بارشامىزدىڭ ماقساتىمىز ورتاق دەيدى اياگوز قالاسىنىڭ تۇرعىنى گۇلنارا ساليباەۆا
سارسەنبى, 24 ءساۋىر 2013 2:31
اياگوز اۋداندىق قازىناشىلىق مەملەكەتتىك مەكەمەسى باسقارماسىنىڭ باستىعى گۇلنارا نىعمەتوللاقىزىمەن ويدا جوق جەردە كەزدەستىك. ول ءوز ۇجىمىمەن بىرگە «قوزى كورپەش – بايان سۇلۋ» مادەنيەت ۇيىندە ءوتىپ جاتقان «مەيىرىم» اكتسياسىنا قاتىسۋعا كەلىپتى. 700 ورىندىق عيمارات ءىشى حالىققا لىق تولى. اياگوزدەگى جەتىم بالالاردى ايالاۋعا ارنالعان اكتسيادا مەكەمەلەر مەن شارۋا قوجالىقتارىنىڭ يەلەرى قايىرىمدىلىق تانىتىپ, قولدان كەلگەن كومەكتەرىن جاسادى.
سارسەنبى, 24 ءساۋىر 2013 2:31
اياگوز اۋداندىق قازىناشىلىق مەملەكەتتىك مەكەمەسى باسقارماسىنىڭ باستىعى گۇلنارا نىعمەتوللاقىزىمەن ويدا جوق جەردە كەزدەستىك. ول ءوز ۇجىمىمەن بىرگە «قوزى كورپەش – بايان سۇلۋ» مادەنيەت ۇيىندە ءوتىپ جاتقان «مەيىرىم» اكتسياسىنا قاتىسۋعا كەلىپتى. 700 ورىندىق عيمارات ءىشى حالىققا لىق تولى. اياگوزدەگى جەتىم بالالاردى ايالاۋعا ارنالعان اكتسيادا مەكەمەلەر مەن شارۋا قوجالىقتارىنىڭ يەلەرى قايىرىمدىلىق تانىتىپ, قولدان كەلگەن كومەكتەرىن جاسادى. تىپتى «اياگوز جول پچ-42» مەكەمەسىنىڭ باستىعى عازەز مۇقاجانوۆ مارتتىك تانىتىپ, جەتىمدەرگە ەكى بولمەلى ەكى پاتەردى سالىپ بەرەتىنىن ايتتى. ال گۇلنارا قارىنداسىمىز دا بۇل قايىرىمدىلىق شاراسىنان تىس قالماي, ۇجىممەن بىرگە قوماقتى كومەك جاسادى.
قايىرىمدىلىق شاراسى اياقتالعان سوڭ گۇلنارا نىعمەتوللاقىزىمەن اڭگىمەلەسۋدىڭ ءساتى ءتۇستى. جانىمىزدا اياگوز اۋدانى اكىمدىگىنىڭ ىشكى ساياسات ءبولىمىنىڭ باستىعى روزا قايىرباەۆا بار.
اياگوز اۋدانىندا 70 مىڭنان استام ادام تۇرادى. مۇنداعى جەرگىلىكتى تۇرعىنداردىڭ دەنى قازاقتار. گ.ساليباەۆا وسىنداعى №1 ورىس مەكتەبىن تامامداعان سوڭ, الماتىداعى نەسيە بەرۋ-ەسەپ تەحنيكۋمىنا وقۋعا تۇسەدى. بالا كەزىنەن ءوزى ۇناتاتىن وسىناۋ وقۋ ورنىن ويداعىداي اياقتاعان ول قىزمەت ەتە ءجۇرىپ ءبىلىمىن ودان ءارى جالعاستىرۋدى ماقسات تۇتادى.اقىرى تالاپتى قىز ارمان قالا الماتىداعى حالىق شارۋاشىلىعى ينستيتۋتىنىڭ ستۋدەنتى اتانادى. ونى اياقتاعان سوڭ اياگوزگە ورالادى.
ۇيعىر جىگىتى عابدۋلقايىم ساليباەۆ ەكەۋى ءبىرىن ءبىرى ۇناتىپ, تۇرمىس قۇرادى. قازىر التىن اسىقتاي ەكى بالالارى بار. ۇلى نيعمەت دەميرەل ۋنيۆەرسيتەتىن ۇزدىك بىتىرگەن, قازىر الماتىداعى ءىرى كومپانيادا ديرەكتور. ال قىزدارى فيرۋزا 7-سىنىپتا وقيدى, قۇربىلارى اراسىندا سىيلى, وقۋدا وزات.
– مىنەزى سالماقتى, ۇجىمىندا زور بەدەلگە يە گۇلنارا نىعمەتوللاقىزىنىڭ اتقارىپ وتىرعان جۇمىسى بۇكىل اۋداننىڭ تىنىس-تىرشىلىگىمەن تىكەلەي بايلانىستى, – دەيدى اۋدان اكىمىنىڭ ورىنباسارى سەيىلبەك ىسقاقوۆ. – اۋدان بويىنشا 96 مەكەمە بار ەكەنىن ەسكەرسەك, بۇكىل قارجىلىق وپەراتسيالار وسى جەردەن وتەدى. ۇجىمدا 20 ادام ەڭبەك ەتەدى. بارلىعى بىلىكتى دە ءبىلىمدى كادرلار. ونىڭ ۇستىنە, قازاق ءتىلىنىڭ مايىن تامىزاتىن, ماقال-ماتەلدى جاتقا سوعاتىن گ.ساليباەۆا مەملەكەتتىك ءتىلدىڭ وركەندەۋىنە دە ءوز ۇلەسىن قوسىپ كەلە جاتقان ىسكەر دە ونەگەلى جان.
مەكەمە ناۋرىز, باسقا دا مەملەكەتتىك مەيرامداردىڭ ءماندى دە مازمۇندى وتۋىنە نازار اۋدارادى. ونىڭ ۇستىنە قازىناشىلىق مەكەمە ءتۇرلى شارالارعا قاتىسىپ, قولدان كەلگەن كومەكتەرىن جاسايدى.
– قازاقتارمەن قويان-قولتىق ارالاسىپ, تۋىستارشا سىيلاسىپ كەتتىك, – دەيدى گۇلنارا نىعمەتوللاقىزى. – كورشىلەرىم بايان جانە ءمادينا اپايلارعا دەگەن قۇرمەتىم ەرەكشە. قازاق كورشىسى دەسە قوڭ ەتىن كەسىپ بەرۋدەن تايىنبايتىن جومارت حالىق قوي. تىعىز ارالاسىپ, ءبىر-ءبىرىمىزدى مەرەكە كۇندەرى قۇتتىقتاپ جاتامىز. مادەنيەت ءۇيى جانىنان قۇرىلعان قازاقستان حالقى اسسامبلەياسىنىڭ بولىمىندە ءتورايىم بولا ءجۇرىپ, اياگوزدەگى باسقا ۇلت وكىلدەرىنىڭ باسىن بىرىكتىرۋدە دە ءبىراز شارالاردى اتقاردىق. اۋدانداعى حالىقتىڭ 98 پايىزى قازاقتار, قالعان 2 پايىزى باسقا ۇلت وكىلدەرى. اۋدان اكىمى انۋاربەك مۇحتارحانوۆ اعامىزعا العىسىمىزدى ايتامىز, ۋاقىتى تاپشى بولسا دا, بىزبەن كەزدەسىپ, كومەگىن جاساپ تۇرادى.
گ.ساليباەۆانىڭ ايتۋىنشا, اۋدان ەكونوميكاسى ءوسىپ كەلەدى. اۋدانداعى بيۋدجەتتىڭ ورىندالۋىن, قارجىنى ۇتىمدى دا ورنى-ورنىمەن پايدالانۋدى باقىلايتىن مەكەمەنى باسقارعان سوڭ كىرىس-شىعىس نازاردا بولۋى كەرەك, دەيدى ول. بيىل «قازاقمىس» كورپوراتسياسى اقتوعاي كەن-بايىتۋ كومبيناتىنىڭ قۇرىلىسىن باستادى. وعان 750 ميلليون اقش دوللارى ءبولىندى. 2015-جىلدارى الىپ كاسىپورىن ىسكە قوسىلعان سوڭ اۋداننىڭ 1500-2000 ادامى جۇمىسپەن قامتاماسىز ەتىلمەك. التىن وندىرەتىن كەنىش پايدالانۋعا بەرىلەتىن مەرزىم دە الىس ەمەس. اياگوزدە وتكەن جىلى بىرنەشە مەكتەپ, بالاباقشالار ىسكە قوسىلدى. اۋدان ەكونوميكاسىنىڭ وركەندەۋى ادامداردىڭ ەرتەڭگى كۇنگە دەگەن سەنىمدەرىن ارتتىرا ءتۇسكەن.
– قازاقتارمەن كورشى بولعانىما قۋانامىن. ولار دوستىق پەن تاتۋلىققا ادال. قوناق كەلسە, ءتورىن ۇسىنادى. كۇيەۋىم ۇيعىر, ءوزىم تاتار بولسام دا بىردە-ءبىر رەت وگەيسىتكەندەرىن كورگەن ەمەسپىز. قايتا باۋىرلارىنا تارتىپ, قۇشاقتارىن جايادى. ەندەشە, ەلىمىزدىڭ گۇلدەنۋىنە ۇلەس قوسۋ – بارلىعىمىزدىڭ ماقساتىمىز, – دەپ جۇرەكجاردى لەبىزىن ءبىلدىردى گۇلنارا نىعمەتوللاقىزى.
وڭداسىن ەلۋباي,
«ەگەمەن قازاقستان».
شىعىس قازاقستان وبلىسى,
اياگوز اۋدانى.
