L'Oreal فيرماسى بىلتىر سۇلۋلىق سالاسىندا الەمدىك كوشباسشى بولۋدى ماقسات ەتپەيتىنىن ءمالىمدەگەن كەزدە, سۇلۋلىق يندۋسترياسىنداعى سالالىق وزگەرىستەردى ايقىن بايقاتقان بولاتىن. «سوڭعى 30-40 جىلدا كوسمەتيكالىق ونىمدەرگە قاتىستى ايەلدەردىڭ سۇرانىستارى وزگەرگەن جوق, بىراق ەندى جاڭا تەحنولوگيالار نەعۇرلىم تالعامپاز تۇتىنۋشىنى قالىپتاستىردى, – دەيدى L'Oreal فيرماسىنىڭ تەحنولوگيالىق بولىمشەسىنىڭ ۆيتسە-پرەزيدەنتى گيۆ بالۋح.
سونىمەن بۇل سالاداعى تەحنولوگيالىق دامۋدىڭ وزىق جاڭالىقتارى قانداي؟
1. دەربەستىك جانە جاساندى ينتەللەكت
گيۆ بالۋحتىڭ ايتۋىنشا, ايەلدەردىڭ تەڭ جارتىسى تەرى تۇسىنە ساي رەڭ تابا المايتىندارىنا شاعىمدانادى. ال بيداي ءوڭدى, قارا قىزدار ءۇشىن تاڭداۋ ەركى ءتىپتى شەكتەۋلى. ماسەلەن, Lancome كومپانياسىنىڭ Le Teint Particulier سكانەرى 20 مىڭ تونالدى كرەم ۇسىنادى. الايدا وسىنشا مىڭ سان كرەمدى دۇكەندەردە ءبىر ۋاقىتتا ۇستاۋ مۇمكىن ەمەس. وسى ولقىلىقتىڭ ورنىنا اتالعان فيرما Teint Particulier دەپ اتالاتىن ارنايى اپپاراتتى ۇسىنىپ وتىر. ول قولما-قول تەرى رەڭىنە ساي جاساندى ينتەللەكت الگوريتمىن قولدانا وتىرىپ, كرەمنىڭ تۇستىك گامماسىن انىقتاپ بەرەدى. الىنعان دەرەكتەر وڭدەلىپ, قاجەتتى ءتۇس تاڭدالادى. كرەم رەتسەبى بىردەن ماشيناعا بەرىلىپ, دۇكەندە قاجەتتى ءتۇستەر ارالاستىرىلادى. ءتيىمدىلىگى جونىنەن ساتىپ الۋشىلارعا ۇناپ تا جاتىر, ايتكەنمەن باعاسى دا بارشىلىق.
2. ۆيرتۋالدى بويانۋ
ونلاين-دۇكەندەر ىڭعايلىلىق ءۇشىن قوسىمشا ناقتىلىق تەحنولوگيالارىن قولدانىسقا شىعاردى. DM نەمىس دۇكەنى ۆيرتۋالدى ماكياج باعدارلاماسىن ۇسىندى. مىسالى, Sephora فيرماسى قولداناتىن Virtual Artist باعدارلاماسى كليەنتتەرگە سمارتفونداردىڭ كومەگىمەن ەرىن دالابىنىڭ مىڭداعان ءتۇرىن تاڭداۋعا كومەكتەسەدى. قولدانبا تەرى قۇرىلىمىنا ساي شەشىم قابىلداپ, بەت الپەتىڭىزگە قونا كەتەتىن بوياۋلاردى دەرەۋ انىقتايدى. 2016 جىلى Virtual Artist قوسىمشاسىمەن 200 ميلليوننان استام كليەنت تاجىريبەدەن وتكەن.
3. «اقىلدى» كۇتىم
بەت كۇتىمىن باعالاۋ ءۇشىن كومپيۋتەرگە قانشالىقتى سەنەسىز؟ تايۆاندىق New Kinpo Group فيرماسى جاساعان HiMirror قۇرىلعىسى «اقىلدى اينا» بولۋعا تالپىنادى. قۇرىلعىنى ىسكە قوسساڭىز بولعانى, بەتتى سۋرەتكە ءتۇسىرىپ, اجىمدەر مەن داقتار, قۇرعاقتىق پەن سەزىمتالدىق دەڭگەيىن انىقتاپ بەرەدى. شەكتىك شكالا بويىنشا باعالاپ, كوسمەتيكا تاڭداۋدا جەكەلەگەن كەڭەستەر ۇسىنا الادى. تەحنيكانىڭ اتى تەحنيكا, تولىقتاي سەنە بەرۋگە دە بولماس, دەسە دە بەلگىلى ءبىر شامادا پايدالى ەكەنى راس.
4. 3D ماكياج
ەرتە مە, كەش پە ۆيزاجيست روبوتتاردىڭ شىعاتىنى راسقا اينالاتىنداي. بيىل لاس-ۆەگاستاعى تۇتىنۋشى ەلەكترونيكاسى كورمەسىندە تانىستىرىلعان Proctor and Gamble فيرماسىنىڭ Opté 3D قۇرىلعىسى كوپشىلىكتى تاڭ-تاماشا ەتتى. ەرەكشەلىگى سول, سەكۋندىنا 200 كادر تۇسىرەتىن شاعىن كامەراسى ارقىلى بەت تەرىسىن بىركەلكى سكانەرلەي وتىرىپ, ميكروپرينتەر ءسىزدى ءاپ-ساتتە بوياندىرىپ بەرەدى. ميكروپرينتەردىڭ دالدىگى سونشالىقتى, سالىستىرمالى شىعىن مەيلىنشە از جۇمسالادى. بۇيىمنىڭ جاپپاي ءوندىرىسى 2020 جىلعا قاراي جوسپارلانىپ وتىرعانىن ەسكەرسەك, ۆيزاجيستەردىڭ قازىردەن باستاپ وزگە سالادا ىزدەنە بەرگەنى دۇرىس پا دەيسىز.
5. ۆيرتۋالدى كوسمەتيكا
كەڭ تانىلعان ۆيرتۋالدى كوسمەتيكا ەشكىمدى تاڭعالدىرمايتىن بولدى. اۋەلدەن سولاي بولۋى تيىستەي, الەۋمەتتىك جەلىلەردە قالاعان وبرازدا «بويانىپ», ءدۇر سىلكىنىپ شىعا كەلەتىندەر كوپ. ياعني, بۇرىنعىداي بار ونەرىڭىزدى سالىپ بويانۋدىڭ, شاشىڭىزدى ون كۇن تاراپ, بەس كۇن ءورۋدىڭ قاجەتتىلىگى جوق. Instagramm جەلىسىندە پاريجدىك ينەس مارزەت جاساعان ۆيرتۋالدى سۇزگىلەرىن كيىپ الساڭىز بولعانى, ءاپ-ساتتە قالاعان وبرازدا قاھارمانعا اينالىپ شىعا كەلەسىز. ارالۋاندىعىمەن ەرەكشەلەنەتىن ونىڭ فانتاستيكالىق بەينەلەرى از ۋاقىتتا جاپپاي تانىلىپ كەتتى. ول جاساعان فيلترلەر سەرياسى Snapchat جەلىسى قولدانۋشىلارىن دا اجەپتاۋىر قارىق قىلىپ تاستاعان ءتارىزدى.
