قازاق جەرىنەن باقىت تاپتىق – دەيدى ازەربايجان قىزى ايدان ەيۆازوۆا
سارسەنبى, 1 مامىر 2013 2:08
ترامۆايدا كەلە جاتىر ەدىم, قاسىمدا وتىرعان قىزدىڭ ۇيالى تەلەفونىنان ءانشى نۇرلان ءالىمجانوۆ ايتاتىن «اققۋ قۇسىم» ويناپ قويا بەردى. ءتۇرى-ءتۇسى بولەك جاس قىز: «ايگەرىم, قازىر كەلەمىن, كەلەسى ايالداماعا جاقىنداپ قالدىم», – دەپ تەلەفون شالعان قۇربىسىمەن قازاقشا سويلەستى.
سارسەنبى, 1 مامىر 2013 2:08
ترامۆايدا كەلە جاتىر ەدىم, قاسىمدا وتىرعان قىزدىڭ ۇيالى تەلەفونىنان ءانشى نۇرلان ءالىمجانوۆ ايتاتىن «اققۋ قۇسىم» ويناپ قويا بەردى. ءتۇرى-ءتۇسى بولەك جاس قىز: «ايگەرىم, قازىر كەلەمىن, كەلەسى ايالداماعا جاقىنداپ قالدىم», – دەپ تەلەفون شالعان قۇربىسىمەن قازاقشا سويلەستى.
– قازاق تىلىندە جاقسى سويلەيدى ەكەنسىڭ. اتىڭ كىم؟ قاي ۇلت وكىلى بولاسىڭ؟ – دەپ سۇرادىم.
– ازەربايجان قىزىمىن. اتىم – ايدان, – دەدى ول ادەمى جىميىپ.
– «ءان ايتاتىن قىز» دەگەن تۇرىك سەريالىنداعى فەريدە دەگەن قىزدىڭ ءرولىن وينايتىن اكتريسا ايداننىڭ اتىن قويعان با؟ – دەدىم.
– مۇمكىن. تۇرىكشەدەن اۋدارعاندا بۇل ەسىم اي, اي نۇرى, ايدىڭ تولىسىپ تۋى دەگەندى بىلدىرەدى. قازاقتار اينۇر, ايگۇل, ايمان, ايسۇلۋ دەپ كوپ اتتار قويادى عوي. سول سياقتى. ءبىر مۇسىلمان حالقىمىز. تىلدەرىمىز دە ۇقساس. انام شاپاعات, اكەم عاسان ەيۆازوۆتار ەكىباستۇزدا, ال اجەمىز, تۋعان-تۋىستارىمىز تۇگەلدەي ازەربايجاننىڭ زارداب اۋدانىندا تۇرادى. دەمالىس العاندا, كانيكۋل كەزدەرىندە بارىپ تۇرامىز, – دەدى ول تاعى دا.
ايالداماعا جەتكەنشە بايلانىس تەلەفونىن الىپ ۇلگەرگەن ەدىم. ايدان ەيۆازوۆا وبلىس ورتالىعىنداعى سۇلتانماحمۇت تورايعىروۆ اتىنداعى مەملەكەتتىك ۋنيۆەرسيتەتتىڭ حيميا-تەحنولوگيا فاكۋلتەتىنىڭ 4-كۋرسىندا وقيدى ەكەن. وتكەندە ترامۆايدا كەلە جاتقاندا مۇناي-حيميا زاۋىتىندا وندىرىستىك تاجىريبەدەن ءوتىپ جۇرگەن كەزى ەكەن. ەكىباستۇزداعى ورتا مەكتەپتى ورىس تىلىندە ءبىتىرىپتى. قازاق تىلىندە جاقسى سويلەپ كەتۋىنە اينالاسى, دوس-قۇربىلارى, كورشىسى التىن اپايدىڭ اسەرى بولىپتى.
– ال ەكىباستۇزداعى پوليتەحنيكالىق كوللەدجدە وقيتىن ءىنىم ءادىل دە قازاق تىلىندە جاقسى سويلەيدى, ويتكەنى, دوستارىنىڭ ءبارى قازاق بالالارى, – دەيدى ايدان.
– ال ۇيدە, وتباسىندا قاي تىلدە سويلەسەسىڭدەر؟
– ارينە, ازەربايجان تىلىندە. اندەرىمىزدى بىلەمىز, سالت-ءداستۇرىمىزدى ساقتايمىز. ال قازاق ءتىلىن ءبىلۋىمىز كەرەك, ول – قاجەتتىلىك, ءبىز وسى جەردە, وسى قازاق ەلىندە تۇرامىز, اتا-انامىزدىڭ جۇمىسى بار, ءۇيلى-كۇيلىمىز, تىنىشتىق, تاتۋلىق ورناعان ەلدە ءومىر سۇرەمىز. ەكىباستۇزدا اتا-انامىزدىڭ باسقا دا ازەربايجان دوستارى تۇرادى. بولاشاعىمىز قازاق تىلىندە, سوندىقتان كىشكەنتايىمىزدان قازاقشا سويلەپ, جازىپ ۇيرەندىك. اكەمىز كەڭەس وداعى كەزىندە ەكىباستۇزدا اسكەر قاتارىندا بولىپ, وسى جەردە قىزمەتتە قالادى. ازەربايجان جاققا بارىپ سۇيگەن قىزى, ءبىزدىڭ انامىز شاپاعاتتى الىپ كەلەدى. اكەمىز عاسان ايتقانداي, ءبىز قازاق جەرىنەن باقىت تاپتىق, ەندى عۇمىر بويى وسى ەلدە ءومىر سۇرەمىز, – دەدى ول ماقتانىشپەن.
ايدان قازىر باياناۋىلدىق قۇربىسى مارينا ناۆاليحينا ەكەۋى پاتەر جالداپ تۇرادى ەكەن.
– مارينا دا قازاقشا سويلەيدى. سەبەبى, ول, باياناۋىلدىڭ قىزى عوي! – دەيدى ايدان. – بولاشاق ماتەماتيك. مۇمكىن, وقۋ بىتىرگەن سوڭ, مۇناي-حيميا زاۋىتىندا بىرگە جۇمىس جاسايتىن بولارمىز. تاعى ءبىر جاقسىسى – ءبىز پاتەر جالدايتىن ءۇيدىڭ يەسى راميزا اپامىزبەن قازاقشا سويلەسىپ, ءتىل بايلىعىمىزدى ودان ءارى بايىتۋدامىز, تاربيەلىك-تانىمدىق باعىتىنداعى اڭگىمەلەرىن تىڭداۋدامىز. ءبىز سوعان قۋانامىز.
فاريدا بىقاي,
«ەگەمەن قازاقستان».
پاۆلودار.
