاسىپ, سول جەردە كەلۋشىلەردىڭ جسن ءنومىرى بويىنشا تىركەۋ دەرەكتەرىن انىقتاپ جاتتى.
- ءبىزدىڭ مۇرات موڭكە ۇلى كوشەسىندە جاڭا قۇرىلىس وتە كوپ, اي سايىن جاڭا ءۇي پايدالانۋعا بەرىلەدى. سوندىقتان دا سايلاۋشىلار تىزىمىندە ءسال-ءپال سايكەسسىزدىكتەر كەزدەسىپ قالادى. بىراق ءبىز ولاردى دەر كەزىندە شەشۋگە تىرىسامىز. ءوز ۋچاستوگىن تابا الماي جۇرگەن سايلاۋشىلارعا ءجون سىلتەپ جىبەرەمىز, - دەيدى №400 سايلاۋ ۋچاسكەسى كوميسسياسىنىڭ جەتەكشىسى ناتاليا ەرعوجيەۆا.
«ارمان» شاعىناۋدانىنداعى №416 سايلاۋ ۋچاسكەسىندە داۋىس بەرۋ وتە بەلسەندى ءجۇرىپ جاتقانىن بايقادىق. داۋىس بەرۋ باستالعالى وتكەن 4 ساعات ىشىندە تىركەۋدە تۇرعان 749 سايلاۋشىنىڭ 340-ى ءوز تاڭداۋىن جاساپ ۇلگەرىپتى.
«جايىق» ۆولەيبول كلۋبىنىڭ سپورت كەشەنىندە ورنالاسقان №169 سايلاۋ ۋچاسكەسىندە عانا ىعى-جىعى ادام, سابىلىسقان كەزەگىن بايقادىق. كەلۋشىلەردىڭ كوبى تىزىمنەن ءوز فاميلياسىن تابا الماي, داعدارىپ قالعان.
- ءبىز ول ادامداردىڭ ءبارىن دە قوسىمشا تىركەۋگە الىپ, سايلاۋ بيۋللەتەنىن بەرىپ جاتىرمىز. ءبىزدىڭ تىزىمدە 2578 سايلاۋشى تىركەلگەن. بارىنە دە بيۋللەتەن جەتەدى, - دەيدى ءبىز تىلدەسكەن كوميسسيا توراعاسى داستان ەسەكەنوۆ.
ورال قالاسىنىڭ 20 جاسار تۇرعىنى بولات يباتوۆ مۇنداي ۇلكەن ساياسي ناۋقانعا تۇڭعىش رەت قاتىسىپ تۇر ەكەن. «سايلاۋعا تۇڭعىش قاتىسۋىم. ەل بولاشاعى حالىق قالاۋىنا بايلانىستى بولاتىنىنا سەنەمىن. سوندىقتان بۇگىن سايلاۋ ۋچاستوگىنە كەلىپ, تاڭداۋىمدى جاسادىم» دەيدى ول.
سۋرەتتى تۇسىرگەن تەمىربولات توقمامبەتوۆ
باتىس قازاقستان
