مىسىر ەلىنىڭ عالىمدارى وتكەن جىلى جاقسى جاڭالىق اشتى. بۇنىڭ اشىلۋىنا قاسيەتتى كىتاپ قۇراننىڭ «ناقىل» ءسۇرەسىنىڭ 68-ءشى اياتىندا ايتىلعانداي «ارانىڭ قارىندارىنان ءتۇرلى-ءتۇستى سۇيىقتىق شىعادى. وندا ادامدار ءۇشىن شيپا بار...» دەگەن يلاھي ۇكىم سەبەپ بولدى دەپتى مىسىرلىق وقىمىستى ءال-ازحار ۋنيۆەرسيتەتىنىڭ پروفەسسورى اتو اس-سىنباتي. جوعارىداعى ايات جايلى «تافسير مۋياسسار» اتتى كىتاپتا «ارانىڭ قارىندارىنان شىعاتىن ءتۇرلى-ءتۇستى سۇيىقتىق دەگەنىمىز – بال. ول ادامدار ءۇشىن دەرتكە – شيپا, تانگە – ساۋلىق» دەپ ءتاپسىرلەگەن ەكەن.
سونىمەن بال اراسىنىڭ ومارتاسىن ۇزبەي 30 جىل باقىلاپ, ارالاردىڭ ءجۇرىس-تۇرىس, قيمىل-قوزعالىسىن زەرتتەگەن عالىمدار مىنانى انىقتاعان: ومارتادان ۇشىپ شىعىپ, بال جيناۋعا اتتانعان جۇمىسشى ارا كەيبىر جاعدايدا ۋاقىتى وتكەندىكتەن شىرىنى اشىعان وسىمدىككە كەزدەسىپ قالادى دا, ءنارلى بولىگى بىجىعاندىقتان پايدا بولاتىن ەتانول (ethanol) سياقتى ماسايتاتىن ەسىرتكى زاتىنا تۇمسىعىن باتىرادى. ءسويتىپ ءوزى ماس بولىپ قالادى. ونىمەن قويماي ماسايتقىش زاتتى ومارتاعا الىپ كەلەدى. سەبەبى ماسايعان ارا عالىمدار انىقتاعانداي, 48 ساعاتقا دەيىن تولىق ايىقپايدى ەكەن.
ءبىر قىزىعى, زياندى زات اكەلگەن ارانى كۇزەتشى ارالار جابىلا قۋالاپ ومارتاعا جولاتپايدى. ءبىر جاعىنان انا ماس نەمە دە قاقپانى بۇزىپ كىرمەككە ەنتەلەيتىن كورىنەدى. مۇنداي ساتتە ارنايى دىبىستىق دابىل قاعىلىپ, بارلىق كۇزەتشىلەر ماس اراعا جابىلىپ, ونى اياماي سوققىعا جىعادى. سوققى العان ارانىڭ ومارتادا ەشقانداي بەدەلى بولمايدى. ىزىلداپ جالعىز ءوزى ۇشىپ جۇرەدى.
