«اق جول» دەموكراتيالىق پارتياسىنان پرەزيدەنتتىككە كانديدات دانيا ەسپاەۆا سەنىم بىلدىرىلگەن وكىلدەرىمەن بىرگە قاراعاندى وڭىرىنە باردى. پارتيا توراعاسى, كانديداتتىڭ رەسپۋبليكالىق قوعامدىق شتابىنىڭ جەتەكشىسى ازات پەرۋاشەۆ باستاعان ناسيحاتشىلار توبىنىڭ قاتارىندا پارلامەنت ءماجىلىسىنىڭ دەپۋتاتى ەرلان بارلىباەۆ, پارتيا ءتوراعاسىنىڭ ورىنباسارى دميتري ۆاسيلەۆ بار.
كەزدەسۋ بارىسىندا قاراعاندىلىق كاسىپكەرلەر پرەزيدەنتتىكتەن ۇمىتكەردىڭ سايلاۋالدى باعدارلاماسىمەن تانىسىپ, وزدەرىنىڭ ويلارىمەن ءبولىستى. قوزعالعان تاقىرىپتار ەلدەگى شاعىن جانە ورتا بيزنەستى دامىتۋ, كاسىپكەرلىكتى قولداۋ جانە سالىقتى ازايتۋ جونىندە بولدى. كاسىپكەرلەر ايماقتاعى جەكە بيزنەستىڭ احۋالىن ايتىپ ءتۇسىندىردى. پارتيانىڭ قاراعاندى وبلىستىق فيليالىنىڭ دەرەگىنە سايكەس, بىلتىر مەملەكەتتىك ورگاندار تاراپىنان كورگەن اكىمشىلىك قىسىم, زاڭسىز تەكسەرۋلەر جانە باسقا دا قۇقىق بۇزۋشىلىقتار تۋرالى 800-دەي كاسىپكەر شاعىمدانعان ەكەن. ا.پەرۋاشەۆ وسىنداي جۇمىس ساپارلارى ارقىلى نازار اۋدارارلىق وزەكتى ماسەلەلەردەن حاباردار بولىپ, شەشۋ جولدارىن قاراستىراتىندارىن مالىمدەدى.
د.ەسپاەۆانىڭ سايلاۋالدى باعدارلاماسىمەن قاراعاندى تۋربومەحانيكالىق زاۋىتى دا تانىستى. كاسىپورىن جىلۋ-ەلەكتر ستانساسى قۇرىلعىلارىن جوندەۋ, قوسالقى جابدىقتارىن دايارلاۋ سالاسىندا 25 جىلدان اسا ۋاقىت جۇمىس ىستەيدى. وسى جىل ارالىعىندا ءتۇرلى قۋاتتاعى 400-دەي تۋربينا جوندەۋدەن ءوتتى. زاۋىت جۇمىسشىلارىمەن كەزدەسۋ بارىسىندا كانديدات وتاندىق بيزنەستى قولداۋ, ىشكى نارىقتا قازاقستاندىق كاسىپورىندارعا باسىمدىق بەرۋ تۋرالى ويلارىن جەتكىزىپ, شەتەلدىك كومپانيالاردىڭ ءوزى قازاقستاندىق شاعىن جانە ورتا بيزنەستىڭ قىزمەتىن پايدالانۋى ءتيىس ەكەنىن ايتتى. سايلاۋالدى شتاب مۇشەلەرى كوپشىلىكتىڭ مازالاعان سۇراقتارىنا جاۋاپ بەردى.
* * *
«اۋىل» حالىقتىق-دەموكراتيالىق پاتريوتتىق پارتياسىنان پرەزيدەنتتىككە كانديدات تولەۋتاي راقىمبەكوۆتىڭ سەنىم بىلدىرىلگەن ادامدارى سەمەي وبلىسىندا ۇگىت-ناسيحات جۇمىستارىن بەلسەندى جۇرگىزىپ جاتىر. بۇل وڭىردە كانديداتتىڭ سايلاۋالدى تۇعىرناماسى تانىستىرىلعان كەلەسى ورىن عاسىرعا جۋىق تاريحى بار «ۇن-قۇراماجەم» زاۋىتى بولدى. بۇگىندە بۇل كاسىپورىن ماڭايداعى اۋىلداردان شيكىزات جيناپ, ايىنا 15 مىڭ توننا دايىن ءونىم شىعارادى.
قازاقستان وڭدەۋ ونەركاسىبىندەگى الەۋەتىن تولىق پايدالانا الماي وتىر. قازىر اۋىل شارۋاشىلىعى ونىمدەرىنىڭ تەك 30 پايىزعا جۋىعى عانا وڭدەلەدى. ال ەگەر وسى باعىتتى جانداندىراتىن بولساق, ءار اۋىلدا كەمىندە ءبىر وڭدەۋ تسەحى جۇمىس ىستەپ تۇرار ەدى. «اۋىل» پارتياسىنان پرەزيدەنتتىككە كانديدات ت.راقىمبەكوۆتىڭ باعدارلاماسىنداعى وسى جانە وزگە دە ماسەلەلەر سەمەي وڭىرىندە قىزۋ تالقىلاندى. كانديدات كاسىپورىندار ماسەلەسىن ءجيى كوتەرىپ, ونى وڭتايلى شەشۋدىڭ جولدارىن ۇسىنادى. ول اۋىل شارۋاشىلىعىن ەكونوميكانىڭ درايۆەرىنە اينالدىرامىز دەسەك, ەڭ الدىمەن شالعاي اۋىلدارداعى شاعىن قوجالىقتاردى كوتەرۋ كەرەك دەپ ەسەپتەيدى. كانديداتتىڭ باستى ۇستانىمدارىن جەتكىزگەن سەنىم بىلدىرىلگەن ادامدار «اۋىل دەگەن ءسوزدىڭ ىشىنە ءبارى سىيادى. ول – ەكونوميكامىزدىڭ نەگىزى, ءوندىرىستىڭ وشاعى جانە رۋحاني بايلىقتىڭ قاينار كوزى. سوندىقتان اۋىل ماسەلەسىنە بەيجاي قاراۋعا بولمايدى», دەدى.
سونىمەن قاتار تاراز قالاسىندا «اۋىل» پارتياسى اتىنان پرەزيدەنتتىككە كانديدات ت.راقىمبەكوۆتى قولداۋعا ارنالعان كونتسەرت ءوتتى. كونتسەرتكە پروفەسسور-وقىتۋشىلار قۇرامى, پارتيانىڭ ساياسي كەڭەس مۇشەلەرى, قالا تۇرعىندارى, جاستار قاتىستى. كونتسەرتتى پارتيانىڭ جامبىل وبلىستىق فيليالىنىڭ ساياسي كەڭەس مۇشەسى نۇرلان بالعاباەۆ اشتى. ول ءوز سوزىندە كانديداتتىڭ ءومىر جولىنا, سايلاۋالدى باعدارلامالارىنا توقتالىپ, بارلىق قاتىسۋشىلاردى داۋىس بەرۋ كەزىندە كانديداتقا قولداۋ كورسەتۋگە شاقىردى.
ەسەپتەن شىعارۋ كۋالىگى
1. ەسەپتەن شىعارۋ كۋالىگىن سايلاۋشى ءوزىنىڭ بولاتىن ورنىن اۋىستىرعان كەزدە داۋىس بەرۋ قۇقىعىنا تىركەۋ ورنى بويىنشا ۋچاسكەلىك سايلاۋ كوميسسياسى بەرەدى. سايلاۋشىلار تىزىمىندە ءتيىستى بەلگى قويىلادى.
2. داۋىس بەرۋ قۇقىعىن بەرەتىن ەسەپتەن شىعارۋ كۋالىكتەرىن كورسەتكەننەن كەيىن ۋچاسكەلىك سايلاۋ كوميسسياسى داۋىس بەرۋ كۇنى سايلاۋشىنى ءوزى بولاتىن جەردەگى سايلاۋ ۋچاسكەسىندەگى سايلاۋشىلار تىزىمىنە ەنگىزەدى.
3. ءبىر ەلدى مەكەننىڭ شەگىندەگى باسقا سايلاۋ ۋچاسكەسىندە داۋىس بەرۋگە قاتىسقىسى كەلەتىن سايلاۋشىلارعا ەسەپتەن شىعارۋ كۋالىگى تابىس ەتىلمەيدى.
4. ەسەپتەن شىعارۋ كۋالىگىن تولتىرۋ سايلاۋشىنىڭ قالاۋى بويىنشا مەملەكەتتىك نەمەسە ورىس تىلىندە جۇرگىزىلەدى.
* * *
كاسىپوداقتار فەدەراتسياسى ۇسىنعان پرەزيدەنتتىككە كانديدات امانگەلدى تاسپيحوۆتىڭ سەنىم بىلدىرىلگەن ادامدارى تاريحي شاھار – تۇركىستانداعى «يگىلىك اتا» مەشىتىندە كاسىپوداق ارداگەرلەرىمەن جانە جاماعاتپەن كەزدەسۋ وتكىزدى. وندا ۇزىن-ىرعاسى 100 ادام باس قوستى. جيىندا كانديداتتىڭ تۇركىستان وبلىسى جانە شىمكەنت قالاسى بويىنشا قوعامدىق شتابىنىڭ باسشىسى بەرىك بەكجانوۆ سايلاۋ ناۋقانىنىڭ ماڭىزدىلىعىنا توقتالىپ, ازاماتتاردى ساياسي دودادا ءوز تاڭداۋىن جاساۋعا شاقىردى. ا.تاسپيحوۆتىڭ تۇعىرناماسىن تانىستىرىپ شىعىپ, ونداعى ەڭبەك ادامىنىڭ قۇقىقتارى مەن مۇددەسى جان-جاقتى تالقىلانعان تارماقتاردى تارقاتىپ ايتتى.
ال كانديداتقا قولداۋ كورسەتىپ جۇرگەن بەلسەندى جاستار تۇركىستانداعى ا.ياساۋي كەسەنەسىنە زيارات ەتە كەلگەن ازاماتتارعا, سونداي-اق ورتالىق ساياباق, «رامىزدەر الاڭى» اللەياسى, ورتالىق بازار سياقتى حالىق كوپ شوعىرلانعان ورىندارعا بارىپ, ۇمىتكەردىڭ سايلاۋالدى باعدارلاماسىمەن تانىستىردى.
شىمكەنت قالاسىنداعى اسانباي اسقاروۆ اتىمەن اتالاتىن ساياباقتا «لتد-تۇرمىس» جشس جۇمىسشىلارىمەن كەزدەسۋ ءوتتى. 200 ادام قاتىسقان ءىس-شارادا ب.بەكجانوۆ كوپشىلىكتى سايلاۋعا اسا جاۋاپكەرشىلىكپەن قاراپ, داۋىس بەرۋگە ۇندەدى. ۇمىتكەردىڭ تۇعىرناماسىمەن تانىستىرعان شتاب باسشىسى ا.تاسپيحوۆتىڭ باستى ۇستانىمى قاراپايىم ەڭبەك ادامىنا جاسالۋى ءتيىس قامقورلىق ەكەنىن اتاپ ءوتتى. جيىندا ءسوز العان قۇرىلىس كەشەنى جəنە تكش قىزمەتكەرلەرى كəسىپوداعىنىڭ توراعاسى ابدۋرايرا ماناحوۆ ەلىمىزگە, حالىققا ايانباي قىزمەت ەتەتىن كانديداتتى تاڭداۋ ءəربىر قازاقستان ازاماتىنىڭ بورىشى ەكەنىن اتاپ كورسەتتى. كوكەيدە جۇرگەن ساۋالدارىن قويىپ, وعان تۇششىمدى جاۋاپ العان جۇمىسشىلار ەلەۋلى ساياسي دوداعا بەيجاي قارامايتىندىقتارىن جەتكىزدى.
* * *
قازاقستان كوممۋنيستىك حالىق پارتياسى اتىنان پرەزيدەنتتىككە كانديدات رەتىندە تىركەلگەن جامبىل احمەتبەكوۆ كەشە قىزىلوردا وبلىسىنا اتباسىن بۇرىپ, تالسۋات اۋىلىنداعى «تالسۋات» وڭالتۋ ورتالىعىندا قىزمەتكەرلەرمەن, ەمدەلۋشىلەرمەن جانە زەينەتكەرلەرمەن كەزدەستى. ورتالىق باسشىسى قوناقتارعا مەكەمە ءوزىنىڭ ءتيىمدى ەمدەۋ ادىسىمەن تانىمال ەكەنىن, زاماناۋي تەحنيكالارمەن جابدىقتالعانىن مالىمدەدى. كانديدات ەم-دوم ورتالىعىنىڭ جۇمىسىمەن تانىسىپ شىعىپ, ءوزىنىڭ سايلاۋالدى تۇعىرناماسىن كەڭىنەن اشىپ كورسەتتى. ول ءبىزدىڭ قوعامعا باتىس مادەنيەتىنىڭ كەرى اسەرىنە ەرەكشە توقتالىپ, قىلمىسكەر وليگارحتاردىڭ ەلگە قايتارىلۋىن جانە سوتقا تارتىلۋىن تالاپ ەتەتىنىن مالىمدەدى. سونداي-اق ۇمىتكەر پارتيا جانە ونىڭ ءماجىلىستەگى فراكتسياسى ساياساتتىڭ بەل ورتاسىندا ءجۇرىپ, ەڭبەك ادامى, ونىڭ ءومىرى, زياتكەرلىگى, مادەنيەتى مەن سالاماتتىلىعى, ەل مەن قوعامعا قىزمەت ەتۋگە دەگەن ۇمتىلىسى بولۋىن تالاپ ەتۋدى جالعاستىراتىنىن اتاپ ءوتتى. ودان كەيىن ۇلتتىق ساياسات, جاستاردىڭ پاتريوتتىق تاربيەسى, زەينەتاقى, ەڭبەك ارداگەرلەرى مەن مۇگەدەكتەرگە الەۋمەتتىك قولداۋ شارالارىن ۇسىنۋ ماسەلەلەرى دە تالقىلاندى.
كەزدەسۋ سوڭىندا كانديدات قاتىسۋشىلارعا العىس ءبىلدىرىپ, ەمدەلۋشىلەرگە زور دەنساۋلىق پەن ساتتىلىك تىلەدى. قىزىلوردا وبلىستىق سايلاۋالدى شتابىنىڭ جەتەكشىسى تالعات تەلەۋباەۆ پارتيا ادام ءومىرىنىڭ ساپاسىن ارتتىرۋ بويىنشا مەملەكەتتىك ساياساتتىڭ ىسكە اسىرىپ جاتقان ستراتەگيالىق باسىمدىقتارىن قولدايتىنىن جانە مەديتسينا سالاسى قىزمەتكەرلەرىمەن قاتار حالىق سالاۋاتى ءۇشىن ەڭبەك ەتۋدى بورىش سانايتىنىن اتاپ ءوتتى.
بۇل ءىس-شارادان ءبىر كۇن بۇرىن ت.تەلەۋباەۆ شتاب وكىلدەرىمەن بىرگە وبلىستىق مەديتسينا ورتالىعىنىڭ قىزمەتكەرلەرىمەن كەزدەسىپ, پارتيانىڭ جۇمىسشىلار مۇددەسىن مەملەكەتتىك دەڭگەيدە قورعايتىنىن ايتقان ەدى. سونىڭ ىشىندە اق حالاتتىلاردىڭ ءال-اۋقاتىن كوتەرۋ ماسەلەلەرىن ەرەكشە اتاپ ءوتتى.
* * *
Nur Otan پارتياسىنان پرەزيدەنتتىككە كانديدات قاسىم-جومارت توقاەۆتىڭ رەسپۋبليكالىق قوعامدىق شتابىنىڭ مۇشەلەرى باي تاريحى بار, قارقىندى دامىپ كەلە جاتقان اتىراۋ وبلىسىنا باردى. العاشقى كەزدەسۋ اتىراۋ قالاسىنداعى ماحامبەت وتەمىس ۇلى اتىنداعى قازاق دراما تەاترىندا ءوتتى. كەزدەسۋدە قالا حالقى وزدەرىن تولعاندىرىپ جۇرگەن باستى ماسەلەلەر, ونىڭ ىشىندە تۇرعىنداردى الەۋمەتتىك قولداۋعا قاتىستى اقپاراتتار الدى. شتاب مۇشەلەرى اتالعان ماسەلەنىڭ ق.توقاەۆتىڭ باعدارلاماسىندا نەگىزگى باسىمدىققا يە ەكەنىن جەتكىزدى. باعدارلامادا الەۋمەتتىك سالانى دامىتۋعا قوسىمشا 2 ترلن تەڭگەدەن اسا قارجى ءبولۋ ۇسىنىلىپ وتىر. سونىمەن قاتار از قامتىلعان, كوپ بالالى وتباسىلار ءۇشىن 40 مىڭنان استام جالدامالى پاتەر سالۋ كوزدەلگەن. «ق.توقاەۆتىڭ سايلاۋالدى باعدارلاماسىندا كوپ بالالى انالارعا, مۇمكىندىگى شەكتەۋلى, بارلىق ساناتتاعى مۇقتاج ادامدارعا مەملەكەت تاراپىنان تولىققاندى كومەك كورسەتۋ جوسپارلانىپ وتىر. ال ەڭبەك ەتۋگە قابىلەتتى تۇرعىنداردىڭ بارلىعى جۇمىسپەن قامتىلىپ, ەڭبەگىنە لايىق جالاقى الۋى ءتيىس دەلىنگەن», دەدى شتاب جەتەكشىسى م.اشىمباەۆ.
كانديداتتىڭ سايلاۋالدى باعدارلاماسىنىڭ «الەۋمەتتىك قورعاۋدىڭ ءتيىمدى جۇيەسى» دەپ اتالاتىن تاراۋىندا «از قامتىلعان جانە كوپ بالالى وتباسىلارعا, مۇمكىندىگى شەكتەۋلى ادامدارعا, بارلىق ساناتتاعى مۇقتاج ادامدارعا بەرىلەتىن الەۋمەتتىك كومەكتىڭ اۋقىمىن كەڭەيتەمىز. اتاۋلى الەۋمەتتىك كومەكتىڭ اشىقتىعىن جانە ماقساتتىلىعىن ارتتىرىپ, ونى الۋ ۋاقىتىن قىسقارتامىز. مۇمكىندىگى شەكتەۋلى ادامدارعا الەۋمەتتىك كومەكتىڭ قولجەتىمدى بولۋىن قامتاماسىز ەتىپ, ونىڭ ساپاسىن ارتتىرامىز. زەينەتاقى رەفورماسىن جالعاستىرىپ, زەينەتكەرلەرىمىزدىڭ ءومىر ءسۇرۋ ساپاسىن جاقسارتامىز», دەپ كورسەتىلگەن.
«ۇلت تاعدىرى» ۇلتتىق-پاتريوتتىق قوزعالىسىنان پرەزيدەنتتىككە كانديدات ءامىرجان قوسانوۆ ەلوردادا ورنالاسقان رەسپۋبليكالىق شتاب كەڭسەسىندە جەلتوقسان وقيعاسىنىڭ قاتىسۋشىلارىمەن كەزدەستى. كانديدات پەن ونىڭ سەنىم بىلدىرىلگەن ادامدارى كەزدەسۋ كەزىندە سايلاۋالدى تۇعىرنامانىڭ نەگىزگى باعىتتارىن اتاپ ءوتىپ, قوناقتار قۇجاتتى تولىقتىرۋعا قاتىستى ءوز يدەيالارىمەن ءبولىستى. جەلتوقسانشىلارمەن كەزدەسۋدە كانديدات ءا.قوسانوۆ ءوزىنىڭ جۋىق اراداعى جوسپارلارىمەن ءبولىستى, شتاب جۇمىسى جونىندە ايتتى, ورتاق قوعامدىق ماسەلەلەردى تالقىلادى. كانديدات جيىنعا كەلگەن جەلتوقسانشىلاردىڭ قولداۋىنا يە بولدى.
ال كانديداتتىڭ قوعامدىق شتابىنىڭ جەتەكشىسى داۋرەن بابامۇراتوۆ سايلاۋ زاڭناماسىنا قاتىستى قيىندىقتارعا ۇشىراپ قالماس ءۇشىن, ازاماتتاردىڭ قولداۋىن ءبىلدىرۋ جولدارىنا قاتىستى بەينەۇندەۋ جاريالادى. وندا «ۇگىت-ناسيحات ماتەريالدارىنىڭ دايىندالۋى زاڭمەن قاتاڭ رەتتەلگەن. ءدال سول ۋاقىتتا الەۋمەتتىك جەلىلەردە ءارتۇرلى «مەمدەر», پلاكاتتار جانە باسقا كانديداتتاردىڭ ار-نامىسىنا تيەتىن ماتەريالدار جاسالىپ, ولار شىنايى ومىردە ءار جەرگە جاپسىرىلا باستاعان. بۇل جاعدايدىڭ بىزگە زيانى ءتيۋى ابدەن مۇمكىن, سەبەبى زاڭعا قايشى كەلەتىن تۇستارى بار. ءدال وسىنداي جاعداي رۇقسات ەتىلمەگەن شەرۋلەرگە دە قاتىستى. قالىپتاسقان جاعدايدا زاڭسىز بولىپ تابىلاتىن ارەكەتتەردى الەۋمەتتىك جەلى بەتتەرىنەن ءوشىرۋدى, نە وزگەرتۋدى سۇراۋىمىز مۇمكىن», دەلىنگەن.
سونىمەن قاتار كانديداتتىڭ باتىس قازاقستان وبلىسىنداعى قوعامدىق شتابىنىڭ وكىلدەرى حالىقتىڭ ماسەلەلەرىن تالقىلاۋ ءۇشىن تۇرعىنداردى قابىلدادى. سەنىم ءبىلدىرىلگەن ادامدار ءۇمىتكەردىڭ ۇستانىمدارىمەن جانە سايلاۋالدى باعدارلاماسىنىڭ نەگىزگى باعىتتارىمەن تانىستىرىپ, قاراپايىم ازاماتتاردىڭ پىكىرىن ءبىلدى. جينالعانداردى الداعى سايلاۋعا بەلسەندى قاتىسۋعا شاقىردى.
* * *
« ۇلى دالا قىراندارى» رەسپۋبليكالىق قوزعالىسى اتىنان سايلاۋعا ءتۇسىپ جاتقان سادىبەك تۇگەل الماتىدا توعىزقۇمالاقتان وتكەن تۋرنيرگە قاتىستى. سايىستى كانديداتتىڭ سول قالاداعى سايلاۋالدى شتابى ۇيىمداستىردى. دوداعا توعىزقۇمالاقتان الماتى قالالىق فەدەراتسياسىنىڭ پرەزيدەنتى ەركەبۇلان حالەلوۆ قاتىستى.
«قازاقستاندا توعىزقۇمالاق جاقسى دامىعان, قازىر 20-30 مەملەكەتكە كەڭىنەن تاراعان. ءبىزدىڭ ەلىمىزدىڭ كومانداسى وتە جوعارى جەتىستىكتەرگە جەتىپ ءجۇر. ءوزىم باس بولىپ الماتىداعى ارباتتا بىلتىر جاز بويى توعىزقۇمالاقتى ۇيرەنگىسى كەلەتىندەرگە تەگىن ۇيرەتتىك. بۇل جاس ۇرپاقتىڭ وي-ءورىسىن دامىتۋعا ارنالعان ويىن ءتۇرى بولعاندىقتان, تەك رەسمي عانا ەمەس, بۇقارالىق سيپاتقا يە بولسا دەيمىن. وسى باعىتتا ۇلتتىق ويىن تۇرلەرىنە باسا كوڭىل ءبولىپ وتىرعان س.تۇگەلدىڭ سايلاۋالدى باعدارلاماسىنداعى ۇلتتىق قۇندىلىقتاردى جاس بۋىن بويىنا دارىتىپ, ولاردى ۇلتجاندىلىققا تاربيەلەۋ دەگەن ۇستانىمدارى كوڭىلىمە قونادى», دەدى ە.حالەلوۆ.
تۋرنيرگە قاتىسۋشىلارمەن بىرگە قوعام قايراتكەرى, جازۋشى س.تۇگەلدىڭ ءوزى دە توعىزقۇمالاق ويناپ, جاستاردى جەڭىسكە جىگەرلەندىردى. ول توعىزقۇمالاقپەن جاس بۋىن مەكتەپ قابىرعاسىندا اينالىسىپ, بۇقارالىق ويىن ءتۇرىنە اينالۋىنا « ۇلى دالا قىراندارى» رەسپۋبليكالىق قوزعالىسى ايرىقشا نازار اۋداراتىنىن جەتكىزدى. ءال-فارابي اتىنداعى قازۇۋ-ءدىڭ تۋرنيرگە قاتىسقان ستۋدەنتتەرى سارا جەتكەرگەن, ارۋجان نارتاي, گۇلبانۋ ماديار جانە الماتى حالىقارالىق سەرۆيس جانە مەنەدجمەنت كوللەدجىنىڭ ستۋدەنتتەرى داۆيد ۆاسيلەنكو, ءالجان جۇبانعاليەۆ, الماتى اقپارات تەحنيكالىق كوللەدجىنىڭ ستۋدەنتى دانيل زاحاروۆتار ۇزدىك ويىن ۇلگىسىن كورسەتتى. رەسمي دەرەكتەر بويىنشا ەلىمىزدە توعىزقۇمالاقپەن اينالىساتىندار سانى 200 مىڭنان اسسا, ولاردىڭ شامامەن 9 مىڭى – كاسىبي سپورتشىلار, 190 مىڭى – مەكتەپ جاسىنداعى بالالار.
دايىنداعان ورىنبەك وتەمۇرات,
«Egemen Qazaqstan»
