سايلاۋ • 29 مامىر, 2019

الەۋمەتتىك ماسەلەلەر – باستى نازاردا

3740 رەت
كورسەتىلدى
14 مين
وقۋ ءۇشىن

ەلىمىزدە سايلاۋالدى ۇگىت-ناسيحات جۇمىستارىنىڭ اياسىندا پرەزيدەنتتىككە كانديداتتاردىڭ باعدارلامالارى جان-جاقتى ءتۇسىندىرىلىپ جاتىر. ونىڭ ىشىندە كورىنىس تاپقان ۇستانىمداردىڭ دەنى حالىقتىڭ الەۋمەتتىك ماسەلەلەرىن شەشۋگە باعىتتالعان.

الەۋمەتتىك ماسەلەلەر –  باستى نازاردا

«اق جول» دەموكراتيالىق پارتياسى ۇسىنعان پرەزيدەنتتىككە كانديدات دانيا ەسپاەۆا مەن سايلاۋالدى رەسپۋبليكالىق شتاب جەتەكشىسى ازات پەرۋاشەۆ نۇر-سۇلتان قالاسىن­داعى گۋمانيتارلىق-زاڭ كوللەدجىندە جاس سايلاۋشىلارمەن كەزدەستى. كول­لەدجدە زاڭگەر, اۋدارماشى, مۇعالىم ماماندىقتارى بويىنشا شامامەن 500 ستۋدەنت ءتالىم الادى. وقۋ ورنى بىل­تىردان باستاپ باستاۋىش سىنىپ مۇعالىمدەرى مەن بالاباقشا ءتار­بيە­شىلەرىن وقىتا باستاعان. وعان مەم­لەكەت 200-دەي شاكىرتاقى بولگەن. كان­ديداتقا كادر جەتىسپەۋشىلىگىن شەشۋ ءۇشىن شاكىرتاقى سانىن 270-كە ارت­تىرۋ كوزدەلگەنى ايتىلدى. ستۋدەن­ت­تەر اراسىندا باسقا قالادان كەلىپ وقي­­تىندار سانى كوپ بولعانىمەن, حوس­تەل­دەگى تەگىن ورىندار سانى 30 ادامعا عانا شاق­تالعان ەكەن. الداعى جىلدارى ءوڭىر­لەردەن كەلگەندەر ءۇشىن جاتاقحانا سالۋ جوسپارلانىپ وتىر.

جيىندا د.ەسپاەۆا ءوزىنىڭ سايلاۋال­دى باعدارلاماسىن كەڭىنەن تانىس­تىردى. جاستار جاعى تۇرعىن ۇيمەن قام­تاماسىز ەتۋ, جولاقىنىڭ قىم­بات­تىعى, جۇمىسپەن قامتاماسىز ەتۋ سياقتى وزدەرىن مازالاعان ماسەلەلەرىن جەتكىزدى. «ماعان جاستاردىڭ ويلارىن اشىق جەتكىزەتىنى ۇنادى. ساياسي ساۋاتتى ەكەندەرى كورىنىپ تۇر. ولار مەنەن نە سەبەپتى سايلاۋعا قاتىسىپ وتىرعانىمدى جانە ايەل ادامنىڭ پرەزيدەنت بولۋى قانشالىقتى ءمۇم­كىن ەكە­نىن سۇرادى. ارينە وعان مەنىڭ جاۋا­بىم دايىن. بىراق جاستاردىڭ, ستۋدەنت­تەردىڭ ەلدەگى ساياسي احۋالعا, كەلە جاتقان پرەزيدەنتتىك سايلاۋعا كوڭىل ءبولۋى – قۋانتارلىق», دەدى د.ەسپاەۆا.

«اق جول» پارتياسىنىڭ ۇمىتكەرى بولاشاق زاڭگەرلەرگە زاڭگەرلىك ما­مان­دىققا قوسا ەكونوميكالىق ءبىلىم الۋعا كەڭەس بەردى. ستۋدەنتتەر مەن وقىتۋ­شىلاردى باعدارلاماداعى بيزنەستى قولداۋ باستامالارى قىزىقتىردى. وندا كانديدات ءوز ءىسىن جاڭا باستاعان كاسىپكەرلەرگە قوسىمشا قۇن سالىعى مولشەرلەمەسىن تومەندەتىپ, نەسيەنى قولجەتىمدى ەتۋدى ۇسىنىپ وتىر. د.ەس­پاەۆانىڭ رەسپۋبليكالىق شتابى جا­قىن ارادا سولتۇستىك قازاقستان جانە پاۆ­لودار وبلىستارىنا جول تارتپاق.


* * *

«اۋىل» حالىقتىق-دەموكراتيالىق پاتريوتتىق پارتياسىنان پرەزي­دەنت­تىككە كانديدات تولەۋتاي راقىم­بەكوۆ باتىس قازاقستان وبلىسىنا ات­باسىن بۇرىپ, وڭىردەگى شارۋا قوجا­لىق­تارىن ارالادى. كانديدات اۋىل شارۋاشىلىعى سالاسىندا ەڭبەك ەتىپ جۇرگەن ماماندارمەن كەزدەسىپ, سايلاۋالدى باعدارلاماسىن تانىستىردى.

تەرەكتى اۋدانىنا قاراستى «اقاس» شارۋا قوجالىعىندا 1400-دەن اسا اقباس سيىر بار. بۇل – جەرگىلىكتى كلي­ماتقا ابدەن بەيىمدەلگەن ەتتى تۇقىم. ياعني, مۇنداعى ءىرى قارالاردىڭ ورتاشا سالماعى 550 كيلو تارتادى. ەش­قان­داي حيميا قولدانىلمايدى. جا­يى­لىمدا ءجۇرىپ سالماق جينايدى. پرە­زي­دەنتتىكتەن ۇمىتكەر ت.راقىمبەكوۆ قىرۋار قارجىعا شەتتەن مال ساتىپ العانشا, وسى باعىتتاعى شارۋا قوجالىقتارىنا قولداۋدى كۇشەيتۋ كەرەكتىگىن ءجيى ايتادى. «وسىنداي شارۋا قوجالىقتارى اينالاداعى ەلدى مەكەن تۇرعىندارىن تۇراقتى جۇمىسپەن قامتىپ, اۋىل ءتۇتىنىن وشىرمەي وتىر. بىراق سونىڭ وزىندە ەكى قولعا ءبىر كۇرەك تاپپاي, قالاعا قاراي سابىلىپ جات­قان جاستار كوپ. سوندىقتان اۋىلدىڭ تىنىس-تىرشىلىگىن دامىتۋعا تىڭ سەرپىن كەرەك. قازىر ەلىمىزدەگى 7 ميلليوننان اسا ادام اۋىلدىق جەرلەردە تۇرىپ جا­تىر. ولاردىڭ ماسەلەسىنە بەيجاي قاراۋ­عا بولمايدى. كەرىسىنشە, اۋىل شا­رۋا­شىلىعىن قولداۋ ارقىلى ەل ەكو­نو­ميكاسىن ىلگەرىلەتۋ كەرەك», دەدى كانديدات.

كەزدەسۋ بارىسىندا كانديدات اۋىل تۇرعىندارىنىڭ تۇرمىس-تىرشىلىگىمەن ەتەنە تانىسىپ, شوپانداردىڭ الەۋ­مەتتىك جاعدايىن جاقسارتۋ, شوپان بالا­لارىنا تەرەڭ ءبىلىم بەرەتىن مەكتەپ-ينتەر­ناتتار اشۋ, شوپان ايەلدەرىنە اتاۋلى الەۋمەتتىك كومەكتەن بولەك, لايىقتى ەڭبەكاقى تولەۋ ماسەلەلەرى كوتەرىلدى. ت.راقىمبەكوۆ مالدى باعىپ, قاراي بىلەتىن ازاماتتارعا ءتيىستى جاعداي جاسايتىن بولساق, ءىرى قارانىڭ باسى ءوسىپ قانا قويماي, وسى باعىتتا ەلىمىزدە ەڭبەك ونىمدىلىگى ارتاتىنىن ايتادى. مال باسىنىڭ ارتۋى – سول اۋىلدىڭ, اۋدان­نىڭ, وبلىستىڭ, اينالىپ كەلگەندە تۇتاس ەل ەكونوميكاسىنىڭ قارقىندى دامۋىنا جارقىن جول اشادى.


* * *

كاسىپوداقتار فەدەراتسياسى اتىنان پرەزيدەنتتىك سايلاۋعا ءتۇسىپ جاتقان امان­گەلدى تاسپيحوۆتىڭ رەسپۋب­ليكا­لىق سايلاۋالدى شتابىنىڭ وكىل­دەرى تۇركىستان وبلىسىنا جۇمىس ساپارى­مەن باردى. شتابتىڭ تەڭ-جەتەك­شىسى, كاسىپوداقتار فەدەراتسياسى توراعا­سىنىڭ ورىنباسارى ساتىبالدى ءداۋ­لەت­الين باستاعان دەلەگاتسيا ۇگىت-ناسي­حات شارالارىن وبلىستىڭ جاڭا ورتا­لىعى تۇركىستان قالاسىنان باستادى.

كيەلى شاھارداعى جەرگىلىكتى حالىق­تى تىرشىلىك نارىمەن قامتىپ وتىر­عان «تۇركىستان-سۋ» مەملەكەتتىك كاسىپور­نىن­دا سايلاۋالدى كەزدەسۋ ءوتتى. جيىن­عا 85 ادام قاتىستى. باسقوسۋدا ءسوز ءسوي­لەگەن ايماقتىق شتاب باسشىسى بەرىك بەكجانوۆ ەلىمىزدە وتەتىن ساي­لاۋ­دىڭ ماڭىزدىلىعىنا توقتالدى. تاعدىرشەشتى كەزەڭدە ەنجار قالماي, بەلسەندى بولىپ, تۇرعىنداردى سايلاۋ­دا ءوز تاڭداۋلارىن جاساۋعا شاقىردى.

ال س.داۋلەتالين جينالعان قاۋىم­عا ابىرويلى ۇيىم كاسىپوداق بىرلەس­تىكتەرىنىڭ ءرولىن, قىزمەتىن بايىپ­تاپ ءتۇسىندىردى. ەڭبەككەرلەردىڭ ءمۇد­دەسى مەن قۇقىعىن قورعايتىن ما­ڭىز­دى قوعامدىق ينستيتۋتتىڭ ات­قارىپ جاتقان قىرۋار جۇمىسىنا توقتالدى. كانديدات ا.تاسپيحوۆتىڭ ەڭبەك جولىن, جەتىستىكتەرىن بايانداپ بەردى. سونداي-اق ۇمىتكەردىڭ سايلاۋال­دى تۇعىر­ناماسىنداعى جۇمىس بەرۋ­شى­لەر­دىڭ جاۋاپكەرشىلىگىن ارتتىرۋعا, ەت­كەن ەڭبەككە لايىقتى جالاقىنىڭ تولەنۋىنە, جۇمىسكەرلەرگە قاۋىپسىز جاعداي جاساۋعا قاتىستى وي-پىكىرلەرىن ورتاعا سالدى. جيىندا «تۇركىستان-سۋ» مەملەكەتتىك كاسىپورنىنىڭ قىزمەتكەرى سەيىلبەك دايراباي شتاب مۇشەلەرىنە العىسىن ايتىپ, كاسىپوداق تۋرالى وڭ كوزقاراستا ەكەندەرىن جەتكىزدى.

سونىمەن قاتار رەسپۋبليكالىق سايلاۋالدى شتابى بۇكىل تۇركى جۇرتىنىڭ اۋليەسى قوجا احمەت ياساۋي كەسە­نەسى­نە بارىپ, تاعزىم جاسادى. سەنىم ءبىلدى­رىل­گەن ادامدار «كەلەشەك» جاستار كەڭەسى مۇشەلەرىمەن جانە ەرىكتىلەرمەن كەز­دەسىپ, ەمەن-جارقىن سۇحبات قۇردى. ساي­لاۋالدى ۇگىت-ناسيحات شارا­لارى­نىڭ قاق ورتاسىندا ءجۇرىپ, بەلسەندىلىك تانىتىپ وتىرعان قىز-جىگىتتەرگە العىس ءبىلدىردى.


* * *

قازاقستان كوممۋنيستىك حالىق پارتياسىنان پرەزيدەنتتىككە كانديدات جامبىل احمەتبەكوۆتىڭ جامبىل وبلىستىق سايلاۋالدى شتابى تالاس اۋدانىنا قاراستى قاراتاۋ كەنتىندەگى مادەنيەت ۇيىندە ەڭبەك ۇجىمدارىمەن كەزدەستى.

جيىندا كانديداتتىڭ وبلىستىق شتابىنىڭ جەتەكشىسى جارىلقاسىن نۇراليەۆ پارتيانىڭ ينتەرناتسيوناليزم مەن الەۋمەتتىك ادىلدىك سياقتى باستى ۇستانىمدارىنا توقتالدى. ول قوعامنىڭ دامۋى ەتنوستار اراسىنداعى بەيبىتشىلىك پەن كەلىسىمگە بايلانىستى ەكەنىن ايتىپ, سايلاۋالدى تۇعىرنامانى جان-جاقتى تانىستىرىپ شىقتى. «ادال ەڭبەك قوعام مۇددەسى ءۇشىن!» دەپ ۇرانداتقان كوممۋنيستەردىڭ ادىلەتسىزدىككە قارسى بەلسەندى كۇرەس جۇرگىزەتىنى ايتىلدى.

سايلاۋشىلار پرەزيدەنتتىكتەن ۇمىتكەردىڭ سايلاۋالدى تۇعىرنا­ماسىن­­دا كورسەتىلگەن باعىتتاردى جاق­سى قابىلداپ, كوكەيلەرىندە جۇرگەن سۇراقتارىن قويدى. ولاردىڭ دەنى جۇمىسسىزدىق, تومەن جالاقى, قالا­داعى سۋ ماسەلەسىنە قاتىستى بولدى. سوڭىندا ناسيحاتشىلار توبى كوپ­شىلىكتى 9 ماۋسىم كۇنى وتەتىن سايلاۋعا بەل­سەنە قاتىسىپ, لايىقتى ۇمىتكەرگە داۋىس بەرۋگە شاقىردى.

سونىمەن قاتار ەلىمىزدىڭ باسقا وڭىرلەرىندە ج.احمەتبەكوۆتىڭ كاندي­داتۋراسىن قولداۋعا ۇندەگەن ءتۇرلى ءىس-شارا ۇيىمداستىرىلىپ جاتىر. سونىڭ ءبىرى نۇر-سۇلتان قالا­سىندا ەلور­دالىق شتابتىڭ جەتەك­شىسى نۇر­داۋ­لەت ورازحانوۆتىڭ گۋماني­تارلىق كولل­ەدج­دىڭ پروفەسسورلىق-وقىتۋ­شىلار قۇرا­مىمەن كەزدەسۋى بولدى. وندا جاستار تاربيەسىنە ينتەر­نەتتىڭ كەيبىر كونتەنتى كەرى اسەر ەتەتىنى, بۇل ماسەلەنى شەشۋدە ءبىلىم بەرۋ سالاسىن دامىتۋ ماڭىزدى ءرول اتقاراتىندىعى ايتىلىپ, كەدەيلىك جالاقىنىڭ تومەندىگىمەن بايلانىس­تى ەكەنى ءسوز بولدى. سونداي-اق نۇر-سۇلتان قالاسىندا ەرىكتىلەر توبى قالا تۇرعىندارىنا ۇگىت-ناسيحات ماتەريالدارىن تاراتتى. ولار ءبىر كۇندە كانديدات ۇستانىمدارى باسىلعان 3500-دەن اسا پاراقشانى ۇلەستىردى.


* * *

Nur Otan پارتياسى ۇسىنعان پرەزي­دەنتتىككە كانديدات قاسىم-جومارت توقاەۆتىڭ رەسپۋبليكالىق قوعامدىق شتابى شىمكەنت قالاسىنا كەلدى. قالا اكتيۆىمەن, شاھار تۇرعىن­دارىمەن وتكەن العاشقى كەزدەسۋدە شتاب مۇشەلەرى شىمكەنت قالاسىنىڭ دامۋ الەۋەتىنە توقتالا كەلە, ءارى قاراي وركەندەۋ باعىتىنداعى ق.توقاەۆتىڭ باعدارلاماسىنداعى باسىمدىقتار جايىن ءسوز ەتتى.

«تاۋەلسىزدىك جىلدارىندا شىم­كەنتتىڭ دامۋ قارقىنى جوعارى بولدى. ەندى تەك قازاقستانداعى عانا ەمەس, بۇكىل ورتالىق ازيا مەن تمد ايماعىنداعى ەڭ ءىرى قالاعا اينالادى دەپ سەنەمىز. ول ءۇشىن كانديداتىمىزدىڭ باعدارلاماسىندا ايتىلعانداي ءبىر ورىندا تۇرماي ورلەۋ قاجەت. ال ورلەۋ اۋىلدى جەرلەردى تازا اۋىز سۋمەن قامتاماسىز ەتۋ, جولداردى جوندەۋ, ءۇش اۋىسىمدى مەكتەپتەردى زاماناۋي ءبىلىم وشاقتارىمەن اۋىستىرۋ, اپاتتى جاعدايداعى مەكتەپتەردى جابۋ سياقتى ناقتى ىستەردەن باستالادى», دەدى شتاب جەتەكشىسى م.اشىمباەۆ.

سونداي-اق كەزدەسۋدە ءماجىلىس دەپۋتاتى, حالىق قاھارمانى ب.ەرتاەۆ, تەلەجۇرگىزۋشى د.نۇرجىگىت, بەلگىلى قالامگەر ن.ورازالين, «ەگەمەن قازاق­ستان» رگ» اق پرەزيدەنتى د.قىدىر­الى, قوعام قايراتكەرلەرى ق.سۇل­تانوۆ پەن ز.تۇرىسبەكوۆ, «دوس­تىق» قاۋىم­­داستىعىنىڭ توراعا­سى ي.حا­كي­م­جانوۆ ءسوز الىپ, كاندي­دات­­تىڭ باع­دار­­لاماسىنداعى نەگىزگى باسىم­دىق­تار مەن حالىقتىڭ الەۋمەتتىك جاع­دايىن جاقسارتۋعا باعىتتالعان ناقتى ۇس­تانىمدارعا نازار اۋداردى.

بۇدان كەيىن ناسيحاتشىلار توبى «كورمە» ورتالىعىندا شىمكەنت قالا­سىنىڭ جاستارىمەن كەزدەستى. بەل­سەندى جاستاردان قۇرالعان «Team Qazaqstan» فورۋمىنا 3 مىڭنان اسا جاس قاتىستى. جينالعان جاستاردىڭ الدىندا ءسوز الىپ, ەلدىڭ ەرتەڭىنە بەيجاي قاراماي, سايلاۋعا شاقىرعانداردىڭ قاتارىندا ق.توقاەۆتىڭ جاقتاستارى ءمادينا سادۋاقاسوۆا, ايقىن تولەپ­بەرگەن, «الاش ۇلى» توبىنىڭ ءانشى­لەرى, بەلگىلى بلوگەرلەر اسحات سادىر­باي, ەرعازى ءازىمحان ۇلى جانە تانىمال اكتريسا قۇرالاي اناربەكوۆا, تەلە­جۇرگىزۋشى داۋلەت بيجانوۆ سياقتى بەلسەندى جاس­تار بولدى.

* * *

«ۇلت تاعدىرى» ۇلتتىق-پات­ريوتتىق قوزعالىسى اتىنان پرەزي­دەنتتىككە كانديدات رەتىندە ءتىر­كەلگەن ءامىرجان قوسانوۆتىڭ سەنىم ءبىل­دىرىلگەن ادام­­دارى اتى­راۋ قالا­سىنداعى «اقجەل­كەن» شىعار­ما­شىلىق ورتالى­عى­نىڭ قىزمەت­كەر­لەرىمەن كەزدەستى. جيىن­­دا كاندي­داتتىڭ وبلىستىق سايل­اۋال­دى شتا­بى­نىڭ جەتەكشىسى عالىم­جان وتەباەۆ ءسوز تىزگىنىن ۇستادى. ناسي­حات­شىلار توبى سايلاۋال­دى تۇعىر­نامانى كەڭىنەن تانىستى­رىپ, كانديداتتىڭ ءتۇرلى ماسەلەگە كوز­قاراسى جايلى بايانداپ بەردى. ال قاتى­سۋ­شىلار بولسا, وزدەرىن تولعان­دىر­عان سۇراقتارىن قويىپ, وعان تۇششىم­دى جاۋاپ الدى.

ءوڭىر-وڭىردە كانديداتتىڭ باستى ۇستانىمدارى ەگجەي-تەگجەيلى ءتۇسىن­دىرىلىپ جاتىر. ونىڭ باعدارلا­ماسىن­داعى «جەمقورلىققا جول جوق» اتتى تاراۋىندا جەمقورلىقپەن ىمىراسىز كۇرەس حالىقارالىق ستاندارتتار بويىنشا جۇرگىزىلۋى قاجەت ەكەنى, جەمقورلاردىڭ مۇلكىن تاركىلەپ, ولارعا راقىمشىلىق قولدانباۋ, ءومىر بويى مەملەكەتتىك قىزمەتكە جولاتپاۋ كەرەك ەكەنى ايتىلعان.

سونىمەن قاتار ەلوردادا ءا.قو­سانوۆ­تىڭ رەسپۋبليكالىق سا­ي­لاۋال­دى شتابىندا سايلاۋ كۇنى ۋچاس­كە­لەردە داۋىس بەرۋ پروتسەسىن قادا­عا­لايتىن بايقاۋشىلار ءۇشىن سەمينار وتكىزىلدى. شارادا دوس كوشىم بايقاۋشىلاردىڭ قۇقىقتارى مەن مىندەتتەرى, سايلاۋ كەزىندە ورىن الۋى ىقتيمال ءتۇرلى جاعدايلارداعى ارە­كەت­تەرى جايلى ءتۇسىندىردى. قاتىسۋ­شىلار قىزىعۋشىلىق تانىتقان تاقىرىپ­تارىن كوتەرىپ, بارلىق وزەكتى سۇراقتار توڭىرەگىندە مازمۇندى پىكىر الماستى.

ال «امانات» ازاماتتىق پلاتفورماسى تاۋەلسىز بايقاۋشىلار بىرلەستىگىنىڭ بەلسەندىلەرى پرەزيدەنتتىكتەن ۇمىتكەر ءا.قوسانوۆتىڭ قاراعاندى وبلىس­تىق سايلاۋالدى شتابىنا باردى. قازاق­ستانداعى كەزەكتەن تىس پرەزيدەنتتىك ساي­لاۋعا بايقاۋ جۇرگىزۋ جۇمىسىندا تاجىريبە الماسۋ ماقساتىندا ۇيىم وكىلدەرى شتابتىڭ جۇمىسىمەن تانىس­تى. تاراپتار سايلاۋالدى كەزەڭدە جەمىستى ىنتىماقتاستىقتى ودان ءارى جالعاستىرۋعا كەلىستى.


* * *

« ۇلى دالا قىراندارى» رەسپۋبليكالىق قوزعالىسىنان پرەزي­دەنتتىككە كانديدات سادىبەك تۇگەلدى قول­داۋعا ارنالعان ۇگىت-ناسيحات جۇ­مىس­تارىنىڭ اياسىندا جەزقازعاندا كونتسەرت ءوتتى. س.قوجامقۇلوۆ اتىنداعى مۋزىكا­لىق دراما تەاتردا وتكەن ءىس-شارادا مىستى شاھارعا ارنايى اتباسىن بۇرعان سايلاۋالدى قوعامدىق شتاب وكىلدەرى جينالعان قاۋىمعا كاندي­دات­تىڭ باعدارلاماسىن جان-جاقتى ءتۇسىندىردى.

«جەرىنىڭ استى كەنگە تولى, ءۇستى ونەرلى جاندارمەن ەرەكشەلەنەتىن, قاداسىن قانىش ساتباەۆتاي xالقى­مىز­دىڭ ءبىرتۋار عالىمى قاداعان جەز­قاز­عان قالاسىنا بيىل 65 جىل تول­ماق. الدىمىزدا ەل ومىرىندەگى ەرەك­شە ماڭىزدى ساياسي وقيعا تۇر. وسى دوداعا ءتۇسىپ وتىرعان قوعام قايرات­كەرى, جازۋشى س.تۇگەلدىڭ سايلاۋالدى باع­دار­لاماسىنداعى ءتورت تۇعىر – ءتىل, ءدىل, جەر, ار-نامىس ءبىر-بىرىنەن اجىراماس ۇلتتىق قۇندىلىقتار. ونى جاس ۇرپاقتىڭ بويىنا ءسىڭىرۋدىڭ باس­تى باعىتتارى باعدارلامادا ايقىن كورسەتىلگەن. ادىلدىكتى تۋ ەتىپ, سىبايلاس جەمقورلىققا جول بەر­مەۋ, جۇ­مىس­سىزدىقتى جويىپ, جاس­تار­دىڭ الەۋمەتتىك جاعدايىن جاق­سارتۋ, دەمو­گرافياعا كوڭىل ءبولۋ كاندي­دات­تىڭ باسا نازار اۋداراتىن باسىم باعىت­تارى», دەدى كانديداتتىڭ سە­نىم ءبىل­دىرىلگەن ادامى, جۋرناليست بازارگۇل ۇمبەتوۆا.

قازاق راديوسىنىڭ ارداگەرى, ديكتور كۇلاش مولداxمەتوۆا پرەزيدەنتتىك­تەن ۇمىتكەردىڭ مەملەكەتتىك ءتىلدىڭ ءمار­تە­بەسىن بيىكتەتۋدەگى ەرەكشە ەڭبەگى جاي­لى ايتىپ, ءتىل قۇدىرەتى جايلى كاكىم­بەك سالىقوۆتىڭ ولەڭىن وقىپ بەردى. ال كورەرمەندەر اراسىنان ءسوز العان جەزقازعان يندۋستريالىق-گۋما­نيتار­لىق كوللەدجىنىڭ وقىتۋ­شى­سى اقگۇلشە يبراەۆا قوعام قايرات­كەرى س.تۇگەلدىڭ باعدارلاماسىن جۇرە­گىنە جاقىن قابىلداعانىن تىلگە تيەك ەتتى. كونتسەرتتە ت.قالماعامبەتوۆ اتىنداعى فيلارمونيا انشىلەرى ارداق مۇقىشەۆ, زاۋرەش وماروۆا, ءلايلا بەك­­با­لاقوۆا, اسxات ساعىندىقوۆ, زاۋرە ەلباەۆا, پەريزات نەسىپباەۆا جانە ايزادا ابدىxالىقوۆا ونەر كورسەتتى.

قر سايلاۋ ۋچاسكەلەرىنەن تىس جەردە داۋىس بەرۋ
1. قازاقستاننىڭ بارلىق ازامات داۋىس بەرۋ كۇنى سايلاۋ ۋچاسكەسىنە كەلۋگە مۇمكىندىكتەرى بولماعان جاعدايدا – سايلاۋشىلار كەلەسى سەبەپتەر بويىنشا ۋچاسكەدەن تىس جەردە داۋىس بەرە الادى: دەنساۋلىق جاعدايىنا; وتباسىنىڭ سىرقات مۇشەسىنە كۇتىم جاساۋ سەبەبىنە; شالعايداعى جانە قاتىناسۋ قيىن اۋدانداردا بولۋىنا بايلانىستى.
2. سايلاۋشى تۇرعان جەرى بويىنشا داۋىس بەرۋ تۋرالى جازباشا ءوتىنىشىن بەرە الادى. ءوتىنىش بەرۋدىڭ سوڭعى مەرزىمى – جەرگىلىكتى ۋاقىت بويىنشا 9 ماۋسىم, ساعات 12:00.
3. ۋچاسكەگە ءوتىنىش كەلىپ تۇسكەن جاعدايدا, سايلاۋ كوميسسياسىنىڭ توراعاسى سايلاۋشىلار تىزىمىنە ءتيىستى بەلگى قويادى.
4. كوميسسيا مۇشەلەرى بايقاۋشىلاردى, سەنىم بىلدىرىلگەن ادامداردى جانە باق وكىلدەرىن سايلاۋ ۋچاسكەسىنەن تىس جەردە داۋىس بەرۋ تۋرالى حاباردار ەتەدى. كوميسسيا مۇشەلەرىنىڭ شىعۋ كەزىندە بايقاۋشىلار مەن كانديداتتاردىڭ سەنىم بىلدىرىلگەن ادامدارى ىلەسىپ جۇرۋگە قۇقىلى.
5. ءۇي-جايدان تىس جەردە داۋىس بەرۋگە ارنالعان تاسىمالداناتىن جاشىككە سايلاۋ كوميسسياسىنىڭ ەكى مۇشەسى ىلەسىپ جۇرەدى, ولار ءب ۇلىنۋى مۇمكىن ەكەندىگى ەسكەرىلە وتىرىپ, بيۋللەتەندەردىڭ قاجەتتى مولشەرىمەن قامتاماسىز ەتىلۋگە ءتيىس.
6. بيۋللەتەن سايلاۋشىعا جازباشا وتىنىشىمەن جەكە باسىن كۋالاندىراتىن قۇجات نەگىزىندە بەرىلەدى.
7. بيۋللەتەن بەرگەن كوميسسيا مۇشەسى وعان ءوز قولىن قويادى, سونداي-اق سايلاۋشىنىڭ وتىنىشىنە قول قويادى. سايلاۋشىنىڭ داۋىس بەرۋ قۇپياسى مىندەتتى تۇردە ساقتالادى.
8. سايلاۋشىلاردىڭ بيۋللەتەندەرى بار تاسىمالداناتىن ۋرنا اۋماقتىق سايلاۋ ۋچاسكەسىنە قايتارىلادى.



دايىنداعاندار 

ورىنبەك وتەمۇرات,

نۇرشات توكەن,

«Egemen Qazaqstan»


سوڭعى جاڭالىقتار