«ساۋىعۋدىڭ بىردەن-ءبىر شارتى – ساۋىقسام ەكەن دەپ تىلەۋ»
جۇما, 1 ناۋرىز 2013 7:13
ناۋقاس ادامنىڭ اق حالاتتى جاننىڭ الدىنا بارعان كەزدەگى كوڭىل-كۇيى بەلگىلى عوي. تامىرىن ۇستاپ وتىرعان دارىگەر بىلىكتى, تاجىريبەلى, ساۋاتتى بولسا ەكەن, سىرقاتىمدى ءدال تاپسا ەكەن دەپ ويلايدى. نەگىزى ناۋقاس ادام دارىگەردىڭ ايتقانىنا يمانداي سەنەدى. سودان بولار, جىلى ءسوز دامەتەدى. دارىگەردىڭ «قورقاتىنداي دانەڭە جوق, ءبىراز ەم الىپ, وزىڭىزگە كۇتىم جاساساڭىز, دەرتىڭىزدەن قۇلان-تازا ايىعىپ كەتەسىز» دەگەن جىلى ءسوزىنىڭ ءوزى جارتى ەم. سوندىقتان ناۋقاستار ءۇشiن ەڭ قاجەتتiسi – دارiگەردiڭ ساۋاتتىلىعى, ادالدىعى, مەيىرباندىعى.
جۇما, 1 ناۋرىز 2013 7:13
ناۋقاس ادامنىڭ اق حالاتتى جاننىڭ الدىنا بارعان كەزدەگى كوڭىل-كۇيى بەلگىلى عوي. تامىرىن ۇستاپ وتىرعان دارىگەر بىلىكتى, تاجىريبەلى, ساۋاتتى بولسا ەكەن, سىرقاتىمدى ءدال تاپسا ەكەن دەپ ويلايدى. نەگىزى ناۋقاس ادام دارىگەردىڭ ايتقانىنا يمانداي سەنەدى. سودان بولار, جىلى ءسوز دامەتەدى. دارىگەردىڭ «قورقاتىنداي دانەڭە جوق, ءبىراز ەم الىپ, وزىڭىزگە كۇتىم جاساساڭىز, دەرتىڭىزدەن قۇلان-تازا ايىعىپ كەتەسىز» دەگەن جىلى ءسوزىنىڭ ءوزى جارتى ەم. سوندىقتان ناۋقاستار ءۇشiن ەڭ قاجەتتiسi – دارiگەردiڭ ساۋاتتىلىعى, ادالدىعى, مەيىرباندىعى.
ادام بالاسىنىڭ باقىتتى بولۋىنىڭ وننان توعىزى دەنساۋلىعىنا بايلانىستى ەكەن. وتكەن جىلى وڭتۇستىك قازاقستان وبلىسىنىڭ 303 ءدارiگەرi مەن 223 ورتا بۋىن مەيiربيكەسi قايتا دايارلىقتان ءوتىپتi. 2844 دارiگەر مەن 4863 مەيiربيكە بiلiمiن جوعارىلاتتى. ولاردىڭ ۇشتەن بiرi حالىقارالىق دەڭگەيدەگi بiلiمدi مەڭگەرگەن.
ال 2012 جىلى مەديتسينالىق ۇيىمداردىڭ مەديتسينالىق قۇرال-جابدىقتارمەن جاراقتالۋى 56,2 پايىزعا دەيىن ارتتى. وبلىستا جۇرگىزىلگەن جاڭا قۇرىلىستاردىڭ 94,0 پايىزىن باستاپقى مەديتسينالىق-سانيتارلىق كومەك كورسەتۋ سالاسى قۇرادى. جەرگىلىكتى بيۋدجەت ەسەبىنەن ءساۋلەلى دياگنوستيكا ماسەلەلەرى شەشىلدى. وبلىس ورتالىعىندا زەرتحانالىق-دياگنوستيكالىق قىزمەت تولىق كولەمدە جابدىقتالدى. تۇرعىنداردىڭ ءومىر ءسۇرۋ ۇزاقتىعى 69,86 جاسقا جەتتى. ەلدى قاتتى الاڭداتىپ وتىرعان قان اينالىمى جۇيەسىنىڭ اۋرۋلارىنان ءولىم-ءجىتىم كورسەتكىشتەرى حالىقتىڭ 100 مىڭ ادامعا شاققاندا 168,6-دان 124,4-كە دەيىن نەمەسە 26,2 پايىزعا تومەندەدى. جۇرەك قان اينالىمى اۋرۋلارى اۋرۋشاڭدىعى مەن ءولىمىن ازايتۋدا مامانداردىڭ بىلىكتىلىگىن ارتتىرۋ جۇمىسى اسا ماڭىزدى. بۇل باعىتتا 41 دارىگەر بىلىكتىلىگىن جوعارىلاتتى.
مىنە, وڭتۇستىكتىڭ دەنساۋلىق ساقتاۋ سالاسىنىڭ ماماندارى زامانعا ساي بەيىمدەلۋدە. ايتسە دە, ءبىزدىڭ قوعامدا دەرتكە شالدىققانشا دەنساۋلىقتىڭ قادىرىن بىلمەيتىندەردىڭ سانى ءالى دە مولداۋ ەكەنىن مويىنداۋ كەرەك. جاقىندا عانا پارلامەنت قابىرعاسىندا ەسەپ بەرگەن دەنساۋلىق ساقتاۋ مينيسترى ساليدات قايىربەكوۆا الداعى ۋاقىتتا اۋىلداردى ءتىس دارىگەرلەرىنىڭ ارالايتىنىن جەتكىزدى. ءوز باسىم ءمينيستردىڭ وسى ۇسىنىسىن تولىق قولدايمىن. شىنىندا اۋدان ورتالىعىندا, بولماسا, اۋىلداردا ءتىس ەمدەۋ ورىندارى مۇلدەم جوق. سول ەلدى مەكەندەردە ءتىسى اۋىرسا ەلەمەي, ءارى كەتكەندە حالىقتىق ەم-دوممەن ەمدەپ, اقىرىندا بۇكىل ءتىسى ءتۇسىپ قالعان قانشاما جاندار ءجۇر دەسەڭىزشى… «ساۋىعۋدىڭ بىردەن-ءبىر شارتى – ساۋىقسام ەكەن دەپ تىلەۋ» دەگەن ەكەن ءبىر ويشىل. سول ايتپاقشى, مەملەكەت مەديتسيناعا قانشاما جاقسىلىقتى ءۇيىپ-توكسە دە حالىقتىڭ ءوز ىنتاسى, دەنساۋلىعىنا دەگەن جاناشىرلىعى, جاۋاپكەرشىلىگى بولماسا, بۇل سالانىڭ تىرلىگى وڭعا باسۋى قيىن. بۇل ىستە تەك دارىگەر عانا ەمەس, حالىق تا ساۋاتتى بولۋى كەرەك.
جازيرا تولەپبەكوۆا,
شىمكەنت مەديتسينا كوللەدجىنىڭ وقىتۋشىسى.
وڭتۇستىك قازاقستان وبلىسى.
