«رولان گارروس» باستالدى

128 جىلدىق تاريحى بار «رولان گارروس» تۋرنيرىندە ءار ءداۋىردىڭ داربوز تەننيسشىلەرىنىڭ بارلىعى دا كۇش سىناسقان. ەرلەر اراسىندا ەڭ مول ولجاعا كەنەلگەن رافاەل نادال ەكەنىن جانكۇيەرلەر جاقسى بىلەدى. «گرۋنت پاتشاسى» اتانعان يسپانيانىڭ ساڭلاعى پاريج كورتىندا 11 مارتە تەڭدەسسىز دەپ تانىلدى. ءبىر عاجابى، 2005-2018 جىلدار ارالىعىندا وتكەن 14 جارىستىڭ تەك ۇشەۋىندە عانا وعان باس جۇلدە بۇيىرماعان ەكەن. 2008 جىلى نادال ءتورتىنشى كەزەڭدە شۆەتسيالىق روبين سودەرلينگكە ەسە جىبەرسە، 2015 جىلى شيرەك فينالدا سەربيالىق نوۆاك دجوكوۆيچتەن جەڭىلدى. ال 2016 جىلى ءوزىنىڭ وتانداسى مارسەل گرانولەرسكە قارسى باسەكەگە شىعۋدان باس تارتتى. ال قالعان دودالاردىڭ بار­لىعى پيرەنەي تۇبەگى تارلانىنىڭ جەڭىسىمەن اياقتالدى.

3 ماۋسىمدا 33 جاسقا تولعالى وتىر­عان رافاەل نادال ءالى دە بابىندا. قازىرگى كەزدە ول الەمنىڭ ەكىنشى راكەت­كاسى اتانىپ وتىر. يسپانيالىق تەن­نيسشى ءتۋرنيردىڭ باس جۇلدەسىنەن باستى ۇمىتكەرلەردىڭ ءبىرى ەكەنى داۋسىز.

تاريحقا جۇگىنسەك، باسقا دا ساقا سپورتشىلاردىڭ كەزىندە «رولان گارروستا» اتوي سالعانىن اڭعارامىز. حح عاسىردىڭ باسىندا فرانتسيالىق ماكس دەكيۋجي 8 مارتە توپ جارسا، جەتپىسىنشى جانە سەكسەنىنشى جىلدارى بورن بورگتىڭ تاسى ورگە دومالادى. شۆەتسيانىڭ ايگىلى تەننيسشىسى فرانتسيانىڭ استاناسىندا 6 رەت دارا شىقتى. ال ايەل­دەر اراسىنداعى سايىستا كريس ەۆەرتتىڭ وزگەلەردەن كوشى ىلگەرى. 1974-1985 جىلدار ارالىعىندا اقش-تىڭ وكىلى 7 مارتە جەڭىمپاز اتاندى. فران­تسيالىق سيۋزانن لەنگلەن (1920-1923، 1925-1926) مەن گەرما­نيا­لىق شتەف­في گراف (1987-1988، 1993، 1995-1996، 1999) 6 رەتتەن باس جۇلدەنى ولجالاسا، اۋستراليالىق مارگاريت كورت 5 مارتە (1962، 1964، 1969-1970، 1973) ءدال سونداي قۇرمەتكە بولەندى.

«رولان گارروستا» تالاي رەكوردتار تىركەلدى. ماسەلەن، 2004 جىلى فران­تسيانىڭ قوس ساڭلاعى – فابريس سانتورو مەن ارنو كلەمانن اراسىنداعى تۇساكەسەر كەزدەسۋ 6 ساعات 33 مينۋتقا سوزىلدى. بۇل – ەرلەر اراسىنداعى ەڭ ۇزاق كەزدەسۋ. 2010 جىلى جاپونيالىق كۋرۋمي نارا مەن رۋمىنيالىق مو­نيكا نيكولەسكۋ اراسىنداعى ىرىكتەۋ باسەكەسىنىڭ جەڭىمپازى 4 ساعات 42 مينۋتتا انىقتالدى. ال 1988 جىلعى فينالدىق سايىس نەبارى 34 مينۋتتا اياقتالدى. بۇل باسەكەدە سول كەزدەگى الەمنىڭ ءبى­رىنشى راكەتكاسى شتەففي گراف كسرو سپورتشىسى ناتاليا زۆەرەۆانى 6:0، 6:0 ەسەبىمەن تاس-تالقان ەتتى.

1990-1992 جىلدار ارالىعىندا يۋگوسلاۆيانىڭ ايگىلى ويىنشىسى مو­نيكا سەلەش پاريجدەگى ءتۋرنيردى قاتارىنان ءۇش مارتە ۇتتى. العاشقى رەت جەڭىسكە جەتكەن كەزدە ول نەبارى 16 جاس 6 ايدا ەدى. 1989 جىلعى جا­رى­ستا امەريكالىق مايكل چانگ پەن يسپا­­نيالىق ارانچا سانچەس تورتكۇل دۇنيە جانكۇيەرلەرىن تامساندىرىپ، باس جۇلدەنى ولجالادى. سول كەزدەرى ولار 17 جاستان ەندى عانا اسقان بوزبالا مەن بويجەتكەن ەدى. سوعان قاراماستان ەكەۋى دە فينالدا اتاعى الىسقا جايىلعان تەننيسشىلەردى ۇتتى. اتاپ ايتساق، چانگ شۆەتسيالىق ستەفان ەدبەرگتىڭ وسال تۇسىن تاپسا، سانچەس نەمىس سپورتشىسى شتەففي گرافتان ايلاسىن اسىردى.

بىلتىرعى جىلى وتكەن تۋرنيردە يسپانيالىق رافاەل نادال مەن رۋ­مىنيالىق سيمونا حالەپ جەڭىسكە جەتتى. نادال فينالدا اۋس­تريالىق دومينيك ءتيمدى ەش قينالماي ۇتتى – 6:4، 6:3، 6:2. حالەپ امەريكالىق سلوان ستيۆەنسكە سان سوق­تىردى – 3:6، 6:4، 6:1. ەرلەر­دىڭ جۇپ­تىق سايىسىندا فرانتسيالىق نيكو­ليا مايۋ مەن پەر-يۋگ ەر­بەردىڭ باق جۇل­دىزى جان­سا، ايەلدەر اراسىندا چەحيانىڭ قوس سۇلۋى – باربورا كرەيچيكوۆا مەن كا­تەرينا س­ينيا­كوۆا وزدى. ارا­لاس جۇپ­تار باسە­كە­سىن­دە تاي­پەي مەن حور­ۆا­تيانىڭ تەننيس­شىلەرى لاتيشا چجان مەن يۆان دوديگ دارا شىقتى.

«ۇلكەن دۋلىعا» ساناتىنداعى تۋر­نيرلەردىڭ جۇلدە قورى دا مول بولاتىنى بەلگىلى. سولاردىڭ قاتارىندا «رولان گارروس» تا بار. بيىلعى جىلى ايتۋلى دودانىڭ جۇلدە قورى 42 661 000 ەۋرونى قۇرادى. تارقاتىپ ايتساق، جەكەلەگەن سايىستاردا جەڭىمپاز اتانعان تەننيسشىلەر 2 300 000 ەۋرونى ەنشى­لەيدى. اقتىق سىنعا القىنباي جەتىپ، شەشۋشى تۇستا ۇتىلعانداردىڭ ەسەپ شوتىنا 1 180 000 ەۋرو اۋدارىلادى. جارتىلاي فينالعا جەتكەندەرى € 590 000-عا بايىسا، شيرەك فينالعا شىققاندار سول سومانىڭ تەڭ جارتىسىن يەلەنەدى.

 «رولان گارروستىڭ» تۇساۋكەسەر كەزدەسۋىندە قاپى قالعان ويىنشىنىڭ ءوزى 46 000 ەۋرونى قالتاعا باسادى. ەكىن­شى اينالىمعا شىقسا، سول سوما ەكى ەسەگە ارتادى. ءۇشىنشى كەزەڭگە جەتكەن تەن­نيسشىگە € 143 000 تيەسىلى. وسى دەرەك­تەردەن-اق، «ۇلكەن دۋلىعا» سانا­تىنداعى جارىستاردىڭ بەدەلى قان­شالىقتى زور ەكەنىن اڭعارۋعا بولادى.

سول سەكىلدى سايىستىڭ وزگە تۇرلەرى بويىنشا ونەر كورسەتكەن ويىنشىلارعا دا ەداۋىر مولشەردە سىياقى تولەۋ جاعى قاراستىرىلعان. ماسەلەن، جۇپتىق باسەكەنىڭ جەڭىمپازى € 580 000-دى ولجالاسا، ارالاس جۇپتار تارتىسىندا توپ جارعاندار € 122 000-دى يەمدەنەدى. سول سەكىلدى جەڭىلگەندەر دە ۇيلەرىنە قۇر الاقان قايتپايدى. ولاردىڭ دا وزدەرىنىڭ كورسەتكەن ونەرى مەن جەتكەن مەجەلەرىنە ساي سىياقى الادى.

قازىرگى كەزدەگى قازاقستاننىڭ تاڭ­داۋلى تەننيسشىلەرى اراسىندا «رولان گارروستا» ەڭ جاقسى ناتيجەگە قول جەت­­كىزگەن يۋليا پۋتينتسەۆا. ايەلدەر اراسىنداعى ەلىمىزدىڭ ءبىرىنشى راكەتكاسى ەكى رەت شيرەك فينالدا ونەر كورسەتتى. 2016 جىلى ول اقش-تىڭ اتاقتى ويىنشىسى سەرەنا ۋيليامستەن جەڭىلسە، 2018 جىلى سونىڭ وتانداسى مەديسون كيسكە ەسە جىبەردى. ال زارينا دياس جانە ميحايل كۋكۋشكين سىندى مىقتىلارىمىز ازىرگە ەكىنشى اينالىمنان اسا الماي ءجۇر.