ايتۋلى دوداعا ايەلدەر اراسىنداعى ەلىمىزدىڭ ەڭ ۇزدىك جۇبى – تاتيانا ماشكوۆا مەن يرينا تسيمبالوۆا قاتىسقان جوق. سول سەبەپتى دە التىن تۇعىر ءۇشىن تارتىس «الماتى» مەن «كاسپي» (اقتاۋ) ۆولەيبول كلۋبى وكىلدەرى اراسىندا ءوتتى. ايتۋلى كوماندالاردىڭ قوس جۇبى جارتىلاي فينالعا دەيىن سۇرىنبەي جەتتى. وسى مەجەدە تاڭسۇلۋ قايىربەكوۆا مەن ايعانىم سماعۇل الەنا چۋگاينوۆا مەن دانا شىڭعىسوۆانى ۇتسا, مادينا وتەۋلينا مەن ەليزاۆەتا ەروپكينا اناستاسيا ۋكولوۆا مەن دانا رۋبيلكودان باسىم ءتۇستى.
ءۇشىنشى ورىن ءۇشىن باسەكەدە اقتاۋدىڭ قوس كومانداسى كۇش سىناستى. بۇل تارتىس اناستاسيا ۋكولوۆا مەن دانا رۋبيلكونىڭ پايداسىنا شەشىلدى. فينالدا الماتىلىقتار كەزدەستى. بۇل ويىندا تاڭسۇلۋ قايىربەكوۆا مەن ايعانىم سماعۇلدىڭ باعى جاندى.
ەرلەر اراسىندا «بۋرەۆەستنيكتىڭ» ويىنشىلارى – كيريلل گۋرين مەن نۇردوس الداش قولا مەدالدى ەنشىلەسە, فينالدا رەسپۋبليكامىزدىڭ ەڭ ۇزدىكتەرى – الەكساندر دياچەنكو مەن سەرگەي سيدورەنكو اقتاۋلىق الەكساندر بابيچەۆ پەن الەكسەي كۋلەشوۆتى قاپى قالدىردى.
ءسويتىپ, التى جۇلدەلى ورىننىڭ تورتەۋىن الماتى قالاسىنىڭ جاعاجاي ۆولەيبولشىلارى يەلەندى. ەندى ەل بىرىنىشىلىگىنىڭ كەلەسى تۋرى ماۋسىم ايىنىڭ سوڭىندا اقتاۋدا وتەدى.
