«اق جول» دەموكراتيالىق پارتياسىنان پرەزيدەنتتىككە كانديدات دانيا ەسپاەۆانىڭ رەسپۋبليكالىق شتابى جەتەكشىسى ازات پەرۋاشەۆ جامبىل وبلىسىنا كەلىپ, جەرگىلىكتى سايلاۋشىلارمەن كەزدەستى. سايلاۋالدى ۇگىت توبى اۋەلى جامبىل وبلىسى, بايزاق اۋدانىنىڭ ورتالىعى سارىكەمەر اۋىلىندا بولىپ, تۇرعىندارمەن جانە كاسىپكەرلەرمەن كەزدەستى. 30 مىڭنان استام حالقى بار سارىكەمەر اۋىلىنىڭ وزىندە مەملەكەت قولداۋىنىڭ ناتيجەسىندە كاسىپكەرلىكپەن اينالىساتىن ازاماتتاردىڭ قاتارى كۇن ساناپ ارتىپ كەلەدى. كەزدەسۋ كەزىندە كاسىپكەرلەر سالاعا بايلانىستى ساۋالدارىن قويىپ, كانديداتتىڭ سايلاۋالدى باعدارلاماسىمەن دە تانىستى.
بۇدان كەيىن پرەزيدەنتتىكتەن ۇمىتكەر د.ەسپاەۆانىڭ رەسپۋبليكالىق شتابى مۇشەلەرى بايزاق اۋدانىنىڭ قوستوبە اۋىلىنا دا باردى. مۇندا دا سايلاۋالدى ۇگىت توبى اۋىل تۇرعىندارىمەن جانە كاسىپكەرلەرمەن كەزدەسىپ, كاسىپكەرلىكتىڭ دامۋى تۋرالى ءوزارا پىكىر الماستى. جيىندا كانديداتتىڭ باعدارلاماسىندا كورسەتىلگەن كاسىپكەرلىكتى دامىتۋعا قاتىستى باعىتتار نازارعا الىندى.
سونىمەن قاتار رەسپۋبليكالىق شتاب جەتەكشىسى ازات پەرۋاشەۆتىڭ جامبىل وبلىسىنىڭ سايلاۋشىلارىمەن كەزدەسۋى تاراز قالاسىندا جالعاستى. «قوشمامبەتوۆ ي ك» عيماراتىندا وتكەن كەزدەسۋگە «اق جول» پارتياسى ورتالىق قىزمەتى پرەزيديۋمىنىڭ مۇشەسى بولات وتەپباەۆ, پارتيانىڭ جامبىل وبلىستىق فيليالىنىڭ جەتەكشىسى اسان قوشمامبەتوۆ جانە وبلىستىق پارتيا ۇيىمىنىڭ بەلسەندىلەرى مەن بۇقارالىق اقپارات قۇرالدارىنىڭ وكىلدەرى قاتىستى. كەزدەسۋ بارىسىندا پرەزيدەنتتىككە كانديدات د.ەسپاەۆانىڭ سايلاۋالدى باعدارلاماسى تانىستىرىلىپ, كاسىپكەرلەرگە شاعىن بيزنەستى ىنتالاندىرۋ ءۇشىن سالىقتى تومەندەتۋ, سالالار ءۇشىن قوسىمشا قۇن سالىعىنىڭ ءمولشەرلەمەسىن ازايتۋ ماسەلەسى دە ءتۇسىندىرىلدى. سونداي-اق مۇندا دا كاسىپكەرلەر شاعىن جانە ورتا بيزنەس ءۇشىن بانكتەگى نەسيە مولشەرلەمەسىن تومەندەتۋدىڭ دۇرىس ەكەنىن جەتكىزدى.
* * *
«اۋىل» حالىقتىق-دەموكراتيالىق پاتريوتتىق پارتياسى اتىنان سايلاۋعا ءتۇسىپ جاتقان تولەۋتاي راقىمبەكوۆ ءوزىنىڭ سەنىم بىلدىرىلگەن ادامدارىمەن بىرگە الماتى وبلىسىن ارالاپ ءجۇر. ناسيحاتشىلار توبى وڭىردەگى جاقىندا اشىلعان اگروپارك پەن وسى سالاعا قىزمەت ەتەتىن اۆياتسيا وكىلدەرىمەن كەزدەستى.
2008 جىلى قاراساي اۋدانىنىڭ كولدى اۋىلىندا ەلىمىزدەگى ەڭ العاشقى اۋىل شارۋاشىلىعى بويىنشا ءبىلىم تاراتۋ ورتالىعى اشىلعان ەدى. سودان بەرى جەرگىلىكتى شارۋالار سالاعا قاتىستى باستامالارمەن وسىندا تانىسادى. جوبالاردى ىسكە اسىرىپ, ءونىمىن ەسەلەگەندەر دە بار. مۇندا شارۋالار ءوز ماسەلەسىن ايتىپ, ماماندار ونىڭ شەشىمىن ىزدەپ جاتادى. ت.راقىمبەكوۆ ەندى وسىنداي مەكەمەلەردى ەلىمىزدىڭ بارلىق اۋدان ورتالىعىندا اشۋ كەرەك دەپ ەسەپتەيدى.
ال «وڭتۇستىك» اگروپاركى وتكەن جىلى عانا جۇمىسىن باستادى. بۇل الدىڭعى ءبىلىم تاراتۋ ورتالىعىنىڭ تاجىريبە الاڭى دەسە دە بولادى. ارنايى اۋماققا وتاندىق ماماندار ويلاپ تاپقان ونداعان تۇقىم ەگىلىپ, ناتيجەسى شارۋالارعا تانىستىرىلىپ جاتىر. پرەزيدەنتتىكتەن ۇمىتكەر ت.راقىمبەكوۆ كەشەندى شارالار ارقىلى عانا سالانىڭ دامۋىنا تىڭ سەرپىن بەرىپ, الەمدەگى اگرارلى ەلدەرمەن باسەكەلەس بولا الامىز دەيدى.
بۇعان قوسا كانديدات ارنايى ۇشاققا وتىرىپ, اۆياتسيا سالاسىنىڭ ماڭىزى تۋرالى دا ايتىپ بەردى. «اسىرەسە مىڭداعان گەكتار اۋماقتى باقىلاۋدا ۇستاپ, قاجەتتى شارالار قولدانۋ ءۇشىن وسىنداي تەحنيكالار كەرەك. ال شاعىن ەگىس القاپتارىنا درونداردى پايدالانا باستاۋ قاجەت. جالپى, زاماناۋي جابدىقتاردان قاشپاۋ كەرەك, ونى قولدانعاننان شارۋانىڭ ۇتارى كوپ», دەدى ت.راقىمبەكوۆ.
اۋىلدىڭ گۇلدەنۋى, قازاقستاننىڭ گۇلدەنۋى دەپ سانايتىن «اۋىل» پارتياسىنىڭ كانديداتى ءوزىنىڭ سايلاۋالدى باعدارلاماسىندا اۋىلدىڭ الەۋەتىن كوتەرۋدىڭ نەگىزگى باعىتتارىن ۇسىنادى. سونىڭ ىشىندە جاستار ماسەلەسىن دە قامتىپ, اۋىلعا قاجەت مامانداردى دايارلاۋ تۋرالى ايتىلعان.
* * *
كاسىپوداقتار فەدەراتسياسىنان پرەزيدەنتتىككە كانديدات امانگەلدى تاسپيحوۆ رەسپۋبليكالىق قوعامدىق شتابىندا وليمپيادا چەمپيونى دانيار ەلەۋسىنوۆپەن كەزدەستى. كەزدەسۋ بارىسىندا ۇمىتكەر مەن چەمپيون ۇلكەن سپورت تۋرالى پىكىر الماسىپ, ومىرلىك ۇستانىمدارىمەن, بولاشاققا ارنالعان جوسپارلارىمەن ءبولىستى. وليمپيادا شىڭىن باعىندىرعان د.ەلەۋسىنوۆ بۇگىندە كاسىپقوي بوكسقا اۋىسىپ, ەڭ تانىمال الەمدىك ارەنالاردىڭ تۇعىرىن باعىندىرىپ كەلەدى. بوكسشىنىڭ قورجىنىندا جەتى جەكپە-جەكتەن جەتى جەڭىسى بار. جەتى جەڭىستىڭ تورتەۋىنە اقش-تا, ەكەۋىنە ۇلىبريتانيادا, بىرەۋىنە موناكودا قول جەتكىزدى.
پرەزيدەنتتىكتەن ۇمىتكەر ا.تاسپيحوۆ «جەڭگىڭ كەلسە, بارلىق جەڭىستەردىڭ قاجىرلى ەڭبەك ارقىلى كەلەتىنىن ۇمىتپا» دەگەن ويىن ءبىلدىردى. ال سپورتشى كانديداتتىڭ سايلاۋالدى تۇعىرناماسىنىڭ نەگىزگى باعىتتارىمەن تانىسىپ, كاسىپوداقتىڭ كوپتەگەن قۇندىلىقتارىنىڭ كاسىبي بوكسقا قاتىسى بارىن, سونىڭ ءىشىندە قاۋىپسىزدىك تەحنيكاسىن ساقتاۋ, كوماندا مۇشەلەرىمەن ۇجىمدىق ەڭبەك شارتىن جاساۋ سياقتى ماسەلەلەردىڭ ماڭىزدىلىعىن اتاپ ءوتتى. كەزدەسۋ سوڭىندا تۇلعالار ءبىر-بىرىنە ساتتىلىك پەن جەڭىس تىلەدى.
سونىمەن قاتار ا.تاسپيحوۆتىڭ سەنىم بىلدىرىلگەن ادامدارى پاۆلودار قالاسىندا تىرەك-قيمىل مۇشەلەرى بۇزىلعان بالالارعا ارنايى ساۋىقتىرۋ قىزمەتتەرىن كورسەتۋ ورتالىعىنا بارىپ, ەڭبەك ۇجىمىمەن كەزدەستى. جيىندا پاۆلودار وبلىسىنىڭ مەملەكەتتىك, بانك مەكەمەلەرى جانە قوعامدىق قىزمەت كورسەتۋ ۇيىمدارى قىزمەتكەرلەرىنىڭ جەرگىلىكتى كاسىپتىك وداعىنىڭ مۇشەسى جۇماباي مۇحامەتالين قاتىسۋشىلارعا كانديداتتىڭ ەڭبەك جولى تۋرالى بايانداپ, سايلاۋالدى تۇعىرناماسىنىڭ نەگىزگى باعىتتارىن تانىستىردى. جينالعان قاۋىم كوكەيلەرىندە جۇرگەن سۇراقتارىن قويىپ, جاقىنداپ قالعان سايلاۋ تۋرالى جان-جاقتى مالىمەت الدى.
* * *
قازاقستان كوممۋنيستىك حالىق پارتياسىنان پرەزيدەنتتىككە كانديدات رەتىندە ۇسىنىلعان جامبىل احمەتبەكوۆتىڭ سەنىم بىلدىرگەن ادامدارى نۇر-سۇلتان قالاسىندا ارداگەرلەر كەڭەسىمەن كەزدەسۋ وتكىزدى. ءىس-شارا بارىسىندا شاحماتتان تۋرنير ۇيىمداستىرىلىپ, قاريالار ءبىر جاساپ قالدى.
باسقوسۋدا پرەزيدەنتتىكتەن ۇمىتكەر ج.احمەتبەكوۆتىڭ سايلاۋالدى تۇعىرناماسىنىڭ نەگىزگى تەزيستەرى ءتۇسىندىرىلدى. نۇر-سۇلتان قالاسى سايلاۋالدى شتابىنىڭ جەتەكشىسى ن.ورازحانوۆ پەن پارتيانىڭ قۇرمەتتى ارداگەرى ن.باتيۋتا ۇيىمنىڭ جاڭا مۇشەلەرىنە سالتاناتتى تۇردە پارتيالىق بيلەتتەر تاپسىردى. مۇنىمەن كانديداتتىڭ ۇستانىمدارى قولداۋ كورسەتەتىن ازاماتتاردىڭ قاتارى تولىقتى. ن.ورازحانوۆ پارتيانىڭ جاڭا مۇشەلەرى ءۇشىن ءومىردىڭ ەرەكشە كەزەڭى باستالعانىن ايتتى. ولارعا پارتيانىڭ ۇندەيتىن يدەيالارى مەن قۇندىلىقتارىن دارىپتەۋدى جالعاستىرۋ مىندەتى جۇكتەلەدى. سونىمەن قاتار ول ەلىمىزدىڭ ءاربىر ازاماتى ءۇشىن پارتيانىڭ ەسىگى اشىق ەكەنىن جەتكىزدى. بيلەت تابىستاۋ ءراسىمىنەن كەيىن شاحمات ءتۋرنيرى باستالدى. تۋرنيردە قالالىق كوميتەتتىڭ جاس بەلسەندىلەرى قالا ارداگەرلەرىمەن سايىسقا ءتۇستى.
سونىمەن قاتار ەلورداداعى ناسيحاتشىلار توبى بەلسەندى جۇمىس ىستەپ, ءوز كانديداتتارىنىڭ باعدارلاماسىن حالىققا بارىنشا جەتكىزۋدە. ولار جۇرتشىلىققا ۇگىت پاراقشالارىن جانە پارتيا جۋرنالدارىن تاراتىپ, اڭگىمەلەسىپ, سايلاۋالدى باعدارلامانىڭ باسىم باعىتتارى تۋرالى مالىمەت بەردى. قالا تۇرعىندارى دا تۇسىنىستىك تانىتىپ, كوممۋنيستەردىڭ باستاماسىن جىلى قابىلداپ جاتىر. سونداي ءىس-شارالاردىڭ ءبىرى مەملەكەتتىك رامىزدەر كۇنىنە وراي ۇيىمداستىرىلعان فلەشموب بولدى. ناسيحاتشىلار توبى نۇر-سۇلتان قالاسىنداعى ەڭ بيىك ورنالاسقان رەسمي نىشان – قازاقستاننىڭ مەملەكەتتىك تۋىنىڭ استىنا جينالدى. سول ماڭدا بەلسەندىلەر جۇرتقا كانديداتتىڭ ۇستانىمدارى كورسەتىلگەن ۇگىت ماتەريالدارىن ۇلەستىردى.
* * *
Nur Otan پارتياسىنان پرەزيدەنتتىككە كانديدات قاسىم-جومارت توقاەۆتىڭ قوعامدىق شتابىنىڭ وكىلدەرى شىمكەنت قالاسىندا بىرقاتار نىساندا كەزدەسۋ وتكىزدى. ۇگىت-ناسيحات توبى الدىمەن قالالىق №3 ەمحاناعا سوعىپ, ونىڭ قىزمەتكەرلەرىنە ەلباسى نۇرسۇلتان نازارباەۆتىڭ ەل باسقارۋداعى كورەگەندىگى, ىشكى تۇراقتىلىقتى ساقتاي العان پاراساتى جايلى ايتتى. سونىمەن قاتار رەسپۋبليكالىق قوعامدىق شتاب مۇشەسى دارحان مىڭباي مەن كانديداتتىڭ سەنىم بىلدىرىلگەن ادامى ەرعالي بولەگەنوۆ جەرگىلىكتى شاعىن جانە ورتا بيزنەس وكىلدەرىمەن كەزدەستى. ولاردىڭ ايتۋىنشا, تاۋەلسىزدىك جىلدارىندا قازاقستاندا 1250 ءىرى كاسىپورىن اشىلدى. وندا 500-گە تارتا جاڭا ءونىم وندىرىلەدى. سونىڭ ناتيجەسىندە قازاقستاندا جاسالعان تاۋارلار الەمنىڭ 110 ەلىنە ەكسپورتتالىپ جاتىر. جيىندا د.مىڭباي جينالعان كوپشىلىككە كانديداتتىڭ سايلاۋالدى باعدارلاماسى تۋرالى اڭگىمەلەدى. ال ە.بولەگەنوۆ ق.توقاەۆتىڭ سىرتقى ساياساتتى دامىتۋعا قوسقان ەڭبەگىن اتاپ ءوتتى.
بۇعان قوسا, شىمكەنت قالالىق قوعامدىق شتابىنىڭ مۇشەلەرى «قازىعۇرت» شاعىن اۋدانى تۇرعىندارىمەن كەزدەستى. جينالعان قاۋىمعا ولار Nur Otan پارتياسى كانديداتىنىڭ سايلاۋالدى باعدارلاماسىنىڭ نەگىزگى باعىتتارىن تانىستىردى. پارتيانىڭ شىمكەنت قالالىق فيليالى توراعاسىنىڭ ورىنباسارى باۋىرجان قۋانىشبەكوۆ كانديداتتىڭ ءومىربايانىنا, ونىڭ ىشكى جانە سىرتقى ساياساتتىڭ دامۋىنا قوسقان ۇلەسىنە توقتالىپ ءوتتى.
سونداي-اق Nur Otan پارتياسى جانىنداعى Jas Otan جاستار قاناتىنىڭ شىمكەنت قالالىق فيليالى «سەنىڭ داۋىسىڭ ماڭىزدى!» اتتى اۆتوشەرۋ وتكىزدى. اۆتوشەرۋگە 20-دان اسا اۆتوكولىك قاتىسىپ, 100-گە جۋىق ەرىكتى جاس پەن جاسوتاندىقتار اتسالىستى. قازاقستان تۋى مەن Jas Otan جاستار قاناتىنىڭ جالاۋىن جەلبىرەتكەن شەرۋ شىمكەنت قالاسىنىڭ ورتالىعىنداعى د.قوناەۆ داڭعىلىنان باستالىپ, بايدىبەك بي داڭعىلىمەن اينالما جول ارقىلى بايدىبەك بي ەسكەرتكىشىنە دەيىن ءجۇرىپ ءوتتى.
* * *
«ۇلت تاعدىرى» ۇلتتىق-پاتريوتتىق قوزعالىسى اتىنان پرەزيدەنتتىككە كانديدات بولىپ تىركەلگەن ءامىرجان قوسانوۆتىڭ نۇر-سۇلتان قالاسىنداعى رەسپۋبليكالىق شتابىنا تۇركى تىلدەس مەملەكەتتەر ىنتىماقتاستىعى كەڭەسى, يسلام ىنتىماقتاستىعى ۇيىمى جانە تۇركى تىلدەس مەملەكەتتەردىڭ پارلامەنتتىك اسسامبلەياسى دەلەگاتسيالارى كەلدى. قازاقستانداعى كەزەكتەن تىس پرەزيدەنتتىك سايلاۋ پروتسەسىن باقىلاۋ ميسسياسى اياسىندا ۇيىم وكىلدەرى شتابتىڭ جۇمىسىمەن تانىستى. كەزدەسۋ بارىسىندا كانديدات ءا.قوسانوۆ سايلاۋالدى تۇعىرناماسىنداعى نەگىزگى باعىتتار, وڭىرلەردەگى جۇمىس جانە جاقىن اراداعى ءوز جوسپارلارى تۋرالى ايتىپ بەردى. تاراپتار سايلاۋالدى كەزەڭدە جەمىستى ىنتىماقتاستىقتى ودان ءارى جالعاستىرۋعا كەلىستى.
سونىمەن قاتار پرەزيدەنتتىكتەن ۇمىتكەردىڭ رەسپۋبليكالىق سايلاۋالدى شتابىنىڭ مۇشەلەرى ەلوردا ىرگەسىندەگى قوياندى اۋىلىنا كەلىپ, جەرگىلىكتى تۇرعىندارمەن كەزدەستى. شتاب وكىلدەرى حالىقپەن كەزدەسۋدە ۇمىتكەردىڭ سايلاۋالدى تۇعىرناماسىنداعى نەگىزگى باعىتتارىن ناقتى كورسەتىپ, تۇرعىنداردى تولعاندىرعان سۇراقتارعا جاۋاپ بەردى.
بۇدان ءبىر كۇن بۇرىن ءا.قوسانوۆ ورال قالاسىندا باتىس قازاقستان وبلىستىق شتاب مۇشەلەرىمەن كەزدەستى. ءىس-شارادا كانديداتتىڭ سايلاۋالدى تۇعىرناماسى ناقتىراق تالقىلانىپ, ءتۇرلى وزەكتى قوعامدىق ماسەلەلەرگە قاتىستى ءوز ۇستانىمىن جەتكىزدى. شتاب مۇشەلەرى وزدەرىن مازالاعان ساۋالدارىن قويىپ, وڭىردە اتقارىلىپ جاتقان ۇگىت-ناسيحات جۇمىستارى جونىندە بايانداپ بەردى. جالپى, ەلىمىزدىڭ بارلىق ايماعىندا جۇرگىزىلىپ جاتقان ءتۇرلى ءىس-شارالاردىڭ ناتيجەسىندە جەرگىلىكتى تۇرعىندار ءا.قوسانوۆتىڭ ءومىر جولى, كوزقاراستارى تۋرالى اجەپتاۋىر حاباردار بولىپ قالدى. سونداي-اق حالىقتىڭ كوبى سايلاۋالدى ناۋقان اياسىندا ءوتىپ جاتقان كەزدەسۋلەرگە بەلسەندى قاتىسىپ, وزدەرىنىڭ وي-پىكىرلەرىن جەتكىزىپ, مەجەلى كۇنى سايلاۋدان دا قالىس قالماي, تاڭداعان كانديداتتارىنا داۋىس بەرەتىندەرىن ايتۋدا.
* * *
« ۇلى دالا قىراندارى» رەسپۋبليكالىق قوزعالىسىنان پرەزيدەنتتىككە كانديدات سادىبەك تۇگەل ءوزىنىڭ سەنىم ءبىلدىرىلگەن ادامدارىمەن بىرگە باتىس قازاقستان وبلىسىندا ءجۇر. ناسيحاتشىلار توبى وڭىردەگى كيەلى ورىنداردى ارالاپ, زيارات ەتىپ, تۇرعىندارعا, شەت ايماقتان كەلگەن جۇرتقا سايلاۋالدى باعدارلاماسىن تۇسىندىرۋدە. نەگىزگى ۇستانىمدارى ۇلتتىق قۇندىلىقتارعا دارىپتەۋگە باعىتتالعان كانديداتتىڭ مۇنداي قاسيەتتى جەرلەرگە اتباسىن بۇرۋى ەرەكشە ماڭىزعا يە. «جەر – جانىمىز, ءتىل – تۇعىرىمىز» دەپ ۇرانداتقان س.تۇگەل وسى تۇركىستان سەكىلدى قاسيەتتى جەرىمىزدىڭ قادىرىن ءبىلىپ, ءدال وسى وڭىردەگى حالىقتىڭ تازا ساقتالعان ءتىلى مەن قايماعى بۇزىلماعان ءداستۇرى بۇكىل قازاققا ۇلگى بولعانىن قالايدى.
پرەزيدەنتتىكتەن ۇمىتكەر ءوزىنىڭ سايلاۋالدى باعدارلاماسىندا كورىنىس تاپقان نەگىزگى باعىتتاردى حالىقپەن كەزدەسۋلەرىندە كەڭىنەن تۇسىندىرۋدە. ول كيەلى ورىندارعا جاساعان ساپارلارىندا ۇلتتىق قۇندىلىقتار, سالت-ءداستۇرىمىز تۋرالى ءسوز قوزعاسا, پەرزەنتحاناداعى كەزدەسۋىندە دەموگرافياعا كوڭىل ءبولۋدىڭ ماڭىزىن ءتۇسىندىردى. سونداي-اق ۇلتتىق ويىن تۇرلەرىنەن ءتۇرلى بىرىنشىلىكتەر ۇيىمداستىرۋعا باستاماشى بولىپ, مەملەكەتتىك ءتىلدىڭ مارتەبەسىن كوتەرۋ جايىن دا ۇمىت قالدىرعان جوق.
سونىمەن قاتار بولاشاق ۇرپاق تاربيەسىندە كوكىرەگى قازىناعا تولى قاريالارعا قامقورلىق جاساۋدى دا نازارىنا الدى. اقساقالداردىڭ كوڭىلىن اۋلاعان شارالاردىڭ بىرىندە «قاريالارىمىز كۇن وتكەن سايىن ازايىپ بارا جاتىر دەپ ايتقانىمىزبەن, ءسوزىمىز بەن ءىسىمىز ۇيلەسپەي جاتادى. سوناۋ سوعىس كەزىندە دە بالالارى ورالماي جالعىز قالعان قاريالاردى بۇكىل اۋىل بولىپ قامقورلىعىنا الىپ, قارايلاسۋشى ەدى عوي. ال قازىر شە؟ اتا-اناسىن قارتايعاندا قاراۋسىز قالدىرىپ, قارتتار ۇيىنە اپارىپ وتكىزىپ, بار جاۋاپكەرشىلىكتى مەملەكەتكە اۋدارا سالاتىن بەزبۇيرەك ۇرپاق قايدان شىقتى, بۇل ءبىزدىڭ ۇرپاق ءتاربيەسىندەگى ولقىلىقتارىمىزدىڭ كەسىرى ەمەس پە؟» دەپ قازىرگى جاعدايدى سىنايدى.
دايىنداعان
ورىنبەك وتەمۇرات,
حاميت ەسامان,
«Egemen Qazaqstan»
