كەزدەسۋگە پارلامەنت ءماجىلىسىنىڭ دەپۋتاتى, «ۆوزروجدەنيە» قازاقستاندىق نەمىستەر قاۋىمداستىعى قامقورشىلار كەڭەسىنىڭ توراعاسى البەرت راۋ, فەدەرالدى ۇكىمەتتىڭ وكىلەتتى حاتشىسى سەباستيان كلاپپەرت, قازاقستانداعى گەرمانيا ەلشىلىگى ساياسي ءبولىمىنىڭ جەتەكشىسى ۆالەنتينا گولدمانن قاتىستى. جيىن بارىسىندا قازاقستان حالقى اسسامبلەياسى قونىس اۋدارۋشىلار مەن از ۇلتتار جونىندەگى فەدەرالدىق ۇكىمەت اراسىنداعى ءوزارا بايلانىستى بەكىتۋ, قازاق ەلىندەگى ەتنوستىق نەمىستەر مەن گەرمانياداعى قازاقتاردى قولداۋ بويىنشا ەكى ەل اراسىنداعى ىنتىماقتاستىقتى نىعايتۋ ءجانە كەڭەيتۋگە قاتىستى ماسەلەلەر مەن نەگىزگى اسپەكتىلەر تالقىلاندى.
– قازاقستان بارلىق قارىم-قاتىناس كەشەنى بويىنشا گەرمانيامەن ىنتىماقتاستىقتى دامىتۋعا باسا ءمان بەرەدى. ساياسي ديالوگ اشىق جانە سەنىمدى سيپاتقا يە. گەرمانيا قازاقستاننىڭ جەتەكشى ەكونوميكالىق سەرىكتەستەرىنىڭ قاتارىنا كىرەدى. ەكى ەل اراسىنداعى ساۋدا-ەكونوميكالىق قاتىناستار ءوزارا ءىس-قيمىلدىڭ تۇراقتى دامۋىنا جانە جاڭا مۇمكىندىكتەرىن ىزدەۋگە سەرپىن بەرەدى. نەمىس ينۆەستيتسياسىنىڭ شامامەن 90 پايىزى قازاقستان ەكونوميكاسىنىڭ شيكىزاتتىق ەمەس سەكتورىنا باعىتتالادى. قازاقستاندا ءبىرلەسكەن كاسىپورىنداردى, نەمىس كومپانيالارى مەن بانكتەردىڭ وكىلدىكتەرىن قوسا العاندا, گەرمانيا كاپيتالىنىڭ قاتىسۋىمەن 900-دەن اسا ەكونوميكالىق قۇرىلىم تىركەلگەن. 450-گە جۋىق گەرمانيالىق كاسىپورىن بەلسەندى جۇمىس ءىستەيدى. ىنتىماقتاستىق ءوڭدەۋشى ونەركاسىپ, قۇرىلىس, كولىك جانە بايلانىس, اۋىل شارۋاشىلىعى, الەۋمەتتىك جانە دەربەس قىزمەتتەر جانە ەكونوميكانىڭ باسقا دا سالالارىندا جۇزەگە اسىرىلادى, – دەدى قازاقستان حالقى اسسامبلەياسى توراعاسىنىڭ ورىنباسارى جانسەيىت تۇيمەباەۆ.
سونىمەن قاتار جانسەيىت ءتۇيمەباەۆ مەيماندارعا الەمدىك ساياساتتا بالاماسى جوق بىرەگەي قوعامدىق كەلىسىم ينستيتۋتى – قازاقستان حالقى اسسامبلەياسىنىڭ جۇمىسىمەن جان-جاقتى تانىستىردى. ونىڭ ايتۋىنشا, قازاقستاندا ۇلتى نەمىس شامامەن 180 مىڭ ازامات ءومىر سۇرەدى جانە گەرمانياعا 900 مىڭنان اسا ادام قونىس اۋدارعان. بۇعان قوسا گەرمانيادا 300-گە جۋىق قازاقستاندىق ءبىلىم الىپ جاتىر. بۇل – ەكى ەلدى بايلانىستىرىپ تۇرعان دانەكەر.
ءوز كەزەگىندە قونىس اۋدارۋشىلار مەن از ۇلتتاردىڭ ءىستەرى جونىندەگى فەدەرالدىق ۇكىمەتتىڭ وكىلەتتى ۋاكىلى بەرند فابريتسيۋس بەيبىتشىلىك پەن كەلىسىم سارايى اشىقتىق پەن قوناقجايلىلىقتىڭ سيمۆولى ەكەنىن ايتىپ, جىلى قابىلداعاندارىنا ريزاشىلىعىن ءبىلدىردى.
– ءسىزدىڭ ۇلتتار دوستىعىنىڭ ۇيىتقىسى بولىپ وتىرعان اسسامبلەيا تۋرالى كەڭىنەن بايانداعانىڭىز وتە مازمۇندى بولدى. قازاق حالقىنا وسىنداعى ەتنوستىق نەمىستەرگە كورسەتىپ وتىرعان باۋىرمالدىعى مەن ۇلكەن قولداۋى ءۇشىن گەرمانيا ۇكىمەتىنىڭ اتىنان العىسىمدى بىلدىرەمىن. ەكى ەلدەگى ءومىر ءسۇرىپ جاتقان جانە قونىس اۋدارعان اعايىن – قازاق-نەمىس دوستىعىن بەرىك ۇستاپ تۇرعان سەنىمدى كوپىر. ءبىز قازاقستاندى تۇراقتىلىقتىڭ ايقىن ۇلگىسى رەتىندە بىلەمىز. سول تۇراقتىلىقتىڭ نەگىزى اشىقتىق پەن ەكونوميكالىق دامۋعا كورسەتىلگەن قولداۋدى جوعارى باعالايمىز, – دەگەن بەرند فابريتسيۋس ءسوزىنىڭ سوڭىندا بەرلينگە قوناققا كەلۋگە شاقىردى.
قازاقستانداعى نەمىس دياسپوراسى مۇددەلەرىن قولداۋ ماقساتىندا قازاقستان-گەرمانيا ۇكىمەتارالىق كوميسسياسى قىزمەت اتقارادى. 20 مامىر كۇنى نۇر-سۇلتان قالاسىندا وسى كوميسسيانىڭ 17-ءشى وتىرىسى ءوتتى.
