تۇركياعا قايتىپ كەلىسىمەن پىكىرلەرىمدى سول كەزەڭنىڭ پرەمەر-ءمينيسترى ت. وزالعا دا, مينيسترلەر كەڭەسىنە دە, قوعامعا دا جەتكىزدىم. ت. ءوزال «كسرو-عا بارامىز, ءتورت كۇنىم بار, ەكى كۇن رەسەيدە بولامىن, ەكى كۇنىن سەنىڭ رەسپۋبليكالارىڭا (سول كەزدە سولاي دەگەن ەدى) بولەمىن, (تۇركى رەسپۋبليكالاردىڭ ىشىنەن) ەكەۋىن تاڭدا», دەدى. اۋەلى «بارىنە بارۋىڭىز كەرەك» دەپ قارسىلىق كورسەتتىم. «ۋاقىتىم جوق» دەگەن سوڭ «قازاقستان مەن ازەربايجان» دەدىم. ازەربايجاندى ءبىر اڭگىمەسىندە «ولار شيت, ءبىز ءسۇننيتپىز» دەپ رەنجىتىپ العان ەدى. سوندىقتان, بارىپ كوڭىلىن تابۋ كەرەك بولدى. باردىق, شىنىمەن دە باۋىرلاستىق سەزىم باستاۋ الدى. قازاقستاننىڭ ماڭىزىن ءتۇسىندىردىم. ول دا ن.نازارباەۆتىڭ قادىرىن جاقسى ءتۇسىندى.
سودان كەيىنگى جىلدارى ءجيى-ءجيى قازاقستانعا بارىپ تۇردىم. ن.نازارباەۆپەن دە كوپ كەزدەستىم. ونىڭ حالىققا نەمەسە تەلەديدار كورەرمەندەرىنە ءسوز سويلەۋلەرىن كوردىم. العاش كەزدەسۋىمىزدەگى وڭدى كوزقاراسىم جىل وتكەن سايىن ارتا ءتۇستى. ن.نازارباەۆتىڭ باسشىلىعىندا قازاقستان تەك ازيانىڭ عانا ەمەس, دۇنيە ءجۇزىنىڭ جارقىراعان جۇلدىزىنا اينالدى. بۇگىن كۇللى جەر ءجۇزى ونى مويىندايدى.
تۇركىستان قالاسىندا احمەت ياساۋي ۋنيۆەرسيتەتىنىڭ نۇرسۇلتان ءابىش ۇلىنىڭ باستاماسىمەن قۇرىلۋىنىڭ ءوزى ونىڭ تۇركى الەمىنىڭ تاريحي تامىرلارىن تەرەڭ بىلەتىنىن كورسەتتى. احمەت ياساۋي ۋنيۆەرسيتەتىنىڭ اتاۋى «قوجا احمەت ياساۋي اتىنداعى حالىقارالىق قازاق-تۇرىك ۋنيۆەرسيتەتى» بولىپ وزگەرتىلگەن سوڭ, سوندا جۇرگىزگەن ون ءتورت جىلدىق جۇمىسىمدا قاشاندا ن.نازارباەۆتان قولداۋ كورىپ وتىردىم.
بۇگىنگى تاڭدا تۇركىستان قالاسىنىڭ وڭتۇستىك قازاقستاننىڭ وبلىس ورتالىعى بولىپ, ال وبلىس اتاۋىنىڭ تۇركىستان بولىپ وزگەرتىلۋى مەن ءۇشىن ءالى دە ءتۇس سياقتى. وسى تۇرعىدان ەلباسىنىڭ الدىندا باس ءيىپ قۇرمەتىمدى بىلدىرەمىن. مۇنداي ىستەردى تەك دانىشپان كوشباسشىلار عانا جاساي الادى. كىشكەنتاي اقمولا كەنتىن استاناداي دۇنيە ءجۇزىنىڭ ەڭ ادەمى قالاسىنا اينالدىرۋ ءۇشىن دە نۇرسۇلتان نازارباەۆ سىندى ۇلى تۇلعا بولۋ كەرەك ەدى, سولاي بولدى دا.
ن.نازارباەۆ تاعى دا تاڭعالدىردى. ەشكىم كۇتپەگەن قادام جاسادى. جەر ءجۇزىنىڭ جارقىراعان جۇلدىزى قازاقستاندى بولاشاققا ودان دا جارقىن ەل رەتىندە جەتەلەۋ ءۇشىن پرەزيدەنتتىك لاۋازىمىنان باس تارتتى.
سەنات توراعاسى قاسىم-جومارت توقاەۆ وسى لاۋازىم ءۇشىن دۇرىس تاڭدالعان تۇلعا. ءىشكى جانە سىرتقى ساياساتتاعى ءتاجىريبەلەرىمەن, زيالىلىعىمەن, سىيلى ادال بولمىسىمەن كوپشىلىككە تانىمال. توقاەۆتىڭ نازارباەۆتىڭ جانىندا وسكەندىگى, كوپ جىلدان بەرى بىرگە جۇمىس ىستەگەندىگى دە قازاقستاننىڭ باعى. بۇرىننان بەرى ايتىپ كەلە جاتقانىم: نۇرسۇلتان اعامىز تەك قازاقستاننىڭ پرەزيدەنتى عانا ەمەس, تۇركى الەمىنىڭ دە قۇرمەت تۇتقان باسشىسى. ەندىگى كەزەكتە كۇندەلىكتى شارۋالاردىڭ جۇگىنەن بوساپ, كۇشى مەن ۋاقىتىن وسى ماسەلەگە دە باعىتتايدى دەپ ويلايمىن. ناحچىۆاندا باس قوسقان تۇركى تىلدەس مەملەكەتتەر باسشىلارىنىڭ سامميتىندە نازارباەۆتىڭ دەم بەرۋىمەن قۇرىلعان تۇركى كەڭەسىن العا جەتەلەۋ ءۇشىن دە وسى ۇلكەن قادامدى جاساۋعا سەبەپكەر بولعان تۇلعانىڭ قامقورلىعى جالعاسادى, ونىڭ ىقىلاسى ءناتيجەسىز قالمايدى دەپ سەنەمىن.
الەمدىك دىندەر سەزى دە ن.نازارباەۆتىڭ ادامزات ءۇشىن جاساعان ۇلكەن ىستەرىنىڭ ءبىرى. دىندەردى ادامزاتتى بولەتىن ەمەس, بىرىكتىرەتىن قۇرىلىمدار جاعدايىنا جەتكىزۋ ءۇشىن بۇل جۇمىستىڭ دا ماڭىزى وراسان زور.
وسىعان ۇقساس جۇمىستار ءۇشىن دە ۋاقىت بولەتىن ن.نازارباەۆتى تەك تۇركى الەمىنىڭ عانا ەمەس, جالپى ادامزاتتى بەيبىت ءومىر سۇرۋگە جەتەلەيتىن كوشباسشى دەپ ويلايمىن.
نامىك كەمال زەيبەك,
تۇركيانىڭ بۇرىنعى مادەنيەت ءمينيسترى
