«اق جول» دەموكراتيالىق پارتياسى ۇسىنعان پرەزيدەنتتىككە كانديدات دانيا ەسپاەۆا سايلاۋالدى ناۋقان بارىسىندا اقمولا وبلىسىنداعى شورتاندى اۋىلىنا باردى. بۇل ءىس-شارانى ۇيىمداستىرۋعا وبلىستىق ايماقتىق شتاب مۇرىندىق بولدى. وعان رەسپۋبليكالىق شتاب ءمۇشەلەرى دميتري ۆاسيلەۆ, مەرۋەرت قازبەكوۆا جانە پارتيانىڭ ايماقتىق بەلسەندىلەرى قاتىستى.
ۇگىتشىلەر توبى الدىمەن ا.باراەۆ اتىنداعى استىق شارۋاشىلىعىنىڭ عىلىمي-ونەركاسىپ ورتالىعىنا سوقتى. ورتالىقتاعى سۇرىپتاۋ زەرتتەۋى ءناتيجەسىندە بيداي, ارپا, تارى جانە باسقا دا داقىلداردىڭ 60-قا جۋىق جاڭا ءتۇرى شىعارىلدى. وتاندىق سۇرىپتاۋ سورتتارى كۇننەن-كۇنگە قولدانىس اياسىن كەڭەيتىپ كەلەدى. د.ەسپاەۆا ورتالىقتىڭ سوڭعى جەتىستىكتەرىمەن تانىسىپ, عىلىمي جاڭالىقتارعا قول جەتكىزۋ ءۇشىن عالىمدارعا نە قاجەت ەكەنىن سۇراپ ءبىلدى.
بۇدان سوڭ «اق جول» پارتياسىنىڭ ۇمىتكەرى شورتاندى اۋدانىنىڭ بيۋدجەتتىك قىزمەتكەرلەرىمەن جانە كاسىپكەرلەرىمەن كەزدەستى. اۋدانداعى 1300-دەي ادام شاعىن جانە ورتا بيزنەسپەن اينالىسادى. ولاردىڭ 40 پايىزى – ايەلدەر. اۋداندا قىزمەت كورسەتۋ سالاسى جاقسى دامىعان. كانديدات جينالعان قاۋىمعا سايلاۋالدى باعدارلاماسىن تانىستىرىپ, ەكونوميكانىڭ باسىم سالالارى ءۇشىن تومەندەتىلگەن قوسىمشا قۇن سالىعى مولشەرلەمەسىن ەنگىزۋ سياقتى ۇسىنىستارىن ايتتى.
«ءدال وسىنداي ەلدى مەكەندەردە بيزنەستى كوبىنە ايەلدەر اشادى. ناندى پىسىرەتىن كىم؟ شاشتاراز اشاتىن كىم؟ سۇلۋلىق سالونىن اشاتىن كىم؟ ارينە, ايەلدەر. مەن ءۇشىن مىنا زالدا وتىرعان ايەلدەر مەنىڭ كانديداتۋرامدى وڭ قابىلداعانى ماڭىزدى. ءوزىمدى ەلىمىزدىڭ باستى لاۋازىمىنا ۇسىنۋ ارقىلى ءوزىم ءۇشىن عانا ەمەس, بارلىق قازاقستاندىق ايەلدەر ءۇشىن باتىل قادام جاسادىم», دەدى د.ەسپاەۆا.
* * *
«اۋىل» حالىقتىق-دەموكراتيالىق پاتريوتتىق پارتياسى اتىنان پرەزيدەنتتىك سايلاۋعا ءتۇسىپ جاتقان تولەۋتاي راقىمبەكوۆتى تالدىقورعان جاستارى قولدادى. كانديداتتىڭ سايلاۋالدى باعدارلاماسىنداعى «جاستار ساياساتىن نىقتاپ قولعا الۋ كەرەك. اسىرەسە, ءبىلىم بەرۋ, تۇرعىن ءۇي, جۇمىسقا ورنالاسۋ جانە ءتالىم-تاربيەگە قاتىستى ماسەلەلەرگە بەيجاي قاراۋعا بولمايدى» دەپ كورسەتىلگەن باعىتتار الماتى وبلىسىندا كەڭىنەن تالقىلاندى.
پرەزيدەنتتىكتەن ۇمىتكەر ت.راقىمبەكوۆ باي رۋحاني مۇرامىزدى ساقتاپ, ونى جاس ۇرپاقتىڭ ساناسىنا ءسىڭىرۋ جولدارىن ۇسىندى. ويتكەنى قازىرگى جاھاندانۋ داۋىرىندە جاس تولقىننىڭ جات مادەنيەتكە جۇتىلىپ كەتۋ قاۋپى بار دەپ سانايدى. وسى باعىتتى اشىپ كورسەتۋ ءۇشىن تالدىقورعان قالاسىنىڭ قاق تورىندە ارنايى فلەشموب ۇيىمداستىرىلدى. جەرگىلىكتى قىز-جىگىتتەر ۇلتتىق ءبيىمىزدى ەرەكشە ناقىشتا ورىنداپ شىقتى.
«جاستار ساياساتىن ءبىر جولعا قويۋ ۇلتتىق قۇندىلىقتاردى ساقتاۋدان عانا تۇرمايدى. ونىڭ ىشىندە ءبىلىم الۋ, جۇمىسقا تۇرۋ جانە باسپانا ماسەلەلەرى دە شەشىمىن تابۋ كەرەك. سونىڭ ارقاسىندا عانا قازىرگى جاپپاي ۋربانيزاتسيانى توقتاتۋعا بولادى. ايتپەسە, جوعارى جالاقى ىزدەگەن جاستار اۋىلدارىن تاستاپ, ءىرى قالالارعا قاراي اعىلىپ جاتىر. مۇنىڭ ارتى اۋىلدىڭ تۇرمىس-ءتىرشىلىگىنە كەرى اسەرىن تيگىزەرى ءسوزسىز», دەدى ت.راقىمبەكوۆ. اكتسيا اياسىندا كانديداتتىڭ وڭىرلىك شتابىنىڭ وكىلدەرى سايلاۋالدى باعدارلامانى قالا تۇرعىندارىنا تاراتىپ, ونىڭ نەگىزگى باعىتتارىن ءتۇسىندىردى.
قازىر ۇگىت-ناسيحات ناۋقانىنىڭ ناعىز قىزعان شاعى. پرەزيدەنتتىكتەن ءۇمىتكەر تولەۋتاي راقىمبەكوۆتى قولداۋعا ارنالعان شارالار ەلىمىزدىڭ بارلىق ايماعىندا ءوتىپ جاتىر. ال كانديداتتىڭ ءوزى الداعى اپتادا باتىستاعى وڭىرلەرگە بارىپ, جەرگىلىكتى تۇرعىندارمەن كەزدەسۋلەر وتكىزبەك.
* * *
كاسىپوداقتار فەدەراتسياسىنان پرەزيدەنتتىككە كانديدات امانكەلدى تاسپيحوۆتىڭ رەسپۋبليكالىق قوعامدىق شتابى باتىس قازاقستان وبلىسى اقجايىق اۋدانىنداعى تايپاق اۋىلىنىڭ جۇرتشىلىعىمەن كەزدەستى. دەلەگاتسيانى شتاب توراعاسىنىڭ ورىنباسارى, مەملەكەتتىك, بانك مەكەمەلەرى جانە قوعامدىق قىزمەت كورسەتۋ قىزمەتكەرلەرىنىڭ سالالىق كاسىپتىك وداعىنىڭ توراعاسى ميربولات جاقىپوۆ پەن قازاقستان مۇناي-گاز كەشەنىنىڭ سالالىق كاسىپوداق توراعاسى سۇلتان قاليەۆ باستاپ باردى.
ۇگىت-ناسيحات جۇمىستارى اياسىنداعى بۇل ءىس-شارا تايپاق اۋىلىنىڭ مادەنيەت ۇيىندە ءوتتى. كەزدەسۋگە اۋىل تۇرعىندارى, اقساقالدار, ەڭبەك ارداگەرلەرى جانە كاسىپوداق مۇشەلەرى قاتىستى. رەسپۋبليكالىق قوعامدىق شتاب ءتوراعاسىنىڭ ورىنباسارى م.جاقىپوۆ پرەزيدەنتتىكتەن ۇمىتكەر ا.تاسپيحوۆتىڭ ءومىر جولى تۋرالى بايانداپ, ونىڭ ازامات رەتىندەگى ۇستانىمدارى مەن كوزقاراستارى كاسىپوداقتار اتىنان كانديدات رەتىندە ۇسىنۋعا نەگىز بولعانىن اتاپ ءوتتى. قازاقستان مۇناي-گاز كەشەنىنىڭ سالالىق كاسىپوداق توراعاسى س.قاليەۆ كانديداتتىڭ ەڭبەكتى قورعاۋ مەن ەڭبەك قاۋىپسىزدىگى, ەڭبەك ادامىنىڭ قۇقىقتارى مەن مۇددەلەرىن قورعاۋعا باعىتتالعان سايلاۋالدى تۇعىرناماسىنا تولىعىراق توقتالىپ, قاتىسۋشىلاردى قىزىقتىرعان سۇراقتارعا جاۋاپ بەردى. كەزدەسۋ بارىسىندا كىتاپحانا قىزمەتكەرى س.تىلەكەەۆا قاۋىپسىز ەڭبەك پەن لايىقتى ەڭبەكاقىعا قاتىستى ۇسىنىستاردى قۋانا قولدايتىنىن جەتكىزىپ, كوپشىلىكتى سايلاۋعا قاتىسىپ, ەڭبەك ادامىنىڭ وكىلى ا.تاسپيحوۆكە داۋىس بەرۋگە شاقىردى.
سونىمەن قاتار رەسپۋبليكالىق سايلاۋالدى شتاب وكىلدەرى اتىراۋ وبلىسىنا اتباسىن بۇرىپ, كانديدات ا.تاسپيحوۆتى قولداۋ ماقساتىندا مەديتسينا قىزمەتكەرلەرىنىڭ كۇنىنە وراي وتكەن دəرىگەرلەر سپارتاكياداسىنا قاتىستى.
1. 51 شەت مەملەكەتتەگى قازاقستان رەسپۋبليكاسىنىڭ وكىلدىكتەرى جانىندا 65 سايلاۋ ۋچاسكەسى قۇرىلدى.
2. تىزىمدەرگە ءتيىستى شەت مەملەكەتتە تۇراتىن نەمەسە ۇزاق مەرزىمدى شەتەلدىك ءىسساپاردا جۇرگەن جانە قازاقستان رەسپۋبليكاسى ازاماتىنىڭ جارامدى پاسپورتتارى بار بارلىق ازاماتتار ەنگىزىلەدى.
3. شەت مەملەكەتتەرگە جەكە شاقىرۋ بويىنشا قىزمەتتىك, ىسكەرلىك جانە تۋريستىك ساپارلارعا كەلگەن قازاقستان ازاماتتارى ۋچاسكەلىك سايلاۋ كوميسسياسىنا جۇگىنگەن كەزدە جانە ولاردا قازاقستان رەسپۋبليكاسى ازاماتىنىڭ جارامدى پاسپورتى بولعان كەزدە سايلاۋشىلار تىزىمىنە ەنگىزىلەدى.
4. شەتەلگە شىعاتىن ازاماتتار تىركەۋ ورنى بويىنشا ۋچاسكەلىك سايلاۋ كوميسسياسىنان ەسەپتەن شىعارۋ كۋالىگىن الا الادى.
5. تىزىمدەر قازاقستان رەسپۋبليكاسى وكىلدىكتەرىنىڭ باسشىلارى ۇسىناتىن دەرەكتەر نەگىزىندە جاسالادى جانە داۋىس بەرۋ كۇنىنىڭ الدىنداعى كۇنگى جاعداي بويىنشا مىندەتتى ناقتىلانۋعا جاتادى.
6. داۋىس بەرۋ كۇنىنە 15 كۇن قالعاندا ءاربىر ازامات سايلاۋشىلار تىزىمىندەگى ءوزى تۋرالى دەرەكتەردى تەكسەرە الادى جانە تىزىمگە ەنگىزىلمەۋگە, دۇرىس ەنگىزىلمەۋگە نەمەسە شىعارىلۋعا, سونداي-اق تىزىمگە سايلاۋشى تۋرالى دەرەكتەردىڭ دۇرىس ەمەستىگىنە شاعىمدانا الادى.
* * *
قازاقستان كوممۋنيستىك حالىق پارتياسى ۇسىنعان پرەزيدەنتتىككە كانديدات جامبىل احمەتبەكوۆ ۇگىت-ناسيحات شارالارىنىڭ اياسىندا «وڭتۇستىك» ارنايى ەكونوميكالىق ايماق جۇمىسشىلارىمەن كەزدەستى. كانديدات جيىن قاتىسۋشىلارىنا سايلاۋالدى تۇعىرناماسىن تانىستىرىپ, وتاندىق تاۋارعا, اسىرەسە اوك ءونىمدەرىنە تۇتىنۋشىلىق سۇرانىستى ىنتالاندىرۋ جانە كەدەيلىكپەن كۇرەسۋ باعدارلاماسىن قابىلداۋدى ۇسىنعانىن, ونىڭ جۇزەگە اسىرىلۋى ءۇشىن جۇمىس ىستەيتىنىن مالىمدەدى.
«بايلار مەن كەدەيلەر اراسىنداعى الشاقتىق جىلدان-جىلعا ارتىپ كەلە جاتىر. اۋقاتتى ادامدار حالىقتىڭ ەسەبىنەن وزدەرىنىڭ جايلى ءومىرىن تولىق قامتاماسىز ەتۋدە. ال ءوز ەڭبەكتەرىمەن اقشا تاۋىپ جۇرگەندەر از جالاقىمەن كۇن كورۋگە ءماجبۇر. تابىستىڭ ادىلەتسىز ۇلەستىرىلۋ جۇيەسىن توقتاتۋ قاجەت. ەڭبەك ادامى ءوز ەڭبەگىنە ساي جالاقى الۋى ءتيىس. ءبىز رەسۋرستاردى دۇرىس پايدالانعان جاعدايدا قازاقستان ءومىر ءسۇرۋ دەڭگەيى بويىنشا كۋۆەيتپەن, بىرىككەن اراب امىرلىكتەرىمەن جانە نورۆەگيامەن يىق تىرەسە الادى», دەدى ج.احمەتبەكوۆ.
بۇعان قوسا, كانديدات زاماناۋي قازاقستاننىڭ باستى قۇندىلىعى بەيبىتشىلىك پەن ۇلتارالىق كەلىسىمدى ساقتاۋ كەرەكتىگىن ايتتى. ونىڭ ويىنشا, ەگوتسەنترلى ينديۆيدۋاليزم جاڭا باتىستىق ءداستۇر ءىزباسارلارىنىڭ مىنەز-قۇلقىنا ءتان. ول كوپ ەتنوستى قازاقستان حالقىنىڭ بىرەگەي مادەنيەتىنە, دىلىنە جات.
كاسىپورىن جۇمىسشىلارى كوممۋنيستىك حالىق پارتياسى ۇمىتكەرىنىڭ سايلاۋالدى تۇعىرناماسىن جاقسى قابىلداپ, الەۋمەتتىك سيپاتتاعى سۇراقتارىن قويدى. ايماقتا گاز بەن ەلەكتر قۋاتىنىڭ جوعارى تاريفتەرى, جۇمىسسىزدىق, دەنساۋلىق مەكەمەلەرىنىڭ تاپشىلىعى سياقتى ماسەلەلەر بار. كانديدات قويىلعان بارلىق سۇراققا تولىققاندى جاۋاپ بەرۋگە تىرىستى.
* * *
Nur Otan پارتياسىنان پرەزيدەنتتىككە كانديدات قاسىم-جومارت توقاەۆتىڭ رەسپۋبليكالىق قوعامدىق شتابى وكىلدەرى قىزىلوردا وبلىسىنىڭ حالقىمەن كەزدەستى. «مۇز ايدىنى» سپورت كەشەنىندە وتكەن كانديداتتى قولداۋشىلار فورۋمىنا حالىق قالاۋلىلارى, مەملەكەت جانە قوعام قايراتكەرلەرى, تانىمال جۋرناليستەر مەن سپورتشىلار جانە ونەر وكىلدەرى قاتىستى. ءىس-شارادا يليا يلين, ەليزابەت تۇرسىنباەۆا, ءمادينا سادۋاقاسوۆا جانە سەرىك يبراگيموۆ سياقتى تانىمال ازاماتتار ەلباسى ۇسىنعان كانديداتقا داۋىس بەرۋگە شاقىرىپ, جەرلەستەرىنە كەرەمەت كوڭىل كۇي سىيلادى.
جۇزدەسۋگە كەلگەن حالىققا ق.توقاەۆتىڭ سايلاۋالدى باعدارلاماسىنداعى ءۇش باسىمدىق تۋرالى ايتىلدى. مىڭنان اسا بەلسەندى قاتىسقان فورۋمدا شتاب جەتەكشىسى ماۋلەن اشىمباەۆ جينالعانداردى پرەزيدەنتتىكتەن ۇمىتكەر قاسىم-جومارت توقاەۆتى, سول ارقىلى بيلىك ساباقتاستىعىن ادىلدىك پەن ورلەۋدى قولداۋعا شاقىردى.
«ق.توقاەۆ – ەلباسىنىڭ سەنىمدى سەرىگى, ەكونوميكانى, ىشكى-سىرتقى ساياساتتى, زاڭ شىعارۋ قىزمەتىن جەتىك بىلەتىن قايراتكەر رەتىندە پرەزيدەنتتىككە ەڭ لايىقتى كانديدات. سىر ەلى قاشاندا ەلباسىنىڭ ستراتەگيالىق ساياساتىن قولدايدى. سوندىقتان سىزدەردى ەلباسى سەنىم ارتقان تۇلعانى قولدايدى دەپ سەنەمىز. 9 ماۋسىمدا ءبىزدىڭ كانديداتقا داۋىس بەرۋگە تۋعان-تۋىس, دوس-جاران, ءارىپتەستەرىڭىزدى شاقىرامىز. العا, قازاقستان!», دەدى م.اشىمباەۆ.
تۋعان كۇنىمەن تۇسپا-تۇس كەلگەن جيىندا ي.يلين جەرلەستەرىن ەلىمىزدىڭ جارقىن بولاشاعى, ءارى قاراي وركەندەۋى ءۇشىن ەلباسى ۇسىنعان كانديداتقا داۋىس بەرۋگە ۇندەدى. ال مانەرلەپ سىرعاناۋدان ەل قۇراماسىنىڭ كوشباسشىسى ە.تۇرسىنباەۆا جينالعاندار الدىندا ءوز ونەرىن پاش ەتتى.
* * *
«ۇلت تاعدىرى» ۇلتتىق-پاتريوتتىق قوزعالىسىنان پرەزيدەنتتىككە كانديدات ءامىرجان قوسانوۆ نۇر-سۇلتان قالاسىندا ورنالاسقان رەسپۋبليكالىق شتابىنىڭ كەڭسەسىندە ءوزىنىڭ سەنىم بىلدىرىلگەن ادامدارىن قابىلدادى. قاتىسۋشىلار باعدارلامانىڭ نەگىزگى باعىتتارىن اتاپ ءوتىپ, قۇجاتتى تولىقتىرۋعا قاتىستى ءوز يدەيالارىمەن ءبولىستى. كانديدات ءتۇرلى وزەكتى قوعامدىق ماسەلەلەرگە قاتىستى ءوز ۇستانىمىن جەتكىزدى.
ال الماتى وبلىسىنىڭ كوكسۋ كەنتىندە ءا.قوسانوۆتىڭ وبلىستىق سايلاۋالدى شتابىنىڭ مۇشەلەرى مەن سەنىمدى وكىلدەرى قانت زاۋىتىنىڭ ەڭبەك ۇجىمىمەن كەزدەستى. بۇل زاۋىت – قازاقستانداعى تاماق ونەركاسىبىنىڭ جەتەكشى كاسىپورىندارىنىڭ ءبىرى. كەزدەسۋدىڭ مودەراتورى وبلىستىق شتاب باستىعى جۇكەل حاماي بولدى. شتاب مۇشەلەرى كانديداتتىڭ سايلاۋالدى تۇعىرناماسىن تانىستىرىپ, كانديداتتىڭ ءتۇرلى ماسەلەگە كوزقاراسى جايلى بايانداپ بەردى. بۇعان قوسا, وبلىستا سايلاۋ بايقاۋشىلارىنىڭ سەمينارى ءوتتى.
سونىمەن قاتار اتىراۋ قالاسىندا پرەزيدەنتتىكتەن ۇمىتكەر ءا.قوسانوۆتىڭ سەنىم بىلدىرىلگەن ادامدارى «راۋان نالكو» جشس ەڭبەك ۇجىمىمەن كەزدەستى. سەرىكتەستىك – قازاقستاننىڭ جەتەكشى مۇناي-حيميا كاسىپورىندارىنىڭ ءبىرى, مۇناي-گاز وندىرىسىنە ارنالعان حيميالىق رەاگەنتتەردى ءوندىرۋشى, الەمنىڭ 160 ەلىن قامتيتىن حالىقارالىق «نالكو چەمپيون» (Nalco Champion) كومپانياسىمەن بىرلەسكەن وتاندىق كاسىپورىن.
كەزدەسۋدە ءسوز تىزگىنىن وبلىستىق شتاب باستىعى عالىمجان وتەباەۆ ۇستادى. شتاب مۇشەلەرى جينالعاندارعا سايلاۋالدى تۇعىرنامانى جان-جاقتى ءتۇسىندىرىپ, اسىرەسە «وركەنيەتتى ءارى حالىقشىل ەكونوميكا» اتتى تاراۋىنا كەڭىرەك توقتالدى. وندا ءادىل باسەكەلەستىكتى دامىتۋ, مونوپوليزمگە جول بەرمەۋ تۋرالى باياندالعان. كاسىپورىن جۇمىسشىلارى وزدەرىن قىزىقتىرعان سۇراقتارىن قويىپ, وعان تۇششىمدى جاۋاپتارىن الدى.
* * *
« ۇلى دالا قىراندارى» رەسپۋبليكالىق قوزعالىسىنان پرەزيدەنتتىككە كانديدات رەتىندە تىركەلگەن سادىبەك تۇگەل نۇر-سۇلتان قالاسى اكىمدىگىنە قاراستى «شاراپات» الەۋمەتتىك قىزمەت كورسەتۋ ورتالىعىندا بولىپ, ارداگەرلەرمەن سۇحباتتاستى. بۇل ورتالىق العاشىندا 1989 جىلى «قارتتار مەن مۇگەدەكتەرگە ارنالعان مەديتسينالىق-الەۋمەتتىك مەكەمە» بولىپ قۇرىلعان. 2016 جىلدان بەرى اتاۋى «شاراپات» بولىپ وزگەرگەن ورتالىق بۇگىندە 321 ادامعا قىزمەت كورسەتىپ كەلەدى. ورتالىق ديرەكتورى رىستى بايماعامبەتوۆانىڭ ايتۋىنشا, ولاردىڭ اراسىندا 2 سوعىس ارداگەرى مەن ولارمەن تەڭەستىرىلگەن 8 ادام جانە 25 تىل ارداگەرى بار.
ورتالىقتىڭ ءماجىلىس زالىنا جينالعاندار الدىندا پرەزيدەنتتىكتەن ءۇمىتكەر س.تۇگەل «قاريالار – اسىل قازىنامىز. سىزدەردىڭ الدارىڭىزعا ۇلكەن تولقىنىسپەن كەلىپ وتىرمىز. سايلاۋ – ۇلكەن قوعامدىق-ساياسي ماڭىزى بار شارا. وندا ەل بولاشاعىنا داۋىس بەرەمىز. اللانىڭ قالاۋىمەن, حالىقتىڭ قولداۋىمەن وسى دوداعا قاتىسىپ وتىرمىن. ءوزىم قوعامدىق-ساياسي كەڭىستىكتە 20 جىلدان اسا قىزمەت اتقارىپ كەلەمىن. ءبىزدىڭ « ۇلى دالا قىراندارى» قوعامدىق بىرلەستىگىنىڭ جۇمىس ىستەپ كەلە جاتقانىنا 8 جىل بولدى. ءبىزدىڭ ماقساتىمىز – ۇلتىمىزعا ادال قىزمەت ەتۋ, جاستاردى وتانسۇيگىشتىككە تاربيەلەۋ», دەدى.
كانديدات ءوزىنىڭ سايلاۋالدى باعدارلاماسىنداعى ءتورت تۇعىرعا جەكە-جەكە توقتالىپ ءوتتى. وندا ايتىلعان باعىتتاردى قىزىعۋشىلىقپەن تىڭداعان قارتتار كوكەيىندەگى ساۋالدارىن دا ىركىپ قالمادى. مەملەكەتتىك ءتىلدىڭ بولاشاعى, ونىڭ وزگە تىلدەردىڭ كولەڭكەسىندە قالىپ قويماۋى, لاتىن گرافيكاسىنا نەگىزدەلگەن ءالىپبيدى قاريالاردىڭ قالاي قابىلداعانى تۋرالى كەڭىنەن تالقىلاندى. سونىمەن قاتار اقساقالدار بولاشاقتا ورتالىقتا بيليارد ويناۋعا مۇمكىندىك جاسالسا دەگەن تىلەكتەرىن دە ءبىلدىردى.
دايىنداعان ورىنبەك وتەمۇرات,
«Egemen Qazaqstan»
