كوسوۆونىڭ ارنايى قاۋىپسىزدىك كۇشتەرى (ROSU) 28 مامىر كۇنى تاڭەرتەڭ ۇيىمداسقان قىلمىس پەن كونترابانداعا قارسى رەيد جۇرگىزۋ جەلەۋىمەن ءولكەنىڭ سولتۇستىگىندەگى سەربتەر تۇراتىن اۋداندارعا باسىپ كىردى. شامامەن 200 جاۋىنگەردەن قۇرالعان, 73 بروندالعان كولىك جۇمىلدىرىلعان وپەراتسيا التى ساعاتقا سوزىلعان. ارنايى جاساقتىڭ بۇل ارەكەتىنە جەرگىلىكتى تۇرعىندار نارازىلىق تانىتىپ, زۋبين-پوتوك ءجانە كوسوۆسكا-ميتروۆيتسا مۋنيتسيپاليتەتتەرىندە بارريكادالار ورناتا باستادى. سوندىقتان كوسوۆو پوليتسەيلەرىنە كۇش قولدانۋعا تۋرا كەلىپ, جولىنا بوگەت قىلىپ قويعان جۇك كولىكتەرىن تۇگەل ىسىرىپ تاستاعان, سوڭى اتىسقا ۇلاسقان. ناتيجەسىندە 30-عا جۋىق ادام ۇستالعان. ولاردىڭ دەنى – سەربتەر, اراسىندا بىرەن-ساران الباندار دا بار. كوسوۆو استاناسى پريشتينادان ۇيىمداسقان قىلمىسقا, كوررۋپتسياعا قاتىسى بار دەگەن كۇدىكپەن 19 قۇقىق قورعاۋ ورگانىنىڭ قىزمەتكەرى ۇستالعانى حابارلاندى. سونداي-اق كوسوۆوداعى ۋاقىتشا اكىمشىلىك ىستەرى جونىندەگى ميسسيامەن جۇرگەن بۇۇ-نىڭ ەكى قىزمەتكەرى ۇستالعان. ونىڭ بىرەۋى – رەسەيلىك ميحايل كراسنوششەكوۆ. ول كەيىن بوساتىلدى.
سەربيا پرەزيدەنتى ءىىم اسكەرى مەن ارنايى جاساقتارىن تولىق جاۋىنگەرلىك ازىرلىككە كەلتىرۋدى بۇيىرعان. جانە مۇنداي جاعدايلار تىيىلمايتىن بولسا, ونى جاۋاپسىز قالدىرمايتىنىن ەسكەرتكەن. سەربيا ۇكىمەتىنىڭ وكىلى ماركو ديۋريچ كوسوۆو پوليتسياسى وڭىردەگى بەيبىت حالىقتىڭ شىرقىن بۇزدى, ەتنيكالىق سەربتەردى قۋىپ شىعارۋعا ارەكەتتەندى دەپ ايىپتادى.
ال كوسوۆونىڭ پرەمەر-مينيسترى رامۋش حاراديناي Twitter-دەگى پاراقشاسىندا ازاماتتاردى تىنىشتىق ساقتاۋعا شاقىرىپ, رەسپۋبليكانىڭ سولتۇستىگىندەگى وپەراتسيا ۇيىمداسقان قىلمىسقا قارسى جانە پوليتسيا مەن كەدەن ورگانداردارىن تەكسەرۋ ماقساتىندا جۇرگىزىلگەنىن ءمالىمدەدى. سونداي-اق سەربيا ۇكىمەتىنەن بۇل ءىس-شاراعا قارسى كۇش جۇمساماۋىن سۇرادى.
قالاي دەگەنمەن دە كوسوۆو پوليتسياسىنىڭ اتالعان رەيدى شيەلەنىسكەن جاعدايدى ۋشىقتىردى. بۇعان دەيىن دە وسىنداي ارانداتۋشىلىق ارەكەتتەر ورىن العان. ونىڭ ۇستىنە ءدال وسى وقيعادان ءبىر كۇن بۇرىن سەربيا پرەزيدەنتى الەكساندر ۆۋچيچ پارلامەنت مىنبەرىندە ەكى ساعات ءسوز سويلەپ, كوسوۆونىڭ ۋىستان شىعىپ كەتكەنىن مويىندايتىن كەز كەلگەنىن مالىمدەگەن. ول ءبۇگىندە كوسوۆو بەلگرادتىڭ قاداعالاۋىندا ەمەستىگىن ايتىپ, دەپۋتاتتاردى شىندىققا تۋرا قاراۋعا شاقىردى. «سەربيانىڭ ءىرى ۇلتتىق جەڭىلىسكە ۇشىراپ, تەرريتورياسىنىڭ بۇتىندىگىن ساقتاي الماعانىن, ەداۋىر ەكونوميكالىق شىعىنعا تاپ بولعانىن مويىنداۋ قاجەت. كوسوۆو مەن مەتوحيانىڭ ۇستىنەن ءبىزدىڭ ۇكىمەت بيلىك ءجۇرگىزە المايدى. بۇدان ءارى ءوز-ءوزىمىزدى الدارقاتۋدى, ءوز قوعامىمىزدى سوعان سەندىرۋدى توقتاتۋىمىز كەرەك. ونسىز ءبىز بۇل ايماقتاعى سەربتەردىڭ قانداي جاعدايدا ەكەنىن ناقتى بىلە المايمىز», دەدى پرەزيدەنت.
ا.ءۆۋچيچتىڭ ايتۋىنشا, كوسوۆو پروبلەماسىن شەشۋدىڭ ەكى جولى بار. ءبىرى – وسىلاي كۆو-ءمارتەبەسىن, ياعني قاتىپ قالعان قاقتىعىس قالپىن ساقتاپ, ىمىراسىز ىرىلداسىپ كۇن كەشە بەرۋ. ەكىنشى نۇسقا – بەلگراد پەن پريشتينا اراسىنداعى قارىم-قاتىناستى ءبىر قالىپقا كەلتىرۋ. سەربيا پرەزيدەنتى ەكىنشى جولدى جاقتايتىنىن جەتكىزدى. جانە بۇل جول – پروبلەمانىڭ جالعىز شەشىمى ەكەنى شىندىق. ويتكەنى كوسوۆونى ەندى قايتارۋ مۇمكىن ەمەسى انىق. بۇل ا.ءۆۋچيچتىڭ كوسوۆونىڭ تاۋەلسىزدىگىن مويىنداۋعا جاقىن ەكەنىن اڭعارتادى. ال كوسوۆو سەربيانىڭ بۋىنسىز جەرىنە پىشاق ۇرىپ, ياعني ءسولتۇستىگىندەگى سەربتەرگە قىسىم جاساپ, پروتسەستى تەزدەتۋگە اسىققان سياقتى. بۇعان دەيىن ەكى ەل پرەزيدەنتتەرى ا.ۆۋچيچ پەن ح.تاچيدىڭ قاتىسۋىمەن اۋماقتىڭ الماسۋ ىقتيمالدىعى تۋرالى كەلىسسوزدەر جۇرگىزىلگەن. اڭگىمە كوسوۆو سەربياعا سەربتەر مەكەندەيتىن سولتۇستىك ايماعىن بەرۋ, ال سەربيا كوسوۆاعا ءوڭتۇستىگىندەگى الباندار تۇراتىن ەكى اۋدانىن وتكىزۋ تۇرعىسىندا بولعان. بىراق سەربيانىڭ دارمەنسىزدىگىن پايدالانعان كوسوۆو سولتۇستىكتەگى سەربتەردى جەدەل كەتۋگە ءماجبۇرلەي باستاعان سەكىلدى.
