تابيعاتتىڭ تامىلجىعان ديدارىنا كىرەۋكە تۇسكەلى, ات تۇياعى جەتەتىن جەردەگى قوعالى كولدەر قورىسقا اينالعالى قاشان؟.. وسىنشاما كولدىڭ 328-ىندە عانا بالىق ورىستەيدى. قالعانى تايىزدانىپ, لايلانعان. كوپشىلىگى تابيعاتتى اياۋدى بىلمەيتىن بەزبۇيرەكتىكتەن. ماسەلەن, وبلىس ورتالىعىنان تاياقتاستام جەردەگى شاعالالى سۋ قويماسى جاز بويى قالا تۇرعىندارىنىڭ سۋعا ءتۇسىپ ماسايراپ, قارا قارعانىڭ ميى قاينايتىن ىستىقتا جاندارى سايا تاۋىپ شومىلىپ, بالىق اۋلايتىن جەرى. نەگىزىنەن بۇل جەردەن وبلىس ورتالىعىنىڭ تۇرعىندارى سۋ ءىشىپ وتىر. ايتسە دە, ەرەجە اتاۋلىنى ەسىنەن شىعارىپ, كولىك جۋاتىندار دا, يتتەرىن شومىلدىراتىندار دا كەزدەسەدى.
تازالىقتىڭ ءجونى وسى بولسا, سۋ قويماسىنداعى بالىققا كەلەتىن قاۋىپ-قاتەر دە ادام قولىمەن جاسالىپ وتىر. ماسەلەن, اۋەسقوي بالىقشىلار باقىلاۋشىلاردىڭ كوزدەرىن الا بەرىپ, قۇلاش-قۇلاش قىتاي اۋلارىمەن سۇزەدى. قورىقشىنىڭ كوزىنە ءتۇسىپ قالىپ, قاشىپ جۇرگەندە اۋلارىن دا تاستاپ كەتەدى ەكەن. وبلىستىق ورمان شارۋاشىلىعى جانە جانۋارلار دۇنيەسى اۋماقتىق ينسپەكتسياسى وكىلدەرى وسىلاي دەپ وتىر.
تاياۋدا «تازا سۋ قويمالارى» اكتسياسى باستالدى. بۇل شارۋا ءبىر اي بويى جۇرگىزىلمەكشى. تابيعات جاناشىرلارى ەڭ الدىمەن ىزگىلىكتى ءىسىن شاعالالى سۋ قويماسىنان باستادى.
– مۇنداي اكتسيانى جىل سايىن جۇرگىزەمىز. قالا تۇرعىندارىنا دا ءوزدەرى يگىلىگىن كورىپ وتىرعان تابيعاتتى كۇتە ءبىلۋى كەرەگىن ايتىپ جاتىرمىز,–دەيدى ورمان شارۋاشىلىعى جانە جانۋارلار ءدۇنيەسى ءبولىمىنىڭ جەتەكشىسى مۇرات شالاباي, – كۇزگە دەيىن جاعالاۋ كۇل-قوقىسقا, ىدىس-اياققا تولىپ كەتەدى.
جاعالاۋعا ءار 500 مەتر سايىن قوقىس جاشىگىن ورناتقان. ايىنا ەكى رەت تازارتىپ تۇرادى. سۋدا قالعان اۋدى جيناستىرۋدىڭ دا امالىن تاپقان. موتورلى قايىققا سۋ ءىشىندەگى اۋلاردى ءىلىپ الاتىن ارنايى قۇرىلعى ورناتىلىپتى. ۇزاق ۋاقىت سۋ ىشىندە تۇرىپ ءىرىپ-ءشىرىگەن اۋلاردى جاعالاۋعا شىعارىپ, ورتەپ جىبەرەدى ەكەن.
شاعالالى سۋ قويماسىن تازارتىپ بولعان سوڭ سىلەتى مەن استانا سۋ قويمالارىندا دا ءدال وسىنداي اكتسيا قولعا الىنباق.
اقمولا وبلىسى
