«اق جول» دەموكراتيالىق پارتياسىنان پرەزيدەنتتىككە كانديدات دانيا ەسپاەۆانىڭ رەسپۋبليكالىق قوعامدىق شتابى اشىق ەسىك كۇنىن وتكىزدى. ءىس-شارا بارىسىندا ۇمىتكەر سەنىم بىلدىرىلگەن ادامدارىمەن بىرگە رەسەيلىك جۋرناليستەر دەلەگاتسياسىن قابىلدادى.
تۇڭعىش ايەل كانديداتقا رەسەيدەن كەلگەن جەتەكشى ماسس-مەديانىڭ جيىرما شاقتى ءجۋرناليسى تىلەكتەستىك ءبىلدىردى. بريفينگتە جۋرناليستەر ءتۇرلى سۇراقتارىن قويىپ, د.ەسپاەۆانىڭ سايلاۋالدى باعدارلاماسىنا, جەڭىسكە جەتكەن جاعدايداعى الداعى جوسپارلارىنا قىزىعۋشىلىق تانىتتى. باق وكىلدەرى ايەل زاتىنىڭ پرەزيدەنتتىككە سايلانۋى تەك قازاقستان عانا ەمەس, ورتالىق ازيا ەلدەرى ءۇشىن قوعامدى دەموكراتيالاندىرۋ مەن ايەلدەر ءرولىنىڭ نىعايۋى جولىنداعى ماڭىزدى قادام ەكەنىن اتاپ ءوتتى.
«مەنىڭ سايلاۋعا قاتىسۋىم – مەن ءۇشىن جاۋاپتى قادام. ايەل ادامنىڭ ەلدى باسقارۋى قازاقستان حالقىنا ەرەكشە كورىنۋى مۇمكىن. سايلاۋشىلار مەنىڭ سايلاۋالدى ناۋقانىما ايتارلىقتاي نازار اۋداردى. مەن مۇنى جاقسىلىققا بالايمىن. بۇگىنگى تاڭدا ەلىمىزدەگى حالىقتىڭ 52 پايىزى – ايەلدەر, وسى نازىك جاندىلاردان قولداۋ كۇتەمىن. دەگەنمەن, مەنى قولداپ جۇرگەندەردىڭ قاتارىندا تەك ايەلدەر قاۋىمى ەمەس, جاستار دا بار. ءاربىر ايماقتا سايلاۋشىلار سايلاۋالدى باعدارلاماممەن تانىسقان سوڭ, مەنى قولدايتىندارىن ايتىپ جاتتى», دەيدى د.ەسپاەۆا.
بۇل كۇنى جەكە ازاماتتاردىڭ ءوتىنىشى بويىنشا قابىلداۋ دا ءوتتى. شتاب وفيسىنە باس سۇققان قاۋىمنىڭ سۇراقتارىنا ۇمىتكەر د.ەسپاەۆا, پارتيا توراعاسى ا.پەرۋاشەۆ جانە پارلامەنتتىك فراكتسيانىڭ دەپۋتاتتارى جاۋاپ بەردى. نۇر-سۇلتان قالاسىنىڭ تۇرعىندارى بانك نەسيەسى, باسپانانى جەكەشەلەندىرۋ, جەر قاتىناستارى بويىنشا ماسەلەلەر كوتەردى. ءاربىر ءوتىنىش «اق جول» پارتياسىنىڭ دەپۋتاتتارىنىڭ باقىلاۋىنا الىندى.
* * *
«اۋىل» حالىقتىق-دەموكراتيالىق پاتريوتتىق پارتياسى اتىنان پرەزيدەنتتىككە كانديدات رەتىندە تىركەلگەن تولەۋتاي راقىمبەكوۆتىڭ سايلاۋالدى باعدارلاماسى قوستانايدا تالقىلاندى. ءوڭىر تۇرعىندارىنىڭ باسىن قوسقان جيىندا كانديداتتىڭ سەنىم بىلدىرىلگەن ادامدارى بىرقاتار ماسەلەنى ورتاعا سالدى. ايتالىق, ەلىمىزدەگى جوعارى وقۋ ورىندارى جىل سايىن مىڭداعان اۋىل شارۋاشىلىعى مامانىن دايىنداپ شىعارادى. بىراق ولاردىڭ ەلدى مەكەندەرگە بارىپ, ەڭبەك ەتىپ جاتقاندارى شامالى. سوندىقتان جاستاردى اۋىلعا تارتاتىن مىقتى ىنتالاندىرۋ تەتىكتەرى كەرەك.
«اۋىل شارۋاشىلىعى ماماندارىن دايىندايتىن ەلىمىزدەگى ەڭ ءىرى 3 ۋنيۆەرسيتەتتىڭ ءوزى جىل سايىن 8 مىڭعا جۋىق ستۋدەنتتىڭ قولىنا ديپلوم بەرەدى. ونىڭ سىرتىندا سالالىق ينستيتۋتتار مەن كوللەدجدەر قانشاما. ەگەر وسى مامانداردىڭ ءبارى اۋىلداردا ەڭبەك ەتسە, ءبىز الدەقاشان اگرارلىق دەرجاۆاعا اينالار ەدىك. بىراق وكىنىشكە قاراي, ولار قالادا قالىپ, باسقا سالالاردا ەڭبەك ەتۋگە ءماجبۇر», دەيدى ت.راقىمبەكوۆ.
ت.راقىمبەكوۆتىڭ وسى جانە باسقا دا باستامالارى قوستانايدا كەڭىنەن ءسوز بولدى. ونىڭ شوپان, ديقانداردىڭ ەڭبەكاقىسىن كوتەرۋ, لايىقتى زەينەتاقىمەن قامتاماسىز ەتۋ سياقتى ۇستانىمدارىنا دا كوپشىلىك قولداۋ كورسەتتى. سونداي-اق پرەزيدەنتتىكتەن ۇمىتكەر ۇلتتىق ءداستۇردى دارىپتەپ, وتباسىلىق نەگىزدى نىقتاپ قالىپتاستىرۋعا شاقىردى.
ۇگىت-ناسيحات ناۋقانىنىڭ اياقتالۋىنا از قالدى. ال ت.راقىمبەكوۆتىڭ ايماقتارداعى قوعامدىق شتابتارى قارقىندارىن ءبىر ساتكە دە باسەڭدەتپەي, نەعۇرلىم بارلىق ءوڭىردىڭ تۇرعىندارىن قامتۋعا بارىن سالۋدا. وسىنداي فورماتتاعى جيىندار, ەرىكتىلەردەن قۇرالعان توپتاردىڭ اكتسيالارى كانديداتتىڭ سايلاۋالدى باعدارلاماسىنداعى باعىتتاردى ەل اراسىندا كەڭىنەن تاراتۋعا سەپتىگىن تيگىزىپ جاتىر.
* * *
كاسىپوداقتار فەدەراتسياسىنان پرەزيدەنتتىككە كانديدات امانگەلدى تاسپيحوۆتىڭ تۇركىستان وبلىسى جانە شىمكەنت قالاسى بويىنشا قوعامدىق شتابى وكىلدەرى ۇگىت-ناسيحات شارالارىن جالعاستىرىپ, ءتۇرلى ەڭبەك ۇجىمدارىمەن كەزدەسۋدە. مەملەكەتتىك, بانك جانە قوعامدىق قىزمەت كورسەتۋ قىزمەتكەرلەرىنىڭ سالالىق كاسىپوداعىنىڭ تۇركىستان وبلىستىق جانە شىمكەنت قالالىق فيليالىنىڭ ءتورايىمى كۇلدار ەسەباەۆا اتالعان قالادا مەملەكەتتىك ارxيۆ كىزمەتكەرلەرىمەن كەزدەستى. ۇمىتكەردىڭ سەنىم بىلدىرىلگەن ادامى سايلاۋالدى باعدارلامانى جان-جاقتى تانىستىردى. اسىرەسە ا.تاسپيحوۆتىڭ بارلىق جۇمىسكەردىڭ ەڭبەكاقىسىن كوتەرۋ, جوعارى ءبىلىمدى تەگىن الۋ, ەڭبەك قاۋىپسىزدىگىن جاقسارتۋ ماقساتىنداعى جۇمىس جوسپارلارىن ساراپتاپ بەردى. ونىڭ ەڭبەككەر قۇقى مەن مۇددەسىن قورعاۋداعى ۇستانىمدارىنا جەكە-جەكە توقتالىپ, ەڭبەك قاۋىپسىزدىگى, ەڭبەك ميگراتسياسى ماسەلەلەرىنە قاتىستى وي-پىكىرلەرى ءسوز بولدى.
ك.ەسەباەۆا كانديداتتى بارلىق قىرىنان تانىستىرىپ بولعان سوڭ سايلاۋشىلار تاراپىنان تۇسكەن ساۋالدارعا جاۋاپ بەردى. ءسويتىپ كەزەكتى سايلاۋدىڭ ەرەكشەلىگىن ەسكەرە وتىرىپ, مەجەلى كۇنى ءوز تاڭداۋلارىن جاساۋعا شاقىردى.
سونىمەن قاتار وڭتۇستىكتىكتەر ۇگىت-ناسيحات جۇمىستارىنىڭ اياسىندا كونتسەرت, دەبات, سپورتتىق شارالار ۇيىمداستىرۋعا مۇرىندىق بولۋدا. سونداي باستامالاردىڭ ءبىرى «كەلەشەك» جاستار كەڭەسى مۇشەلەرىنىڭ قاتىسۋىمەن ورداباسى اۋدانى امانگەلدى اۋىلىندا ورنالاسقان «ساناتوري قاينار» مەكەمەسىندە بولدى. ەڭبەك ۇجىمىمەن, ەمدەلۋشىلەرمەن كەزدەسۋدە بەلسەندىلەر الدا كەلە جاتقان سايلاۋدىڭ ماڭىزدىلىعىن, ەرەكشەلىگىن ءتۇسىندىرىپ, داۋىس بەرۋدەن قالىس قالماۋعا شاقىردى. بۇل ساناتوريالىق كۋرورتتا 5 بىردەي ەمدىك كورپۋسى جۇمىس ىستەيدى. ەمدەۋ مەكەمەسىنىڭ ايىرماشىلىعى سول, مۇندا دارىگەرلەر ىستىق سۋمەن, تەرمالدى سۋمەن اسقازان دەرتىنەن, سونداي-اق كوپتەگەن باسقا بارلىق اۋرۋ ءتۇرىن ەمدەيدى. جەرگىلىكتى حالىقتى ايتپاعاندا, ەلىمىزدىڭ وزگە دە ايماقتارىنان دەمالۋشىلار كەلىپ, ەم-دوم الادى.
* * *
قازاقستان كوممۋنيستىك حالىق پارتياسى اتىنان سايلاۋعا ءتۇسىپ جاتقان جامبىل احمەتبەكوۆتىڭ سەنىم ءبىلدىرىلگەن ادامدارى نۇر-سۇلتان قالاسىنىڭ سايلاۋالدى شتابى «قكحپ سالاماتتى ءومىر سالتىن قولدايدى» فلەشموبىن ۇيىمداستىردى. جاستار سارايىنىڭ جانىنا پارتيا بەلسەندىلەرى مەن ءبىر توپ جاس جينالدى.
قالالىق سايلاۋالدى شتابىنىڭ جەتەكشىسى نۇرداۋلەت ورازحانوۆ قاتىسۋشىلار الدىندا ەلىمىزدەگى ەڭ ءىرى ساياسي ناۋقان كەزىندەگى ازاماتتار مەن مەملەكەتتىڭ ورتاق جاۋاپكەرشىلىگى تۋرالى ءسوز سويلەدى. ول پرەزيدەنتتىكتەن ءۇمىتكەر ج.احمەتبەكوۆتىڭ وڭىرلەردەگى جۇمىس ساپارلارى مەن سايلاۋشىلارمەن كەزدەسۋلەرى جونىندە حاباردار ەتتى. ونىڭ ايتۋىنشا, قاتارداعى ازاماتتار پارتيانىڭ جۇمىسىنا, ونىڭ يدەيالارى مەن ۇستانىمدارىنا قىزىعۋشىلىق تانىتىپ جاتىر. «قازاقستان كوممۋنيستىك حالىق پارتياسى ارقاشاندا قاراپايىم حالىق مۇددەسىن قورعاۋعا باسىمدىق بەرەدى. حالىق كوممۋنيستەرى – ينتەرناتسيوناليزمنىڭ, ەۋرازياشىلدىق يدەيانىڭ جانە XXI عاسىرداعى ۇلتتىڭ ەرەكشە جولىنىڭ جاقتاۋشىسى», دەدى ەلوردالىق شتابتىڭ جەتەكشىسى.
بۇدان كەيىن پارتيا نىشاندارى بەينەلەنگەن كيىم كيگەن جاستار كەڭەس جىلدارىنداعى اۋەنمەن جاتتىعۋلار جاسادى. جينالعاندار «قكحپ-عا داۋىس بەر!», «ادال ەڭبەك قوعام مۇددەسى ءۇشىن!» دەپ ۇراندادى.
سونىمەن قاتار نۇر-سۇلتان قالاسىنداعى ناسيحاتشىلار توبى بەلسەندى جۇمىس ىستەپ, ءوز كانديداتتارىنىڭ نەگىزگى ۇستانىمدارىن حالىققا بارىنشا جەتكىزۋدە. ولار كەزىككەن جۇرتقا ۇگىت پاراقشالارىن جانە پارتيا جۋرنالدارىن تاراتىپ, اڭگىمەلەسىپ, سايلاۋالدى باعدارلامانىڭ باسىم باعىتتارى تۋرالى مالىمەت بەردى. قالا تۇرعىندارى دا تۇسىنىستىك تانىتىپ, كوممۋنيستەردىڭ باستاماسىن جىلى قابىلداپ جاتىر. مۇنداي ءىس-شارالار ءالى دە قارقىندى جۇرگىزىلە بەرمەك.
* * *
Nur Otan پارتياسىنان پرەزيدەنتتىككە كانديدات قاسىم-جومارت توقاەۆتىڭ رەسپۋبليكالىق قوعامدىق شتابى شىعىس قازاقستان وبلىسىنا جاساعان ساپارىن سەمەيدەگى بىرقاتار كاسىپورىندا وتكىزگەن كەزدەسۋلەرمەن اياقتادى. قالا حالقى جانە ەتنومادەني بىرلەستىكتەر وكىلدەرىمەن كەزدەسۋدە ەڭ الدىمەن ق.توقاەۆتىڭ سايلاۋالدى باعدارلاماسىندا ساباقتاستىق قاعيداسىنا باسىمدىق بەرىلگەنى ايتىلدى. ويتكەنى قازىرگى تاڭدا قازاقستان حالقىنىڭ بىرلىگى مەن ءوزارا كەلىسىمىن ساقتاۋ ءۇشىن ەلباسى جولىن جالعاستىرۋدىڭ ماڭىزى زور. بۇعان قوسا, باعدارلامادا ايرىقشا اتالعان تاعى ءبىر وزەكتى ماسەلە – ءبىلىم بەرۋ سالاسى. بۇل جونىندە قۇجاتتا ءبىلىم مەن عىلىمعا جۇمسالاتىن جالپى شىعىندى جىل سايىن ءوسىرىپ وتىرۋ, ۇستازدار مەن تاربيەشىلەردىڭ مارتەبەسىن كوتەرۋ سياقتى باعىتتار قامتىلعان.
سونىمەن قاتار شتاب مۇشەلەرى سەمەي قالاسىنداعى قازاق گۋمانيتارلىق-زاڭ يننوۆاتسيالىق ۋنيۆەرسيتەتىندە جەرگىلىكتى جوعارى وقۋ ورىندارىنىڭ ۇستازدارىمەن جانە ستۋدەنتتەرىمەن كەزدەستى. باسقوسۋدا باعدارلامادا كورسەتىلگەن جوعارى وقۋ ورىندارى مەن كوللەدجدەرگە مەملەكەتتىك ءبىلىم بەرۋ تاپسىرىسىن ۇلعايتۋ, وقىتۋدىڭ جاڭا ءتاسىلدەرىن ەنگىزۋ سياقتى ناقتى شارالار ءسوز بولدى. شتاب مۇشەسى, ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ رەكتورى ەرلان سىدىقوۆ كانديداتتىڭ ءبىلىمدى ۇلت قالىپتاستىرۋعا ۇلكەن كوڭىل ءبولىپ وتىرعانىن جەتكىزدى. «ق.توقاەۆ ءوزىنىڭ باعدارلاماسىندا ءبىلىم بەرۋ سالاسىنا قولداۋ كورسەتىپ, بۇل جۇيەنى قارجىلاندىرۋدى ارتتىرۋ ءماسەلەسىن كوتەردى. وسىلايشا ءبىزدىڭ كانديدات ءبىلىم بەرۋ سالاسىن ودان ءارى جەتىلدىرىپ, بۇل باعىتتاعى ەلباسى سالعان سارا جولدى جالعاستىرادى», دەدى ە.سىدىقوۆ.
سونىمەن قاتار دەلەگاتسيا تسەمەنت زاۋىتىنىڭ جانە وتاندىق اۆتوموبيل وندىرىسىندە وزىق تۇرعان «سەماز» جشس-ءنىڭ ەڭبەك ۇجىمدارىمەن كەزدەستى. بۇل ءىس-شارادا شتاب مۇشەلەرى حالىقتىڭ ءال-اۋقاتىن ارتتىرۋعا باعىتتالعان باعدارلاما تۋرالى جان-جاقتى ايتىپ, سەمەيلىكتەردى دۇرىس تاڭداۋ جاساۋعا شاقىردى.
* * *
«ۇلت تاعدىرى» ۇلتتىق-پاتريوتتىق قوزعالىسى اتىنان پرەزيدەنتتىك سايلاۋعا ءتۇسىپ جاتقان ءامىرجان قوسانوۆتىڭ نۇر-سۇلتان قالاسىنداعى رەسپۋبليكالىق قوعامدىق شتابى ەكولوگيالىق ءىس-شارا ۇيىمداستىردى. ناسيحاتشىلار توبى ەسىل وزەنىنىڭ جاعالاۋىندا تازالىق جۇمىستارىن جۇرگىزىپ, اينالانى بىرگە كوركەيتۋگە شاقىردى. كوپشىلىكتىڭ ءبىرلىگىن جاراستىرعان ورتاق ىسكە ورتالىق شتاب وكىلدەرىمەن قوسا, ەرىكتى جاستار دا اتسالىستى. وسى باستاما اياسىندا كانديداتتىڭ سايلاۋالدى باعدارلاماسىنىڭ نەگىزگى باعىتتارى ءتۇسىندىرىلدى. سونىڭ ىشىندە ساياسي بوستاندىق, ۇلتتىق بولمىس, جەمقورلىق تاقىرىپتارى كەڭىنەن قوزعالدى. «ءبىز بۇعان دەيىن دە بازارلار مەن اۋلالار سەكىلدى حالىق كوپ جۇرەتىن ورىنداردا ءتۇرلى شارالار ۇيىمداستىرىپ, كانديداتتىڭ ۇستانىمدارىن بارىنشا ۇعىنىقتى جەتكىزۋگە كۇش سالدىق. بۇگىنگى ەكولوگيالىق اكتسيا ءسوز جۇزىندە عانا ەمەس, ىسپەن دالەلدەيتىن جۇمىستىڭ كىشىگىرىم كورىنىسى. مۇندا جينالعاندار قولىن شارۋادان ۇزبەي, قۇلاقتارى ۇندەۋگە تۇرىك ءجۇر. سايلاۋالدى ناۋقاننىڭ سوڭعى ساعاتىنا دەيىن باعىت-باعدارىمىزدى حالىققا ايقىنداپ, بارىنشا دۇرىس جەتكىزۋگە تىرىسامىز», دەدى ەرىكتىلەردىڭ ءبىرى باتىربەك قوشقارباەۆ.
بۇعان قوسا, وڭىرلەردەگى قوعامدىق شتابتار دا قىزۋ جۇمىس ىستەپ, ءتۇرلى ءىس-شارالار ۇيىمداستىرۋدا. بەلسەندىلەر جەرگىلىكتى تۇرعىندارعا كانديداتتىڭ سايلاۋالدى تۇعىرناماسىندا كورسەتىلگەن باعىتتاردى جان-جاقتى ناسيحاتتاپ, ۇگىت ماتەريالدارىن دا كەڭىنەن تاراتىپ جاتىر. بۇل رەتتە قوعامدىق شتابتار الەۋمەتتىك جەلىلەردىڭ الەۋەتىن دە ءتيىمدى پايدالانىپ, ەلىمىزدەگى ەڭ ءىرى ساياسي وقيعانىڭ ماڭىزىن دا ارتتىرۋدا.
سونداي-اق «ۇلت تاعدىرى» ۇلتتىق-پاتريوتتىق قوزعالىسى اتىنان پرەزيدەنتتىككە كانديدات رەتىندە ۇسىنىلعان ءامىرجان قوسانوۆتىڭ وڭىرلەردەگى سايلاۋالدى قوعامدىق شتابتارى بەلسەندىلىك تانىتىپ, سايلاۋ كۇنى ۋچاسكەلەردە داۋىس بەرۋ پروتسەسىن قاداعالايتىن بايقاۋشىلارعا سەمينارلار وتكىزىپ جاتىر.
* * *
« ۇلى دالا قىراندارى» رەسپۋبليكالىق قوزعالىسىنان پرەزيدەنتتىككە كانديدات سادىبەك تۇگەل ماڭعىستاۋ وبلىسىنداعى سايلاۋالدى ۇگىت-ناسيحات جۇمىستارىن اقتاۋ قالاسىنان باستادى. قالا تۇرعىندارىنىڭ الدىندا كانديدات ءوزىنىڭ سايلاۋالدى باعدارلاماسى تۋرالى كەڭىنەن اڭگىمەلەدى. «ەلىمىزدىڭ باتىس ايماعىنداعى ءىسساپارىمدى مۇنايشىلار قالاسى اتىراۋدا باستاسام, بۇگىن كيەلى جەر ماڭعىستاۋدىڭ ورتالىعى اقتاۋدا جالعاستىردىم. ەلىمىزدىڭ تەڭىزگە شىعار قاقپاسى سانالاتىن قالانىڭ تۇرعىندارىنا ريزاشىلىعىمدى بىلدىرەمىن. « ۇلى دالا قىراندارى» قوعامدىق بىرلەستىگى رەسپۋبليكا بويىنشا ۇلتتىق قۇندىلىقتاردى ناسيحاتتاپ كەلە جاتقان ۇيىم ەكەندىگىن جەتكىزگىم كەلەدى. ماڭعىستاۋ ءوڭىرىنىڭ ەلىمىزدىڭ ەكونوميكاسى, دەموگرافياسى مەن تۋريزمىنە قوسىپ وتىرعان ۇلەسى زور. مەنىڭ سايلاۋالدى باعدارلامامدا دا حالقىمىزدىڭ ءال-اۋقاتىن كوتەرۋگە, دەموگرافياسىنا زور كوڭىل بولۋگە, جاس ۇرپاقتاردى وتانسۇيگىشتىككە ءتاربيەلەۋگە بايلانىستى كەزەك كۇتتىرمەي شەشەتىن مىندەتتەر اتاپ كورسەتىلگەن. ەكونوميكاعا عانا ەمەس, يدەولوگياعا دا باستى نازار اۋدارعانىمىز دۇرىس. بۇل ەكەۋىنە دە قۇستىڭ قوس قاناتى سياقتى ءبىر-بىرىنەن اجىراتىپ قاراۋعا بولمايدى. سوندىقتان ءبىزدىڭ ۇستانىمىمىز «ۇلاعاتتى ۇرپاق – ۇلتتىق ۇستانىم» دەپ ايقىندالىپ, باعدارلاماما ءتورت قۇندىلىقتى وزەك ەتىپ الدىق. ءتىل, ءدىل, جەر مەن ار-نامىستان بيىك ەشتەڭە جوق», دەدى س.تۇگەل.
سونىمەن قاتار كەزدەسۋ بارىسىندا اسقار باقىتجانوۆ, جانسايا ىنتىماققىزى ەسىمدى جاستار كانديداتتىڭ سايلاۋالدى باعدارلاماسىندا ايتىلعان نەگىزگى باعىتتار جايلى ءوز پىكىرلەرىن جەتكىزدى. ماڭعىستاۋ جەرىندەگى جيىنداردان كەيىن س.تۇگەل سايلاۋالدى شتابىنىڭ وكىلدەرىمەن بىرگە كيەلى مەكەندەگى شوپان اتانىڭ باسىنا سوعىپ, ءپىر بەكەتتىڭ ماڭگىلىككە دامىل تاپقان وعلاندى شاتقالىنا باردى. ەكى اۋليەنىڭ مەكەنىنە اينالعان ماڭعىستاۋ دالاسىنىڭ ءبىر قيىرىنداعى قاسيەتتى ورىنعا زيارات ەتىپ, ارنايى دۇعا باعىشتادى.
