– اكادەميك ومىرزاق سۇلتانعازيندى دۇنيە جۇزىندەگى عىلىمي قوعامداستىقتاردىڭ بىلمەيتىنى كەمدە-كەم. ونىڭ ەڭبەكتەرىن الەمنىڭ ايگىلى ماتەماتيكتەرى جوعارى باعالادى. قوستاناي توپىراعىنان تۇلەگەن پەرزەنتتىڭ ماتەماتيكا عىلىمىنا قوسقان جاڭالىقتارى كوپ-اق, سونىڭ ەڭ ىرىلەرىنىڭ ءبىرى وسى عىلىمداعى وزەكتى پروبلەما – «بولتسماننىڭ تەورياسىنا» قوسقان ۇلەسى. شەتەلدىك جەتەكشى عالىم-ماتەماتيكتەر «سۇلتانعازين باعىتى» دەپ, ومەكەڭ اشقان بۇل جاڭالىققا ارنايى ايدار تاقتى, وسى ەڭبەككە سىلتەمە جاساپ وتىرادى. قوستاناي جەرىندەگى كىشكەنتاي قاراوبا اۋىلىندا تۋىپ, ەرجەتكەن عالىم الەمنىڭ كوپتەگەن ەلدەرىندەگى ۋنيۆەرسيتەتتەردە ءوزىنىڭ عىلىمي مەكتەبىن قۇردى. بۇل – ۇلتتىڭ ماقتانىشى, – دەدى كەنجەعالي ابەن ۇلى.
ومىرزاق سۇلتانعازين ءومىرىنىڭ سوڭعى 15-20 جىلىندا عارىش الەمىن زەرتتەدى. سونىڭ نەگىزىندە ەلىمىزدە عارىشتىق زەرتتەۋلەر ينستيتۋتى قۇرىلدى. عالىم ەلىمىزدىڭ تۇڭعىش عارىشكەرى توقتار ءاۋباكىروۆتىڭ جانە تالعات مۇساباەۆتىڭ ۇشۋ باعدارلاماسىن جاسادى. ولاردىڭ باعدارلامالىق اتقارعان جۇمىسى دۇنيەجۇزىلىك عالىمدار اراسىندا جوعارى باعالاندى.
ءوز ەسىمىن يەلەنگەن ءبىلىم ورداسىنان بىلىمگە سۋسىنداعان جاس ۇرپاققا الداعى كۇنگە دەگەن سەنىممەن كۇلىمسىرەي قاراپ وتىرعان ءومىرزاق ماحمۇت ۇلىنىڭ ءمۇسىنىن بەلگىلى ءمۇسىنشى قايرات سۇرانشى سومدادى. عالىمنىڭ ءمۇسىنى قوستاناي قالاسىنىڭ كوركىنە كورىك قوساتىن ەسكەرتكىشتەر قاتارىنان ورىن الىپ قانا قويمايدى, ەڭبەكقورلىق پەن ادامگەرشىلىكتى, زيالىلىقتى, وتاندى ءسۇيۋدى ءبىلىم قۋعان جاستار مەن جالپى جۇرتشىلىقتىڭ ەسىنە ءسات سايىن سالىپ تۇرعانداي اسەر بەرەدى.
قوستاناي
