قاسىموۆتار اۋلەتىن ساحناعا مەحانيزاتور بولىپ ەڭبەك ەتەتىن وتاعاسى بەرىك باستاپ شىقتى. ومىرلىك جارى گۇلزيرا – اسپاز. ول جەرگىلىكتى شىعارماشىلىق سايىسىندا «انشىلىك شەبەرلىك» اتالىمىندا جەڭىسكە جەتىپتى. ياعني ءدامدىلىگى ءتىل ۇيىرەر اس ءمازىرىن دايىنداۋدان باسقا دا ونەرى جەتىپ-ارتىلادى. ءتورت ۇل-قىزىن قۇتتى جەرىنە قوندىرىپ, جەكە وتاۋ ەتىپ شىعارعان ەكەۋىنىڭ ءبىر شاڭىراق استىندا ءتۇتىن تۇتەتكەنىنە – 35 جىل. ءتۇرلى ماماندىق يەلەرىن توعىستىرعان قاراپايىم اۋلەتتىڭ «تۋعان جەرگە تۋىڭدى تىك» اتالىمى بويىنشا وزىپ شىعۋى لايىقتى كورسەتىلگەن قوشەمەت ەكەنى داۋسىز. ۇلكەنگە قۇرمەت, كىشىگە ىزەت قاسيەتتەرى بويلارىنان سامالا جەلدەي ەسەتىن كوپ بالالى ارتىقباي مەن بالزيا نۇرمەتوۆتەر «نۇرلى كوش» باعدارلاماسى اياسىندا قىزىلجار اۋدانى بايتەرەك ەلدى مەكەنىنە قونىستانعاننان بەرى قوعامدىق جۇمىستاردىڭ بەل ورتاسىنان كورىنىپ ءجۇر. «دۋسلۋك» وزبەك مادەني ورتالىعىنىڭ بەلدى مۇشەلەرى سانالادى. ەڭبەكقور, الدارىنان جۇمىس ۇركىپ وتىرادى دەسە دە بولادى.
جۇرتشىلىق ساحنا ءتورىنە كوتەرىلگەن توپاەۆتار, قانافيندەر جانە كياەۆتەر پاتروناتتىق وتباسىلارىنا دا ءدۇركىرەتە قول سوقتى. توپاەۆتار اتا-انانىڭ قامقورلىعىنسىز قالعان ەكى ورىس بالاسىن ماپەلەپ ءوسىرىپ وتىر. يۋرا اكە جولىن قۋىپ, تۇرمىستىق بۇيىمدار جاساۋمەن شۇعىلدانادى. بولاشاقتا ديزاينەر بولعىسى كەلەدى. ەرلى-زايىپتى كياەۆتەر بەس قىزدى باۋىرىنا باسقان. ۆالەريا قازاق ءتىلىن, ۆاليا دومبىرا تارتۋدى مەڭگەرگەن. ىنتىماعى جاراسقان ازامات پەن گۇلزات قانافيندەر كىندىكتەرىنەن وربىگەن ەكى بالاعا جەتىم بالالار ۇيىنەن ءتورت بالانى قوسىپ الىپتى. پەداگوگيكالىق جۇمىس ءوتىلى ءبىر عاسىرعا پاراپار ەسكەندىروۆتەر اۋلەتى وبلىس ورتالىعىنداعى جانعا جايلى تىنىش ءومىرىن اۋىلدىڭ تىنىمسىز تىرلىگىنە ايىرباستاعانىنا ەش وكىنبەيدى. 10 ۇل-قىز ءوسىرىپ, 20-عا جۋىق نەمەرە ءسۇيىپ وتىرعان زيات اتا, بوتاگوز اجە جاسىنا جەتىپ, شاتتىعى شالقىعان شاڭىراقتى سۇتتەي ۇيىتىپ وتىر.
وسىلايشا «ەل دەپ كەلگەن باۋىرلار», «انا جۇرەگىنىڭ جىلۋى», «ۇرپاق ساباقتاستىعى», «شەبەردىڭ قولى ورتاق» اتالىمدارى ءوز يەلەرىن تاپقاننان كەيىن جۇلدەگەرلەر مەن جەڭىمپازداردى ماراپاتتاۋ باستالدى. تايىنشا اۋدانىنان كەلگەن شاتارباي وتباسى ءۇشىنشى ورىنعا لايىق دەپ باعالاندى. داۋەي اقساقال ون ساۋساعىنان ونەر تامعان شەبەرلىكتى موڭعوليادا ۇيرەنگەن. اتامەكەنگە ورالعاننان كەيىن كەللەروۆكا اۋىلىندا قولدانبالى ونەر مۇراجايىن اشىپ, «رۋحاني جاڭعىرۋ» باعدارلاماسى شەڭبەرىندە ءبىراز ءىس تىندىرعان. ەكىنشى ورىندى يەلەنگەن ماشيكوۆتاردىڭ ابىز اقساقالى ايدارحان مەن قۇداي قوسقان قوساعى گۇلشارا ەكەۋىن 11 ۇل-قىز, 31 نەمەرەنىڭ قىزىعىن كورىپ وتىرعان ماۋەلى بايتەرەك دەرسىڭ.
گران-پري باس جۇلدەسىن وبلىس اكىمىنىڭ ورىنباسارى رۋسلان الىشەۆ شالعايداعى ءۋاليحانوۆ اۋدانىنىڭ نامىسىن ارقالاي كەلگەن مۇحامەدياروۆتار وتباسىنا سالتاناتتى تۇردە تابىس ەتتى. وتاعاسى بولات 31 جىل ەنەرگەتيك بولىپ ەڭبەك ەتكەن. اسىل جارى مافرۋزا – «رەسپۋبليكا اعارتۋ ءىسىنىڭ ۇزدىگى». ۇلدارى مەن قىزدارى, نەمەرەلەرى شەتىنەن ونەرپاز, ءانشى, كۇيشى, ءبيشى.
«مەرەيلى وتباسى» كونكۋرسىنا قاتىسۋشىلارعا باعالى سىيلىقتار تارتۋ ەتىلدى.
سولتۇستىك قازاقستان وبلىسى
