سپورت • 28 مامىر، 2019

اپايتوستەر الماتىدا ايقاستى

718 رەت كورسەتىلدى

وتكەن اپتانىڭ اياعىندا گرەك-ريم كۇرەسىنىڭ شوق جۇلدىزدارى الماتىدا باس قوسىپ، 25 جىل بويى ءداستۇرلى تۇردە ۇيىمداستىرىلىپ كەلە جاتقان بولات تۇرلىحانوۆتىڭ كۋبوگى جولىنداعى جارىستا كۇش سىناستى. بالۋان شولاق اتىنداعى سپورت سارايىنا جينالعان سان مىڭ كورەرمەن رەسەي، گرۋزيا، ارمەنيا، مولدوۆا، بەلارۋس، موڭعوليا، تاجىكستان، وزبەكستان، قىرعىزستان، يران جانە قازاقستاننىڭ ءار وڭىرىنەن كەلگەن داڭقتى بالۋانداردىڭ باسەكەلەرىن تامسانا تاماشالادى.

بۇل كۇندەرى بىرىككەن كۇرەس الەمىنىڭ بيۋرو مۇشەسى، ازيا كۇرەس فەدەراتسياسىنىڭ پرەزيدەنتى قىزمەتىن اتقارىپ جۇرگەن داڭقتى بالۋان، سەۋل مەن بارسەلونا وليمپياداسىنىڭ جۇلدەگەرى، الەم، ەۋروپا جانە ازيا چەمپيونى، ازيا ويىندارىنىڭ جەڭىمپازى، الەم كۋبوگىنىڭ ەكى دۇركىن يەگەرى، كسرو-نىڭ جەتى دۇركىن چەمپيونى داۋلەت تۇرلىحانوۆ وسى جارىس قارساڭىندا باق وكىلدەرىنە بەرگەن سۇحباتىندا: «وسىعان دەيىن سەمەي قالاسىندا ۇيىمداستىرىلىپ كەلگەن ەلىمىزگە ەڭبەك سىڭىرگەن جاتتىقتىرۋشى بولات تۇرلىحانوۆتى ەسكە تۇسىرۋگە ارنالعان حالىقارالىق تۋرنير سوڭعى كەزدەرى الماتىدا ءوتىپ جۇرگەنى بارشاڭىزعا ءمالىم. بۇل – بىرىككەن كۇرەس الەمىنىڭ كۇنتىزبەسىنە ەنگەن قازاقستانداعى جالعىز جارىس. بۇل تۋرنيردە بەلدەسۋلەر تەك وليمپيادا باعدارلاماسىنا ەنگەن سالماق دارەجەلەرى بويىنشا عانا وتەدى.  سوندىقتان دا ايتۋلى تۋرنيردە كىل مىقتىلار كۇش سىناسادى. سولاردىڭ اراسىندا وليمپيادا مەن الەم چەمپيوناتتارىندا جەڭىس تۇعىرىنا كوتەرىلگەن اتاقتى بالۋانداردىڭ دا قاراسى مول. ەگەر جىگىتتەرىمىز وسى بايراقتى باسەكەدە ءبىر التىنعا قول جەتكىزسە، سونىڭ ءوزى ءبىزدىڭ كوماندا ءۇشىن جاقسى ناتيجە بولار ەدى»، – دەپ ءوز ويىن ايتقان ەدى.

ايتقانداي-اق، بيىلعى ءتۋرنيردىڭ دەڭگەيى وتە جوعارى بولدى. ءوز ەلىمىزدە، ءوز جەرىمىزدە ءوتىپ جاتقان جارىستا قازاقستاندىق بالۋاندار اراسىنان تەك اسحات دىلمۇحامەدوۆتىڭ عانا باس جۇلدەنى ولجالاۋعا كۇش-جىگەرى مەن قارىم-قابىلەتى جەتتى. راسىندا دا، 77 كيلو سالماق دارەجەسىندە بەلدەسكەن الماتى وبلىسىنىڭ وكىلى بۇل تۋرنيردە كەرەمەت ونەر كورسەتتى. تاياۋ كۇندەرى 33 جاسقا تولاتىن ارداگەر بالۋان جيىرمانىڭ ىشىندەگى جالىندى جاستارمەن قاتار، تالاي ۇلى دۇرمەكتەردە اتوي سالعان ساقا سپورتشىلاردىڭ بارلىعىن جولىنان ىعىستىرىپ، جەڭىس تۇعىرىنىڭ ەڭ بيىك ساتىسىنا كوتەرىلدى. بىلتىرعى جىلى ازيا چەمپيونى اتانعان قانداسىمىز فينالدا 2018 جىلعى الەم جانە 2014 جىلعى ەۋروپا چەمپيونى، رەسەيلىك الەكساندر چەحيركيننەن ايلاسىن اسىردى. بىلىكتى باپكەرلەر مەن مايتالمان مامانداردان باستاپ، قاراپايىم كورەرمەندەرگە دەيىن بولات تۇرلىحانوۆتىڭ كۋبوگى جولىنداعى جارىستا اسحاتتىڭ اسقان شەبەرلىگىنە ءتانتى بولىپ، الاش جۇرتىنىڭ مەرەيىن اسقاقتاتقان قايسار ۇلعا تىك تۇرىپ قوشەمەت كورسەتتى.

ءدال وسى سالماقتا بەلدەسكەن اسحات جاڭبىروۆقا دا جۇرت ريزا بولدى. باستاپقى باسەكەلەردىڭ بارلىعىندا جەڭىسكە جەتكەن جەرلەسىمىزدىڭ جارتىلاي فينالدا جولى بولمادى. ەسەسىنە قولا مەدال ءۇشىن تارتىستا ول رەسەيدىڭ تاعى ءبىر جۇلدىزى، 2016 جىلعى الەم چەمپيونى، الەم كۋبوگىنىڭ ەكى دۇركىن يەگەرى رامازان اباچاراەۆتان باسىم ءتۇستى.

60 كيلو سالماق دارەجەسىندە ايدوس سۇلتانعالي مەن ءالي رەزا نەجاتي بەلدەسۋگە ءتيىس ەدى. الايدا جارتىلاي فينالدا جاراقات العان قازاق سپورتشىسى شەشۋشى ايقاسقا شىقپادى. وسىلايشا، يران بالۋانىنىڭ باعى جانىپ، ول باس جۇلدەنى ولجالادى. ايدوس كۇمىس مەدالدى قاناعات تۇتتى. وليمپيا ويىندارى مەن الەم چەمپيوناتىنىڭ جۇلدەگەرى، ەۋروپا چەمپيونى، رەسەيلىك مينگيان سەمەنوۆ پەن وزبەكستاندىق يسلومجون باحراموۆ قولاعا قول سوزدى.

جانكۇيەرلەر 67 كيلو سالماقتاعى فينالدىق سايىستى دا كورە المادى. ريو وليمپياداسىنىڭ قولا جۇلدەگەرى، گرۋزيالىق شماگي بولكۆادزە جاراقاتىنا بايلانىستى بوز كىلەمگە شىقپادى. ناتيجەسىندە ەۋروپا بىرىنشىلىگىنىڭ جۇلدەگەرى، رەسەيلىك زاۋر كابالوەۆ ءبىرىنشى ورىندى يەلەندى. يراندىق مۇحاممەد رەزاي مەن وزبەكستاندىق ارام ۆاردانيان ءۇشىنشى ساتىعا تابان تىرەدى.

87 كيلو سالماقتا رەسەيلىك بەكحان وزدوەۆقا تەڭ كەلەر ەشكىم تابىلمادى. ەۋروپا بىرىنشىلىگىنىڭ كۇمىس جۇلدەگەرى اقتىق ايقاستا يراندىق رامين تانەريسارتانگتى تىزە بۇكتىردى. بەلارۋسيانىڭ قوس مىقتىسى – ميكولاي ستادۋب پەن راديك كۋليەۆ قولا مەدالدى قورجىنعا سالدى.

97 كيلو سالماق دارەجەسىندە رەسەيدىڭ ءۇش ءاپايتوسى جەڭىس تۇعىرىنا كوتەرىلدى. الەكساندر گولوۆين كۇمىس مەدالدى موينىنا ىلسە، نيكيتا مەلنيكوۆ پەن دانيلا سوتنيكوۆ قولا جۇلدەنى ەنشىلەدى. ال سولاردىڭ بارلىعىنان ارتۋر الەكسانياننىڭ شوقتىعى بيىك بولدى. 2012 جىلى لوندون وليمپياداسىندا كۇمىس، 2016 جىلى ريو وليمپياداسىندا التىن الىپ، ءۇش رەت الەم چەمپيوناتى جانە ءتورت رەت ەۋروپا بىرىنشىلىگىندە باس جۇلدەنى يەمدەنگەن ارمەنيانىڭ اتاقتى بالۋانى الماتىدا دا قارسىلاس شاق كەلتىرگەن جوق. 

– الماتىداعى ايقاستاردىڭ ەشبىرىندە جەڭىس ماعان وڭايلىقپەن كەلگەن جوق. بارلىق جەكپە-جەكتە كوپ كوپ تەر توكتىم. بۇل جاعداي بولات تۇرلىحانوۆ ءتۋرنيرىنىڭ دەڭگەيى اسا جوعارى بولعانىن اڭعارتسا كەرەك، ەندى جەڭىستى جولىمدى نۇر-سۇلتاندا جالعاستىرسام دەيمىن. قىركۇيەك ايىندا قوناقجاي قازاق ەلىنىڭ استاناسىندا جالاۋى جەلبىرەيتىن الەم چەمپيوناتىندا باس جۇلدەنى ولجالاۋدى كوزدەپ وتىرمىن، – دەپ ارتۋر الەكسانيان اقتارىلا سويلەدى.

الىپتاردىڭ ايقاسىندا بەلارۋستىڭ بەتكەۇستارى كيريلل حريشچانكانىڭ اسىعى الشىسىنان ءتۇستى. فينالدا ول رەسەيلىك ۆيتالي ششۋرگە شاڭ قاپتىردى. قوس قولا مەدالدى يراندىق شاحاب گحوۋرەحجيلي مەن گرۋزيالىق ياكوب كادجايا يەلەندى.

جارىس جەڭىمپازدارى مەن جۇلدەگەرلەرىنە ءداستۇرلى مەدالدار مەن ديپلومداردان بولەك، اقشالاي سىيلىقتارعا تابىس ەتىلدى. ءبىر عاجابى، وسى ءتۋرنيردى تاماشالاۋعا كەلگەندەردىڭ اراسىندا اتاعى الىسقا جايىلعان ارداگەر بالۋانداردىڭ قاراسى مول بولدى. ەكى كۇنگە سوزىلعان باسەكەلەر بارىسىندا جاقسىلىق ۇشكەمپىروۆ، باقتيار بايسەيىتوۆ، گەورگي تسۋرتسۋميا، اسەت مامبەتوۆ، ەرمەك كوكەتوۆ، اسەت يمانباەۆ سىندى وتانداستارىمىزدان بولەك، شەت مەملەكەتتەردەن كەلگەن كاماندار مادجيدوۆ پەن سەرگەي دەمەشكەەۆيچ باستاعان گرەك-ريم كۇرەسىنىڭ حاس شەبەرلەرىن دە كوزىمىز شالدى. سونداي-اق، بولات تۇرلىحانوۆتىڭ زايىبى، باتىر انا ءمارزيا ايتبايقىزى، ۇلدارى – رەسپۋبليكالىق اۋىر اتلەتيكانىڭ قۇرمەتتى پرەزيدەنتى قايرات تۇرلىحانوۆ پەن داڭقتى بالۋان داۋلەت تۇرلىحانوۆ جانە تاعى باسقا ەلگە ەلەۋلى تۇلعالار ايتۋلى جارىستى باسىنان اياعىنا دەيىن تاماشالادى.   

الماتى  

سوڭعى جاڭالىقتار

ۇقساس جاڭالىقتار