«اق جول» دەموكراتيالىق پارتياسى ۇسىنعان پرەزيدەنتتىككە كانديدات دانيا ەسپاەۆانى قولداۋ ماقساتىندا الماتى قالاسىندا ۆەلوجارىس ءوتتى. ءىس-شارانى ۇيىمداستىرۋعا «ۆەلو-حالىق الماتى» ۆەلوقاۋىمداستىعى جانە №73 جاسوسپىرىمدەر مەن بالالارعا ارنالعان سپورت مەكتەبى مۇرىندىق بولدى. جاستار جىلى اياسىندا وتكەن جارىستىڭ اشىلۋىندا «اق جول» پارتياسى الماتى قالالىق فيليالىنىڭ باسشىسى ن.جازىلبەكوۆ پرەزيدەنتتىكتەن ۇمىتكەر د.ەسپاەۆانىڭ سايلاۋالدى تۇعىرناماسىن جان-جاقتى تانىستىردى. دودا ءال-فارابي داڭعىلىنداعى تۇڭعىش پرەزيدەنت پاركىنەن باستالىپ, تورايعىروۆ-كابلۋكوۆ-تيميريازەۆ-بايتۇرسىنوۆ-شەۆچەنكو-قوناەۆ-گوگول كوشەلەرى ارقىلى ءوتىپ, مادەنيەت پاركىندە مارەگە جەتتى. دىتتەگەن جەرىنە جەتكەن ۆەلوشاباندوزداردى قالا تۇرعىندارى, پارتيا بەلسەندىلەرى «اتامەكەن» ءانىن شىرقاپ قارسى الدى. شارا سوڭىندا فيليال جەتەكشىسى ۆەلوجارىستىڭ بارلىق قاتىسۋشىلارىن قۇتتىقتاپ, 2019 جىلدىڭ 9 ماۋسىمىندا وتەتىن سايلاۋعا بەلسەندى قاتىسۋعا شاقىردى.
سونىمەن قاتار ۇگىت-ناسيحات جۇمىستارىنىڭ اياسىندا سالاماتتى ءومىر سالتىن ناسيحاتتاۋعا ارنالعان تاعى ءبىر جارىس ءوتتى. ورال قالاسىندا د.ەسپاەۆانىڭ ايماقتىق قوعامدىق شتابى بايداركا مەن كانوە ەسۋدەن بىرىنشىلىك ۇيىمداستىردى. ءىس-شاراعا كانديداتتىڭ سەنىم بىلدىرىلگەن ادامدارى, پارتيانىڭ باتىس قازاقستان وبلىسىنداعى بەلسەندى جاستارى قاتىستى. تۋرنيردە تۇركىستان, الماتى, شىمكەنت, تەمىرتاۋ, اتىراۋ, ورال قالالارىنان, ياعني قازاقستاننىڭ تۇكپىر-تۇكپىرىنەن كەلگەن 120-دان اسا سپورتشى باق سىنادى. جاقسى ناتيجە كورسەتكەن قاتىسۋشىلاردىڭ بارلىعى ديپلوم مەن مەدالدار يەلەندى. ماراپاتتاۋ راسىمىندە «اق جول» پارتياسى وبلىستىق كەڭەسىنىڭ مۇشەسى, باتىس قازاقستان وبلىسىنداعى بايداركا مەن كانوە فەدەراتسياسىنىڭ پرەزيدەنتى يۋ.كازانين مەن ورال قالالىق ءماسليحاتىنىڭ دەپۋتاتى ۆ.ۆلاسوۆ جەڭىمپازداردى قۇتتىقتاپ, ەلىمىزدەگى ساياسي ناۋقاننىڭ ماڭىزدىلىعىنا توقتالدى.
* * *
«اۋىل» حالىقتىق-دەموكراتيالىق پاتريوتتىق پارتياسىنان پرەزيدەنتتىككە كانديدات تولەۋتاي راقىمبەكوۆتىڭ تۇركىستان وبلىستىق قوعامدىق شتابى پوەزيا كەشىن وتكىزدى. ۇگىت-ناسيحات جۇمىستارىنىڭ اياسىندا وتكەن بايقاۋعا اۋدان بەلسەندىلەرى, اقىندار, تەرمەشى-انشىلەر – بارلىعى 148 ادام قاتىستى. ءىس-شارا قالامگەرلەردى اۋىلدىڭ رۋحاني ءومىرىن, الەۋمەتتىك-ەكونوميكالىق ۇدەرىستەردى سۋرەتتەۋگە ىنتالاندىرۋ ماقساتىندا ۇيىمداستىرىلدى.
كەش بارىسىندا سايلاۋعا قاتىسۋدىڭ, دۇرىس تاڭداۋ جاساۋدىڭ ماڭىزى ءسوز بولىپ, كانديدات تۋرالى جينالعان قاۋىمعا كەڭىنەن ماعلۇمات بەرىلدى, سايلاۋالدى باعدارلاماسى تانىستىرىلدى. ال كونكۋرستىڭ قازىلار القاسىنىڭ قۇرامىن وبلىستىق سايلاۋالدى شتاب جەتەكشىسى ە.دۋاناەۆ, №17 اتاتۇرىك اتىنداعى مەكتەپ-گيمنازيانىڭ مۇعالىمى د.ايتىلەۋوۆا مەن اقىن س.جولانوۆ تولىقتىردى. بايقاۋ قورىتىندىسى بويىنشا 1-ورىندى كەنتاۋ قالاسىنىڭ تۇرعىنى ج.بەكشوراەۆا يەلەنسە, 2-ورىن وتىرار اۋدانىنان كەلگەن ج.شارحانعا بۇيىردى. ال 3-ورىنعا بايدىبەكتىك ا.قىلىشبەك لايىق دەپ تانىلدى. بۇعان قوسا, تۇركىستان قالاسىنان «اۋىلىم ادەمى» اتتى ولەڭىمەن د.كەيكى «ۇزدىك ديپلوم» يەگەرى اتاندى. سوڭىندا ۇيىمداستىرۋشىلار اۋىلدىڭ تىنىس-تىرشىلىگىمەن ەتەنە تانىس, اۋىلدىڭ احۋالىن كوتەرۋگە اتسالىسىپ جۇرگەن ازامات, ءوزىنىڭ سايلاۋالدى باعدارلاماسىندا دا اۋىل ماسەلەسىن ۇمىت قالدىرماعان ت.راقىمبەكوۆتىڭ كانديداتۋراسىن قولداۋعا شاقىردى.
سونىمەن قاتار الماتى وبلىسىندا سايلاۋالدى ناۋقان شەڭبەرىندە كونتسەرت ءوتىپ, وعان جاقىن اۋدانداردىڭ تۇرعىندارى شاقىرىلدى. كونتسەرتتىك باعدارلامادا تۋعان جەر, اۋىل تۋرالى اندەر كوپتەپ شىرقالدى. اقىندار قاۋىمى دا قالىس قالماي, جىردان شاشۋ شاشتى. «اۋىل» پارتياسىنىڭ ارداگەرى ب.جەتپىسباەۆ, ايماقتىق قوعامدىق شتاب وكىلدەرى ق.بەكيەۆ پەن ق.يساەۆا جينالعانداردى 9 ماۋسىم كۇنى وتەتىن سايلاۋعا بەلسەندى قاتىسۋعا ۇندەدى.
* * *
كاسىپوداقتار فەدەراتسياسى اتىنان سايلاۋعا ءتۇسىپ جاتقان كانديدات امانگەلدى تاسپيحوۆتىڭ قىزىلوردا وبلىسىنداعى قوعامدىق شتابى قارقىندى جۇمىس جۇرگىزىپ جاتىر. كانديداتتىڭ سەنىم بىلدىرىلگەن ادامدارى ارال اۋداندىق اۋرۋحانا ۇجىمىنا بارىپ, سايلاۋالدى تۇعىرنامانى ەگجەي-تەگجەيلى تانىستىردى. باعدارلاماداعى مەديتسينا سالاسى قىزمەتكەرلەرىنىڭ ەڭبەكاقىسى, ساپالى تەگىن ءبىلىم الۋ, قاجەتتى ماماندار دايارلاۋ ماسەلەلەرى ەڭبەك ۇجىمىنىڭ ەرەكشە قولداۋىنا يە بولدى. اۋرۋحانا ۇجىمى ءاربىر ماماننىڭ الەۋمەتتىك مۇددەلەرىنىڭ قورعالۋى, سالادا مامان تاپشىلىعىنىڭ جويىلۋى ەڭبەك ونىمدىلىگىن ارتتىرىپ, حالىققا ساپالى قىزمەت كورسەتۋگە وڭ اسەرىن تيگىزەدى دەيدى.
ا.تاسپيحوۆتىڭ سەنىم بىلدىرىلگەن ادامى ق.بەكەنوۆ قازالى اۋدانىنداعى №70 مەكتەپتە ايتەكە بي كەنتىنىڭ تۇرعىندارىنا كانديداتتىڭ نەگىزگى ۇستانىمدارىن ءتۇسىندىردى. جيىن بارىسىندا سايلاۋشىلاردىڭ سۇراقتارىنا دا جاۋاپ بەرىپ, قوعامنىڭ وزەكتى ماسەلەلەرى تۋرالى پىكىرلەرىن ورتاعا سالدى. اسىرەسە جۇمىسسىزدىق, جاستاردىڭ تەگىن ءبىلىم الۋى, جۇمىس بەرۋشىلەردىڭ جاۋاپكەرشىلىگىن ارتتىرۋ ماسەلەلەرى كوپ تالقىلاندى.
سونىمەن قاتار قىزىلوردا وبلىستىق ءبىلىم جانە عىلىم قىزمەتكەرلەرىنىڭ كاسىپوداق ۇيىمى ءتورايىمى ر.باينازاروۆا جوسالى كەنتىنىڭ جۇرتىمەن كەزدەستى. كەنت ورتالىعىندا ورنالاسقان تاڭسىقباي بازارىندا جانە «سالتانات» ناۋبايحاناسىندا وتكەن جيىندار بارىسىندا سايلاۋشىلارعا كانديدات تۇعىرناماسىنىڭ باسىم باعىتتارى ءتۇسىندىردى. وسىنداي جۇمىس ورىندارىندا ناپاقاسىن تاۋىپ جۇرگەن اعايىن ءوز قۇقىعىنىڭ قالاي قورعالۋى كەرەكتىگى تۋرالى ءبىراز جايعا قانىقتى.
بۇعان قوسا, قىزىلوردالىق بەلسەندى توپ قالانىڭ حالىق كوپ شوعىرلانعان تۇستارىندا ۇگىت جۇمىستارىن قىزۋ جۇرگىزۋدە. ولار دەمالىس كۇندەرى كەشكە سەرۋەنگە شىققان تۇرعىندارعا ۇگىت-ناسيحات پاراقشالارىن ۇلەستىرىپ, الداعى سايلاۋ تۋرالى مالىمەت بەرىپ جاتىر.
* * *
قازاقستان كوممۋنيستىك حالىق پارتياسىنان پرەزيدەنتتىككە كانديدات جامبىل احمەتبەكوۆ سەمەي قالاسىندا پارتيا بەلسەندىلەرىمەن جانە قالا تۇرعىندارىمەن كەزدەستى. مادەنيەت ۇيىندە وتكەن باسقوسۋدا كانديدات ەڭبەكشى حالىق مۇددەسىن قورعاۋ بويىنشا تاباندى جۇمىس اتقارىپ كەلە جاتقانىن ايتتى. ول سايلاۋالدى باعدارلاماسىنىڭ نەگىزگى اسپەكتىلەرىنە توقتالىپ, اسىرەسە كەدەيلىكپەن كۇرەس تۋرالى باعىتقا باسا نازار اۋداردى.
جينالعاندار پرەزيدەنتتىكتەن ۇمىتكەردىڭ ۇندەۋىنە قولداۋ ءبىلدىرىپ, مەملەكەتتىك ساياسات ەڭبەك ادامىنا دەگەن ادىلەتتى قارىم-قاتىناسقا باسىمدىق بەرۋ كەرەكتىگىن اتاپ ءوتتى. كوپشىلىك كوكەيلەرىندە جۇرگەن سۇراقتارىن قويىپ, وعان تۇشىمدى جاۋاپ الدى. ولاردىڭ قاتارىندا جالاقى كولەمىن ارتتىرۋ, ەڭبەك جاعدايىن جاقسارتۋ, مەديتسينالىق قىزمەتپەن قامتۋ جانە باسپانا ماسەلەسى بولدى.
سونىمەن قاتار قاراعاندى قالاسىنداعى وبلىستىق سايلاۋالدى قوعامدىق شتابى «ادال ەڭبەك قوعام مۇددەسى ءۇشىن» دەگەن ۇرانمەن فلەشموب وتكىزدى. ءىس-شارا بارىسىندا اسپانعا قازاقستان كوممۋنيستىك حالىق پارتياسىنىڭ ۇراندارى جازىلعان شار ۇشىرىلىپ, ۇگىت پاراقتارى تاراتىلدى.
قاراعاندى وبلىستىق سايلاۋالدى شتاب جەتەكشىسى ا.زەۆاحين كوممۋنيستىك يدەولوگيا سىنعا كوپ ۇشىرايتىنىن, الايدا قازىرگى كوممۋنيستەر بۇرىنعى ءىزاشارلارىنىڭ قاتەلىگىن قايتالاماي, زامان تالابىنا ساي ارەكەت ەتىپ جاتقانىن باياندادى. ول پارتيا حالىقتىڭ سەنىمى مەن قۇرمەتىنە يە بولىپ وتىرعانىن اتاپ ءوتىپ, ساياسي قۇرىلىم تۇرمىسى تومەن ادامداردىڭ جاعدايىن جاقسارتۋ جولىندا قىزمەت ەتىپ, ەڭبەك ادامىنىڭ قۇقىعىن قورعايتىنىن ايتتى. بۇگىنگى تاڭدا پارتيا پارلامەنت ماجىلىسىندە قاراپايىم حالىقتىڭ مۇددەسىن قورعاپ, بيلىك پەن حالىق اراسىنا التىن كوپىر بولىپ وتىر. ا.زەۆاحين پارتيانىڭ سايلاۋالدى تۇعىرناماسى كەدەيلىكپەن كۇرەسكە, سونىمەن قاتار باتىستىڭ جالعان قۇندىلىقتارىنان باس تارتۋعا ۇندەيتىنىن جەتكىزدى.
* * *
Nur Otan پارتياسىنان پرەزيدەنتتىككە كانديدات قاسىم-جومارت توقاەۆتىڭ رەسپۋبليكالىق قوعامدىق شتابى جەر ءجانناتى جەتىسۋ وڭىرىنە باردى. العاشقى كەزدەسۋ تالدىقورعان قالاسىنداعى بەكەن ريموۆا اتىنداعى دراما تەاترىندا بيۋدجەت سالاسى قىزمەتكەرلەرىنىڭ قاتىسۋىمەن ءوتتى. جيىنعا 500-گە جۋىق ادام قاتىستى.
دەلەگاتسيا قۇرامىندا سەنات دەپۋتاتتارى ب.جۇماعۇلوۆ, م.قۇل-مۇحاممەد, ءماجىلىس دەپۋتاتى, Nur Otan پارتياسى پارتيالىق باقىلاۋ كوميتەتىنىڭ توراعاسى ق.سۇلتانوۆ, تەاتر جانە كينو اكتەرى, قازاقستاننىڭ ەڭبەك سىڭىرگەن قايراتكەرى ءا.احمەتوۆ بولدى. ناسيحاتشىلار توبى جينالعاندارعا كانديداتتىڭ سايلاۋالدى باعدارلاماسىنداعى باسىمدىقتاردىڭ بارلىعى حالىقتىڭ ءال-اۋقاتىن كوتەرۋگە باعىتتالعانىن جەتكىزدى.
كانديداتتىڭ رەسپۋبليكالىق شتابىنىڭ جەتەكشىسى ماۋلەن اشىمباەۆ ساباقتاستىق, ادىلدىك, ورلەۋ قاعيدالارى تۋرالى تولىققاندى اقپارات بەردى. «ق.توقاەۆ ەلباسىنىڭ ستراتەگيالىق باستامالارىنىڭ بارلىعىن ءارى قاراي جۇرگىزۋدى نەگىزگى ماقساتى ەتىپ وتىر. باعدارلامادا ايتىلعان ساباقتاستىق قاعيداسى وسىعان سايادى. بارشا قازاقستاندىقتاردىڭ زاڭ الدىنداعى تەڭدىگى, اركىمنىڭ لايىقتى جۇمىسى جانە ەڭبەگىنە ساي ادال جالاقىسى بولۋى – ادىلدىك قاعيداسىنىڭ نەگىزى. ال ورلەۋ قاعيداسىندا ءاربىر قازاقستاندىقتىڭ ءومىر ءسۇرۋ ساپاسىن جاقسارتۋعا باعىتتالعان ماڭىزدى ماسەلەلەردىڭ بارلىعى قامتىلعان», دەدى شتاب جەتەكشىسى.
سونداي-اق ول سايلاۋالدى باعدارلامادا كورسەتىلگەن تۇرعىنداردىڭ باسپانا ماسەلەسىن شەشۋگە قاتىستى باسىمدىققا ەرەكشە توقتالدى. 650 مىڭ وتباسىن باسپانامەن قامتاماسىز ەتۋ, كوپ بالالى وتباسىلار مەن مۇمكىندىگى شەكتەۋلى جانە باسقا دا مۇقتاج جاندارعا ارناپ 40 مىڭنان استام جالعا بەرىلەتىن پاتەر سالۋ كوزدەلگەنىن جەتكىزدى. بۇل باستامالار ءوز كەزەگىندە تالدىقورعاندىق تۇرعىندار تاراپىنان قىزۋ قولداۋ تاپتى.
* * *
«ۇلت تاعدىرى» ۇلتتىق-پاتريوتتىق قوزعالىسىنان پرەزيدەنتتىككە كانديدات بولىپ تىركەلگەن ءامىرجان قوسانوۆتىڭ قوستاناي قالاسىنداعى وبلىستىق سايلاۋالدى شتابىندا سايلاۋ كۇنى ۋچاسكەلەردە داۋىس بەرۋ پروتسەسىن قاداعالايتىن باقىلاۋشىلار ءۇشىن سەمينار ءوتتى. ءىس-شارانىڭ مودەراتورى جانە ترەنەرى دوس كوشىم بولدى. ول باقىلاۋشىلاردىڭ قۇقىقتارى مەن مىندەتتەرى, سايلاۋ كەزىندە ورىن الۋى ىقتيمال ءتۇرلى جاعدايلارداعى ارەكەتتەرى جايلى ءتۇسىندىردى. قاتىسۋشىلار قىزىعۋشىلىق تانىتقان تاقىرىپتارىن كوتەرىپ, بارلىق وزەكتى سۇراقتارىنا جاۋاپ الدى.
بەلگىلى ساياساتتانۋشى ەلىمىز بويىنشا ءوزىنىڭ سەمينارلارىن وتكىزۋدى جالعاستىرىپ جاتىر. د.كوشىم باستاعان توپتىڭ كەلەسى جيىنى قاراعاندى وبلىسىنىڭ ورتالىعىندا جانە اۋداندارىندا ءوتتى. بولاشاق بايقاۋشىلار ەلىمىزدىڭ بارلىق وڭىرىندە شىنايى قىزىعۋشىلىق تانىتۋدا.
ال كانديدات ءا.قوسانوۆتىڭ ءوزى ۇگىت-ناسيحات جۇمىستارىنىڭ اياسىندا الەۋمەتتىك جەلىلەردىڭ الەۋەتىن ءتيىمدى پايدالانىپ جاتىر. ول Facebook, Instagramm, Youtube جەلىلەرىندە تىكەلەي ەفيرگە شىعىپ, ءوز ۇستانىمدارىن كەڭىنەن ءتۇسىندىردى جانە كورەرمەندەردىڭ سۇراقتارىنا جاۋاپ بەردى. ونىڭ ىشىندە جاقىندا وتكەن تەلەدەبات جونىندەگى ويىن ايتىپ بەردى. سونداي-اق ءا.قوسانوۆ ءوز سوزىندە كوزقاراستارى شاعىن جانە ورتا بيزنەس وكىلدەرى تاراپىنان قولداۋ تاۋىپ جاتقانىن ايتىپ, باعدارلاماسىنداعى «باقۋاتتى ايماقتار – باقۋاتتى مەملەكەت» باعىتىنا توقتالدى. وندا «باسىم باعىتتا دامۋ, ءومىر ءسۇرۋ دەڭگەيىنىڭ جاقسارۋى, رۋحاني وركەندەۋ ءبىردى-ەكىلى ءىرى قالانىڭ عانا ەنشىسىندە بولماۋى ءتيىس. ەلدىڭ بارلىق ايماعىن تيىسىنشە تەڭ قارجىلاندىرۋ, ولاردىڭ دامۋىنا جاعداي جاساۋ, دامۋ دەڭگەيىندەگى الشاقتىقتى بىرتىندەپ جويۋ كەرەك. شىنايى بەلسەندى ءارى تەڭ قۇقىقتى جەرگىلىكتى ءوزىن-ءوزى باسقارۋدى دامىتۋ جانە اۋىل اۋدان, قالا اكىمدەرىن حالىقتىڭ تىكەلەي سايلاۋىنا كوشۋ قاجەت» دەپ جازىلعان.
* * *
« ۇلى دالا قىراندارى» رەسپۋبليكالىق قوزعالىسىنان پرەزيدەنتتىككە كانديدات سادىبەك تۇگەل اقمولا وبلىسى تسەلينوگراد اۋدانى قابانباي باتىر اۋىلىنداعى №41 مەكتەپتە اۋىل تۇرعىندارىمەن كەزدەستى.
«بۇل اۋىل ماعان وتە ىستىق. مۇندا قابانباي باتىر كەسەنەسىن سالۋعا, اۋىلدىڭ اتىن بەرۋگە قاتىستى كوپتەگەن يگى ءىستىڭ باسى-قاسىندا ءجۇردىم. بۇگىن بارلىعىڭىز جينالىپ وتىرسىزدار. اۋىلداعى ون مىڭعا جۋىق تۇرعىننىڭ بارلىعىمەن كەزدەسە الماساق تا, سىزدەر ارقىلى مەنىڭ سايلاۋالدى باعدارلامامنىڭ نەگىزگى باعىتتارى جەتەدى دەپ سەنەمىن. الدىمەن, وسى كەزدەسۋگە قاتىسىپ وتىرعان ۇستازدار, بولاشاعىمىزدىڭ تۇتقاسى سانالاتىن جاس ۇرپاق تاربيەسى سىزدەردىڭ قولدارىڭىزدا. مەنىڭ باعدارلامامنىڭ وزەگى – ءتىل, ءدىل, جەر جانە ار-نامىس ماسەلەسى. بۇل ءتورت تۇعىردى ءبىر-بىرىنەن ءبولىپ قاراۋعا بولمايدى. انا ءتىلىمىزدىڭ مارتەبەسىن بيىكتەتۋ ءۇشىن ءار كەزدەسۋىمدى مەملەكەتتىك تىلدە جۇرگىزىپ كەلەمىن. سايلاۋالدى باعدارلامامنىڭ ەڭ باسىندا دا وسى ماسەلە باستى ورىندا تۇر», دەدى س.تۇگەل.
سونىمەن قاتار كانديدات جاس وتباسىلاردىڭ الەۋمەتتىك جاعدايىن كوتەرۋگە, اۋىلدى كوركەيتۋگە, جۇمىسسىزدىقتى بولدىرماۋعا قاتىستى باعدارلاماسىندا اتاپ كورسەتىلگەن مىندەتتەرگە توقتالدى. بۇعان قوسا, سەنىم بىلدىرىلگەن ادامدار ب.ۇمبەتوۆا, ب.مۇحامەدراحيموۆا, ك.مولداحمەتوۆا ءسوز سويلەپ, « ۇلى دالا قىراندارى» ەلىمىز بويىنشا ۇلتتىق قۇندىلىقتار مەن ۇلتتىق سپورت تۇرلەرىن ناسيحاتتاپ وتىرعان ۇيىم ەكەندىگىن, حالىقارالىق سپورت باسەكەلەرىندە ەل نامىسىن قورعاپ, قازاقتىڭ اتىن الەمگە تانىتقان ۇلتتىق ات سپورتى تۇرلەرىنىڭ باستاۋىندا ۇلت جاناشىرى س.تۇگەلدىڭ تۇرعاندىعىن جەتكىزدى.
كەزدەسۋدەن سوڭ ناسيحاتشىلار توبى قابانباي باتىر كەسەنەسىندە جانە ونىڭ جانىندا ورنالاسقان پانتەوندا بولىپ, ەل قورعاعان باتىر مەن تاۋەلسىزدىكتىڭ تۇعىرىن بيىكتەتۋگە اتسالىسقان تۇلعالارعا دۇعا باعىشتادى.
دايىنداعان
ورىنبەك وتەمۇرات,
«Egemen Qazaqstan»
